رواية صيته ظبي النفود بقلم نبض أفكاري

الجازي
الله يذكرك بالخير يافهد توني ادري اني كنت مصيبه
في حياتك ليتني تعلمت وتسنعت قبل لااخذك كان
حياتي معك بتكون احسن منها مع اي رجال ثاني
سمعت انك خطبت بنت عمك الله يوفقك معها وانا مسامحتك على كل الي صار بينا واتمنى انك انت
تسامحني انا الحين عرفت اغلاطي كلها وشفت
كيف كانو الناس يشوفوني قبل عمتي ماقصرت
تعبت معي كثير علمتني ودربتني على اشيا ماكنت
اعرف عنها شي وخلتني اختلط بالناس واعرفهم زين
واعرف كيف يتعاملون ويوم اتذكر حياتي قبل اعرف
اني طحت في اغلاط كثيره وكبيره واولها غيرتي
من صيته الي مالها سنع البنت ماهي يمي وعايشتن
حياتها وانا احشرها في كل شي غصب
هذا كله كوم والكوافيره الي العبت علي كوم ثاني
ياني كنت غبيه وعلى نياتي واصدق كل شي
المهم الحين اني برجع لاهلي وناسي الي تعودت
عليهم وعلى عيشتهم البسيطه وان شاء الله اعيش
سعيده واتوفق مع ولد خالي

عند انس ومناير
مناير مجهزه القهوه والحلى والمعجنات وتنتظر انس
يرجع من المزرعه بعد صلاة المغرب
كلها اشويات ووصل انس
ناضر فيها كيف جالسه على راس السفره تنتظره ابتسم
لها بحب
: لاانتي كذا بتخلين عمي ابومطلق يعلقني على اعلى
نخله في المزرعه

ابتسمت مناير : ياساتر يارب وليش يعلقك جدي في النخله

انس واهو يجلس جنبها وياخذ يدها يبوسها
: لأنك تسرقيني من مجلسه واهو مايحب احد يغيب
عن مجلسه بذات مجلس بعد المغرب ذا مجلس الزامي
والبارح اشوفه يقدح بعيونه يمي وشكل العقاب العسير
جايني في الطريق
مناير :هههههه جدي مسوي رعب واهو اطيب منه مافيه
انس :هههههه هو مافيه اطيب منه بس لاعصب وخري
عن طريقه وبعدين عمي كله هيبه الواحد يستحي يخالفه

مناير عقدة حواجبها : موكنك قاعد تقول اخر مره اجلس
معك بعد المغرب

انس هز راسه بايه واهو يضحك :ههههههههه عمي
ماينمزح معه انتي خلي جلستك الظهر

في الشرقيه
مضاوي وشيخه في غرفة مضاوي
شيخه تفتش الكيس الي جابنه من السوق العصر
:اف العالم تدرس وحنا نجهز لعرس الغفله
مضاوي
: ياسمج اخوك وولد عمك مسرعهم على العرس بعد
الاختبارات بشهر مالت عليهم مايعرفون يشاورون

شيخه عقدت حواجبها وحطت يدها في خصرها باعتراض
: ياسلام اخوك وولد عمك على اساس انتي طالعه منهم
ترا كلهم اعيال خوالك مالت عليك وعليهم اثنينهم

مضاوي اجلست مقابله لشيخه على السرير
:المهم الحين ليش مانخلي التسوق لين نخلص ادراسه
مابقى شي على الاختبارات النهائيه

شيخه : انا اقول الاوقات الي ماعندنا فيها مذاكره
زي اليوم نروح فيها لسوق خاصه اذا كان فيه تخفيضات
علشان نستفيد من التخفيض ونوفر شي من المهر
في ايدينا بعد العرس يمكن نحتاج شي
مضاوي هزت راسها بموافقه : اكيد بنحتاج صديقتي
تهاني تقول اختها اصرفت مهرها كله يوم جت عند الرجال
لقته متدين علشان العرس وحالته حاله تقول اقعدو كم
شهر مطبخهم مافيه غير الطحين والرز واساسيات الاساسيات ولا المصيبه اذا اخذو جولة زيارات على
الاقارب علشان يوفرون حق الأكل

شيخه مطت عيونها : اف اف الله لايحطنا محلهم
بس خلي عنك التشائم ترا لابيتنا والابيت عمي ناقصهم
شي صحيح نمر باقي يدرس بس بعد يشتغل
مع الدراسه وابوي ماراح يخليه لواحتاج شي
وعماد قيده خلص ويشتغل يعني موب كل شي تسمعينه
تتوهمين انه بيصير في حياتك

مضاوي بشهقه : الحين من قال بنوفر افلوس يمكن نحتاجها

شيخه بتوضيح : انا قلت بس قصدي نحتاج كوافيره
غاليه نحتاج هديه لأحد نحتاج نثريات ومصاريف
من تحت الطاوله ايام الخجل والدلع في بداية زواجنا
زي كذا

