رواية صيته ظبي النفود بقلم نبض أفكاري

في بيت ابووليد
وليد وهلا جالسين على الطاولات الي قدام المطبخ

وليد :اسمعي كلمي صيته وخليها تجي تتعشى هنا الليله

هلا ارفعت حاجب :ومن قال اني ابي اتعشى مع صيته

وليد تنرفز :هلا بلا سماجه ابي اتكلم معها ضروري

هلا تريح دقنها على باطن كفها ومرفقها على الطاوله
: اسمع عاد احكاية اني اصير مثل الاطرش في الزفه
وانفذ الي تبي من غير مافهم وش السالفه انسى
ياتقولي وش صاير بينكم يادبر عمرك بعيد عني

وليد انقهر منها وبصرخه : هلا وتبن ترا ماني رايق لك
قومي كلميها اشوف

هلا حست ان وراه شي اف اكيد ماقدر يجمع المهر
هو متكتم على سالفة المهر ذي
قامت واهي تقرب وجهها منه وبنفخة اهياط :طيب
ابشر طال عمرك بكلمها اف

عند صيته قيدها ادخلت البيت ونزلت عباتها
مرت على امها في الصاله تخبرها انها ارجعت
وقبل تطلع من الصاله رن التلفون وردت اغزيل
صيته ماهتمت وراحت للمطبخ بتسوي لها قهوه
ممداها تدخل المطبخ الا امها تناديها
طلت عليها مع مدخل الصاله :نعم
غزيل :تعالي كلمي هلا
ادخلت صيته الصاله واخذت السماعه من امها
:هلا هلاوي وشلونك
/بخير اسمعي تعالي تعشي عندنا بكره خميس وانا حدي
زهقانه من الدراسه تعالي تكفين خل نستانس
: تعالي انتي وحلا انا ماعندي نيه اطلع من البيت نهائي
/ يوه ياسمجك تعرفين الست الناظره اليوم محمره العين
لو اقول بطلع تحكم علي سجن سنه كامله

: طيب زين يالي قلتيلي ان الست الناظره مطلعه وجهها الثاني اعطيتيني سبب قوي علشان اقعد في البيت
وفي نفسها صاحيه انا اجيكم واشوف ذاك المغرور

/صويته وجع اقولك بابكي من الطفش وش النذاله الي فيك

: هلا من جد مالي نفس اروح مكان

هالكلمتين طاحت في اذن حمود الي توه دخل الصاله
وهو ملاحظ بنته في الفتره الاخيره بس ماسكه اخوانها تذاكر لهم اوتذاكر هي واليوم اخوانها عطلو
واهي مبين خاطرها شين
:الي تكلمك هلا
ارفعت صيته راسها وشافت ابوها يمشي جهتها
:ايه يبه هلا

حمود مد يده لها واعطته السماعه
:السلام عليكم
/هلا والله وعليكم السلام
:هاه كني سمعت طاري عزيمه
/اي والله تكفى ياعمي جب صيته تبات عندنا ترا بنتك
بيصيبها اكتئاب من مقابل الكتب
:هههه يعني العزيمه لصيته الحالها
/افا ياعمي فيه احد ينعزم في بيته انت تدف الباب وتدخل
:هههه طيب علشان دفة الباب هذي بجيب صيته
/ يابعد راسي انت والله ابشر اخلي ام وليد تزين
احلى عشى لاحلى عم في الدنيا
: لاوالله الله يسلم يدين ام وليد انا معزوم عند رجال بس
بجيب صيته

خلص حمود المكالمه ورجع السماعه مكانها وصيته باقي
واقفه جنبه ومتضايقه ان ابوها قرر يوديها بيت عمها

التفت حمود على بنته بحب وحنيه وحط يده على راسها
وبدى يمسح عليه واهو يناضر في عيونها بابتسامه
: وش فيها قلب ابوها خاطرها شين
صيته نزلت راسها واهي خايفه يبدى يستدرجها بلكلام
ثم تقوله الاولي والتالي
:ابد يبه بس عندي ضغط ادراسه
/ علشان كذا ابيك تصعدين لغرفتك تبدلين ملابسك
وتجين اوديك بنات عمك مايصير تقعدين اربع وعشرين
ساعه بين الكتب روحي استانسي وجددي نشاطك
صيته عارفه ان ابوها قرر يوديها وانتهى علشان
كذا احسن شي تصعد تبدل قبل يبدى يجرجرها في الكلام
:ان شاء الله يبه عشر دقايق واكون جاهزه

