رواية صيته ظبي النفود بقلم نبض أفكاري

في الجنوب

مفلح في المزرعه يشتغل
وترفه قررت انه كفايه قعده في البيت لحد كذا صار لها
شهر متزوجه ماعادهي عروس راحت لبيتها الي
اعطاها اياه ابومطلق قبل اخذت اسلاح ابوها الي
مخبيته في البيت لفت احزام السلاح على وسطها
بشوق واطلعت لمزرعة ابومطلق
في المزرعه استغربت ان المزارعين الي كانت قبل
تشرف عليهم وتاخذ وتعطي معهم عادي صارو
يبعدون عن طريقها ويتحاشون يتكلمون معها
ولو اهي تكلمت مع احد منهم يلف وجهه عنها
او يكلمها وعينه في الارض المزارعات النساء
ماكانن اقل غرابه من المزارعين الرجال
فبعد ماكانت تسمع منهن بعض الهمسات عن كونها
عاله على ال مطلق او انها جالسه عند اهل طليقها
صارت تشاهد نظرات الاحترام وكل ماجت تسوي
شي تلقى من تتبرع بالقيام بذالك العمل نيابه عنها

مفلح جاه خبر ان سيدة ال مطلق في المزرعه راح لها
وهويطبخ من الغضب
اول ماشافته مقبل عليها راحت له
مفلح بغضب مكبوت حتى مايلفت الانتباه : وش جايبك هنا
ترفه : خابرني فلاحه طول عمري ومالي في جلسة البيت
حاجه

مفلح : اياني واياك اشوفك في المزرعه مره ثانيه انتي
هالحين من حريم ال مطلق والي يمشي عليهن يمشي عليك

ترفه تبي تفسد على مفلح نبرة التعالي : انا بنت القناص
لاتربطني في حزمة ماهي بحزمتي

مفلح : كم لك تشتغلين في المزرعه والكل يدري انك ترفه القناصه بنت القناص ماشفت احد عبرك
واليوم الطريق الي تمشين فيه تباعد عنه الخطى وكلن
يغض طرفه عنك تدرين ليه لانك اليوم مرة مفلح ال مطلق

كلمت مفلح صابت هدفها عند ترفه فعلا طول المده
الي راحت كان الكل يعاملها على انها مزارعه عاديه
رغم تشديد ابومطلق على انها وحده من بناته
واليوم الكل يعاملها على انها صاحبة ملك واكثر من
كذا شي من الاحترام لايمنح لاصحاب الاملاك
وانما يحصل عليه من يستحقه فقط وواضح ان
الجميع اتفقو ان حرم مفلح تستحق ان تعامل باحترام
: بس الشغل ماهو عيب

مفلح : وانا ماقلت انه عيب في اول شبابي كانن
حريم ال مطلق كلهن يشتغلن معنا في فلاحة المزرعه
بس بعد ماغنانا الله افلوسنا تخدمهن واهن في بيوتهن
ومنها نفتح باب رزق للبيوت الي تطلب العيشه
وانتي هالحين وحده منهن والي يمشي عليهن يمشي عليك

ترفه : بس انا مقدر اعيش بدون شغل

مفلح احتدة ملامحه بغضب : ارجعي لبيتك واذا تبين
الشغل عندك احدود البيت من المزرعه سوي فيه الي تبين
الا اشجرة النايفه اياني واياك تقربينها

ترفه عشتو كل وحده حاطه لها اشجره الظاهر حتى
انا بسوي سواتهن

مفلح شافها واقفه وسرحانه : انتي لهالحين واقفه
ارجعي للبيت اشوف

ترفه ماعاد عندها شي تقوله هالمفلح مهوب سهل ابد
واهي ماتقدر على ازعله هذا هو الي عاشت تنتظره
اسنين هيبه وقوه وصلابه ومكانه عاليه بين اهله وجماعته
استدارت من عنده بترجع للبيت في الحظه الي انتبه
فيها مفلح لسلاح الي يختال على وسطها المنحوت

صرخ :ترفه

التفتت عليه بسرعه ماتدري وش الي ازعله
:لبيه

مفلح يأشر على اسلاحها : اختاري ياتتركينه لي
يااتركك له

ترفه انزعت السلاح من وسطها بسرعه وحطته في يد
مفلح : ماعاش والاكان الي اترك من دونه

