رواية صيته ظبي النفود بقلم نبض أفكاري

بعد عشر سنوات
عام الفين وسته
اهم المستجدات
وليد وصيته عندهم ثلاثه ابناء حمدان عمره تسع سنوات ابراهيم عمره خمس سنوات غيداء سنتين
راكان تزوج ساره بنت عمته قمراء زي ماتمنت امها
راشد صديق ابراهيم ووليد تزوج انوار
مصعب تزوج من بنات عمه الي عايشات في الجنوب
النايفه ماجابت اعيال ووجود مطلق ولد علي
اشبع شوي من احساس الامومه عندها
الباقين حياتهم مستمره على طبيعتها
عناد عمره ثمانية عشر عام زياد سبعة عشر عام وكم شهر
خلصو الثانويه وناوين يدخلون كلية الملك عبد العزيز الحربيه

في بيت اول مره نزوره

عائله ممتده مكونه من سته اشقاء وسبع شقيقات
وجمع كبير من الابناء والبنات هم ابناء هاؤلا الاشقاء
العائله الكبيره جايه من الشرقيه علشان يحضرون
تمايم ولد اصغر الاشقاء والي عمره ثلاثين سنه
ويعمل في القوات الخاصه اما باقي الاشقاء
اغلبهم موضفون في ارامكو بمناصب كبيره
اما ابناء الاشقاء تنوعت مهنهم من تجاره
الى عسكريه الى تدريس
عقيد العائله غانم كنيته ابومصلح
الرجال متواجدون في المجلس الواسع
ابومصلح : ياعيال افرشو لنا في الحوش اكتمتنا هالجدران الي صاكه علينا من كل جهه
صاحب المنزل سعود :ابشر ياشباب ابسطو الزل في الحوش

وهو يتكلم شاف اثنين من ابناء اخوانه متجهين لباب
الشارع بيطلعون
:نواف فيصل وين بتروحون
نواف : يبغون عود وبخور علشان الحفله وبنروح لسوق
نجيبها

سعود : لاتبطون

فيصل : بناخذ كم لفه في شوارع الرياض بعد السوق

عند وليد وصيته في السياره توهم موقفين عند بيت
حمود
وليد : الي بيوديك السوق من
صيته : بحط غيداء عند امي واروح مع السواق
وليد : اسف حياتي كان ودي انا الي اوديك بس تعرفين
ماجد توه راجع من سفرة شغل ومسوين له عشاء في الاستراحه
صيته : والايهمك حبي رح وسع صدرك واستانس مع اخوياك السواق موجود خل نستفيد منه
وليد : ابراهيم بتروح معي والاتجلس عند خوالك
حمدان : لامهوب على كيفه يقعد
ابراهيم : انت مالك دخل ابوي يسئلني
حمدان : لمى تتكلم معي عدل السانك
صيته : وليه مايقعد
حمدان : خله يروح لرياجيل ويسترجل بدل العلب مع البنيات
وليد :هههههههههه
ابراهيم : مالعبت الا مع شذى بنت خالي محمد خل عنك الخرابيط
صيته اخذت بنتها ونزلت من السياره وحمدان
نزل من ورى وركب جنب ابوه
وليد : ابراهيم ترى عمك سلمان ينشد عنك ويقول لازم تجيبه معك
ابراهيم استانس : اذا عمي سلمان اهناك خلاص بروح معكم
حمدان ابتسم بسخريه لان السياره قيدها مشت وذا باقي
يعطي رايه

صيته نزلت غيداء عند غزيل وراحت لسوق
اول مادخلت السوق فكرة انها تبدا بالعود والبخور
لان محل العطور اقرب شي للبوابه وبعده بتدور
ملابس لحفلة زياد واعناد
اول مادخلت المحل تصلبت مكانها بصدمه حقيقيه
وتوسعت عيونها على كبرها عناد ياالله هذا عناد
نسخ ولصق

