رواية صيته ظبي النفود بقلم نبض أفكاري

اليوم الي بعده في الحرس الوطني
بيت ابوابراهيم

ام ابراهيم يارب سترك من البارح وانا احس بالطلق
يروح ويجي والحين بدا يزود علي وكاد انها الولاده
ابراهيم على وصول بس انا ماعاد اقدر استحمل
اكثر من كذا يارب تجيب ابراهيم يارب
:اه اه انوار تعالي انوار
انوار في المطبخ تجهز القهوه لابراهيم الي يتوقعون
وصوله في اي لحظه
هذى صوت امي يارب سترك ركضت لصاله لقيتها
ماسكه اسفل بطنها وتوجع لا لايكون بتولد وانا ماعندي
احد ياربي انا وش اسوي الحين

ام ابراهيم شافت انوار واقفه تطالع فيها بخرعه
: روحي جيبي عباتي ونقابي وجيبي شنطتي
الي جهزتها للمستشفى ودقي على الاسعاف
يجون ينقلوني للمستشفى بسرعه

انوار ياويل قلبي امي جتها الولاده انا وش
اسوي هي وش قالت احس مخي انشل
من الروعه وماعاد ادري وش اصلح رحت اركض
للمطبخ اخذت ابريق القهوه من على النار وبديت
اصب القهوه في الترمس اف انا وش قاعده اسوي
ماقالت اقهوه اجل وش تبى قمت اتلفت في المطبخ
مثل المجنونه لحد ماصحتني صرخة الخدامه
: ماما واجد تعبان سرعه جيب عبايه انت مايسمع

انوار ايه صح العبايه رحت اركض مع الدرج جيت
باخذ عباية امي وخميت ثوب ابوي المعلق جنبها
ومالاحظت الافي نص الدرج ياربي وش جاني انا
رجعت اركض لغرفة امي وانا ابكي خايفه على امي
ولاني عارفه كيف اتصرف رميت ثوب ابوي على السرير
واخذت عباية امي والشنطه الي كانت مجهزتها على
طرف التسريحه ونزلت اركض سمعت صوت رجولي
جاي من الصاله وشهقت بفرحه هذا صوت ابراهيم
الحمد لله انه وصل في الوقت المناسب

ابراهيم وصل البيت مشتاق لامه وانوار بس افجعته
الخدامه الي افتحت له الباب واهي تصرخ عليه
بسرعه مدام ولاده سرعه

دخل يركض شاف امه جالسه على الكنب ماسكه اسفل
بطنها بيديها الثنتين وتوجع قرب منها ابراهيم
وجلس في الارض عند ارجولها وهوخايف عليها
:يمه وش فيك
ام ابراهيم
:تطمن مافيني شي ماغير الولاده ودني المستشفى
بسرعه
اوصلت انوار بالعبايه والشنطه لبسوها عبايتها
والبست انوار عبايتها وودوها لطواري مستشفى
الملك فهد

ام ابراهيم كانت جاهزه للولاده وكلها عشر دقايق
واطلعت عليهم الدكتوره تبشرهم انها جابت ولد
وانها طيبه وصحتها زينه والمولود كذالك صحته ممتازه

ابراهيم ياالله واخيرا جالي اخو ولد مع ان فارق
العمر بيني وبينه كبير بس ياني فرحان فيه
بسميه مطلق على اسم جدنا الكبير باروح ابشر
ابوي واعلمه اني سميته وان شاء الله يوافق
على الاسم الي اخترته
انوار ياربي لك الحمد اخيرا امي اولدة بسلامه
وجابت لي اخو واو صار عندنا نونو صغيرون
ودي اسميه مطلق على اسم عمي مطلق ويارب
يطلع مثله عمي مطلق انسان اخلاق وهيبه ويجنن