ابتسم مفلح بنصر اخيرا طردة نصف الرجل الذي يستوطنها

بعد مرور سنه
هيفاء جابت ولد سمته مهند مناير جابت ولد سمته احمد
ترفه جابت بنت سمتها شيهانه
علي طلع من الحرس الوطني واشترى بيت ملك دور تحت
وشقتين فوق ام ابراهيم تحت وشقه لنايفه وشقه لعبير
الي قيدها تزوجت ابراهيم راكان توسع في شغله وفتح
فرع ثاني لقرطاسيته محمد توسع في شغله بالشراكه
مع اخوه سالم وبدو يشتغلون في امتلاك الxxxxات
ومن ثما بيعها بجانب مكتب الxxxx الي يشتغلون من
خلاله كوسطاء بين البايع والشاري
صيته صارة تعمل في مجله تصدر مره كل شهر وهي تقوم بتغطية الانشطه النسائيه الاجتماعيه لصالح المجله
واهي تكتب باسمهاالصريح
وليد ماعاد تدخل في حياتها وصار يتجنبها
بشكل كامل محد عارض عملها في الصحافه الا راكان
وابوه لاكن وقفت ابوها واخوانها جنبها اجبرتهم على
التزام الصمت ازعلو عليها كم شهر ثم مع متابعتهم
لتغطيات الصحفيه الي تقوم فيها تقبلو الموضوع
تركت فكرة العمل في مشروع تجاري وصار كل جهدها محصور في دراسة وبحث
اساليب التربيه الحديثه واهي الحين تكتب اولى
صفحات كتابها الاول عن تربية الابناء بعنوان
(حمدان المنتظر ) واهو تقريبا عباره عن منهج الخطه اوالاساليب التربويه الي راح تتبعها في تربية حمدان
نست نمر بالكامل وبدت تتحرر من كرهها لوليد الاانها
لم تحبه بعد فهو مجرد شخص عادي تربطها به علاقة زواج

هلا تخرجت من الجامعه قسم ادب انجليزي
والحين تجهز لزواجها حلا ومحمد راح يتزوجون
بعد فهد وحلا بشهر
وليد تكفل بقاعة زواج فهد كرد لدينه الي اعطاه اياه
بمسمى تصفية بضاعه في السابق
ووليد رده تحت مسمى هديه خاصه لهلا وخلا هلا
هي الي تختار القاعه بنفسها وتعمد يوديها
افخم القاعات في الرياض علشان يغطي
افلوس فهد الي عنده
ترك عمله السابق وفتح مكتب تصميم ديكور خاص فيه
واهوحاليا في بداياته

فهد انهى مديونياته للبنك وبدى يجني ثمار عمله المتواصل
السنوات السابقه وبعد ماشاف الحرب القائمه بين وليد
وصيته حمد ربه انه نجى من هالحرب وبدى ينظر
لهلا بعين جديده

في بيت ابووليد هلا تكلم
:صيته خلينا نروح سواء وفي السوق موب مشكله
كل وحده تروح تدور اغراضها

صيته / يابنت مابقى وقت وانا ماخيطت وماودي اشتري
جاهز خليني اروح الحالي علشان اركز على الاقمشه
انتي تبين عطور واشيا مالها علاقه في الاقمشه
كذا بتشغليني وباشغلك

هلا : لاماعليك ساره وحلا معي وانتي اول ماتلقين
القماش الي تبينه تجين معنا

كان جالس في الصاله ويسمع مكالمت هلا واهو يدعي
عدم الاهتمام مرة سنه على اخر هوشه بينهم
حكم عمه عليه انه مايشوفها والايتدخل فيها
كان صدمه بالنسبه له مايدري ليه تهور وحط
على الثلاث اسنين ثلاث ثانيه
من ذاك الوقت واهو يتحاشاها يحاول يثبت انه
يقدر يتخلى عنها بسهوله يمكن هذا الشي
يخليها تحس بقيمته بس الواضح انها ماجابتله
خبر ومبسوطه في حياتها من دونه

انتبه ان هلا قيدها خلصت المكالمه وهذا هي لابسه
عبايتها خالصه هي وحلا
: من بيوديكم
هلا : راكان
قام واقف : انا بوديكم