عند هلا ارجعت لوليد :كلمتها وعيت تجي

وليد خبط الطاوله بيده بعصبيه :اف واخرتها

هلا : هي عيت بس عمي اخذ السماعه منها وقال بيجيبها

وليد رفع راسه لها بقهر ووده يصكها بكاس المويه على
قد مالعبت باعصابه
:عمي بيجي معها
/لا يقول معزوم بس بيجيبها
: طيب انا بطلع الحين ساعه كذا وارجع اياني واياك
تدري اني الي قلت لك تنادينها وبعد ماجي ابيك
تشوفين طريقه اتكلم معها من غير ماتدري امي
/والله شف تبي تشوفها معي من عيوني ادبرك
اما اني اطلعها لك الحالها اسمحلي هذي
خيانه
: بلا كلام ماله سنع ولاتخافين بكلمها قدامك بس ياويلك
تدخلين في الكلام بحرف والا تطلعين منه حرف
/ خلاص ماشي

قام وليد طلع وهلا بقت جالسه
ياترى وش يبي وليد من صيته شكله ماجمع المهر
طيب اذا قطع حبل افكارها جلوس حلا معها على الطاوله
حلا : وش عندك مسنتره هنا الحالك
هلا ارفعت راسها لحلا وبدت تتأمل ملابسها تيشرت
ابيض مرسم بدرجات الوردي وبنطال جنز وشعرها
لامته على ارقبتها بربطه
حلا تحرك يدها قدام عيونها :هيه خير وش فيك
قمتي تمقلين فيني
هلا وخرت يدها :تكفين عاد من زينك اتمقل فيك
احاول اطرد الافكار المزعجه من راسي
حلا قامت من الكرسي الي كانت جالسه عليه واجلست
في الكرسي الي جنب هلا ولقتها وجهها
: ووش الافكار المزعجه علشان اطردها معك
هلا تجاهلت السماجه : قبل شوي كان وليد هنا وطلب مني اكلم صيته واقولها تجي تتعشى هنا وكلمتها
واهي عيت بس عمي حمود سمعها تكلمني واخذ السماعه
منها وقال انه بيجيبها انا حاسه انه صاير بينهم شي
حلا : طيب يمكن ماقدر يكمل المهر ويبي يسئلها اذا افتحت الوصيه الي معها
هلا تهز راسها بلا : ماراح تفتحها قبل وقتها
هنا اسمعو الجرس يضرب
اسمعي وليد مايبيها تدري انه الي طلب منا نناديها فاهمه
حلا :فاهمه قومي نستقبلها

في بيت حمود
رجع لبيته بعد ماوصل صيته لبيت عمها لسى بدري
على العزومه الي بيروح لها باقي ماصلو المغرب
دخل البيت لقى اغزيل تقهوى في الصاله هي
وسالم وعناد وزياد تو شافهم يلعبون في الحديقه
اما محمد مداوم في المكتب
جلس بهم وغزيل صبت له فنجال قهوه ومدته عليه
:وش فيك متضايق
رفع راسه لغزيل فكر اشوي وتنهد : صيته خاطرها شين
وماتبي وليد انا حاس فيها كل ماقرب وقت ملكتهم
زادة الضيقه في وجهها
غزيل : ادري من صغرها تكرهه من بد اعيال عمها
الله يسامح عمي ضيق عليها الوسيعه
مع اني اتمناه الها وياما سايستها علشان تقنع فيه
مير راسها يابس ومايقنعها الا الي هي تبيه

سالم : دامها ماتبيه لاتغصبونها حرام تهدمون سعادتها
وتجبرونها على شي ماتقبله نفسها علشان وصيه ترى ماهي قرآن منزل

حمود غمض عيونه بقهر ياعزتيلك ياصيته ليتني اقدر
ارده كان رديته استغفر الله ياربي استغفر الله
ياربي لاتجعل هالخاطر الي طرالي عقوق لابوي الله
يرحمه ويغفرله دامه يبيها لوليد بتكون له طول عمري
اجتهد اني ماعقه وهو حي ومستحيل اعقه وهو ميت
حتى لوكان الثمن اعيالي كلهم ماهو بس صيته