انوار التفتت على ابراهيم الي الوناسه شاقه وجهه
: انا بسميه
ابراهيم
:موب على كيفك انا بسميه
انوار
: مالي شغل انا حليت الاسم قبلك
ابراهيم
:لوتموتين ماحد يسميه غيري
انوار انقهرت منه واتعرف ان ابوها مايرفضله طلب
تكتف بزعل :ووش بتسميه ان شاء الله

ابراهيم ابتسم اخيرا استسلمت
:باسميه مطلق
انوار اضحكت وصفقت بيدها
:واو نفس الاسم الي انا اخترته مطلق على اسم عمي

ابراهيم بعناد
:لا مطلق على اسم جدي الكبير
انوار
:على اسم عمي
ابراهيم
:على اسم جدي
:عمي
:جدي

في الجنوب
النايفه تجهز بتروح للاستراحه الي في مزرعة ابومطلق
العائله مجتمعه كلها اهناك علشان ال محمد الي
جوهم امس اسمعت التليفون يدق راحت بترد
وشافت علي سبقها ورد اوقفت تسمع من المتصل
توسعت اعيونها من الخبر الي سمعته وحجم الفرحه
الي شافتها على وجه علي حست للحظه بحزن على
حالها لاكنها استدركت نفسها الحمد لله على كل حال
الله يهنيهم بمارزقهم ويرزقني من واسع فضله

علي التفت على النايفه بعد ماسكر التليفون
:ابشرك ام ابراهيم جابت ولد

النايفه ابتسمت له
: الف مبروك ويتربى في عزك
علي تذكر حزنها على جنينها الي افقدته
قرب منها وحظنها وباس جبينها
: الله يرزقك بالولد الي تتمنينه
النايفه :امين يارب كأني سمعت ان ابراهيم سماه

علي بابتسامه
: ايه سماه مطلق على اسم جدي وانوار تقول انها
مسميته مطلق على اسم اخوي مطلق
النايفه : هههههههههه وانت على من مسميه
علي : انا بروح لابوي واقوله مسميه على جدي
والاجيت مطلق قلت تراني مسميه على اسمك
النايفه بضحكه : اجل انا بخرب عليك واقولهم ان
ابراهيم الي سماه مهوب انت

في استراحة العائله
وفي مجلس الرجال كل ال مطلق مجتمعين
في المجلس الواسع دخل عليهم علي
وبصوت عالي علشان الكل يسمعونه
: ابشركم جالي ولد وسميناه مطلق
الفرحه عمت الجميع والتبريكات انهلت عليه
من كل جهه
مطلق ابتسم : عسى نية الاسم على اسمي
ضحك علي : الاسم مشتركين فيه انوار وابراهيم
ابراهيم نيته لجدي وانوار نيتها لك
مطلق ضحك : بعد قلبي انوار تبشر بالسمايه لها الحالها
ابومطلق بضحكه : ابوي هو الاصل وانت بكبرك مسمينك
على اسمه ويبشر ابراهيم بالسمايه
علي ضحك : افا السمايه راحت الانوار وابراهيم والولد اولدي انا
وليد بفزعه لابراهيم : والله ياخالي اذا على سالفة ولدك
ام ابراهيم اولى منك بالسمايه هي الي شالت الولد واتعبت عليه وابراهيم هو الي سماه وانت متكي عندنا
هنا لاشلت والاسميت