هلا وحلا ناظرن في بعض باستغراب ثم مشن وراه
بصمت

عند صيته وساره البسن عباياتهن وجالسات
على وحده من الطاولات في حديقة بيت حمود
ينتظرن البنات يمرون عليهن كلها دقايق
وجاهن زياد يقولهن يطلعن
راحت صيته وساره لسيارة واستغربت انها سيارة
وليد ليه ماجاء على سيارته
افتحت ساره باب السياره واركبت وبعدها
اركبت صيته وسكرة الباب ردن السلام
وجاهن صوت وليد بالرد
ارفعت راسها بصدمه صارلهم سنه يتجنبون بعض
حتى في جلسات العائله يتكلمون مع الجميع
الامع بعضهم
لاحظ وليد انها مركزه نظرها عليه وحاول يبين انه
ماهو مهتم مشى واهو يسئل هلا : وش السوق الي تبينه
وتعمد يخلي السؤال خاص بمعنى انتي الي يهمني
رايك
التقطت صيته المعنى والاهتمت لأنهم اساسا متفقين
على السوق الي بيروحون له
قالت له هلا اسم السوق وراحو له والسياره يعمها الصمت
والتوتر
لمى اوصلو السوق انزلن كلهن كمجموعه وحده
وداخل صار لازم يفترقون اهي متفقه مع البنات
على كل شي قبل يجون بس المشكله وليد الحين
معهم تروح لقسم الاقمشه من غير ماتقوله
والا تقوله قبل ووش بتكون ردة فعله
طلعها من سرحانها صوت هلا
: يالله روحي انتي واذا خلصتي تعالي دورينا
في المحلات هذي اذا اذن وانتي ماخلصتي
نلتقي في المصلى
كان يستمع واهو ساكت وينتظر رد صيته
حلفت ان راحت من غير ماتقولي انها ماتطلع
من هالسوق واهي على ذمتي

صيته باقي محتاره ابوها قايله بكل وضوح ان ماله
دخل فيها لحد ماتدخل بيته واهو ماعاد تدخل فيها
انتبهت على البنات يمشن من عندها ووليد معهن
: وليد
وقف من غير مايلتفت عليها
قربت منه وتكلمت بثقه : انا ابي اروح لقسم الاقمشه
تعال معي

توقع انها بتقوله وتمشي اما انها تطلب منه يروح معها
هذا الي ماتوقعه ومن الربشه
: روحي الحالك موب رايح معك وكمل طريقه من غير
مايلتفت عليها

انقهرة منه واندمت انها قالت له وراحت الحالها
البنات اول مانادت وليد اسرعن في مشيتهن
على اساس يتركن لهم مجال يتكلمون مع بعض
بس تفاجأو بوليد يلحقهم على طول

صيته اتعبت واهي تدور اقماش يعجبها والا حصلت
شي قررت تروح للبنات وبكره تروح لسوق ثاني
في هالحظه شافت محل على زاويه بعيده شوي
عن محلات الاقمشه الباقيه راحت له واهي تقريبا
فاقده الامل في انها تلقى شي
ادخلت المحل وبدت تتفرج على الاقمشه عجبها
اقماش احمر مشغول شغل كثيف بس حلو
اخذت منه الي يكفي صدر الفستان وباقي
الفستان اخذت اقماشه احمر ساده

راحت تدور البنات واخذت لها اشويات تدور لحد
مالمحته واقف قدام محل عطور معناته البنات اهناك
تجاوزته وادخلت البنات التفتن عليها
حلا : لقيتي اقماش
صيته : ايه خلصت
هلا : يالله حنا بعد خلصنا عطور بننتقل للجزم
صيته : لحظه انا بشتري عطر
هلا : شوفي العطر ذا يهبل انا ماخذه منه
وليد سمعها وعقد حواجبه هذا الناقص بعد
تحط نفس العطر الي بيشمه فهد في هلا
تقدم لها لمى شاف ان العطر عجبها ونوت تاخذه
اخذ العطر من يدها من غير سابق انذار ونزله
على زجاج العرض وسحبها وراه بيدها
استغربت من تصرفه وتنرفزة
اسحبت يدها من يده بقوه
: خير انت وشلون تسحبني كذا قدام العالم
التفت عليها بعصبيه
: اش لاسمع حسك وامشي قدامي اشوف وبعكس
كلامه مشى قدامها فكرة انها تطنشه وتروح مع البنات
الي بمجرد ماشافوه قرب منها طقن من المحل
وراحن لاقرب محل جزم ادخلن فيه
بس في النهايه راحت وراه اكفايه مشاكل وخلوني اشوف
وش اخرتها معه
دخل محل عطور من الماركات المشهوره التفت يمها شافها
تمشي وراه بصمت وقف قدام البائع ووقفت جنبه
بدى يجرب روايح العطور واهي واقفه تناظر فيه
من غير ماتمد يدها على اي عطر منهم اخيرا لقى
عطر اعجبه وبتسلط دفع قيمة العطر واخذه
مده لها من غير مايفكر حتى انه ياخذ رايها في
ريحته استغربت من نفسها واهي تمد يدها للكيس
الي مده لها وتاخذه في حالاتها الطبيعيه راح تمشي
وتتركه هو وعطره او حتى تاخذه ترميه في الزباله

