رواية صيته ظبي النفود بقلم نبض أفكاري

بعد مادخلو البنات البيت ومن باب الاحساس بالذنب
قررت صيته انها تكلم وليد وبمجرد مانزلت عباتها
واطلعت من غرفة شيخه شافت التلفون في الصاله
والحريم في المطبخ يجهزن للعشاء
اجلست عند التليفون وبدت تدق رقم بيت عمها
ورن ورن من غير ماحد يرد كررت الاتصال يجي
ثلاث مرات ولاحد رد وهنا تاكدت انهم ماهم في البيت

نرجع للجنوب
وبتحديد سيارة راكان
عبير من اركبت السياره واهي ساكته والانطقت بحرف
وهالمره خلت عينها في ايدينها الي شابكتهن في
بعض في حظنها والاحتى التفتت

راكان فال امها مع خواته والاطق لعبير خبر يسولف
ويضحك وكم مره لمحها واهي متصلبه كأنها تمثال
البنات يسولفن بينهن ومع راكان وتعمدن مايتكلمن
مع عبير علشان مايحرجنها واهي منبهه عليهن مايتكلمن
معها في السياره وقف راكان عند المحطه وسئل البنات
وش يبغون واطلبن لهن والعبير الي مازالت على الصامت
راكان تنرفز من سكوتها وش فيها اذا قالت جب عصير
والامويه باكلها انا راح جاب الاغراض وعبى بنزين
ومشى والكل بدو ياكلون ويشربون الا ابوالهول الي
ورى ومن التسميه واضح ان الي قاعد يفكر في
الوضع داخل السياره راكان
واضح انها قاعده تحاول تقنعني ان قصتها السخيفه
الي مشتها على البنات صدق اف لايكون جدي ملمح
لها انه يبيني اخذها لالا جدي ماعاد جاب الطاري
وشكله نسى الموضوع
اذن المغرب وانزلو يصلون في مسجد في الطريق
بعد ماخلصو صلاه البنات اطلعن سيده واركبن
السياره اما عبير ادخلت الحمام

طلع راكان وركب السياره وهو يضحك وشغل
السياره ومشى
والبنات ذابحن الفضول بيعرفن وش يضحك منه
هلا :وش فيك طالع من الصلاه تضحك شكل ابليس قايل لك نكته

راكان زاد ضحكه مع كلام هلا
حلا : وجع ضحكنا معك

راكان : كان قدامي رجال معه اولدين واحد جلس عن
يمينه والثاني جلس عن يساره واثنينهم ماصلو بس
الي على يمين ملقوف واشغل الرجال الي يصلي
جنبه كل ماسجد مد يده لمخباه واهو بين انه بس يتلقف
لويبي ياخذ شي يمديه قش الي في المخبى كله
الرجال ارتفع ظغطه منه يوم جلسنا لتشهد قام الولد
وراح لاخوه الي على يسار ابوه واشرله انهم يتبادلون
الاماكن عاد الرجال ماصدق انه سلم من الصلاه
اول شي سواه التفت على الولد واصفقه كف حامي
والمسكين مايدري وش القصه انا ماقدرت امسك
نفسي من الضحك يوم شفت الملقوف كيف جالس
جنب ابوه ببراءه ويسبح باصابعه المجرم لعبها صح

ههههههههههههههههههههههههه ضحكه جماعيه

راكان انتبه ان الضحكه لخواته بس اخس البرنسه
حتى الضحك ماتضحك التفت على مكانها وشهق
:بنت خالي وين

عبير اطلعت من الحمام وماشافت حولها احد اطلعت
تشوف السياره فيه والا مالقت احد هنا انفجعت
ماكان قدام المسجد سياراة ابد والاحتى شافت
ناس والمسجد اساسا مبني على طريق المزارع
وقريب منها بس ماحوله محطه والابيوت والاشي
ويعتمد على ان الجماعه الي تدخل المسجد وقت
الصلاه يقدمون واحد منهم يأذن ويقيم ويصلي بالناس
او على حسب الحاضرين وقت الصلاة
ماهي متعوده تواجه المشاكل التافهه وشلون تلقى نفسها
في مكان مقطوع الحالها على طول بكت برعب وبدت
تلفت حولها ماشافت احد انسحبت لداخل
المسجد اجلست باستسلام ضمت ارجولها لصدرها
وحطت راسها على اركبها وقعدت تبكي اكيد الحيوان
راكان متعمد يتركني الوصخ ماسويتله شي والله اعلم
ابوي وجدي عليه هين انا اوريك والله اخلي مصعب
يكسر الدنيا على راسك ياحقير