وبحزم : وصية ابوي بانفذها زي مايبيها ومابي اسمع
في هالموضوع اي نقاش رمى الفنجال من يده بعصبيه
وراح يستعد لصلاة المغرب

عند وليد جالس على كرسي في الحوش الامامي وعلى
الطاوله الي قدامه علبة مويه عذبها من كثر مايفتحها
ويرجع يصكها بتوتر شديد ومرات يشرب منها ومرات
يضغط عليها بيده ومرات يطق باصابعه على سطح الطاوله
اه من هالحاله وشلون اراضيها الحين عنيده وراسها
يابس ومتأكد انها مراح تعدي سالفت الكف بالساهل
وبعذرها وراها ابو مسكر عليها بوسط عيونه
لويدري اني ظربتها شب فيني حريقه وماهي بعيده
يملك لراكان عليها لو اجيبله بدال المئية الف مليون

صيته من اوصلت لبيت عمها واهي جالسه في المجلس
الداخلي ورافضه تقوم مع البنات لاي مكان علشان ماتشوف وليد
هلا ياربي والحل الحين صيته ماهي راضيه تطلع معي
من المجلس وامي طاقتها معها سوالف ومبسوطه والاهو
مبين انها بتقوم والحل الحين مافيه الاانتظر لحد ماتقوم
امي تسوي العشا
في هالوقت دق التلفون وراحت حلى ترد عليه دقايق
ووصلهم صوتها تنادي من الصاله
:يمه تعالي كلمي خاله ام ابراهيم
سلمى قامت وراحت ترد على التلفون

هلا ازفرة براحه واخيرا
: صيته وليد يبي يتكلم معك ضروري
صيته /وانا مبي اتكلم معه نهائي

:والي يرحم والديك تعالي معي وشوفي وش يبي انتي
تعرفين اجنان وليد لوماجيتي معي عادي عنده يطب
بوسط المجلس ويتكلم قدام امي

/ قولي له لو فكر يعترض طريقي اوفتح فمه معي بكلمه
وعد لاعلم ابوي بالاولي والتالي واخليه يتفاهم معه

: ممكن افهم وش صاير بينكم علشان ذا كله

/ اسئلي اخوك وسكري الموضوع علشان ماتخرب بينا
على شي تافه

هلا راحت لوليد وقالت له الكلام الي قالته صيته
وليد انقهر منها كان ناوي يتكلم معها لوغصب
وقدام الكل ماتفرق معه بس بعد تهديدها
مستحيل يغامر يعرفها زين عند كلمتها ويعرف عمه
اكثر دون هالبنت يصير حريقه
حذف المويه الي معه بعصبيه وقام واقف ودف الطاوله
الي قدامه وانقلبت على جنبها ماهتم وطلع لاستراحة
كايد

عند ماجد كان مار من عند الاستراحه وشاف سيارة
كايد وسيارة وليد وحتى سيارة سلمان
حز في نفسه هالشي
الله يالدنيا بعد ماكان مايدخل الاستراحه الاوانا معه
صار يجمع الجحلط ذولا ولايقولي
اف خل اروح بس وش ابي فيه اذا هو موب معبرني
لا كايد صديقي وماراح اتركه للخمه ذولا
توجه للاستراحه وقف سيارته ودخل
لقاهم في المجلس منزلين مخاد ومراكي في الارض
وجالسين يسولفون سلم
وردو عليه السلام تلقائي وكملو سوالف
راح للكنب جلس عليه ومحد يمه
في الجلسه مندمجين في السوالف
كايد : دام متاكد انها ماراح تختار اخوك ليش تقلق

سلمان : انا اقول كمل الناقص وود المهر كامل بلا شغلي
بلاشغلك بلاهم وريح راسك

كايد : صادق سلمان انا اعطيك الباقي وش دراهم
انه ماهو من شغلك

وليد بهم : اذا على الفلوس عندي افلوس راكان
امس جايب لي ثلاثين الف يقول كمل الناقص واذا تبي
زياده جبتلك وامي معطيتني بطاقة احسابها الرئيس
وتقول لوتصفره كله مايهمني