وليد غريبه صايره مطيعه اليوم توقعت تكسر العطر
في بلاط المحل معقوله بعدي عنها الفتره الي راحت
خلتها تراجع نفسها

اذن المغرب وراحو يصلون بعد الصلاه تاخر وليد
ماجاهم وصيته لقتها فرصه راحت لمحل عطور شرقيه
قريب منهم واختارة عطر رجالي على ذوقها ادفعت
قيمته واطلعت وصل وليد وماشافها مع البنات
: وين صيته
اشرة هلا على محل العطور
راح يم المحل وشافها تطلع منه وتجي يمه وقف ينتظرها
قربت منه ومدة عليه كيس العطر
وقف يناظر يدها للحظه واخيرا مد يده واخذ الكيس
بمجرد ماخذ الكيس منها تجاوزته للبنات


البنات توقعو انهم تصالحو خلاص
لاكن الي صار بعد كذا خيب ضنهم

كانو يمشون بين المحلات ويتسوقون يدخلون محل
ويطلعون من محل لحد مامرت من قدامهم بنت كاشفه
وجهها وفيها جمال خيالي وليد التفت يناضرها
وصيته اشتعلت غضب قربت منه بعصبيه
: تعال معي لمحلات الذهب
وليد حس بغيرتها واضحه في صوتها الغاضب
: وليش اروح معك
/ لأنك بتدفع
: اذكر عمي قال مالي فيك دخل لين تدخلين بيتي
/ والله انك ان مامشيت معي ودفعت قيمة الي اخذه
اني مدخل بيتك
وليد عصب من كلامها
: مهوب على كيفك ثم وش دخلني ادفع
/ علشان مره ثانيه تعرف تغض بصرك موب تمشي وتقز
في خلق الله
وليد حب ينرفزها زود
: انا ماني من الي يقزون بس بعض الزين يسحر
/اجل خل الزين الي يسحر ينفعك
واستدارت من عنده بغضب بتطلع من السوق كله
تبعها بسرعه ومسكها بعضدها
/ امشي معي اشوف
راحت معه وهي واصله حدها من القهر والبنات يمشون
وراهم
حلا : ياقو باسها على نظره بتاخذ ارضاوه ذهب
هلا : يستاهل ماشفتي كيف لوى ارقبته مع البنت
ساره : بعذرها ترى والله انه قهر ولابعد يقول الزين يسحر
هلا بشماته في وليد لانها تخيلت نفسها في نفس الموقف
: خلونا نشوف وش بتاخذ

ادخلو محل الذهب وبدى صاحب المحل يعرض لهم البضاعه اخذت طقم عقد مع اسوارته وخاتمه وخرصانه
واخذت اسواره واخذت خاتمين وخلخال
هذي الاشياء كانت ناويه تشتريها من قبل على احسابها
وتلبسها في عرس محمد بس بعد الي صار اخذتها على
احساب وليد
وليد التفت عليها بابتسامه :خلصتي
صيته من غير نفس :ايه
بدى صاحب المحل يوزن الذهب الي اختارته ووليد
اختار لها سلسال على شكل قلب ومليان افصوص
واخذ تعليقه فخمه بسلسال طويل ودبله وخاتم واسواره
ناعمه الي تجي سلسله وفيها تعليقات اصغار
حاسب على كل ذا واعطاها الي هي اختارته
وخلى الي هو اختاره معه وصيته اكلها قلبها
من الحركه وش قصده بهالحركه ليه يشتري دبل
وبعدين يخليها معه ولمن الذهب الي هو اشتراه