انس :صادق وليد عمتي ام ابراهيم الي شالت وابراهيم
الي سمى والسمايه لهم

علي التفت على انس وعقد حواجبه :حتى انت معهم علي

انس بضحكه : وش اسوي بافزع لعمتي انت تقول لاتناديني عمي خلاص عمتي اولا بالفزعه

في اليوم التالي
الشرقيه

اهل الرياض قيدهم اوصلو من الظهر وضيفتهم قيدها
تمت غدا والحين الوقت بعد العصر والناس الي
احضرو الغداء قيدهم مشو كلهم ومافي بيت ابونمر
الا اهل البيت واهل حمود واهل ابوفهد والرجال
كلهم في الاستراحه مضاوي من اسبوعين ماتطلع
من بيت امها علشان كذا اول ماتغدت امها ارجعت
لها شيخه لمى جو ابيوت عمامها والجيران يحظرون
الغداء ادخلت غرفتها وبقت فيها لحد ماراحو الناس
كلهم واطلعت
كانو جالسات الحريم في غرفة الجلوس يسولفون
طلت عليهم ام نمر : صيته محمد دخل سيارتكم
في الحوش وراح للاستراحه يقول خلهم ينزلون
قشهم من السياره

صيته : الحوش فيه احد
ام نمر : مافيه الاعناد وزياد نافخين روسهم الحمادين
يردون السلام من بعيد يعننا كبرنا

غزيل :ههههههه ماشفتي شي هالحين مايدخلون
قسم الحريم لاصار عندنا احد

صيته : عناد اخر مره جانا عمي يهاوش بناته يقول
تغطن اذا طلعتن عندي انا وزياد

شيخه : اما عاد هالنتيفات مسوين فيها مراجل
انا اوريهم بروح امطخ كل واحد فيهم بوسه تشق خده

ههههههههههههههه ضحكه جماعيه

قمرا : روحي وانا بعلم المعرس

شيخه بمزح :خالتي لاتصيرين حريشيه خليني املى عيني من الزين قدام ينشب في حلقي المعرس

صيته قامت واقفه :اقول امشي معي ننزل الزهاب
لاتسوين فيها عروس

شيخه بضحكه :ياعزتيلي ماعند ام نمر عروس بتكدني
لاخر لحظه شكلهم بيزفون المعرس وانا انشف ايدياتي
عن صابون المواعين

ام نمر بمزح : اي نعم ماعندي دلع وكلام فاضي
لارحنا للقاعه قومي على البيت خميه وسنعيه واغسلي
المواعين ولو تجهزين فطور اليوم الي بعده وتدخلينه
الثلاجه مسويتن خير

هههههههههههههههههههههههه ضحكه جماعيه

ساره : وش ذا ياخاله المفروض معطيتها اجازه من شهر

ام نمر : شفقانتن عليها قومي بدالها اجازات مافيه

ساره : هههههه تبشر شيوخه بعزها لابغيتي شي
ناديني مكانها

شيخه وصيته سوا : اشهدو هاه شغل المطبخ عليها

غزيل : انتن ياهالثنتين العوب ماتجوز فيكن الشفقه

قمراء : افزعت لبنت اخوها غزيل وابنيت اخوي وخويتها
وش قاصرهن يوم انكن بتكدنهن في المطبخ

شيخه :ههه بعدي خالتي قمراء

صيته :يمه على اساس بنت اخوك ماهي بعوبا

غزيل تمسح على شعر ساره جنبها : بسم الله على بنية
اخيي من العوابه

ساره تلعب دور البنت الخجوله وتنزل راسها بابتسامه
خجوله

وشيخه اسحبت صيته بيدها : اقول امشي ننزل زهابكم
قبل اصدق ان اسويره البنت الدلوعه الرقيقه

هههههههههه ضحكه جماعيه

صيته وشيخه راحن ينزلن الزهاب ولقن زياد وعناد اهناك

عناد بتذمر : الحمد لله على السلامه كان طولتو بعد ليش
مستعجلات

شيخه استدارت بترجع : شكرن بنكمل القهوه ونجيكم

عناد : اقول بلا سماجه انتي وياها وخلصني قبل
اقفل السياره واطلع واخلي زهابكم مكانه

صيته تعرف عناد حامي ماعنده وقت : نمزح معك يالدب
نزلي الاغراض وانا ادخلها

شيخه قربت منهم : قبل تنزل الاغراض تعال سلم علي

عناد عطاها نظره استنكار :استحي يابنت عيب تسلمين
على الرياجيل

شيخه فتحت عيونها على وسعها :عمرك سبع سنوات
مسرع صرت رجال

عناد حس انها مستحقرته وعصب حط اصبعه السبابه
على راسه : المرجله هنا
صيته تناظر في عناد وتشجعه بنظراتها وحركة راسها

