رواية صيته ظبي النفود بقلم نبض أفكاري

في يوم اخر عند ام ابراهيم
كانت في المطبخ تجهز معجنات واقهوه وشاهي
ادخلت عليها انوار شافت كيف مجهزه مجموعه كبيره
من ترامس القهوه والشاهي وارض المطبخ فيها يجي عشر
اسلال افتحت اعيونها على وسعها
: يمه وش ذا عندنا حفله وانا مدري
ام ابراهيم : لا بس دقيت على عمتك سلمى وقلتلها
نروح انا وياها نزور المرضى المنومين في المستشفى
ومايزورهم احد ياني متشوقه لروحه

انوار ابتسمت امها تغيرت تغير جذري وغيرتها معها
صارت تتطوع في حلقات القرآن صارت ماتجلس
الاوهي مشغله عندها محاضره دينيه لاحد العلماء
صارت تصوم الاثنين والخميس تغيرات كثيره
صارت لها حتى تفكيرها تغير ولى من يصدق
ان امي تنصح ابوي يطلع النايفه ويمشيها
علشان تغير نفسيتها وتطلع من جو الحزن
الي هي فيه من يصدق ان امي تدعي لنايفه
وتقول الله يفرج عنها ويعوظها خير

ام ابراهيم انتبهت لسرحان انوار هزت كتفها
:انوار وش فيك سرحتي
انوار : يمه انتي كيف صرتي تدعين لنايفه وتوصين ابوي
عليها موب انتي تكرهينها

ام ابراهيم اضحكت ضحكه قصيره : صدقيني
ماعاد اكرها والاشي بلعكس شفقانه عليها
مسكينه من كلام ابوك عرفت انها ادخلت اكتئاب النفاس
وابوك ماعنده صبر ولايعرف يتصرف في هالمواقف
الله يعينها ويفرج عنها

انوار والاستغراب مازال معشش في راسها :طيب وش تغير قبل كنتي تكرهينها

ام ابراهيم : الي تغير انه صار عندي هم وهمه اعلى بكثير
من مستوى علي يعني بدل ماكنت افكر اغلب وقتي بعلاقتي بابوك صرت كل وقتي افكر في علاقتي بربي
كيف اتقرب لربي الي خلقني كيف احسن من اعمالي
واخلاقي حتى يرضى ربي عني كيف احس بهموم الناس
وحاجاتهم اشياء كثيره ماراح تعرفينها والاتحسين فيها
الااذا خليتي رضى الله هو اهتمامك الاول
هنا في دار اختبار ماهي دار استقرار لازم نبذل للجاي
صدقيني ماعاد احس بكره لنايفه ولاعاد احس انها
ظلمتني ربي حلل لرجل اربع زوجات وابتلاني بزواج
زوجي علي صحيح اني وقتها كنت معترضه وناقمه
بس وقتها كان اهتمامي علي اما الحين انا راضيه
كل الرضى ولو تزوج الثنتين الباقيات ماراح ازعل
لان اهتمامي الحين اكبر من علي بكثير علي
مجرد جزء من حياتي ماهو حياتي كلها
لاكن الله وعبادته ورضاه علي حياتي كلها

انوار ابتسمت برضى بعمرها ماكانت فخوره بامها
قد الحظه ذي تحس امها من الداخل صارت قويه
وصلبه والااهم نضيفه نضيفه حيل



عند النايفه وجوزاء

جوزاء : قومي امشي حركي ارجولك طول الوقت نايمه
ولامنسدحه على الفراش

النايفه بكسل وتعب : مالي نفس في شي شغلي التلفزون
بس خلينا نشوف فلم والاشي

جوزاء بمحاولت اقناع : يابنت الحلال طيعيني الجو
مطر وشين يهول خلينا بس نمشي تحت مظلة الحوش ونتفرج في المطر

النايفه بعدم مبالاه : ماني طالعه مالي نفس خلاص
عاد شغلي التلفزون وخلينا نجلس

جوزاء فكرت خلوني اطلع واطنشها يمكن تمل وتلحقني
بتذبح نفسها بالنوم والكسل ماعاد تتعدى الفراش
: والله الي يترك الجو الممطر الي براء علشان التلفزيون
خبل وانا بطلع اتمشى واحرك جسمي اخاف تعقد ارجولي
من طول الجلسه

النايفه بكسل ماتدري ليه صايره مره خامله ودايم
فيها النوم : ايه من كثر ماتجلسين طول اليوم تكرفين
في ذا البيت

جوزاء : والله لو ماعمليتك والاكان رحت لبيتي وخليت
الكرف كله لك على الاقل تحركين دمك الي جمد في اعروقك من الخمله
قالته واطلعت للحوش من غير ماتشغل التلفزيون