مر الشهر بسرعه واليوم عرس فهد وهلا
من بعد ذاك اليوم الي وليد اشترى لصيته الذهب فيه
ماعاد تقابلو نهائي
اليوم العرس والتجهيزات من اجمل مايكون
غدا العرس توه انتها والناس الي احضرو الغداء
مشو
واهل العرس بدو يتجهزون لسهره ابونمر واهله
احضروالغداء وشيخه جت معهم وطبعا مضاوي
وامها معهم وكلهن بيروحن لاحد المشاغل يلبسون
اهناك
ام ابراهيم والنايفه وعبير ومناير وانوار بيروحون
لمشغل مع بعض
اهل الجنوب ماجو كلهم كلن واضروفه احدن جاء
واحدن ماجاء وابومطلق من الحاضرين

سلمى وبناتها وغزيل وقمرا وساره حاجزين كاوفيرتين
وبيلبسون في القاعه العروس بتزينها صيته وبتزين
نفسها
هلا تتذكر كيف اهل الجازي في عرسها طلعوها
اميره اسطوريه وبفخامه لاتوصف ثم بعد كذا
شافوها فقيره تفتقر لابسط اساسيات الذوق السليم
وشافت كيف كان الفرق بين الصورتين كبير ومنفر

فحبت انها تطلع بصوره ناعمه وانيقه وماتشطح كثير
عن صورتها الحقيقيه
كان فستانها الابيض مزيج بين الدانتيل والتفته البيضاء
بصدر ضيق وتنوره منفوشه واكمام طويله من الدانتيل
غير المبطن زينتها صيته زي ماتبي بالظبط
ارفعت مقدمة شعرها بطريقه فخمه وخلت باقي شعرها
مفلوت على ضهرها ثبتت الطرحه بورد طبيعي عوضاً
عن التاج زينت وجهها بطريقه تبرز جمالها من غير
مبالغه والاتقصير البست عقد ناعم من الذهب الابيض
وخواتم وخرصان طويله
وصارت العروس جاهزه واجلست في كوشتها الانيقه
اما صيته البست فستانها الاحمر بصدر مشغول
وتنوره ساده بقصات مبتكره وفستان راقي
كانت مشتريه معه اكسسوار بالون الاسود
بس ماتدري وين اختفى صار لها يجي ربع ساعه
تدوره والاهي لاقيته

وماتدري ان احدهم تعمد اخفاءه

الناس في القاعه تحت في قمت احتفالهم رقص ووناسه
وفي غرفة العروس المصوره بدت تصور هلا
حلا نادت صيته بدعوى انهن يشوفن المعازيم من عند
درابزين الدرج الي فوق من غير محد يشوفهم
وعلى اتفاق وليد مع خواته دخل غرفة العروس
في هالوقت وصور مع هلا بعدها هلا انتقلت
للكنب الجانبي ووليد جلس على الكوشه
مكان العريس هيفاء جابت الذهب
الي هو اشتراه قبل شهر محطوط على صينيه
فظية مزخرفه ومزينه بمفرش ابيض مخمل وفوقه
مفرش اصغر دانتيل وقطع الذهب مرتبه عليها
هيفاء حطت الصينيه على الطاوله الجانبيه
قريبه من وليد وراحت تنادي صيته
ادخلت مع صيته واهي تسولف معها علشان تشغلها
عن وليد بعد ماخطت كم خطوه داخل الغرفه المحت
هلا في الكنب الجانبي التفتت يمها وطاحت عينها
على وليد جالس في الكوشه بالثوب والشماغ
والابتسامه شاقه وجهه
قام بسرعه قبل تتراجع ومسكها بيدها وصار
يمشي معها للكوشه وخواته مشغلات اغنية
زفه في الديجيه ويصفقن مستانسات
والمصوره تصور كل شي
صيته تفاجأة بلي سواه وليد وخواته وماحبت
تخرب عليه فمشت معه في زفتهم القصيره جدا
بشموخ وثقه
وقفها معه قدام الكوشه مباشره باس جبينها
ثم جلس وجلسها جنبه
كانت صيته كعادتها في الحفلاة تعتمد اخر صيحات
الموضه في تسريحات الشعر والمكياج واكيد تختار
الي يناسبها من هالصيحات فكانت كعروس حقيقيه
قمه في الجمال والفخامه
هيفاء قربت صينية المخمل من وليد بدى بدبله
لبسها دبلتها ومدة لها هيفاء دبلته لبسته اياها
ثم لبسها السلسال القلب بعده السلسال
الطويل بعده الاسواره والخاتم
كان وده يستفرد فيها بس المشكله انهم في كوشة
هلا ومايقدرون يطلعونها من الغرفه والاالباقين
مقدور عليهم
ناظر فيها بحب : انا اسف على كل شي زعلك مني
قبل هالساعه
صيته حست ولاول مره بسعاده لاتوصف واهي
جالسه جنبه وتسمع كلامه
نزلت وجهها للاسفل بخجل ثم ارجعت ارفعته ببط
وابتسمت ابتسامتها الجذابه وتعلقت عيونه فيها
: مسموح وانا بعد اسفه على كل شي زعلك مني
واتمنى انا نفتح صفحه جديده بعيده عن كل شي
صار في الماضي