صاحب المحل لنواف وفيصل الي طلبو منه بخور
تبون بخور ملابس والابخور بيت
نواف : وحنا وش درانا يبون بخور ملابس والابيت
فيصل : خلاص ناخذ القارورتين وبس
جاهم صوت نسائي جهوري فخم : مافيه شي اسمه
بخور ملابس وبخور بيت البخور واحد وتبخر فيه الي تبي
نواف وفيصل التفتو على صيته ثم التفتو على صاحب
المحل بعصبيه
فيصل : تلعب علينا
صاحب المحل : هي الي تلعب عليكم وانا اعرف البخور وانواعه لاني الي اصنعه
نواف : اقول هات وحده من القوارير واخلص علينا

صيته شافت فيصل لمى التفت عليها وتاكدت من الشبه
بينه وبين عناد نفس الملامح مابينهم فرق الى في الجسم
مع ان ذا شكله اكبر من عناد الا ان عناد اطول منه ومعضل لانه هو وزياد يلعبون رياضه واجسامهم معضله
وهذا الشبه المنسوخ نسخ معناته ان هالشاب الي قدامي
من اهل عناد

انتضرتهم لحد ماطلوعو من المحل واستوقفتم
: لحضه لو سمحتو

وقفو فيصل ونواف واهم مستغربين وش تبي منهم
نواف : نعم

صيته : انا مشبهه عليكم وابي اتاكد تعرفون واحد
اسمه عبدالله بن عبد الرحمن بن عقاب ال عواد

التفتو نواف وفيصل على بعض بصدمه
فيصل : ايه نعرفه هذى عمي بس متوفي الله يرحمه
صيته : له اخوان عايشين
نواف : ايه اخوانه كلهم عايشين وكلهم مجتمعين
الحين في بيت اصغر عماني قريب من هنا
صيته : اذا ماعندكم مانع خذوني لهم لازم اتكلم مع
عقيدكم في موضوع ضروري
نواف : ووش هالموضوع
صيته : ماراح اتكلم فيه الامع عقيدكم
فيصل : اذا معك سياره بنمشي الحين والحقينا
صيته : ايه سيارتي معي بس خلو السواق يشوف
سيارتكم قبل تمشون
اطلعو نواف وفيصل وصيته وراهم
اركبو سيارتهم ومشو واشرو لسواق صيته يلحقهم

صيته طلعت جوالها ادق على ابوي يجي بس لا
اخاف ينصدم واهو حده متعلق بعناد انا لازم
اعرف اول شي وش سالفتهم وليش مادورو
اعناد طوال هالمده وهل هم كفو انهم يكونون اهل لعناد
او لا

داخل سيارة نواف وفيصل
فيصل : تتوقع الحرمه ذي من وين تعرف عمي
نواف : وانا وش دراني معقوله يكون متزوج حرمه ثانيه
وحنا ماندري
فيصل : او يمكن السالفه فيها وصيه اوشي زي كذا

نواف : مدري بس الغريب ان الحرمه شكلها صغيره
يعني مستحيل تكون زوجه لعمي

فيصل : وليه ماتكون بنته والا كيف اعرفت اني اشبه له
ماسمعتها تقول مشبهه عليكم يعني اعرفتنا من الشبه

نواف : لا مستحيل يكون عنده اعيال وابوي وابوك مايدرون

صيته شافت سيارة الشباب توقف قدام فيلا متوسطه
الحجم بابها مفتوح وفيه اعيال وبنات اصغار يلعبون
قدام الباب وعندهم زحمة سيارات
انزلو الشباب وشافتهم يدخلون الصغار الي في الشارع
سمت بالله واستودعت الله نفسها وانزلت
الشباب انتظروها لحد ماقربت منهم وادخلو وقالو لها
تدخل
ادخلت صيته وراهم ماتدري كيف تهورت وادخلت
بيت ناس غرب لاكن الحقيقه الي تنتظرها كانت
اقوى من كل المبررات واحتياطات السلامه عندها
شافت الحوش مفروش زل وعليه قبيله من الرجال
هل يعقل ان يكون عند عناد كل هالاهل والاواحد
فيهم طلع فيه خير وحن لدمه والحمه الي صارله
عمر بعيد عنهم اكيد وراهم مصيبه هالعالم
والاماكان خلو ولدهم من غير مايدورونه الوقت هذا كله