وشيخه طق في راسها الا تسلم على ذا البزر الي
مسوي رجال قربت منه اكثر وامسكته بيده
واول مانزلت راسها بتسلم عليه صفقها كف بيده
الثانيه هنا صيته تدخلت وفكت يد شيخه عنه وخلته
يروح لرجال اما شيخه بقت مكانها مذهوله من الكف
الي ماكانت متوقعته ابد
زياد مازال واقف يراقب الوضع وحاقد على شيخه
الي زعلت اخوه وينتظر صيته تخلص من السياره
علشان يقفلها ويودي المفاتيح لمحمد

صيته :زياد اركب داخل السياره وعطني الاغراض

شيخه تبي تختبر زياد وتشوف يسلم والايسوي مثل
اخوه : زيادي حبيبي تعال سلم علي

زياد ناظرها بحده : تبغين كف ثاني صح

هنا شيخه افرطت ضحك : لاوالله مشكور كف واحد
يكفي

صيته بضحكه :تستاهلين ماجاك قالك مايبي يسلم
تغصبينه بعمرك ليه
شيخه : اقول انثبري انتي الثانيه تراه بزر
صيته : بس حنا في البيت انعامله على انه رجال يفهم
علشان نزرع فيه الثقه وحب المراجل وتصير اعزومه قويه
شيخه : انا اشوف لو تخلون ذا البزر يعيش طفولته
اصرف لاحق على المرجله
صيته : العود من ركزته الاولى
شيخه بتذمر : ياجعلك ماتاليني
صيته انحنت على الشنطه الي نزلها ازياد وارفعتها
من الارض وبما ان لها عجلات بدة تسحبها وراها
شيخه اخذت شنطه ثانيه ودخلتها معها وزياد بعد
مانزل كل شي في الحوش سكر السياره وقفلها
وراح للاستراحه

عند مضاوي جالسه في غرفتها وحدها طفشانه
ياالله صارلي اسبوعين وانا منطقه في بيتنا
زهقت من القعده الحالي بس وش اسوي
استحي اطلع اليوم الظهر جوني جارات
خالتي ام نمر سلمو علي ياني بغيت اموت من الفشيله
البنات اجلسو عندي اشوي والصدق اني استانست
وانا اسمع مزحهم وسوالف بس استحيت اشاركهم
السوالف واهم يوم شافوني بس ساكته ومنزله
راسي للارض قامو اطلعو على بالهم ضايقوني
وانا والله ودي بجلستهم عندي ماشاء الله على شيخه
ماخذه راحتها تضحك وتسولف والاعبرت احد
ليتني اقدر اسوي زيها

في الحرس الوطني
بيت علي
ام ابراهيم اطلعت من المستشفى هي وولدها
وحطت لها انوار طراحه ومفرش في الصاله
وهذي هي جالسه عليه وانوار وابراهيم
جالسين عندها يشوفون المولود ويحاولون يصحونه
من النوم يبون يشوفون اعيونه
ابراهيم يظغط على اخدود مطلق باصابعه بشويش
:هي مطلق قم ورنا عيونك طلوق قم وش الكسل ذا دايم نايم
انوار تسحب يد ابراهيم عن وجه البيبي : وخر عورته
وبدت تفك المهاد عنه علشان يصحى

ام ابراهيم ابتسمت :اقول اتركو الولد عورتوه
ابراهيم : يمه بس بنشوفه
انوار فكته وبدى يتمغط وانوار وابراهيم استانسو
وصارو يلمسون ايدينه وخدوده يبونه يفتح والولد
في سابع نومه
اخذته ام ابراهيم منهم وارجعت مهدته وحطته في سريره
ينام

