رواية صيته ظبي النفود بقلم نبض أفكاري

في الرياض
في بيت ابوفهد
ابوفهد وام فهد يتقهوون اقهوة الضحى
ابو فهد : الجازي وين ماعاد اشوفها
ام فهد : مدري وش عندها قايمتن تسهر اليل وترقد النهار
ابوفهد : قومي قوميها خليها تقهوى معنا
راحت ام فهد تطق على الجازي الباب
ولاحيات لمن تنادي قمراء بدت تقلق عليها اخاف انها مصخنه والاشي معقوله ماسمعت الطق هذا كله
عند الجازي نايمه والاجابت خبر للباب الي يطق
قمرا حاولت تفتح باب الجناح وانفتح معها
لاكنها ترددت انها تدخل ارجعت صكته وقعدة
تطق اقوى من قبل
الجازي وصلها صوت الباب وبدت تنزعج منه وتقلب
على افراشها لاكن الصوت ماش عيا يروح
قامت واهي معصبه وراحت للباب
افتحته وشافت عمتها عنده : خير وش الطق ذا
قمراء : عمك مرسلني اناديك تقهوين معه
الجازي : الحمد لله والشكر مقومتني من عز نومي علشان
قهوه مبغى قهوه ولحد يقرب بابي يطقه ابي انام
قمراء تغير وجهها من الهجوم الغير متوقع الي جاها
وماصحت من ذهولها الى على رقعت الباب واهو يتسكر
وينتقفل

ارجعت لابوفهد واجلست
: تقول راسها يعورها وتوها ماخذه بندول بتنسدح عليه
ياكود انه يهدى
ابوفهد : الله يشفيها سويلها حليب زنجبيل والاشين
حار يدفيها اخاف اخذتن برد
قمراء : ان شاء الله لاقامت يصير خير

بعد اسبوع
النايفه اصيبت باكتئاب النفاس
وصارت بس نوم واكل ومع ان نساء ال مطلق وجوزا
حاولن يطلعنها من جو الحزن الي هي فيه
الاانها ماتستجيب لهم ابد والي زاد الامر سؤ كثرت
الحريم المتشائمات من حولها فثلاثي الشؤم راعيات
واجب وكل يوم محضرات عندها وقصصهن الماساويه
لاتنتهي وزادها وجود احدى كبيرات السن الي عامت
على عومهن فان كانت جوزاء وام مصعب يحاولن
انهاء اي سالفه تفتحها اي وحده من ثلاثي الشؤم
الاانهن مايفيد فيهن اما السيده العجوز مايقدرن
يقاطعن كلامها احترامن لكبر سنها
اما النايفه لقت في سوالفهن السوداويه الحطب
الي يغذي حزنها وكأبتها المتزايده
اماعلي اصبح يتهرب من البيت لمجلس ابوه ولتمشيات
في مزارع العائله

ترفه انتقلت لبيتها والسور مازال تحت البناء
الجازي تطورت علاقتها بالكوفيره وصارت تعدها
صديقتها وصارت تخبرها كل شي عنها وصارت
تشتري منها الاشرطه باستمرار وسايق اهلها تحت
تصرفها اما فهد فكانت تقوله انها تروح لبيت جدتها
وبنسبه لعلاقتهم مع بعض الجازي صارت تعد فهد
مضاد حيوي مرتين فاليوم وبعد ماكان السروال والفنيله
البس المفضل عندها صارت تطلب منه يلبس الشورتات
وماهواقل منها لان هذي هي الملابس الي تشوفها في
الافلام الي ادمنتها فهد كل ماله شكوكه تزيد لاكن
ضغوط العمل والدراسه بعد زادت فماهو لاقي فرصه
ينبش وراها وبكذا قرر يتخلص منها في اسرع وقت

