رواية صيته ظبي النفود بقلم نبض أفكاري

في صباح اليوم الثاني بيت علي

قامت جوزاء جهزت الفطور لعلي والنايفه وقومتهم يفطرون
كان واضح على وجه النايفه الحزن والهم
اجلسو يفطرون مع بعض الثلاثه وعلي وجوزا
يسولفون بينهم ويحاولون يشركون النايفه معهم في السوالف علشان تطلع من الحزن الي هي فيه
لاكن النايفه ماكان بالها معهم كنت تفكر في
حياتها وفي جنينها الي فقدته هي اساسا استغربت
انها احملت على طول واهي بهالسن وهذي هي
افقدة الحمل المشكله ان وزنها صدق زايد
وش اتسوي الحين وكيف تنزل هالوزن
معقوله تحمل مره ثانيه بس الوزن الزايد
صعب ينزل ياما شافت ناس يحاولون ينزلون وزنهم
والاقدرو
علي :لازم نذبح تمايم لسقط
جوزاء : انت سميته
علي : ايه سميته محمد وباذبح تمايمه على تمام الاسبوع
جوزاء : الله يجعله شفيع لكم ويعوضكم خير
علي : امين
النايفه : ام ابراهيم حامل
علي : ايه حامل
النايفه سالت ادموعها على خدها اه يالقهر كل شي
لها كل شي تبيه تاخذه جعلها بالموت احسها ناشبه
في حلقي
: الها اسنين ماحملت وش معنى الحين
جوزاء توسعت اعيونها الحرمه وش جاها ماهذي بعلومها
ولاهذا بطبعها

علي رفع عيونه لها بحده : الله الي يرزق
النايفه : ايه الله الي يرزق ماقلنا شي بس وش معنا
اتركت موانع الحمل هالحين اغتارت من حملي وتبي
تقهرني
جوزاء يارب سترك وش جاهاذي صايرتن حسود
:تعوذي من ابليس الحرمه ماسوت شي غلط
علي : انتي اكيد صايرن لعقلك شي اذا انا مادريت
عن حملك الايوم جيت ام ابراهيم وش دراها عنك
وارتاحي ام ابراهيم ماتاخذ موانع حمل علشان تتركها
نزل الخبزه الي في يده على السفره وقام وهومتنرفز
النايفه ناظرت في جوزاء شوي : يمكن انتي علمتي
سلمى بحملي واهي علمتها

اشهقت جوزاء : وانا من متى اعلم سلمى باسرارنا
وبعدين ترا الحرمه من بعد هوشتكن في الرياض
ماعاد شفناها والاجانا منها شي والهوشه انتي
سامحتيها عليها قدام الجميع وبرضاك
وش الي تغير هالحين

النايفه ناظرت في جوزاء ودمعتها تسيل على خدها
وبصوت خافت مقهور : ياكثر الي تغير ياكثره
كنت اضن ان الي صدر البيت والها العتبه
واثر البيت كله بيتها حتى العتبه مالي فيها مكان

جوزاء حزنت على صديقت عمرها واكسرت خاطرها
: الله يهداك البيت مقسوم بينك وبينها بالنصيفه
واذا على العيال ربي يعوضك والي جاب الاول
يجيب الثاني ولاتنسين انك الغاليه وعلي يحبك
حيل

النايفه : ماهقيت انه يحبني انتي شوفي كيف ماعاد
يداني هرجتي
جوزاء : هوهالحين مشغول بمشاكل اعياله
انتي تجاهليه هالفتره واهتمي بنفسك وبتشوفين
كيف يرجع لك احسن من قبل

النايفه مشغول بعيالها وبحملها وبكل شي يخصها
وانا مافكر فيني انا شفت وشلون كان خايف ان حملها
يتضرر طيب انا سقطت ليه ماهتم ليه ماتوجع ليه اشوفه
عايش حياته وكانه ماصار شي ناظرت في جوزاء
بحزن وقامت تغسل وترجع تنام من غير ماترد على كلامها

عند ترفه ومناير
قامت ترفه من النوم وقومت مناير معها
وادخلن المطبخ سواء يسون الفطور
ترفه : من اليوم انا الي بعلمك الطبخ
مناير : ايه تكفين ياخاله ابي طبخي يكون احلا من طبخ
انس طبخه يجنن اخاف مقدر اسوي شي قريب منه
موب عاد احسن
ترفه : افا تلميذتي وتخافين من انس انتي بس شدي
حيلك معي وبتشوفين وشلون انس يجي يتعلم منك
اهم شي لاتعلمين انس انك قاعده تدربين عندي
الي عرفته من ابراهيم ان بيتي بيكون قريب
من بيتك كل ماراح انس لشغله تعالي عندي
وانا اعلمك على شغل البيت كله