سعود فز واقف يوم شاف حرمه تدخل بيته
توجه لها واهو يأشر على مدخل الحريم
: الحريم مناك
صيته : مالي في الحريم حاجه
وتعدته متوجه للفرشه وقفت على مسافة مترين من الفرشه
الي يجلس عليها الرجال
وبصوتها الجهوري
: السلام عليكم ورحمة الله وبركاته
ردو عليها السلام
وسعود حقد عليها يوم تعدته

فيصل : يبه هذي لقيناها في سوق تقول تبي تتكلم
مع عقيدنا وجبناها معنا

سعود : وانتي من وين تعرفينا

صيته شافت الشخص الي تكلم معه فيصل
وواضح انه اكبر الموجودين رجل يبدو انه تجاوز الستين
لحيته بيضاء ويبدو بصحه جيده رغم كبر سنه

تجاهلت سعود ووجهت كلامها لابو مصلح
انا جايه بنشدك
عن عبد الله بن عبد الرحمن بن عقاب يصير لك

ابومصلح اوجعته الذكرى وتجهم وجهه : عبدالله واحد من اخواني الله يغفرله ويرحمه
من وين عرفتيه

صيته : متى عرفتو بموته

ابومصلح : ميتن من اسنين طويله الله يغفر له

صيته : انا ادرى منك بموته انا انشدك انتم متى دريتو
بموته

عم الجالسين صدمه لاتوصف وبدو يتلفتون على بعض
وتعالت الاصوات
وش يعرفك بموته من انتي وش تبين واسئله كثيره
تداخلت وتنوعت

استعاد ابومصلح تماسكه وصرخ في الموجودين : صه
صه خلوني اسمع

: انتي من وين جايه وش تعرفين عن عبدالله

صيته : الي اعرفه محد يعرفه غيري وانا كنت
موجوده يوم وفاة عبدالله الله يرحمه وعندي منه علم
ماعلمك ابه لين تعلمني بالحقيقه كامله

سعود ارتفع ضغطه منها وصرخ : اذا عندك شي يخص
عبد الله بنعرفه غصبن من ورى خشمك

التفتت عليه صيته بغضب وكان هو الوحيد الواقف
من اهله الي كلهم جالسين على الزل
: اجل انا طالعه وورني كيف بتعرف غصب
واستدارت بتطلع على صرخة ابومصلح
:سعود اقطع واخس لاسمع حسك
وانتي تعالي هرجيني انا وماعليك من الباقين

اسعود انقهر من صرخت اخوه الكبير عليه
وسكت واهو حاقد على صيته

صيته ارجعت اوقفت مكانها
ابومصلح : وش الي تبين تعرفينه

صيته : اخوكم مات وماحوله احد منكم والانشدتو عنه بعد
موته واكيد ان ذا كله وراه سبب وانا ابي اعرف القصه
كامله ومن اولها

ابومصلح : ومن قال انا مانشدنا عنه
صيته : قلتلك عندي منه علم وتركت لكم وراي طريق
لونكم ناشدين عنه لقيتوني مير اختصر الهرج هذا كله
وعلمني بالحقيقه الي عندك واعلمك بالحقيقه الي عندي