راكان اول ماشاف مكان عبير خالي ديور ورجع للمسجد
واهو مرعوب لايكون صار لبنت خاله شي والبنات اكل
الخوف اقلوبهن على عبير يعرفنها دلوعه ودجه ماتدبر
نفسها بس زين انهم مابعدو والا حتى طولو كلها عشر دقايق اوحتى اقل بالنسبه لبنت قويه تقدر تتماسك يمكن
لساعتين او اكثر قبل لاتفقد الامل في ان اهلها يرجعون
لها وتنهار (هالكلام بحسب تصور حلا وهلا )

راكان وصل للمسجد وقف السياره وفتح بابه ونزل يركض
لداخل المسجد واهو يدعي انها داخل زلق في مويه مكبوبه
في الممر وبغى يطيح لولا انه تسند على الجدار وكمل ركض لداخل اول مادخل المصلى شافها متكومه على نفسها وتبكي وتشاهق بصوت فتح اعيونه على وسعها
يمه منها مسرع انفتحت شلالاة الدموع حسستني
انا رحنا للحج ورجعنا

عبير اول ماسمعت صوت الركض التفت بخوف وشافت راكان
لفت وجهها عنه واهي حاقده عليه وتوعده في نفسها
وماتدري ليش هي تصلبت مكانها وماقدرت تقوم اويمكن
هي ماحاولت تقوم اف من ذا الرجول احسها ماعاد تعرف
مهمتها وشهي من الروعه جاها صوته بسخريه
:اوه لا انتي باقي هنا تمنيت ارجع القاك انخطفتي

التفتت عليه بحده كان ودها تقوم تضربه كف تصرخ
في وجهه تسوي اي شي يبرد حرتها فيه وبدال
ذا كله قامت واقفه واهي باقي تشاهق لازم اوريه اني قويه الكلب مستقوي علي خل نوصل عند مصعب
خلاص بسكت
بسكت ايييييييييييييييي وزادت بكى

راكان حامت كبده وش الضعف الي هي فيه
تقهر لوعاقبني عليها احد قشها زي السلام عليكم
والاقدرت تدافع عن نفسها
دار لها اظهره وطلع واهي الحقته بسرعه خوف انه يروح
مره ثانيه ويخليها
في السياره البنات حاولن يسكتنها بشتى الطرق ولاحياتا
لمن تنادي
المزرعه مره قريبه وراكان صكه راسه من بكاها وده ينزلها
في الطريق ويخليها تروح للمزرعه كعابي على هالمناحه
ياهوه كلها دقايق الي تركناها فيها وش لازمته البكى ذا
وجع ماتخلص ادموعها

هلا ياالله معقوله فيه احد ضعيف كذا ماغبنا عنها الادقايق بس دقايق ليش للحين تبكي
ادري انها دلوعه وبكايه بس عاد موب لذى الدرجه

حلا ياصدعة الراس من الدلوعه البكايه متى ناويه تسكت ذي

اوصلو اخيرا للمزرعه وراكان نزل البنات في قسم الحريم
وراح لقسم الرجال لقاهم يجهزون عدة الشوي بيشوون
وابوه وجده وخاله مطلق جالسين على الفرشه يتقهوون
سلم وجلس يتقهوى معهم

ابو مطلق :جبت البنات
راكان : ايه جبتهن وبضحكه بنت خالي بغت تروح من ايدينكم اليوم
ابومصعب اعتدل في جلسته : وش فيها عبير
راكان :تطمن مافيها شي صلينا في المسجد القريب
ويوم طلعت لقيت خواتي في السياره شغلت ومشيت
سيده وحنا نسولف ممدانا نتعدى المسجد وفقدناها
رجعنا ناخذها لقيناها مسويه مناحه وحنا ماغبنا عنها
الادقايق معدوده ووصلنا هنا واهي باقي تبكي
ابومطلق عقد حواجبه : متاكد انك مابطيت عليها
راكان : اذا كملت سبع دقايق كثير
ابومصعب واثق ان راكان ماراح يكذب عليه ويدري
ان مثل هالامور تحصل بس مع ذالك شال هم بنته
البنت صايره ضعيفه ودلوعه وماتاخذ حقها من بزر
والمشكله اغلب الي يخطبونها شديدين يخاف عليها
منهم واعيال عمها محد منهم خطبها
ابومطلق سرح اشوي يفكر ثم ناظر في راكان
الي بدى يسولف مع ابوه ثم رفع راسه لمطلق
: عطها ناصر خلها تختلط بالناس البعيد وتعلم ترد عن نفسها
مطلق عقد حواجبه بغظب : يبه من جدك تبيني اجوز
ناصر الي يده تسبق السانه
(ناصر تاجر معروف عندهم وعنده زوجه اولى ويبي الثانيه)
راكان لقط المعنى من كلام جده وفز واقف بيخلص عمره
قبل يطيح في الشرك ويخطبله ابوه
: انا بروح اشوف الشباب
ابو وليد : ناصر ماهو بكفو ياخذ عبير والبنت توها
تكبر وتتعلم
ابومطلق ابتسم الولد هذا مهوب سهل مانقز مثل المقروص
الاواهو خابرن وش ابي اوصله فهم المعنى من قبل ابدى
سالفتي : دام هذا رايكم انتم ابخص