سلمان يقاطع : اف هذا المنافس جايب افلوس

وليد ناضره برفعة حاجب : راكان ماله دخل في الوصيه
وبعمره مانافسني على الي ابيها هذا جدي وخبصته
الي مدري وش يبي من وراها
والمهر باعطيهم الي جمعته من شغلي وماراح ازيد عليه
ريال واحد

كايد : وليد انت صاير معك شي من اليوم مانك طبيعي
قل وش صاير بضبط علشان نقدر نساعدك

وليد رفع راسه لكايد بعصبيه : الي صار اني يوم تهاوشت
معها ذاك اليوم ضربتها كف على وجهها

كايد عصب : مجنون انت المهر وباقي ماكملته والبنت
وماتبيك تقوم تضربها منت بصاحي

سلمان بانفعال : تدري ابوي عنده صندوق
مربع قديم شايله في دولابه في غرفة النوم
حاطه في الرف الوسط تحت ملابسه الداخليه
فيه مسدس والمسدس فيه ارصاصه وحده
وبعصبيه اكبر يرحم امك ودني بيت عمك
خلني احطها في راس السلقه

وليد وكايد الي شدتهم القصه اول ماخلص
كلامه ارتفع ضغطهم وهجمو عليه يضربونه

هههههههههههههههههههههههه
ماجد على قد ماحاول يتجاهلهم ماقدر الا انه يضحك
على سالفت سلمان وبضحك : ياجعل ارصاصة مسدس
ابوك تجي في راسك

سلمان الي باقي ينضرب : يالمزهريه افزعلي ياكلب

ماجد واهو جالس مكانه صرخ : بس انت وياه انثبرو

وليد وكايد وقفو على صرخة ماجد وارجعو يجلسون
وهم يعدلون ملابسهم
وليد : مره ثانيه لاصار الموضوع جد لاتتسيمج

سلمان الي كان طايح على اظهره قام واهو يحك اماكن
الضربات في جسمه ويضحك : الشرهه على الي يفزعلك
هذا وانا مضحن برصاصة ابوي الوحيده

كايد : ماشبع ضرب ذا يبيني اقومله

سلمان ماعندي حل لمشكلته وش اقدر اسوي غير اني
احاول اطلعه من حالت الهم الي هو فيها
في النهايه الضيقه ماهي حالتن مشاكله
قام من عند وليد وكايد وجلس جنب ماجد
: انا اليوم بخاوي ابو المجد ياكود انه يعلمني
التفندي زيه

كايد اعجبه تحرش سلمان في ماجد يمكن يقدر يدخله
جوهم

ماجد دف سلمان من جنبه : اقول تقلع مابقى الاانت اخاويك

سلمان قام واقف ويمثل العصبيه : اخو العيال
اسمعو ياشباب دامه عيا يعلمني التفندي
خلونا بكره نشقله في حوظ الوانيت ونوديه
شبك الغنم حق ابوي خل يتعلم البداوه

ههههههههههههههههههههههههههههههه
ضحكه جماعيه
كايد بحماس : وش رايكم نروح بكره نطعس في الثمامه
دام ابو الشباب عنده وانيت

سلمان : قدام والعزبه علي

وليد : يالله وانا معكم خل انسى الهم الي انا فيه شوي

التفتو كلهم لماجد
: انا مشغول موب فاضي للعب العيال

سلمان التفت عليهم : شباب خلونا نسوي بروفه لشقلته
بكره على الوانيت

الشباب تحمسو واهجمو على ماجد شالوه واطلعو فيه
برا واهو يرفس ويصايح عليهم :نزلوني ياكلاب
ماهتمو بصياحه وكملو طريقهم للوانيت وبدل مايحطونه
في الحوض ركبوه قدام وكايد ركب جنبه علشان مايقدر
ينزل ووليد ركب مكان السايق اما سلمان نقز في الحوض
وراحو يتعشون في مطعم

في الجنوب بيت مفلح
النايفه تنظف حوسة المطبخ
ياعزتيلك يامفلح عودتك جوزاء على الدلع وراحت وخلتك
الله يرحمها ويغفرلها
انا لازم افاتحه في موضوع الزواج مايصير يقعد
باقي عمره وحداني
النايفه نظفت المطبخ واغسلت الملابس وكنست وبخرت
وجهزت القهوه واجلست تنتظر مفلح يرجع
مابقى على صلاة المغرب شي وهذا يعني انه
بيرجع للبيت علشان يبدل ويستعد لصلاه ومن المسجد
يروح لبيت ابومطلق زي ماهم متعودين