النايفه بدل ماتقوم تشغل التلفزيون تلحفت ونامت
او سوت نفسها نايمه


في بيت حمود الصاله
صيته جالسه وعناد وزياد جالسين جنبها واحد عن يمينها
والثاني عن يسارها والكتب قدامهم وقاعده تذاكر
لهم وتساعدهم في حل واجباتهم
عناد يمد لها دفتره :شوفي خلصت
اخذت الدفتر : بطل حبيبي كل الكلمات الي كتبتها
صح يالله انت خلصت دخل كتبك ودفاترك في الشنطه
استانس عناد وبدى يدخل اغراضه : نبي نلعب كوره
صيته : طيب بعد مايخلص زياد تلعبون
زياد بفرحه : وانا خلصت
اخذت دفتره وشيكت عليه : بطل حبيبي يالله شل اغراضك
وروحو العبو كوره في الحديقه اياني واياكم تطلعون برا
العيال بدو يشيلون اغراضهم
وصيته راحت تستاذن من امها بتروح لساره
لقت امها في غرفة الجلوس مشغله الدفايه وجالسه تطرز
مفرش طاوله
صيته : الله الله اشتقتي لتطريز والحركات الجميله
ابتسمت اغزيل : ايه طفشت من الجلسه
خليني اتسلا واوريكم المفارش السنعه بدل هالبلاستيك
الي ماله منظر ولاشكل
صيته ابتسمت لامها : يمه باروح لساره اذاكر معها
غزيل : طيب روحي والبسي عباتك قبل تطلعين
صيته واهي تمشي للباب : يمه دايم تقولين البسي عباتك
وانا من متى اطلع بدون عباتي
غزيل : من خوفي عليك اذكرك
راحت صيته لساره واهي داخله شافت الجازي
جالسه في الصاله تاكل ومبين عليها توها قامت من النوم
: السلام عليكم
الجازي من غير نفس
: وعليكم السلام
تعدتها صيته واصعدت لساره

الجازي تذكرت روحتها امس للكوافيره
ووش قالت لها لمى شكت لها من صيته
وكيف انصحتها تعطيها شريط فديو من الي عندها
وتخليها تشوفه واهي لاشافته اكيد بتطلب غيره
هنا تقولها الجازي عن مكان الكوافيره وهي تصرف معها
وبتعرف كيف تبعدها عن طريقها
ايه هي ماقالت وش بتسوي معها لاجتها
وانا وش علي منها هي ذهينه وتعرف اكثر مني
خلها تدبرها زي ماتبي المهم اني اعطيها
الشريط واقول انه فلم علشان تاخذه زي
ماقالت لي الكوافيره ابتسمت للفكره واصعدت
فوق اخذت شريط فديو وحطته في جيب بالطوها
الداخلي والي كان واسع ونزلت تحت تحتري
صيته تطلع من عند ساره
الكوافيره كانت تضن ان صيته من نفس خامت الجازي
الساذجه البسيطه ففكرة ان الجازي تجيبها لها
علشان تبيعها على الشخص الي تشتغل معه في الجراره
والبغاء وهم كل بعد كم شهر يطيحون وحده من زوار
المشغل في اشباكهم علشان مايلفتون الانتباه
وبشرط تكون بنت ماهي متزوجه وهذا الي مخليهم
يكتفون ببيع الاشرطه للجازي باسعار خياليه
وطبعن البنت الي يصيدونها يصورونها في اوضاع
مخله ويهددونها بالصور لوفكرة انها ترفض اي شي
يطلبونه منها اوفكرت تبلغ عنهم
ولحد الان والاوحده من الضحايا تجرأت انها تبلغ

في مكان ثاني عند وليد واخوياه الجدد
كانو داخلين سوبرماركت ياخذون مويه وعصير وشوية اغراض لمى وصلو عند الكاشير طلع وليد بوكه بيحاسب
وانفجع من صيحة سلمان وكايد عليه
:لا لاتدفع
سلمان تقدم بسرعه وسحب البوك من يده قبل لايطلع شي
وكايد دفه عن الكاشير وحاسب هو
اخيرن استوعب الي سووه اخوياه وانفرط ضحك
:ههههههههههههههههههههه
اطلعو ووليد باقي يضحك
وكايد وسلمان انقهرو منه
وقف سلمان واسحبه مع عضده علشان يوقف
وبعصبيه : ممكن تكركرنا معك يالاخو
كايد سمع كلمت سلمان وشبك مع وليد في الضحك
والي ضحكه زاد
وليد : جديده ياولد وش كركرنا ذي
سلمان : مالي حيله طقت كبدي لك ساعه تكركر ماندري
وش عليه
وليد : ياخي بعذري اكركر ماشفتو اشكالكم كيف
خميتوني ياخي ترا ماني مطفر لهادرجه وبعدين البوك
الي كنت بحاسب منه البوك الاسود

كايد يرفع حاجب لاياشيخ يعني فرق الون اسود والاازرق

وليد طلع من مخباه بوك بني : ايه فرق هذا البوك الي
احط فيه دخلي
اول شي سواه ابوي يوم سمع الوصيه عطاني وحده
من صرافاته علشان اصرف منها ولابعد يهدد لاشوفك
تصرف هلله من فلوسك
وطبعا ماتهون الست الناظره قبل لاشافتني تنشدني
عن صحتي ولاتبي اكل ووش مضيق خاطرك
هالحين اول شي تنشد عنه معك فلوس وكل اشوي
حاطه في مخباي مبلغ وقدره
سلمان : وش الست الناظره ذي اشوفك قلبت مصري
وليد بضحكه : هذي امي مديرة مدرسه
وقبل كانت حاطه لنا قوانين وش كثرها وممشيتنا عليها
بلقلم والمسطره لحد ماجت الحرب ورحنا عند عمي
طول مدة الحرب وهناك اهل عمي اخترقو كل انظمتها
وصارت مرنه كثير موب زي قبل
كايد : اجل تفضلو عليكم اهل عمك