راكان راح لوليد وابراهيم الي كانو يتمشون على جنب
ويسولفون وقالهم سالفة عبير ثم التفت على ابراهيم
وبسؤال مباغت :انت ماعندك نيه تزوج
ابراهيم الي ابيها راحت لنصيبها الله يوفقها الي مايعدني
ربح ماني بعاده خساره
: باقي مافكرت في الموضوع
راكان : بنت عمك عبير تراهم قامو يتشاورون يزوجونها
ناصر ومن طقت ناصر
ابراهيم : وانا وش دخلني في الموضوع
راكان : بنت عمك ودلوعه وضعيفه بتخليها تروح لواحد
مناك ياطى على ارقبتها
ابراهيم : يخسى احد يدوس لها على طرف
وليد : ماعلاك من راكان يبيك تاخذها علشان امي
مصدعه راسه فيها
راكان : انا في كل الحالات ماني ماخذها موب لقصورن
فيها بس لاني ماستحمل الدلع الزايد والضعافه
ابراهيم شبت النخوه في اعروقه لبنت عمه بعد كلام
وليد ورد راكان عليه
:بنت عمي انا باخذها واذا امك لزمت عليك تاخذها
فهذا لانها تبيلك الزين
راكان : وانا ماقلت فيها شي بنت خالي وعلى عيني وراسي

ابراهيم تركهم وراح لجده وعمه على الفرشه

وليد التفت على راكان بقهر : انت وش حاشرك تختارله
حرمته
راكان : بلا عبط موب بزر اختارله انا عطيته رائيي
واهو اخذ فيه وبعدين بنت خالك ذي مايصلح لها الا
ابراهيم وماسعيت لها في السالفه الاعلشان خاطر
خالي مطلق الي واضح انه شايل همها

ابراهيم وقف على طرف الفرشه واهو معصب : وش الي
سمعته
ابومطلق برواقه : انت ادرى وش سمعت
ابراهيم : سمعت انكم تشاورن في ناصر لعبير
ابومصعب : وانت وش دخلك في عبير وخطابها
ابراهيم : بنت عمي وانا اولابها من الغريب

ابومطلق اتسعت ابتسامته من يوم شاف ابراهيم
جايهم معصب واهو داري ان راكان ورى السالفه

ابومصعب : ومصعب مهوب اولى ببنت عمه

ابراهيم : لامن مصعب طلب انوار من خاطره واهو راغبن
فيها يبشر بسعده

ابومطلق : ووينك عن الخطبه يوم ابوك موجود
ابراهيم : ماكنت مستعجل والادري ان البنت جايها خطاب
وابوي باجيبه ونخطبها رسمي المهم انكم تعطوني كلمه
انها تكون لي وتقطعون الطريق على الخطاب

ابومصعب : ماعطيك كلمه لين اشاور اخوها اخاف في
خاطره شي عليك

ابووليد : مانكم لاقين احسن من ابراهيم لعبير
ولاابراهيم بلاقن احسن من عبير له تعوذو من ابليس
ومصعب عندي
والتفت جهة الشباب الي يجهزون الجلسات وعدة العشاء
: يامصعب تعال جاي

جاء مصعب :سم يابو وليد
ابووليد : ابراهيم خطب عبير من ابوك وابوك يقول
مايعطيه كلمه الابرضاك الله الله باختك لاتردي نصيبها

مصعب رفع راسه لابراهيم واهو يعرف ان اخته صعبه
ويبيلها واحد عاقل وحنين زي ابراهيم : انت الي اخترتها
والا عمي الي لزم عليك فيها

ابراهيم : انا الي اخترتها وابوي لهالحين مايدري
عن الخطبه كلها

مصعب : وانا موافق

ابومصعب : وانا موافق والراي النافذ لابوي

التفت ابراهيم لجده : وش قلت ياجدي

ابتسم ابومطلق ابراهيم طيب وسمح وباله وسيع
وانسب لعبير من راكان بس اه من هالراكان
ماني بسافطه لبنات الغرب بنات خواله اولابه
: ياعساه مبارك وانا جدك وين ابلقى لعبير احسن منك
ابتسم ابراهيم وقرب من جده قبل راسه وراس عمه
ثم راح لشباب واهو مبسوط ماكانت على البال
بس الحين يحس انها صارت تنتمي له