مضاوي تحك راسها :اها .....اشوى طمنتيني

جاهن صوت ام مضاوي من الصاله تنادي
: يابنات قدر المرقوق على النار قيد الحمته انضجت
قومن رقنه

شيخه مدة بوزها :يوه من المرقوق ورق عجينته شي اكرهه
ياعالم
مضاوي اخذت الكيس من بينهن وارمته على شيخه
وهربت وبصوت عالي علشان تسمعها :اقول قومي
وتعالي اعلمك السنع لاتفضحينا في عمادوه
شيخه وخرت الكيس والحقتها تركض :خلي سنعك
لنميروه مانبي من وراك سنع

ام مضاوي جالسه في الصاله تتفرج على التلفزيون
ومرنها البنات يتراكضن تلفتت حولها ماشافت شي
تحذفهن فيه غير علبة المنديل اخذتها واحذفتها عليهن
والاصابت والاوحده منهن : انتن متى بتعقلن كل وحده
رجالها يحتريها على الباب واهي تراكض مثل البزران

شيخه ومضاوي اوصلن المطبخ واهن ميتات ضحك
على الرميه الي جتهن
شيخه بضحك :ياحليل عمتي بغيت اصدق واروح ادور عمودي عند الباب
مضاوي تمثل الاستفراغ :وع وش ذا الدلع الي يحوم
الكبد اسمعي بس الدلع الي على اصوله نمري
ياختي شي فخم الصراحه
شيخه بتهديد :هين عند نمر ان ماقلتله انك اتدلعينه
نمري قالت اسمه بهنوصه

مضاوي سوت نفسها خايف وخمت راس شيخه تبوسه
:هه وهذي بوسه توبه ماعاد اعودها اصلا محد يعرف
لدلع غيرك

شيخه مشت لدولاب المطبخ وشالت طاسة العجين من
فوق رخامته وجابتها مدتها لمضاوي
:خذي رقي عجين المرقوق وقولي عند عمتي اني
رقيته معك عشان ماقول لنمر ولا ترى بخلي لين تصرين
موجوده واقول قدامك

مضاوي اخذت الطاسه بسرعه :لا والي يرحم والديك
كله والاانك تسميجين وانا فيه هاتي انا ارق المرقوق
وامدحك واالقمك بعد تدللي انتي بس

عند الشباب في الاستراحه
الوقت المغرب والشباب مجتمعين في الاستراحه
حقت كايد
كايد يتكلم مع سلمان :ليش ماجيت اليوم على الغداء
سلمان : انا اي عزيمة غدا صعب احضرها ارجع
من الجامعه دايخ وانام سيده خاصه اني في سنة
تخرج ووقت اختبارات يعني زين يوم اجي اجلس معكم
وليد منسدح على الكنب وسرحان وفجأه قام جلس
: ياخي اقهوتكم وين راسي مصدع
كايد :دقيقه ويجيبها القهوجي توني قايله يجيب اقهوه وشاهي
هنا دخل عليهم ماجد ومن غير نفس :السلام عليكم
ردو كايد ووليد وهم مكانهم لانهم شايفينه على الغداء
وسلمان قام سلم عليه وماحبه ابد
ماجد يناضر في سلمان ووليد بتكبر
وليد مطنشه والااهتم لتصرفاته
اما سلمان انفقعت مرارته لمى شاف كيف يناضر فيه
بتكبر وغرور اشر جهة ارجوله :شفها طاحت جنب انعولك
وليد وكايد الي يعرفون عبط سلمان ناضرو في بعض بضحكه مكتومه اما ماجد قعد يناضر ارجوله بيشوف
وش الي طاحت ماشاف شي رفع راسه لسلمان
وهو عاقد حواجبه :وشهي
سلمان بسخريه عينك الي تقلبها فينا كأنك شايف ناس
من كوب ثاني
وليد وكايد :هههههههههههه
ماجد ناضرهم بعصبيه :اسمج من كذا مابعد شفت
سلمان شاف القهوجي جاب القهوه وحطها على الطاوله
راح لها شالها بطوفريتها وجلس في الارض وحط القهوه
قدامه دخل القهوجي مره ثانيه بطوفريه فيها الحلا والمعجنات اشرله سلمان يجيبها عنده واهو متعمد ينرفز
ماجد الي جلس على الكنب قريب من كايد
:الي يبي قهوه ينزل يجلس في الارض انارجال بدوي
ولاعندي تفندي
وليد فاهم سلمان واعجبته حركته خل ذاك المغرور ينفقع
قام وجلس جنب سلمان وخبط فخذ سلمان بيده
:صب قهوه لابوه من تفندي الي يحرمنا قهوتك
كايد ابتسم لماجد الي مكشر بقرف من تصرفات سلمان
وقام اسحبه بيده :قم تقهو جلست الارض تجيب العافيه
ماجد قام مع كايد واخذ من الكنب مخده حطها تحته وجلس عليها : علشانك بس والا الهمجي ذا ماينجلس
معه
سلمان ناضره برفعت حاجب ورجع يتقهوى والاعبره
كايد تضايق من تعامل ماجد مع اصدقائه
: انا ماخاوي همج وسلمان رجال كفو
سلمان ابتسم لكايد
وماجد عصب :يعني انا الي ماني بكفو
كايد :انا ماقلت كذا ولومانت بكفو كان ماخاويتك السنين
هذي كلها بس لاتستعجل في احكامك وانا متاكد انك
اذا عرفت الشباب بتحبهم
سلمان بلعانه :انا لاتحبني اخاف اكره نفسي اذا انت حبيتني
كايد اخبطه على راسه :سلمانوه وتبن
ماجد حامت كبده من المتخلف ذا :الله يصبر الارض عليك
وليد عطى سلمان نضره يعني مشها علشان كايد
وسلمان حده منغث اكره ماعنده الانسان المتكبر مايقدر
يصبر عليه سحب واحد من صحون الحلا وحط حرته فيه