: مانك رايح لعمامك
ابراهيم : وشلون اروح واخليك الحالك
ام ابراهيم : اولاده والحمد لله ولدت وماعاد احتاج شي
وان احتجت اخواني اقريب رح احظر العرس مع اهلك
واخذ انوار معك
انوار : مستحيل اروح واخليك الحالك يمه وبعدين
عمامي كلهم بيجون في تمايم مطلق ونشوفهم
ابراهيم : اخاف تحتاجون شي امراجعة مستشفى والاشي

ام ابراهيم : لا مافيه مراجعه والاشي رح بس لعمامك
وسع صدرك واحظر العرس وحنا ماعلينا اخلاف
وابوك بيجي بعد العرس على طول وبتجي معه النايفه

ابراهيم كشر على طاري النايفه : يمه ليه خليتيها
تجي في بيتك اخاف تكدر خاطرك ترى لو اشوفها
تغلط عليك لو بحرف ذبحتها وشربت دمها

ام ابراهيم : لاتشيل هم ماهي مكدره خاطري
والاشي الحرمه جايه بتتعالج ولاعاد بيني وبينها
مشاكل

ابراهيم : اجل شوفو وش ناقصكم من اغراض علشان اجيبها لكم قبل امشي

انوار : عادي اروح معك لسوبر ماركت
ابراهيم : وامي تقعد الحالها
ام ابراهيم : ماعليه اخذها معك انا بنام قبل يصحى
جدكم ويزعجني

ابراهيم وانوار اضحكو هههههه
انوار : يمه ذا عمي مهوب جدي
ابراهيم : ذا جدي موب عمي وانا الي سميته
ام ابراهيم : اقول اطلعو عني قبل اغير اسمه

في الشرقيه
الاستراحه
فهد ونمر جالسين جنب بعض ويسولفون
نمر :حرمتك الثانيه اخت وليد

فهد : ايه اخته

نمر : وانت مسرعك اتطلق وتتزوج

فهد : ابد والله الحرمه الاوله ماناسبتني قلت اطلقها
قبل يصير بينا اعيال احسن لي ولها
وتزوجت بنت خالي

نمر : ومتى عرسك

فهد : بعد سنه

زياد جاء فهد وبدى يتكلم معه بشويش
: عمتي تقولك جب السياره بننزل اغراضنا الي فيها
فهد التفت على نمر
: اهلي يبون اغراضهم الي في السياره
نمر : قم اجل نروح يمهم انا بعد بشوف اذا اهلي يبون
شي للبيت

عند الحريم جالسات في الصاله وقدامهن خضره يقطعن
سلطه وخضرة ايدام يجهزون للعشا
ازياد دخل ووقف عند باب القاطع (الباب الي يفصل قسم
الرجال عن قسم النساء )
ونادى : ياساره قومي دخلي اغراضكم وترا فهد ونمر
عند السياره
ساره التفتت على صيته : صيوت تعالي معي
صيته : اسفه مدام العيال فيه ماني رايحه
قمراء : تذكرة موقف فهد في ملكت وليد واعذرت صيته
: اجلسن كلكن انا الي باروح ادخل الاغراض وارد على
نمر

في الجنوب
والليله عرس ترفه ومفلح
مناير سبق وحاولت في ترفه تجيب لها فستان ابيض ومسكة ورد وطرحه لاكن ترفه ارفضت واعتبرته شي
منقود واصرة انها تلبس لبس العروس التقليدي
ثوب مطرز تطريز فخم والوان زاهيه وتزين شعرها
بالريحان والبعيثران ومحزم الفضه والخواتم والحجول
ولأن مفلح من عائله غنيه كانت كل حليها من الذهب
بدل الفضه

بعد ماجهزت ترفه استغلت انشغال مناير عنها ولبست
احزام السلاح بدل احزام الذهب الي كان المفروض
تلبسه