ابومصلح هالبنت لابد ان وراها شي مانعرفه يمكن
عندها وصيه من عبدالله والاشي
وش فيها لاعلمتها بالقصه اخرتها سالفه قديمه صارت
وانتهت ماهي بنافعتها والاهي بضارتنا لاكن انا لازم
اعرف اخوي وشوهو موصن به
: اجل اسمعي ابوي الله يرحمه كان متزوج من ام عبدالله
وابطت عنده ماجابت اعيال ثم اخذ امي عليها
وحطهن في بيتن واحد والحريم قامت بينهن مشاكل
وصارن يبغضن بعض ودوم مشاكلهن ماتخلص
الله يغفر لهن جميع ويسامحن امي جابت ثلاثه
انا واثنين من اخواني ثم جابت ام عبدالله
عبد الله والاجابت بعده احد
وبعد كم سنه مات عمن لنا ماعنده الابتن وحده
بمرضن ماندري وشهو واخذه هو وامرته
وابوي اخذ بنت اخوها رباها
وبعد ماكبرنا زوجها اخوي عبدالله
وامي وام عبد الله مازالن على مشاكلهن وكرههن لبعض
لدرجة كل وحده منهن صارة تكره اعيال الثانيه
بعد يجي ثلاث سنين مات ابوي وام عبد الله في حادث
سياره وبعد وفاته رحنا حنا عشنا عند خوالنا في
الشرقيه حسب رغبة امي وعبدالله قعد في الدوادمي
بعد مانقلنا بكم شهر جاء عبدالله يزورنا
وازعلت امي ماتبيه يجينا بسب الي كان بينها وبين امه
وفي ذاك اليوم صاربينه وبين واحد من خواني هرج
وكلمه ورى كلمه تهاوشو وازعلت امي زود واحلفت
على كل اعيالها وبناتها انهم مايزورون عبدالله
في بيته والانستقبله في بيوتنا والانكلمه ولاننشد
عنه ونقطع كل علاقتنا فيه واحلفت ان غضبها
على الي يخالف كلامها وياصل عبدالله بعلمها
والامن دونه وانجبرنا نقطعه بسب احلوفها وتوعدها النا
وعبدالله كان موجود وسمع احلوفها ورجع لدوادمي
وقعدنا بعد هالسالفه يجي سنه ونصف كنا نحاول
فيها انا نسترضي امي وناخذ اذنها في انا نزور
عبدالله واهي مصمله على كلامها وكل ماطلبناها
كل مازادت احلوفها لين ماتت امي الله يرحمها
ويعفي عنها بعد وفاتها بشهر ارسلنا واحد منا
يدور عبدالله ويجيبه معه وراح اخوي عقاب
دوره في بيته الي حنا خابرينه مالقاه
وبعد النشده عرف مكان بيته الجديد
وراح دوره هناك وقالو له الجيران انه مات غريق
هو وحرمته في السيل ويوم عرفنا خبر وفاته
له متوفي يجي سته اشهر نشدنا الجيران عنه
قالو مايعرفون عنه شي الاانه مات هو وحرمته
غرقانين في السيل وقبل غرقهم ماكان له فيهم خلط
والايعرفون عنه شي

وهذى الحقيقه الي عندي وش عندك انتي

صيته : اخوك عنده اعيال
ابومصلح بثقه : لا ماله احد حرمته ماخلت من الطب شي
ووين ماراحت قالو انها ماتنجب

صيته : اجل اسمع الي عندي وخبرته بسالفة كشتتهم
وضياعها وكيف لقت عناد

يوم اعرفو ان عبدالله عنده ولد انصدمو وقامو يتلفتون
على بعض ماهم مصدقين الي يسمعونه

ابومصلح شهق : ابومصلح ابك انتي وش تقولين
عبدالله عنده ولد وحنا ماندري عنه

صيته : لونكم ناشدين شرطة الدوادمي كان دلوكم علينا
ابوي حتى بعد ماطلعنا من الدوادمي راح لهم وحط
عنوانه في الرياض وارقام تلفوناته عندهم

واحد من عمام عناد : وانتي وشلون عرفتي اعيالنا
في السوق

صيته اشرت على فيصل : عرفتهم من الشاب ذا
وجهه نسخه من وجه اخوي عناد

ابومصلح الي تأثر بالخبر حيل وبدى يمسح دموعه
الي ماقدر يسيطر عليها وبصوت مبحوح : هذا وجه
ابوي الله يرحمه ماخذه غير اخوي عبدالله وولدي
فيصل وهذا انتي تقولين ولد عبدالله مثله

سعود بأمر : دقي على ولد عبدالله خليه يجي
والانه حب ينرفزها كمل اوه نسيت انه مهوب ولدكم
اكيد ماعنده جوال ويمكن مخلينه سواق لكم