ابراهيم وراشد ارجعو لدبي ووليد مازال يبحث عن
عمل اضافي

الليله العوائل الثلاث مجتمعين كلهم في مشب
حمود الجميع بأستثناء فهد الي يرجع من دوامه متأخر
وكانو الحريم جالسات في جهه من المشب والجهه
المقابله لرجال
الشباب مجتمعين على الالعاب الي يلعبون كيرم
والي يلعبون ضومنه
والبنات جالسات جنب بعض وداقاتها سوالف
الرجال والحريم يسولفون سوالف مشتركه بين الجانبين
الجازي في البدايه مابغت تروح تجلس
معهم بس لمى تذكرت ان الشباب كلهم موجودين
فكرت انو حلو اروح واملى عيني من الزين وش وراي
البست تنوره سودا وبلوزه مشجره والبست طرحتها
ونقابها وحرصت انها تنزل على عيونها غطاء خفيف
علشان تاخذ راحتها من غير محد ينتبه لها والتفت بملفع كبير
وطبعا مارشت عطر لانها صارت تعرف انه شي مستهجن
عند العائله كلها طالما انهم في مجلس مختلط
ادخلت الجازي المشب سلمت واجلست جنب الحريم
من جهة الشباب واول واحد طاحت عينها عليه وليد
الي كان يلعب كيرم
الجازي الحين هالمزيون ذا بياخذ صيته الله ياخذها
مقوى حظها عليه جسم ماعمري شفت زيه مدري
هالادمي وش ياكل شكل امه اتزغطه من اكل اهل الجنوب
اويلي وش هالشامه المعترضه على صفحة الرقبه
ياهني هالصيته يوم تبوسها الله ياخذها كل الرياجيل
منهبلين عندها مدري وش الزود فيها
في هالاثناء ضحك راكان الي يلعب مع تركي ضومنه
مما علق اعيون الجازي
في ضحكته اما الاسد هذا من تقدر عليه ياحض الي
تاخذه صدق رجال لاقالو رجال اه بس لو النصيب
الي جاب فهد جايبه
من راكان انتقلت لمحمد الي يلعب كيرم
اما القطنه ذا ياخذ العقل ياهو حنيه ياهو ثقل
القهر انه مايعطي وجه ابد نظرته كنها كنز مايعطيها احد
ياحظ الي تاخذه مايطالع احد غيرها اخ بس لويعطيني
نظره وحده كنها الدنيا
هناء وصلها صوت حمود : حبيبي زياد ادخل داخل المشب
لايعورك البرد
كله كوم وهالعجوز الي منشقٍ حظها ليلة قدر كوم
جرة العسل ذا يليقله بنت ثمان طعش مهوب هالعجوز
الشهباء اه يالقهر حتى هالي قلبه مزهر ولسانه يقوطر
عسل من نصيب السلقه صيته حظ حظ هالبنت كلها حظ
حتى ابوها مهوب مثل الابوان الباقين شايلها من فوق السحاب

نترك الجازي وخيالها الشهواني ونرجع للجلسه والي فيها

ابووليد : ياوليد
وليد يلتفت على ابوه : هلا
ابووليد : مالقيت شغل غير الي تركته
وليد : لامالقيت شي
حمود : حاول ترجع لوضيفتك الاوله
وليد : رحت لهم وقالو مكانك استلمه موضف جديد

صيته لوماقدر يجمع المهر وشلون اقدر افك عمري من
راكان مستحيل اتزوج واحد طول عمري اشوفه
واحد من اخواني اصلا مجرد فكرت الزواج منه تجيبلي
الغثيان كان محمد اخوي هو الي قايل بتزوجك اعوذ بالله
مجرد الطاري مقزز وشلون افهمهم انه راكان مايفرق
عندي عن محمد اخوي بشي صحيح اتغطى عنه
بس حتى الغطى مايحسسني انه واحد غريب وقابل
لزواج وع وش ذا الافكار ياربي وش الحل صحيح
انه حتى وليد مبغاه ولاني مقتنعه فيه بس اذا بختار
بينه وبين راكان اكيد بختار وليد والله يستر
من هالمهر الي مدري وش حد جدي عليه
شكله حس بتانيب الضمير بعد ماوصاني اخذ
وليد قال خل اضمن انه يستاهلها طيب الوصيه
الي عندي وش فيها وليه امنى مافتحها الا بعد سته
اشهر