مناير : ايه امس يوم انس جابني عندك وراني
بيتك مره قريب مني خاصه اذا فتحو باب
في سورنا

بعد يومين على هالصباح الوقت العصر
مناير وترفه مجهزات اغراضهن ومطلعاتها في الحوش
والحين يشيكن على بيت ام ابراهيم علشان يقفلونه
لان بيوتهن اجهزت كلها عشر دقايق ووصلو انس وابراهيم
انس اخذ مناير وابراهيم اخذ خالته ترفه وودو كل وحده منهم لبيتها
عند انس ومناير
ادخلت مناير واهي تظن ان التغيير الجذري راح يكون
في غرفة انس لانها بتصير غرفه مشتركه لهم اما باقي
البيت ماتوقعت يسوي فيه ذاك التغيير المهم وهذا الي
خلاها تنبهر بمجرد مافتحلها انس باب المشب الي
كان اول باب يقابلهم واهم داخلين
مناير بانبهار : واو انس المشب صار شي ثاني ماتوقعت
تغير فيه شي (كان مغير فرش المشب كله فرشه ومخاد وحتى الاواني المستخدمه في المشب مغيرها)
وبدت تتنقل من جمال لجمال اكبر واكثر شي اعجبها
انه انس لاحض انها ماتحب تجلس على الارض وسوى
لها غرفة الجلوس والصاله كنب
انس : عسى عجبك البيت
مناير بفرحه : ماتتصور وش كثر انا سعيده بهالتغيير الجميل الحين صرت احس ان كل شي في هالبيت ينتميلي ويمثل ذوقي
انس استانس على وناستها : مابقى الااواني المطبخ
مشي حالك بالموجود لحد ماوديك السوق تشترين
الي تبين
مناير بمحاولت جس نبض : اناماتعجبني الا اواني الرياض

انس ابتسم دامها ماصرحت برغبتها في الروحه لرياض
معناته مستعده تتقبل اي قرار اخاذه في الموضوع
وبدل لايستغل الوضع ويقول بنتسوق من هنا
: ابشري بعد عشره ايام كذا اوديك تزورين امك
واوديك السوق تاخذين كل الي تحتاجينه وتراي قدمت
طلب خط تلفون وكلها ايام ويصير عندنا تلفون حتى ابراهيم قدم طلب لخالتك

مناير ماتدري وشلون تشكره كل الي قدمه لها اليوم
اشيا ماكانت تحلم فيها يوم ادخلت هالبيت اول مره
كانت تظن ان هالبيت بيكون قبرها واهي حيه
لاكن اليوم بالذات تأكدت ان سعادتها الحقيقيه
موجوده في هالبيت التفت على انس بحب وحماس
واحضنته بقوه : احبك انس
انس موب مصدق ان مناير حضنته من نفسها ومن غير
مايحاول انه يتقرب لها وبعد تقوله احبك هالحظه عنده
اجمل من كل الي قدمه لمناير بنسبه لها

عند ترفه كانت تشوف البيت فخم كثير اكثر من الي
تعودت عينها عليه تمنت لوكان الاثاث ابسط من كذا
افتحت غرفة النوم وتفاجأت بالسرير الي ماكل نصف
مساحة الغرفه واشهقت

ابراهيم يدري انها ماتحب الاسره مناير قايله له
علشان كذا وصاء وليد وراشد يشترون لها سرير
منخفض وتعبو حيل عبال ماحصلوه
ابتسم على شهقتها : خالتي ترا ذا اخفض سرير لقيناه
في السوق وش بتقولين اجل لوجايبلك الي ارتفاعه نصف متر
ترفه تلتفت عليه : ليتك ماتكلفت وشريته افراشي معي
وش لازمت خراب الفلوس

ابراهيم : لاتخافين المصاريف كلها على ابوك ابراهيم
وترا الرجال شبعان يعني مايدري وين يودي افلوسه
وحنا يدوب قشينا الي طايح من الكيس قاله وهو يضحك

ترفه ابتسمت على مزحة ابراهيم : دامنا ماخذنا غير
الي طايح من الكيس معناته سوينا فيه معروف هالحين
يقدر يربط كيسه واهو مرتاح

ابراهيم انفجر ضحك على كلام خالته : هههههههههه
ايه كذا تعجبيني

واذا كان انس ترك مهمة شراء المواعين لمناير ابراهيم
كمل كل شي في بيت خالته حتى المواعين شراها
وترس مطبخها وثلاجتها اكل وماخلى عليها قاصر