هنا صيته ماتت قهر عناد اخوها يحرمونه من الجوال
ويحطونه سواق عندهم
: والله انك تعقب يالخسيس

سعود : مايعقب غيرك ياحيوانه وتقلعي من بيتي قبل
اقلع عيونك من مكانها
ابومصلح صرخ بغضب :سعود انت الي تعقب وان اطلعت
من بيتك تراني قبلها ماتستحي تطرد بنت الي ضف ولد
اخوك ورباه
صيته تكلمت واهي رايحه يم الباب : كثر خيركم الي جاني
يسدني والاني بالي تقعد بعد طرده

سعود تحسف على كلامه هو باقي ماشاف ولد اخوه
ليش حكم انهم معذبينه ومعيشينه في مذله بس هالوقت
الناس يالله تحمل اعيالها بتفهمني انهم ربو ولد اخوي
من غير مقابل مستحيل
: اصبري يابنت انا اسف ماكان قصدي
صيته : انا ماشيه على كل حال
ابومصلح : يابنت اصبري
صيته اوقفت على صوت الشايب : سم ياعمي
ابو مصلح : ولد عبدالله وينه هالحين
صيته : طلع مع ابوي واخوي زياد يدورن استراحه
علشان حفلة تخرجهم من الثانويه وابشرك انهم بيسجلون
في كلية الملك عبد العزيز الحربيه
انا الليله بعلم ابوي وعناد عنكم وبكره ان شالله تقابلونه
انت عطني رقمك وابوي يكلمك بعد مانخبر عناد بكل شي
ابومصلح عطاها رقمه واخذ منها رقم حمود
صيته : ابدق عليه هالحين واخليك تسمع صوته بس
لحد يتكلم لازم نمهدله الموضوع قبل
ابومصلح هز راسه بموافقه

اتصلت صيته وافتحت السبيكر
عناد : هلا والله ام الصيت

صيته / هلابك عنادي بشر لقيتو استراحه

: هههههههههههههه خلينا ابوي ياخذ قاعه بدال الاستراحه عاد ابوي يقول ياليت منهو يلقى التؤام
الي تدورونهن علشان ازوجكم مره وحده واخلص

صيته : انت وزياد بتشيبون ماتزوجتو اذا انتم ملزمين
تزوجون خوات وتؤام

عناد : هههههههههه عادي مهوب لازم نتزوج

صيته : طيب مع السلامه انا مشغوله الحين

عناد : مع السلامه

ابومصلح بابتسامه سعاده انه سمع صوت عناد
وباين من كلامه ان الرجال الي رباه ماهو مقصر
: اسمه عناد وزياد اخوك انتي

صيته : ايه اسمه عناد وكلهم اخواني

ابومصلح : السموحه يابوك على هرج سعود امسحيها
في وجهي

سعود تنرفز مايبي اخوه يعتذر مع انه معترف بغلطته
بس هي تنرفز من جد وبعدين سالفة ان ولد اخوي عاش
عندهم شي يقهر

صيته : وجهك ابيض ياعمي مايصرلي ازعل منكم
دامكم اهل عناد

سعود بعنطزه :ايه اهله وبناخذه ونعوظكم عن كل شي دفعتوه على مصاريفه

العمام الكبار وابومصلح التفتو على سعود بغضب
بدل مايشكر الناس ويعترف بفضلهم على ولدهم
يتنكر لهم كذا
احد العمام : سعود امنعنا من الردى
العم الثاني : ماهذي بطبوعك ياسعود تعوذ من ابليس
الاجواد ماقصرو مع ولدنا الله يجزاهم خير
ابومصلح وجه كلامه لصيته : والله يابوك ماعاد ادري
وش اقول هالخبل ماعاد خلالي عذر

سعود توسعت عيونه قهر : انا خبل

صيته تجاهلت سعود وخلت كلامها مع العمام الكبار

: ماله داعي تعتذر مابين الاهل زعل وعم عناد يصير عمي
وملزومه اتحمله
: اسلم عليكم ونشوفكم على خير ان شاء الله