في اليوم الثاني وليد طلع يدور شغل بعد صلاة العصر
ومن الاماكن الي راح لها احد السوبر ماركت
سئل اذا عندهم وضايف ولاحصل شي طلع
لسيارته وحده طفشان اول ماركب السياره جاه
هندي يشيل سطل مويه صغير ومنشفه
: يبغا غسل قزاز
وليد عقد حواجبه
: انت كيف شغل فلوس كويس
الهندي : الحمد لله شغل تعب كثير وفلوس يوم كويس ويوم مافيه كويس
وليد طقت في راسه فكره نزل من سيارته وقفلها
وراح لسوبر ماركت اشترى منظف قزاز ومناشف اصغار
وانطلق لمجمع تجاري كبير كان قريب من السوبر ماركت
وقف سيارته في المواقف ونزل عدة الشغل المناشف
الصغار ثبت اطرافها في احزام بنطلونه وخلى وحده في
يده واخذ منظف القزاز البخاخ في يده الثانيه وبدى
يمشي بين السيارات ويدور احد يبيه يغسل قزاز سيارته
اول زبون كان رجال كبير في العمر نزل من سيارته
وانزلن البنات الي معه والي خمن وليد انهن بناته
وليد : اغسلك القزاز ياعم
الزبون يناظر في وليد باستنكار صحيح انه لابسن ملابس
اجانب بس بين انه سعودي ولاشكله بشكل واحدن فقران
: وش حادك على هالشغله
وليد ماحب السؤال : ماتبي تغسل اجل مع السلامه وتحرك
بينتقل لسياره الي بعده
بس الرجال ناداه : تعال ياولد اغسل القزاز وهذا حقك
طلع عشره ريال وعطاها وليد
وليد اخذ العشره وبدى ينظف القزاز
خلص وانتقل للي بعده نظف قزاز كم سياره
الي يسئل وش حادك والي يطلع مبلغ ويعطيه ويقول
خذ الفلوس ولاتغسل شي لاكن وليد يرفض رفض قاطع
انه ياخذ اريال واحد زياده عن عشرة التنظيف والي
يرفضون انه يغسل قزاز سياراتهم يرفض انه ياخذ
منهم والاشي وهذا خلا الناس تستغرب عاده الي ينظفون
السيارات اي مبلغ تعطيهم ياخذونه غير ان شكله موب
شكل محتاج شغله مثل كذا ابد البعض توقع انه
طالب جامعي ويبي يطلع مصاريفه بنفسه من غير لايعتمد
على ابوه البعض اعتقد انه يستعبط البعض ضنه سيئ
واعتقد انه يسوي كذا علشان يغازل الحريم الي في
سياراتهم مع سواقين وذولا اكرشوه مع كم شتيمه
ومازال وليد صامد رغم التحديات
ننتقل لداخل السوق كيان شاب من اسره غنيه
عنده متجر متخصص بملابس الشباب وكل احتياجاتهم
من مختلف الماركات الراقيه وطبعا متجره كبير ومقسم
لعدة تصنيفات ملابس احذيه نظارات اكسسوارات كل
لوازم اللبس متوفره عنده
كان واقف عند مدير المتجر
: انا بطلع محتاجين شي اسويه قبل امشي
المدير : لاطال عمرك كل شي تمام

طلع كايد من المجمع بكبره متوجه لسيارته في المواقف
وحده طفشان من يوم سافر صديقه ماجد مع امه
الي تتعالج برا واهو ضايق خلقه ماجد صديقه الوحيد
ومن غيره حياته مالها طعم صحى من افكاره
على منظر عجيب شاب سعودي مبين من كمية الماركات
الي لابسها انه ولد نعمه والعجيب انه واقف عند سيارته
ويسئله اذا يبيه يغسل القزاز ومع ان العمال الي في
قصر ابوه توهم غاسلين سيارته بكبرها موب بس القزاز
قبل لايجي لدوامه الاانه طلب من وليد يغسل القزاز
كان واقف جنب سيارته يتأمل وليد بتعجب وحط في راسه
انه لازم يعرف وش سالفت غسيل القزاز مع هالشاب
: قميص وبنطلون ماركه بالطو ماركه ساعه كبك سبته
جزمه كله ماركه النظارات الحالها بالف واشوي
يعني لبسك كله بمبلغ وقدره
وليد يسمع تحليل الشاب صاحب السياره وساكت
ومكمل شغل

كايد بسخريه : ولابعد يغسل القزاز بمنظف القزاز جديده
ياولد مره جديده
وليد مطنش
كايد اشتعل الفضول عنده اكثر ان خليتك تمشي قبل
اعرف سالفتك ماكون كايد
وليد خلص غسيل القزاز والتفت على كايد : عشره ريال
كايد طلع محفظته وسحب مجموعة فلوس كلها من فئة
الخمس مئه واعطاها وليد
وليد اعتبرها اهانه له وعصب حده اخذ الفلوس ورماها
في الارض ودف كايد على سيارته بعنف وامسكه
مع نحر تيشرته : قلت عشره اريال ماقلت لله يامحسنين
سحب البوك الي مازال في يد كايد اخذ منه عشره اريال
ثم سحب كف كايد وحط البوك فيه وتحرك لسياره الي بعده
كايد موب قليل شر ولاتعود يسكت لاي احد يرفع صوته
عليه فمابالكم بالي يمد يده بس هالشاب هو اخر واحد
يفكر يتمشكل معه يأنه طير الطفش من راسي ولازم
اعرف وش وراه ابتسم لنفسه برضى وانحنى على فلوسه
الي في الارض اخذها ولحق وليد