النايفه جت لمناير :بشري جهزت ترفه
مناير :ايه جاهزه تعالي شوفيها
ادخلت مناير والنايفه عند ترفه
قربت النايفه منها وبدت تبارك لها بابتسامه عريضه
اختفت فورا لمى شافت احزام السلاح على وسطها
مناير استغربت ان النايفه انخطف لونها فجأه ناظرت
وين ماعين النايفه متسمره واشهقت بفجعه
: خالتي وش ذا انتي صاحيه فيه عروس تلبس
اسلاح
ترفه ناضرتهن بحده : اسلاحي قطعه من جسمي
مايفارقني ابد
النايفه : وش خليتي لمفلح تبيني اكلمه ينزل اسلاحه
دامك متسلحه هنا
ترفه فاهمه قصد النايفه : مفلح على عيني وراسي
واسلاحه عليه واسلاحي ماهو بناقصن من قدره شي
مناير : خالتي تكفين نزلي هالسلاح وفكينا من المشاكل

ترفه بعناد :اسلاحي ماينزل لو على موتي

النايفه راحت تنادي سلمى تشوف المصيبه ذي

جت سلمى واهي ماهي مصدقه الي تسمعه لين شافت
بعينها : وش لازمت السلاح ياترفه

ترفه : وصات ابوي وعز الي ماله عزوه ورفيق مايفرق بيني
وبينه الاالموت

سلمى : ابوك الله يرحمه سلمك لواحد من ال مطلق
واكتفى به عز وعزوه وهالحين كل ال مطلق عزوتن لك
وانتي اخذتن واحد من روس ال مطلق وعيب في حقه
وفي حق ال مطلق كلهم انك تنزفين له واسلاحك في
وسطك وش تبين الناس تقول عنا ماوراها ارجال يحمونها
متقلدتن اسلاحها في عرسها

ترفه بغضب :تعرفين ان ماهوب هذى المقصد ابوي
طول عمره يوصيني على اسلاحي حتى وانا راقده ارقد
واهو تحت مخدتي مقدر اتركه بين يوم وليله

سلمى : تعوذي من ابليس ولاتحطينا في مشكله مالها
حل مفلح مستحيل يدخل عليك واهو يشوف اسلاحك
في وسطك هذي اهانه اله تبينه يطلقك من عند الباب
وش بيفيدك السلاح ساعتها

سلمى والنايفه ومناير تعبن حيل مع ترفه لحد ماقدرن
يقنعنها تنزل السلاح واخذته مناير وخبته في شنطتها
حتى تظمن ان ترفه ماترجع له مره ثانيه

ترفه اخذو اسلاحي وحسيت بالضياع اول مره
يفارقني هالسلاح من اكثر من اربعة عشر سنه
ياويل حالي مغير اتفقد وسطي كل اشوي
فاقدته حيل وبدي الخوف يدخلني
وصايا ابوي تجمعت علي وبدت تقرع اضلوعي
وتقول انتي بدون اسلاح انتي ضعيفه بيهزمونك
الرجال
دخل مفلح عند ترفه واهي ماتدري من دخل معه
والاوش الاغاني الي كانو يتغنون فيها والاهي
قادره تشوف شي من مظاهر البهرجه والفرح الي حولها
وصايا ابوها قامت تضرب في مخها على شكل افلاشات
سريعه مرعبه انتبهي لاحد يغدر فيك


الظهر ضعف خلي وحده من عيونك في ظهرك


احترسي


الرياجيل مايبون الا شرفك لاخذوه داسوك تحت الرجلين


الي يقرب منك اخذي روحه قبل ياخذ اشعره من راسك


اسلاحك الدرع الي يحميك


السلاح قوه


السلاح عزوه


خليك قويه


الي يمد يده عليك اقطعيها


خلي طعنتك قويه وسريعه


اظربي بالخنجربيد ثابته وقويه


الرجال ذيابه لاتامنين قربهم


احذري ......