العمام ودعوها واطلعت اركبت سيارتها
سعود وجع وعما يعميك مسويه نفسها صغيره وبتحطني عمها : انا بروح وراها اشوف بيتهم وين وماترك لحد
مجال يتكلم
طلع سيده وركب سيارته ومشى ورى سيارة صيته
وتعمد ان سواق صيته يشوف سيارته لعانه

السواق خبر صيته عن السياره الي تلحقهم
واطلبت منه يتجاهلها ويكمل طريقه واهي
عارفه انه سعود

سعود لحقهم لحد ماشاف سيارتهم تدخل مع بوابة
بيتهم ديور ورجع

بعد ماطلعت صيته من عند اهل عناد

فيصل : هههههههه يبه سمعت ولد اخوك واخوه يدورون
خوات تؤام جهز بناتك للعرس

ابومصلح بابتسامه : كانهم رياجيل فيهم خير يبشرون
بالي يزوجهم

احد شباب العائله
: ولد عمنا نجوزه يستاهل بس ولد الناس وش علينا
منه يروح يدورله حرمه بعيد عنا

ابومصلح بغضب : الهرج هذا لاعاد اسمعه وترا ولد
عمك عايشن عمره عندهم والايعرف الاهم وانت سمعته
باذنك يقول ابوي حجز لنا قاعه لو الرجال مايعامله
مثل اعياله ماقاله ابوي فخلو عنكم التفرقه والدنافس
الي مالها سنع والاسمع انكم هرجتو في الرجال واعياله
بالشينه يكفينا سواد الوجه الي سواه اسعود

احد العمام : الله يصلح سعود انفلت على البنت بغاء ياكلها

عم اخر : تهقون الكلام الي قالته صحيح

ابومصلح : وش حادها تكذب وبعدين كلها بكره على
خير ونشوف كل شي على حقيقته

في بيت حمود بعد مارجع حمود واعياله
اجتمعت فيهم صيته في المقلط حمود ومحمد
وسالم وزياد وعناد وغزيل
وبدل الف والدوران والمقدمات فضلت انها تجيب السالفه
من الاخر
: اهل عناد بيجونكم بكره هنا في البيت
صدمه صدمه صدمه والكل يتلفتون على بعض
وش ذا الي سمعوه من اهل عناد

عناد انصدم وحس بخوف من المجهول : وش اهله
صيته : يوم رحت لسوق شفت واحد نسخه منك كانه
انت ويوم نشدته عن اسم ابوك قال انه عمه
ورحت مع السواق وراهم لبيتهم وقابلت عمامك
كلهم قاطعها حمود
: متى صار ذا كله ووش يثبت انهم عمامه

اما عناد مازال مصدوم وزياد اكثر صدمه وخوف منه
التفتو على بعض الاثنين واشبكو ايدينهم في بعض
وكأنهم يقولون ماراح نفترق

غزيل فزت من مكانها ودموعها تصب وراحت اجلست
جنب عناد واحضنت راسه على صدرها
: اوليدي والله ماحد ياخذه مني يكذبون كلهم
يكذبون عناد اولدي وماله اهل غيرينا حنا اهله
عناد لف ادينه على اكتاف امه : يمه تكفين لاتبكين
محد يقدر ياخذني منك

حمود بثقه : اركدي يامره عناد رجال ومال احد عليه
كلمه واهو اولا واخيرا ولدنا والولد يعيش في بيت
ابوه ويزور عمانه مايسكن عند عمانه ويزور ابوه
وناضر عناد وكأنه يبيه يأكد كلامه
عناد مع انه باقي مافهم السالفه كامله
بس امه وابوه واخوانه مستحيل يضحي فيهم
محمد : عناد لايكون تضعف قدامهم هم عمامك
والهم حق بي حنا اهلك ومستحيل نتخلا عنك
سالم : وش فيكم قلبتوها مناحه عناد مستحيل
يترك بيته واهله ويروح لناس ماعرف لهالحين