عند صيته رايحه تاخذ لها اغراض من قرطاسية راكان
انزلت من السياره وادخلت المكتبه كان راكان جالس ورى
طاولت المحاسبه ومعه كتاب يذاكر
اول ماشافته ابتسمت لنفسها كنت حقيره لمى فكرت اتزوجه جنني اخوه المصرقع صار عندي عطل في
التفكير ساعتها
وبأخوه صادقه :السلام عليكم
مجتهد ماشاء الله

راكان رفع راسه على الصوت وبابتسامه
:هلا وعليكم السلام والرحمه
وماهقيت اني اكثر اجتهاد منك

صيته واهي تتجه لرف القريب تاخذ اقلام وبعدها تحركت
لرف ثاني تاخذ استكرات واوراق وغيره
: عاد انا حدي احوس بين الكتب باقي ماسويت مشروعي

راكان : يمديك على المشاريع خاصه انه العطله جايه ووقتها طويل

صيته اخذت الاغراض الي اختارتها وجت حطتها قدامه
على الطاوله : والله اخوك النشبه حاس مخي ماعاد
اعرف افكر في شي

راكان بتسائل :انتي ماتبينه وماخذته علشان الوصيه
صح

صيته :صحين وثلاثه ومليون صح

راكان : اذا وليد ماكان اختيارك لازم تعرفين انك انتي
اختياره وراح يبذل جهده علشان يسعدك ونصيحه لاتضيعينه من يدك اعطيه فرصه واكيد مع الوقت بتفهمون
بعض وبتحبينه

صيته اه بس لواقدر افتك منه تذكرت الكف الي اخذته
منه وحست بقهر
: لاتخاف عليه فارض نفسه بالقوه موب محتاج فرص من احد

راكان حط اغراضها في الكيس ومده عليها
: احسابك علينا
صيته : والله انك لتاخذ احسابك والا اترك الكيس
واروح لجرير اشتري من عندهم
ابتسم راكان : ول دام فيها جرير هاتي الحساب
وبعدين لاتجيبين طاري منافسينا قدامي
صيته بضحكه : ام الثقه بس جرير بكبرها صارت منافس
لكم
راكان ضحك :بتشوفين
اخذت صيته كيسها واطلعت لسياره

وراكان يناضرها
مسكينه كل الي حبوك ماعرفو يوصلون لك مع ان مفاتيحك
سهله وبسيطه بس من يفهم فهد ووليد صبات وكل شي
يبونه غصب فهد من عرفناه وهو يقول صيته لي ويتصرف
وكأن عقد الزواج في مخباه واخرتها انصدم برفضك له
لوفكر بس اشوي كان قدر يستولي على قلبك واهتمامك
خاصه انه الوقت قدامه كان طويل حيل
اما وليد رغم انه شاف تجربت فهد معك طاح في نفس
الغلط واذا كان فهد رسم لنفسه حلم وعاشه الحاله
وليد رسم حلم وقاعد يفرض عليها انها تشاركه هالحلم
بالقوه مدري وين يضيع ذكائك ياوليد قدامها معقوله على كثر ما صيته واضحه
وصريحه موب قادر توصل لمفاتيحها وقاعد تهشمها من غير ماتحس

عند صيته في السياره
كلام راكان ذكرني باخر موقف لي مع وليد والكف الي
اكلته منه انا لازم أأدبه على هالكف موب معقوله
اسكتله وامشي اموري كأن شي ماصار ............
اقول لابوي يسنعه ....................بس لا صعبه ذا العله بيصير رجلي................

اخاف اقول لابوي يطيح من عينه
اصلا حتى لو ماتأثرت
صورته عند ابوي الا انه في النهايه ابوي مستحيل
يسكتله على شي زي كذا ومدري عقابه وش بيكون

احسن شي احل مشاكلي بنفسي بس وشلون اخذ حقي
منه شلون ؟!