انتبهي .....


اصحي .......


فتحي عيونك ......


لاحد يلمسك ...


لاحد يقرب ....
لا.....
لا.....
لا....
يدها بدت تدور السلاح في وسطها من غير شعور
تحس انفاسها بدت تتسارع وتحفزها يوصل ذروته
السلاح وينه خنجري وين ماني قادره اوصله
رجال يقرب مني لازم ادافع عن نفسي بسرعه
خنجري وين مسدسي وين اسلاحي وين قامت تحوس في وسطها تدور السلاح من غير
شعور وتوترها واصل لذروه

مفلح استغرب حركت ايدينها وتوترها الواضح
وتذكر كلام انس مناير فهمت انس ان ترفه
متعوده على السلاح وان ابوها مشدد عليها
ماتنزله وماتثق في الرياجيل ابد وقالتله يفهم
مفلح هالكلام علشان يكون حذر في تعامله
معها

قرب منها مفلح واهو يشوفها كل مالها تتوتر اكثر
وحركتها تزيد حتى انها بدت تلفت في الغرفه
يمين يسار تدور شي تحمي فيه نفسها
طاحت عينها على فازت الورد الي رتبتها مناير
على الطاوله قدامها مفلح استوعب نظرتها
ومن حسن حظه انه قريب حيل منها
تقدم لها بسرعه وضمها لصدره واهو يكتف ايدينها
بايدينه الي ضامتها وشاده عليها بقوه حتى ماتقدر
تفلت منه حاولت بكل قوتها تفك نفسها اعجزت
حاولت تظربه بيدينها اعجزت حاولت تدفه وتتخلص
منه عجزت مفلح اقوى منها بكثير بدت تحس انها
مقيده في جذع اشجره من كثر ماهو ثابت رغم
محاولاتها العنيفه لتخلص منه ياعزتي لجذع الشجره
منه هذا جدار متحرك
مفلح بدى يتكلم معها ويحاول يهديها :مبروك عليك مفلح
ترفه : الله ياخذه والايبارك فيه فكني وخر عن دربي
ماعاد ابيك والاابي عرس
مفلح : هههههههههههههه طحتي في يدي خلاص
هههههه قصدي طحتي في حظني

ترفه وصايا ابوها وتجردها من السلاح لاول مره من اسنين
طويله حسسها برعب حقيقي
: وانا مبي هالجدار الي رابطني فيه فكني خلني ارجع لبيتي

مفلح استغرب كل هالخوف الي سيطر عليها واهي مطلقه
صحيح ماقعدة على ذمة علي الاثلاثه ايام بس اسمها تزوجت
: افهم من كذا ان حضن الي قبلي لين اهوين

ترفه تحس عقلها انشل ماعاد تعرف تفكر والاحتى تتصرف طق في راسها فكره تسب ولد عمه يعصب
وتثور نخوته ويطلقني وافتك وارجع لسلاحي وماعاد
افارقه ابد
: ولد عمك حمامه مايقدر يقدم على شيهانه تنتف ريشه
(الشيهانه نوع من انواع الصقور )

مفلح :ههههههههههههههههههههههههههههههه
الشيهانه طاحت بين مخالب صقر حر واهو الي بينتف ريشها

(الصقر الحر افضل انواع الصقور وافضل من الشياهين )

ترفه بدت تشتعل توتر وخوف وكهربا تضرب في جسمها
بسبب وجودها في حضن المتوحش ذا ماتدري وش
هالاحساس الغريب زاد توترها حطت كل تركيزها
على سلاح مفلح الي في وسطه تحاول تسحبه

مفلح منتبه لكل حركه تسويها وبحركه سريعه فصخ
الحزام ورماه ابعيد عنها وشالها لغرفة النوم واهي
تحاول كل جهدها تنفك منه ومفلح ياجبل مايهزك ريح