رفع يدها لشفايفه وباسها بوسه طويله
والبنات موب مصدقات ان هالاثنين الي طول عمرهم
حرب وحرايب يطلع منهم كل ذا

هيفاء صفرت بحماس وهلا وحلا يصفقون
وليد ترك يد صيته وهو يضحك
قل اعوذ برب الفلق
هيفاء بلعانه : اقول قومو توكلو عن كوشة اختي عطيتكم
وجه
وليد يناضر صيته :وش رايك انخاويهم اليله
حلا : اي والله فكونا من غثى التجهيز لعرسكم
صيته ابتسمت : حنا تونا على الزواج خل نزف الشياب
قبل

هنا طق باب الغرفه واختبصن البنات
هيفاء : وليد اطلع بسرعه
قام وليد وقبل يكتمل وقوفه مال على صيته وباس
خدها وطلع واهي تفشلت من البنات
هلا ارجعت مكانها وصيته باقي تحت صدمة البوسه
يدوب تحركت من الكرسي الي هي عليه واجلست
مكان وليد
حلا راحت تقفل الباب بعد وليد وهيفاء افتحت الباب
الي يطق
ادخلت سلمى : وش فيكم ماتفتحون
هيفاء بتصريف : هلا تصور ومابغينا نقطع التصوير
عليها خفنا يكون الي عند الباب وحده من المعازيم
جايه تسلم

سلمى التفتت على صيته وشافت الذهب الي هي لابسته
: ماشاء الله متى شريتي الزين هذا ياصيته

صيته ابتسمت : من عند وليد

اتسعت ابتسامت سلمى صار لهم سنه موب عاجبها
حالهم : ياعساه مبارك تعالي وريني ومتى عطاك وليد

صيته قامت وقربت لعمتها علشان تشوف الذهب الي
عليها : الله يبارك فيك

هيفاء : وليد معطيني الذهب اليوم العصر وقالي
اعطيه صيته

سلمى تشوف السلاسيل الي على صدر صيته بسعاده
: بسم الله ماشاء الله الله يحفظك من كل شر اقري
اذكارك وانزلي معي ابيك ترقصين الحين

صيته :اذكاري قريتها والرقص خلي لين هلا تسري
وننزل كلنا ونرقص سواء

سلمى باصرار : لا انزلي معي الحين وبعد ماترجعين
فوق تنزل حلا ترقص وبعدها هيفاء عمتكن ملزمه
انكن ترقصن من بدري

اطاعتها صيته وانزلت ترقص ومن بعدها البنات زي
ماقالت سلمى

جاء وقت الزفه ودخل فهد على عروسته مع وليد وراكان
استحت هلا من وجود اخوانها وفهد وماقدرت ترفع
عينها لهم رغم انها انسانه جرئيه بس ماتدري
في هالحظه وين راحت جرئتها وقوت شخصيتها
واكثر شخص استحضرة هيبته راكان لو ابوها
داخل بداله اهون
وقف فهد قدامها وقبل جبينها ثم استوى جنبها
واهو يبتسم لاخوانها وليد قرب منها باس جبينها
والتفت على فهد : لاوصيك على الغاليه تراها تسوى
عيوني
اشر فهد على اعيونه : هذا مكانها
وليد : تسلم وهذي الهقوه فيك
راكان قرب منها بعد وليد وباس جبينها
ثم مسك يدها بيده : لاغلط عليك طلعي حقك من عيونه
ثم علميني اكمل الباقي
ابتسم فهد : انت جاي تبارك والاتحرش
راكان ردله الابتسامه : وقت التباريك انتهى والله ان جاني
علم انك مزعلها ليكون زعلك اقوى من زعلها
هلا ارفعت راسها لراكان وابتسمت له واضغطت على يده
الي ماسكه يدها
اتسعت ابتسامت راكان يوم شاف ابتسامتها
ووقف جنبها يصور معها ثم طلع هو ووليد
بدت جلسة التصوير وبعدها سرو للفندق
بعد الصلاة والدعاء حسب السنه
بدت رحلة الترقب عند فهد رغم انه يدري ان هلا مختلفه
تماما عن الجازي الاان شبح القميص الاحمر
مازال يحلق في خياله ويردد الله يستر
الاكل قيده وصل ومرتب على الطاوله واهو منزل بشته
وجالس بثوبه واشماغه وعينه معلقه على الباب
الي انفتح وتوسعت عيونه بصدمه