في سياره هايلكس غماره وحده كان سلمان يسوق
واهو يفكر بنزل اخذ ساعتي من عند المصلح الي
هنا وبعدها اروح ادورلي مطعم اتغدى فيه
اليوم رقدت بعد مارجعت من الجامعه ولاتغديت
ياني ميت جوع اول مالقى لسيارته موقف وسفط
شاف شابين مبين عليهم العز جايين يمه
مع انه هو مايلبس الاثياب والايعرف الماركات نهائي
بس الشكل واضح انهم اعيال عز من جد والغريب
ان واحد منهم معه منضف قزاز وفي يده فوطه
والثاني سحب وحده من الفوط الي منشبه في
بنطلون خويه وجايينه خير وش يبون
وليد : اغسل قزاز سيارتك
كايد : بنخلي قزاز السياره جديد من قو النظافه
وليد ناظره بنص عين خير ذا وش يبي لاحقني

سلمان العن ابو السماجه والله من الفضاوه
الي عندهم ايه وش عليهم متوسدين الفلوس
ومالقو شي يتسلون فيه الا انهم يستعبطون
على خلق الله يعننا بنجرب احساس الهنود
واهم يغسلون السيارات
ناظر وليد وكايد بسخريه : اغسلوها بس بشرط
وليد دخل مزاجه الشاب ابتسم : وش شرطك
كايد رفع حاجبه وباعتراض : على كيفك انت وش شرطه
سلمان قطع على كايد اعتراضه : والله انا جاي
اطلع ساعتي من عند المصلح وبعد ماخذها
ماباقن معي غير عشره اريال اذا بتعزموني على
الغداء خليتكم تغسلون القزاز واعطيتكم العشره
واذا ماوافقتو خليت عشرتي معي ورحت اتغدا فيها

كايد شاف انها فرصه يتعرف على وليد : موافقين
والغداء على احسابي

وليد ناظر في كايد بتعجب وش عنده ذا قاط في السالفه

وقبل لايتكلم وليد قطع عليه كايد الي لاحظ نضرته
: حلفت انكم اثنينكم تتغدون على حسابي
وليد يوم شاف كايد قام يحلف فكر انه ماراح يخسر
شي لوراح معهم يغير جو الضيقه الي يحس فيه

سلمان دخل للمجمع ياخذ ساعته
ووليد وكايد بدو ينظفون قزاز سيارته
وليد رش نصف القزاز الي في جهته بالمنظف
وقام يمسحه بالمنشفه
كايد يناظر فيه بقهر : احلف ياشيخ رش عندي
لاصبه على راسك الحين
وليد حذف العلبه جهة كايد : خذ رش بنفسك ماني
خدام عندك
كايد اخذ المنظف واهو يعظ على السانه وبدى يرش
جهة القزاز الي يمه ثم قام يمسحه بالمنشفه
شاف وليد خلص جهته رش على جهت وليد مره
ثانيه لعانه
وليد تنرفز : توني مخلصه ياتبن
كايد يبتسم : محد قالك تخلص قبلي
وليد مسح الي رشه كايد بسرعه ثم خبط المنشفه
الي في يده في الارض ثم خبطها على القزاز الي نظفه
كايد وطبع التراب على القزاز
كايد شهق : توني منظفه ياكلب
واخذ المنشفه الي معه فركها في الارض ونفظها
على الجهه الي نظفها وليد
ووليد عصب وخمه بيمسكه بس كايد قدر يتفاداه وانحاش
عنه
سلمان ماطول داخل اخذ ساعته ورجع على طول لسياره
لقى القزاز كله تراب ووليد وكايد يتطاردون
: الايالكلاب اعدمو قزاز السياره
وليد يوم شاف سلمان جاء راحله
والحقه كايد
وليد : هات العشره
سلمان : والله انك تحلم هالحين توصخون قزاز سيارتي
وتبوني اعطيكم عشره على الوصاخه
كايد : العشره الي انا نظفت القزاز بس الحسود ذا
وصخه
وليد يلتفت على كايد : انا الي وصخته والاانت
كايد : لاانت
سلمان : بس انت وياه انا بنظفه بس لاتحسبوني نسيت
الغداء
كايد : امشو اوديكم اطلق مطعم في الرياض
وليد يناظر كايد بنص عين : ماتغدى مع بزران
كايد بعصبيه : بزران في عينك وبتتغدى معنا غصب
والالحقتك لين احضر في وسط بيتكم
سلمان سحب فوطه من بنطلون وليد وراح ينظف قزاز
سيارته : اقول اخلصو علي ترا ذابحني الجوع
بتمشون نتغدى سوى والا اروح اخذ نص دجاجه بثمانيه
اريال واحط الريالين الباقيه في مخباي واعيش الليله كأني
ملك