ابومطلق وابومصعب نادو مصعب وراحو يشوفون
عبير بعد الي صار معها
ادخلو المجلس الموجود في قسم النساء ونادو عبير
وقيدها اسكتت ونست الموضوع بس اول مادخلت
المجلس وشافت مثلث القوه قائم امامها حتى انهارت
من جديد وجتهم تبكي اوربما تبكبك اجلست قدام
ابوها وجدها الي متكين على نفس المركى في جلسه
ارضيه حتى تلفت انتباهم مع بعض ومانست
ان تتفقد عيني مصعب بعد كل كلمه والثانيه
: اييييييي جدي شفت وش سوى فيني راكان راح
وتركني في المسجد

ابومطلق يربت على كتفها : يابوك ماكان يقصد
شاف خواته في السياره ومشى ونساك

عبير:يكذب هومخليني عمد حتى يوم ارجعو قال
كنت اتمنى القاك مخطوفه

الجد ابتسم وابومصعب عقد حواجبه بغضب هويدري
انه مجرد كلام ماله صله بالواقع بس مجرد انه يقوله
لبنته شي يزعل

مصعب عصب :جعلهم خواته الي ينخطفون

ابومطلق رفع راسه لمصعب بحده : لاتنسى ان خواته
بناتي مثل اختك بالضبط وانت تدري انه حتى لوقال
هالكلام مايقصده
مصعب استحى من جده : ماكنت اقصد
ابومصعب التفت لولده : انسى السالفه هذي والااشوفك
تدخل في مشاكل مع ولد عمتك على هرج مايسوى
عبير ازعلت : ياسلام يخليني في المسجد وتسكتون له

كلامها زاد عصبية مصعب يكره يشوف زعلها ويكره
اكثر الي يزعلها : ومن قال بسكتله بكسر راسه

عبير انبسطت حدها

وابومطلق عصب جد : وش اتكسر راسه عليه
السالفه تصير مع اي واحد معك والامع ابوها
نساها ماتركها علشان تكسر راسه على قولك

مصعب : نساها ليش يطول السانه

ابومصعب : عاد هوكذا ان ماحذف كلمه على الماشي مايرتاح بس الوكاد انه مايرضى على بنت خاله انها تنخطف

ابومطلق وابومصعب ابذلو جهدهم لحد ماقنعو مصعب
يسكت عن السالفه وارضو دلوعتهم بطريقتهم وسكرو
الموضوع

بعد مارجعو لرجال راح ابومطلق لشباب الي
يشتغلون وكان يبي راكان

راكان كل مارفع راسه شاف جده يناضر فيه
عرف انه يبيه واكيد علشان سالفة عبير
ترك تجمع الشباب وراح يتمشى الحاله وجده الحقه

ابومطلق واهو ياقف مقابل لراكان
: من علم ابراهيم بسالفة ناصر

راكان ابتسم وقرب لجده اكثر : بنتك واخذت الي يستاهلها
وولدك اخذ الي تستاهله ثم اتسعت ابتسامته
وانا طير حر ماوقع الى على الغصن الي اختاره
ولا اكل غير صيد مخلابي

ابومطلق ابتسم له :وغصنك الي توقع عليه ماله مكان
في اشجرتنا

راكان رفع اكتوفه علامة مدري : لحد الحين مافكرة في
الزواج والااخترت ابي اركز في مشروعي وابني
مستقبلي والزواج لاحقن عليه

في الحرس الوطني علي قيده واصل من امس
وفي المقلط الي ام ابراهيم تتنفس فيه
النايفه جالسه وحاطه مطلق في حضنها تلاعبه
: وازين جدي ثقل مايعطي وجه ياولد اضحك
اغ اغ وبدت تناغيله وتمسح على خده باصابعها

انوار : تقولين له جدي وتبينه يضحك انا قايله لكم
الاسم اسمي هاتي انا اقوله ياعمي ويضحك

النايفه بمزح : لاوالله مانبي عمك ناقصين نتغطى حتى
فالبيت

ام ابراهيم بضحكه : مانا متغطيات بنطرده هو وبنتاخيه
في المجلس ونفك اعمارنا

علي : هالحين ورعكم ذا تبونه مثل جدي والاخوي مطلق

انوار التفتت على ابوها بزعل : بابا وش فيك على
اخوي ترا جدك واخوك كانو ورعان زيه وان شاء الله
اخوي يطلع موب زيهم وبس الااحسن منهم

علي : ههههههه خلاص لاتزعلين علينا انتي واخوك
الله يقويه ويطلع زي اسمياه

النايفه تذكرة : على طاري المجلس قومي انوار
خلي الشغاله تروح تكنسه وبخريه قبل يوصل انس ومناير

انوار : ان شاء الله وقامت

علي : تبون شي اجيبه لكم قبل يوصل الرجال

النايفه : لا كل شي موجود