بدت رحلة الترقب عند فهد رغم انه يدري ان هلا مختلفه
تماما عن الجازي الاان شبح القميص الاحمر
مازال يحلق في خياله ويردد الله يستر
الاكل قيده وصل ومرتب على الطاوله واهو منزل بشته
وجالس بثوبه واشماغه وعينه معلقه على الباب
الي انفتح وتوسعت عيونه بصدمه
ثم ابتسامت فرح واسعه
هلا اطلعت لابسه فستان اسود فخم بصدر ضيق
وتنوره زم خفيف وياصل لحد الركبه ولابسه معه كعب
عالي مخليه مكياجها وتسريحتها زي ماهي
بعد مانزلت الطرحه حقت الفستان والورد الي
مثبتها منزله الذهب اكمام الفستان علاقي

فهد اعجبه شكلها حيل خاصه انها انقلته من
لون للون النقيض والأهم انها في انظره
صارت اكثر فتنه منها بفستان الزفاف
وهذا حسسه انها مهتمه بطلتها عنده
اكثر من اهتمامها بطلتها قدام الناس

هلا اشوف اعيونه تعلقت فيني على وسعها
مدري هو اعجاب او انزعاج من اللون بعض
الناس يعتبر اللون الاسود شؤم وانا ماتهمني
هالخرابيط واعتبر اللون الاسود فخامه ناضجه
بقيت واقفه مكاني اتأمل رزته في الثوب والشماغ
بس ماقدرت اطول وانا اتأمله جماله فتنه متوقده
مابيها تفتك فيني من اول نظره

فهد يا الله اشكثر جميله وفاتنه مدري وش فيني
اختبصت وماقدرت انتظرها تجيني قمت
من مكاني ورحت لحد عندها بنفسي
يمكن تقول عني مرجوج بس انا اقول
اني حيل مشدود لسحر الي تمثل قدامي
اشوفها استحت ونزلت راسها وقفت قدامها
وسحبتها لحضني وحضنتها وكأني لأول مره
احضن انثى في حياتي كلها
كنت ناوي اخذها لطاولة الاكل نتعشى
لاكني وجدة اشباع القلب اولى من شباع
المعده لذالك غيرة وجهتي لغرفة النوم

في صباح اليوم الثاني قام فهد وهلا
من نومهم وهم في قمة سعادتهم البارح
نامو بدون عشاء فعوضو انفسهم بفطور
فاخر ولأن الاثنين كانو رايقين ونفسياتهم مرتاحه
اكلو بشهيه مفتوحه وماخلو في خاطرهم شي
بعد الفطور البست هلا فستان باروع درجات الون
التفاحي والبست معه طقم الذهب الفخم الي
جابه فهد لها اصباحه واكتفت فيه زينت وجهها
وسيحت شعرها واتركته مفلوت
دخل عليها فهد واهو متحمس يشوف وش البست
اتسعت ابتسامته واهو يشوف اناقتها وجمالها
قرب منها ووقف وراها بضبط واهو يلف ايديه
حوالين خصرها ويظهر معها في الصوره
ناظرته هلا في المرايه واهو يريح ذقنه على كتفها
بحب ووجهه ملتصق بوجهها كان اجمل منها
بمراحل وكآنه قراء افكارها باس خدها
: انتي اجمل ماخلق ربي في عيني
اضحكت هلا بسعاده ومالقت حرج في انها تعترف
انه اجمل منها
: تجي نتفق بناتنا ياخذون وجهك واعيالنا ياخذون
وجهي