مفلح رجع للبيت وحده تعبان من الشغل
ممداه يفتح الباب الا هبت عليه الروايح الي تفتح النفس
عرف ان اخته جايه تنظف البيت دخل داخل
وابتسم يوم شافها جالسه تنتظره
: هلا هلا الله حيها
ابتسمت له النايفه بحب وقامت تسلم عليه
:الله يبقيك يالغالي اخبارك

/الحمد لله بخير
النايفه مدت له فنجال القهوه واهي تعرف وقته ضيق
فحبت تكسب الوقت وادخلت في الموضوع على طول
: يامفلح البيت يبيله مره وابوي الله يرحمه ماجاب
الاانا وياك تكفى يامفلح تزوج لعل الله يرزقك
بلي يرفع ذكر ابوي ويشيل اسمه

مفلح سكت يفكر اشوي صادقه النايفه العمر مابقى فيه كثر ماراح وانا مثل انخلة الزينه لاولد والاتلد
/ عندك مره تبينها لي

: الحريم واجد وانا مابغيت ادور قبل اخذ موافقتك
انت من ودك تخطب

/اخاف اختار انا ومايعجبك اختياري
: لاتقول كذا انت الي بتتزوج وانت الي لازم تختار

/ وش رايك في ترفه

النايفه اشهقت موب لان ترفه كانت زوجت علي لأنها فعلا
تشوفها موب حقة زواج
: بس ترفه ذي خشنه وقويه ماكنها حرمه انا لامرت جنبي
يكش جلدي منها

مفلح ضحك على وصف اخته
/ههههههه لاماعليك من خشونتها انا اخاف انك كارهتها
علشان زواجها لاول من علي وانا اهم ماعندي راحتك
لادخلتي بيتي

: يامفلح مابعد جوزاء الله يرحمها احد يستاهل اني احبه
والاحتى اكرهه وانا ماعلي من ترفه اذا انت تبيها
بس انا انصحك وانت بكيفك
الحرمه ذي تقدر تقول رجال في اثياب حرمه

/ علشان كذا اخترتها وانا بنفسي الي بعلمها كيف
تكون حرمه على اصولها تقدرين تقولين متملل
وابي اشغل وقتي في تسنيعها

النايفه استغربت اختيار اخوها بعد جوزاء الي شايلته
من فوق الارض شيل والي نظره من عينه تطير قلبها
من مكانه بياخذ القناصه ذي
:ياخوفي ينزلون اعيالها من بطنها وكل واحد منهم في يده خنجر

مفلح فرط ضحك على كلام اخته
/ههههههههههههههههههه ومن وين بيجيبون الخناجر
واهم في بطنها

النايفه ابتسمت لضحكته من زمان ماشافته يضحك
: بكيفك دامك تبيها نزلني عند مناير وانت رايح لبيت
عمي

مفلح : ومناير وش دخلها

النايفه : مناير هي اقرب وحده لترفه ومحد يقدر يقنعها غيرها

مفلح خلاص اجل انا بقوم ابدل واوديك لها

عند مناير وانس
انس توه راجع البيت يبدل علشان يروح يصلي ومن الصلاه لبيت ابومطلق
مناير شافته داخل تعبان جت تمشي يمه بابتسامه
: ياقلبي شكلك مره تعبان تعال خذلك طاقه قالته وقربت
منه واحضنته

انس مستانس على الحضن وبدى يدفن وجهه في ارقبتها
وشعرها
: ايه هذي الطاقه الي تضيع التعب من جد
وباسها على خدها وارقبتها
مناير وخرت عنه بهدؤ يالله انا مجهزه لك الحمام والملابس
علشان لاتتاخر على ابومطلق
انس :الله يخليك لي يارب
دخل انس تحمم على السريع ولبس وطلع يصلي
على طلعته وصل مفلح والنايفه بعد عن الباب
علشان النايفه تدخل وسكره بعدها
وراح هو ومفلح لصلاه
النايفه ادخلت ونادت واهي تدخل
اطلعت لها مناير وسلمت عليها
مناير : هلا الله حيها وين ابوي
النايفه : الله يبقيك جايتن مع مفلح كنت عنده انضف البيت
وقلتله يجيبني
مشت معها مناير لغرفة الجلوس
:اقلطي بروح ازين القهوه واجي
النايفه اجلست على الكنب
: لا لاتسوين شي توني متقهويه مع مفلح تعالي ابيك
في موضوع مهم
استغربت مناير هو صحيح انهم صارو يتزاورون عادي
بس ماوصلت علاقتهم لمواضيع مهمه راحت اجلست قريب منها
: عسى ماشر ابوي فيه شي
النايفه : لاابوك مابه الاالعافيه