الكل كانو يحاولون يطمنون انفسهم ان عناد مستحيل
يتخلى عنهم هي الحالها كانت واثقه تمام الثقه
من عناد لانها هي الي ربته وهي الي جهزته لهاليوم
عدل لانها من اول يوم دخل عناد بيتهم كانت خايفه
يطلعون اهله وياخذونه منهم فحطت لنفسها هدف
ان تربط عناد بالعائله وتجهزه لظهور العائله الاخرى
وياما تجادلت هي وعناد في هالموضوع
عناد اخذ يد امه الي تشاهق من قو البكاء
وباس كفها : يمه تكفين لاتبكين هذا بيتي
وانتي امي وانتي الي بتخطبين لي وتزوجيني
وتربين اعيالي العوبان
ابتسمت امه على كلامه وخربطت شعره بيدها
: مانهم بجايين اعوب منك
ضحكت صيته :ههههه في هاذي ابصم لك بالعشره
عناد باشا مافيه اعوب منه احد والظاهر اني عرفت
المخيس الي مورثه العوابه تقصد سعود
حمود : ههههههه ماخذ العوابه الى منك انتي
صيته : حرام عليك يبه وش زيني انا بسم الله علي من العوابه

عناد : اها انجزي وعلمينا وشلون لقيتي اهلي يامكتشفة
ال عقاب

سالم : ههههههههه سبحان الله مايطيح عليكم الاهي

علمتهم صيته بالسالفه كلهامن غير ماتجيب طاري للي قاله سعود علشان مايصير مشاكل بين العايلتين ودق حمود على ابومصلح
وعزمهم كلهم على الغداء عنده ووافق ابومصلح

وكملو ليلتهم واهم يتكلمون عن اهل عناد ووش
ممكن يصير في مقابلتهم لهم وكيف بتكون علاقتهم معهم
وقلق استوطن انفس الجميع على الرغم من محاولت
التظاهر ان الامور طبيعيه

في اليوم الثاني الحمدان كلهم مجتمعين في بيت
حمود هم وابوفهد واهله في انتضار اهل عناد
عناد حده متوتر صعب انه يشوف اهله بعد
العمر ذا صحيح انه ماحتاجهم في يوم
والاهو في حاجتهم الحين بس يبقون
الأهل اهل والدم عمره مايصير ماء مايدري يزعل لأنهم
مادوره الوقت ذا كله والايشكرهم لأنهم لو اخذوه من صغره
كان ماعاش هالحياه السعيده الي عاشها عند ابوه حمود
مايدري يزعل منهم لانهم تخلو عن ابوه وقاطعوه واهوماله
غيرهم او يعذرهم لانهم كانو مجبورين على الي سووه
مشاعر كثيره مختلطه وصعبه وماهو عارف وش نهايتها

زياد اكثر واحد مرعوب وحاس بكره لناس الجايين
لانه خايف ياخذون اخوه منه

زياد وعناد لابسين ثياب وشمغ ومطقمين بكل شي زي العاده نفس الثوب نفس الشماغ نفس التنسيفه
نفس الساعه نفس الكبك الجزمه القلم الخاتم في الاصبع
الصغير كل شي طقم
وطالعين شياكه ورزه اخيرا وصلو اهل عناد
واستقبلوهم ال حمدان من عند الباب بالترحيب الحار
وكان في مقدمة المستقبلين حمود وابووليد
ثم عناد وزياد والبقيه منقسمين على صفين يستقبلون
ويرحبون وكان فيصل محط استغراب ال حمدان كلهم
بسب شبهه الكبير لعناد واهو اكثر واحد حبوه بسبب
هذا الشبه حتى زياد وعناد رحبوفيه بحراره واهم
يعلقون على الشبه الي بينهم ونفس الشي عند
ال عقاب كان عناد مثار دهشة الجميع بسبب
شبهه الكبير من فيصل
شي ثاني لفت انتباه ال حمدان واهو كثرة ال عقاب
بلمقارنه مع عائلتهم هم
وشي لفت انتباه ال عقاب ان ال حمدان ناس ودودين
ويحسسونهم ان لهم قدر ومكانه عندهم لمجرد
انهم اهل عناد
انتهى السلام وادخلو الضيوف المجلس الواسع
وكان عناد وزياد وسالم وتركي هم الي يصبون القهوه
زياد
ابو مصلح لاحظ التطقيمه بين عناد وزياد في البس
وشاف كيف يكلمون عناد ويتعاملون معه نفس مايتعاملون
مع زياد واستانس كثير ان ولد اخوه لقى ناس اجواد
يربونه كأنه ولدهم ولوهو عندهم ماسوو فيه مثل
ماسوى حمود الي واضح حسن تربيته من سنع
الولد وادبه وطريقة سلامه عليهم بحفاوه واحترام
لوهو واحد غيره سبهم وشتمهم وماخلى تهمه مااتهمهم
فيها على تركهم له كل هالسنين

