نصايح لاصحاب المواقع واللي بيكتبوا محتوى مواقع الكترونية
من معاناتي في ضبط محتوى المواقع للتوافق مع محركات البحث او ما يسمى ب #SEO
من اهم اساسيات ال SEO هو الاهتمام بمحتوى موقعك يعني اية الكلام ده ؟
يعني جوجل عشان يخلي حضرتك تظهر في محرك البحث بتاعه في النتايج الاولانيه له شروط من ضمن الشروط دي او ممكن نقول اهمها هو الاهتمام بالمحتوى بتاع موقعك وده له قواعد هنقول شوية منها النهاردة طبعا في بعض الملاحظات الناس ما بتاخدش بالها منها هنذكره في المقالة دي
وزي ما بيقولوا Content is a king المحتوى هو الملك فالمحتوى هو الاساس اللي بيتبني عليه بعد كدة شغل ال seo و شغل ال social media
- طبعا لازم يكون محتوى حضرتك مش منقول او مقتبس او ملطوش ايا كان المسمى من اي مكان تاني حاول تخلي المحتوى بتاعك حصري
- المحتوى كل ما كان مفيد للقاريء و مهم و بيقدم شيء في دايرة اهتمامة هيحبه ومش بعيد يشيره ويعملك دعاية ببلاش يعني مثلا ما تجيش على موقع للمرأة و تتكلم عن الكورة التخصص حلو برضو او لو عندك قسم على الموقع بتاعك بيتكلم عن الكورة مافيش مشكلة المهم يبقى لكل مقام مقال المقال الصح في القسم الصح بلاش الخلطابيطة دي
- قبل ما تكتب مقالة اعرف الناس بتدور على اية ووفرهولها يعني مثلا في
خاصية جوجل موفراها اسمها جوجل تريندز
Google Trends
دي بتقدر من خلالها تعرف الاتجاه العام رايح لأي مواضيع هتعرف الناس مهتمة الفترة دي بأي مواضيع لو مناسبة لموقعك اكتب عن المواضيع دي
- وانت بتكتب المقالة الله يكرمك بلاش تكتب موضوع تعبير في عنوان الموضوع يعني خليها عليك شوية واكتب 70 حرف بس
- وانت بقى بتكتب الموضوع بما فيه العنوان بالوصف بالحاجات اللطيفة دي بلاش تلزق علامات التنصيص في الكلام خاصة لما تكون كلمات عليها نسبة بحث عالية يعني مثلا ما الاقيش حضرتك كاتب عنوان زي كدة
مقال (باسم يوسف) مسروق من كاتب صهيوني
ممكن تكتب مقال باسم يوسف مسروق من كاتب صهيوني
شوفت سهلة ازاي لأن كلمة باسم يوسف عليها نسبة بحث عالية في مصر
- المقالة اكيد هتركز على موضوع معين الموضوع ده اكيد الناس بتدور عليه بكلمات معينه حاول تختار الكلمات دي بطريقة احترافيه ازاي يعني تختار الكلمات الاعلى في البحث جوجل بردو بيوفرلنا اداة تانية اسمها keyword planner هتلاقيها في google adwords الاداة دي بتقولك نسبة البحث https://adwords.google.com/ko/KeywordPlanner
والمنافسة على الكلمات اللي بتستخدمها قد اية وخلي بالك من الفروق البسيطة زي مثلا كلمة وظائف خالية و وظائف خاليه / فيس بوك و فيسبوك - ممكن تبقى الكلمة واحدة بس بتختلف في حرف ، نقطة ، همزة حاول تختار الاعلى في البحث والاقل في المنافسة والمناسبة لموضوعك
- و انت بتكتب الجمل راعي المسافة بين (و , ، - ) يعني مثلا ممكن تكتب تسويق وتسويق الكتروني شايف الواو لازقة ازاي في كلمة تسويق الكتروني اهي دي من الحاجات الغلط وناس كتير ما بتاخدش بالها منها
- حاول تخلي الموضوع مابين 300 ل 700 كلمة بلاش كلمتين وتجري
- لما تستخدم صورة في الموضوع معلش عشان خاطري اكتب عنوان ووصف للصورة عشان تطلع في صور جوجل اسرع
- اهتم بترتيب الموضوع وانه يكون فيه تنسيق يعني العناوين الرئيسية والفرعية بينها كدة واعملها تقيلة ما تاخافش الحبر مش هيخلص
- نوع في المحتوى بتاعك مابين صورة وفيديو و كلام
- اهتم بالميتا تاجز بتاعة الموضوع ميتا العنوان والوصف والكلمات المفتاحية لأن دي اللي بتظهر في محرك البحث حاول تخلي العنوان جذاب والوصف يشد القاريء انه يدخل يقرأ الموضوع بتاعك
- لو كنت كاتب موضوع شبهة قبل كدة او له علاقة بالموضوع على نفس الموقع معلش اتعب نفسك واربط بينهم برابط داخلي
- لما تنشر الموضوع على الموقع اعمله شير على جوجل بلس لأن جوجل بيحب منتجاته وبيفضلها على اي منتجات تانية وبيعطي اولوية ليها فوجودك على جوجل بلس مهم من حيث محركات البحث اكتر منها ترافيك للموقع وماتنساش تستخدم الكلمات المفتاحية اللي عايز تركز عليها
يعني دي شوية نصايح كدة ياريت تاخد بالك منهم عشان في ناس وراك بتتعب في التسويق بسبب الحاجات البسيطة دي
و خليك فاكر دايما ان اقصر طريق الى قلب جوجل هو المحتوى الجيد
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف
نصائح لأصحاب المواقع و المنتديات و محتوى مواضيعهم
العرض الشجري