السالفه اني بخطب لمفلح وابيك تساعديني

مناير : يعني بتدورين له حرمه

النايفه : يبي ترفه وانا ابيك انتي تكلمينها وتقنعينها

مناير باستغراب :وانتي موافقه على خالتي

النايفه حست بغصه ترفه الي ماجلست مع ابوهم
الايوم واحد كلهم يقولون لها خالتي وانا الي من دمهم
ولحمهم وكم لي عند ابوهم للحين ينادوني باسمي
ماقدرت تكتمها في نفسها
: ترفه خالتكم وانا ماني بخالتكم
مناير انحرجت النايفه من بعد وفاة عمتي متغيره
وصاير تعاملها محترم
: لا عادي حتى انتي خالتي
النايفه انا وش فيني قمت اتشره على البنت اذا هي
ماتبي تناديني خالتي كيفها انا ماني بحاجة القاب
من احد لازم اتعود اسعد نفسي بنفسي ومانتضر
من احد اي شي
: خلينا في المهم مفلح هو الي اختار ترفه ودامه
اختارها انا موافقه على اختياره هذي حياته
وكلن ينام على الجنب الي يريحه المهم انتي همتك
معي واقنعي خالتك انها تاخذه
مناير ترددت شوي
:عمه سلمى تعرف
النايفه : لامحد يعرف وش دخل سلمى
مناير : لابس علشان عمه جوزاء الله يرحمها
النايفه تنهدت بحزن : الله يرحمها لاتحسبين سلمى
تحب جوزاء اكثر مني جوزاء قطعه من قلبي
ومانسيتها ولايمكن انساها في يوم من الايام
بس هذي هي حال الدنيا ومحد يموت لموت احد
ومفلح من حقه انه يتزوج ويعيش حياته
مناير هزت راسها بموافقه : خلاص اعتمدي علي
انا بقعد ازن عليها لين توافق بس اهم شي علمي
مفلح لايكلم جدي لين توافق ونقوله انها وافقت

النايفه : خلاص استعجلي اولادت امك مابقى عليها
شي وانا بروح عندها انفسها وودي ان مفلح يتزوج
قبل اروح لرياض ويقعد ماعنده احد

مناير اضحكت : هههههههههههه والله ان ابوي لعب
عليكن يالثنتين وحطكن في مخباه

النايفه ارفعت راسها بغرور وكشت على مناير بيدها
: مالت عليك انتي وابوك الا عقلنا وعرفنا قدر انفسنا
وان مافيه احد يستاهل انا انكدر خواطرنا علشانه
وخلي ابوك بس يدوس على طروف وحده منا
والله انا لنتحد عليه ونكرشه برا

مناير زاد ضحكها :ههههههههههه وينك يابو ابراهيم
تسمع ياعزتيلك طاح سوقك عند الثنتين والظاهر
اني بفزعلك واجوزك الثالثه