بعد ماتغدو وخلصو جاء وقت الجد

ابومصلح : يابو محمد انا اشهد انك كفيت ووفيت
وجزاك ماينلحق وهالحين ولدنا بناخذه معنا
حنا من اهل الشرقيه مانا من هنيا واذا وده
بالرياض يجي عند عمه سعود

حمود : ياعساك تسلم انا ماسويت شي عناد اولدي
وواجبي اربيه مثل ماربيت اخوانه ومابينهم عندي فرق
اما احكاية انه يروح معكم اسمحلي هذا اولدي
وهذا بيته وانتم حقكم محفوظ وزيارتكم واجبه

سعود رغم التحذيرات شديدة الهجه من اخوانه
ماقدر يمسك عمره : انت تدري انه ولدنا مهوب
ولدك ولحد هنا كثر الله خيرك ومشكور وكل الي
تامر فيه حنا حاظرين لاكن عناد مانطلع من هنا
الا وهو معنا

جاه الرد من عناد الغاضب من الطريقه الي تكلم
فيها عمه مع ابوه : اسمع ماأسمحلك تكلم مع
ابوي بالطريقه ذي وابوي ماني تاركه والارايح لامعك
والامع غيرك

سعود بغضب : بتمشي معي غصب ورجلك فوق ارقبتك
وش تبي الناس تقول عنا تاركين ولدهم عند الغرب
يكدون عليه

هنا ال حمدان فزو واقفين وال عقاب فزو لفزتهم

حمود بغضب : ماعاش والاكان الي يغصبه
وحلفت مايطلع معك شبر غصبن عنه لو ياصل
الدم لركب

عناد : والله عال يالي تسمي نفسك عمي بتاخذني
غصب علشان خوفك من كلام الناس
ابشرك كلام الناس ماهمني واذا انت تبيني علشان
كلام الناس ابوي يبني لنفسي ووالله انه مايتعب
على تربيتي لين صرت رجال ثم اديرله اظهري
واخلي منفعتي لغيره

ابومصلح فكر في السالفه شاف ان عناد صار
رجال مسؤل عن نفسه ومالهم عليه درب
ودامه متمسك في اهله الي ربوه مالهم
الاانهم يكسبونهم بالعلم الطيب والمعامله الحسنه
حتى مايخسرونه بالمره
التفت على ربعه ولسعود بالتحديد
: الي عنده هرجه يبلعها
ثم التفتت على ال حمدان
: انا اشهد انكم اهل الاوله وماقصرتو اول وتالي
ودام عناد مصمل انه يقعد عند كم انتم اولابه منا
دامه ربوة ايدينكم لاكني اطمع انا نكون اهل واصدقاء واخوان نتواصل
في مابينا ونساند بعضنا في الرخى والشده

ابو وليد : طال عمرك خوتكم شرف لنا وابشر بعزك
من ساعتك هذي مايجري عليكم يجري علينا معكم

وبكذا اتفقو العايلتين انهم يبقون على تواصل مستمر
وانهم يكونون عون لبعضهم من اجل عناد
وعلشان عين تكرم مدينه