04-27-2019, 09:22 AM
عقال و غترة و طاقية
ليتني ماجيت سوق (الحرة الغربية )
غير أنا متأهل / ومتمّهل / وعقلاني
قلت قبل الزحمه ابغى انزل له العصرية
ما احسبنّه فيه غير العجز والشيباني
ودّي أشري لي عقال /وغترة/ وطاقية
ومن عجلتي كنت لابس ثوب نوم عماني !
المهم أني نزلت ونزلتي فورية
للمحل اللي انتقضى منه انا واخواني
صاحبه تاجر ولد تاجر وعينه حيّه
منعم من اول حياته/ واحمر ! وفسقاني
قال لي عقب السلام وعقب يالله حيّه
لو سمحت اجلس محلي واحرس الدكاني
من صلاة العصر وانا اناظر البوفيه
ولابغيت ازرق لها تطري لي السرقاني
ولاطلع من عندي إلا داخله جنيّه
في محاجرها الوساع يقيّل الشيطاني
وانحرجت ورجت حتى تفهم الماريّه
وأسألتني ! كم هذا ؟ قلت : ماني ! ماني !
قالت اعرفك انك يماني من الشخصيّه
ولو بغيت اعطيك كفّ ! اعطيك ياليماني
أنت حدّك غمزتين بعيني السحرية
وآخذك من راسك لياساسك الصنعاني
وإن بغيت توصّل الموضوع للدوريه
ابشر بعزك يجيك الضابط القوماني
وصيحتي فالسوق صك من البراءة ليّه
وأنت عاصي مالك الا الضرب بالعصياني
ويش ابي بالسوق كان الحمرة الوردية
ماخذت لي حاجتي من عندكم مجّاني
قلت : يابنت أقصري صوتك عليّ شويه
واخذي اللي ودّك وخليني لورعاني
قالت :انت سعودي ؟ وقلت : آه ياسعودية
كم هندي شاف من مثلك وكم افغاني
وكم عطيتيهم مقابل قيمة العيديه!
واسرقوا منك الحياء والمسمت الربّاني
قالت : استرني عشان ظروفي الصحية
واعتبرني تايبه لله ياحميداني
قلت : روحي جعلها روحه بليّا جيّه
واطلعت مع دخلة التاجر !! وكلٍ جاني
يوم جوني والنوايا كلبوها سيّه
صرقعوا بالضحك عندي صرقعة سكراني
قالوا انظر ياذكي فالكمرة المخفيه
وخلك رياضي نبنمقلبك مقلب ثاني!!
الوكاد اني طلعت وطاستي مجفية
في يدي خمّة عدس ! واصاقع الجدراني
الشرف لاهل الشرف من دونه الجنبيّه
واللعب هذا يسمى لعب بالنيراني
والنصيحة واجبه لاهل العقول الحيه
والسلام ختام لو طولت ياحبّاني
احمد خليف
كلمات البحث
العاب ، برامج ، سيارات ، هاكات ، استايلات , مسابقات ، فعاليات ، قصص ، مدونات ، نكت , مدونات , تصميم , شيلات , شعر , قصص , حكايات , صور , خواطر , سياحه , لغات , طبيعة , مناضر, جوالات , حب , عشق , غرام , سياحه , سفر