النايفه بتهديد : لاتخليني ادق على ام ابراهيم
الحين وندور لاانس حرمه

مناير تمثل الخوف : لا خلاص وش علي منكن انتن
ورجالكن اهم شي خلوكم بعيد عن انس

عوده لرياض ليلة فتح الوصيه الثانيه
في بيت ابووليد مجتمعين في الصاله
وابووليد لابس بدلته العسكريه بيطلع لدوام
عنده مناوبه من الساعه ست المغرب لحد الساعه اربع الفجر
: اسمعو بكره الساعه عشر تكونون جاهزين علشان
نروح لبيت عمكم
والتفت على وليد كم جمعت انت
وليد يفرك يده بتوتر : واحد وثمانين الف
راكان نزل انظره للارض وبدى يهز رجله بتوتر
ابو وليد هز راسه بهم : باقي الوصيه الي معها ان شاء الله ان فيها الفرج
وليد تنهد : اتوقع ان الوصيه الي معها تخيرها من تبي
ابووليد التفت على راكان شافه منزل راسه ويهز رجله
وشكله متنرفز رجع يناظر لوليد
: ان شاء الله خير المهم ابيكم تكونون جاهزين في الموعد
راكان رفع راسه لابوه : انا عندي جامعه روحو انتم واذا
بغيتوني بتلقوني موب طاير
ابو وليد هز راسه : موب مشكله المهم انت ياوليد لازم
تكون موجود

وليد ناظر في ابوه : طيب

عند هلا وحلا في جناحهم الساعه عشر اليل
هلا تمشي في الغرفه رايحه جايه وحلا جالسه على
كرسي التسريحه وناثره ادوات التجميل قدامها
وماسكه اصبع روج وقاعده ترسم فيه دوائر على
خدودها وتخبص بالكحل الجاف على حواجبها
وترسم فيه وشم على دقنها خابصه وجهها الوان
واشكال ومندمجه في الحوسه

هلا التفتت عليها وتوها تشوف المهرجان الي في
وجهها اشهقت بروعه وقربت منها واهي فاتحه
عيونها على وسعها وتمد اصبعها تلمس الدواير
الحمراء الي على خدودها : يمه شنوهذا
اذى على بالك بتقلدين الهنود ترا يحطونها
في الجبهه موب على الخدود وبعدين يحطون
نقطه بس نقطه موب تخميسة داشر في النفود

حلا قامت ترمش بعيونها بدلع ومن قال اني اقلد
احد انا بس اطلع الجانب المدفون من مواهبي

هلا كشت عليها : مالت بس مالت الناس في وادي
وانتي في وادي ثاني

حلا قامت واقفه وتخصرت :لاياشيخه ووشهو الوادي
الي الناس فيه

هلا : بلا سماجه يعني مانتي شايفه حالت البيت
وليد من اليوم حابس نفسه في جناحه مايطلع
الا لصلاه وراكان نفس الشي حتى امي قالت لشغالات
يروحون جناحهم وادخلت جناحها ماعاد اطلعت منه
البيت برا يشبه الموت مافيه حس لاحد

حلا هنا عصبت واضربت الاغراض الي على التسريحه
بيدها خلتها تتطاير على الارض : يعني انا الي مبسوطه
وفالتها هذا انا قاعده احوس في وجهي مثل المجنونه
ابي اضيع الهم الي انا فيه ترا وليد موب اخوك الحالك
وكلنا شايلن همه بس وش في يدي اسويه والاشي
عشان كذى انقلعي عني وخليني احوس في وجه النحس
ذا واتناسى الغم الي حنا فيه

هلا اندمت انها تكلمت معها كان المفروض تستنتج الحالها
انها قاعده تشغل نفسها عن التفكير بوليد وصيته
والامن متى حلا تلعب بلمكياج كذا
اف الله يستر صيته ماراح تفرق معها اخذت وليد والاراكان لأنها ماتبيهم كلهم بس مع راكان ووليد
تفرق كثير وليد يحب صيته ومايبي احد غيرها
وراكان يشوفها مثل اخته وفي نفس الوقت يعرف
انها حبيبة اخوه صعبه عليه انه ياخذها صعبه
حيل

بعد بعض الوقت في غرفة ام وليد جالسه على سجادتها
توها مصليه ركعتين سنه وجالسه تدعي لوليد
:يارب انك توفقه وتفرح قلبه يارب

في غرفة راكان جالس على الكرسي بالمقلوب ومخلي
ظهر الكرسي بين ارجوله ولاصق في صدره وعاقد
ايديه على راس ظهر الكرسي ومريح دقنه على ايديه
ويفكر في موعدهم بكره وش راح يصير فيه
يا الله وش الورطه ذي وليد ماقدر يكمل المهر
والوصيه الي مع صيته ماندري وش فيها
يارب تطلع زي ماقال وليد تخير صيته من تبي
واهي اكيد بتختار وليد انا اعرفها زين مستحيل
تختارني انا وياها طول عمرنا مثل الاخوان مستحيل
تخون الاخوه ذي