11-03-2016, 10:11 AM
|
#31
|
رد: ديوان الشاعر تركي 2000
قصيدة مانيب مجازيك في صدك وهجرانك - تركي 2000
ما نيب مجازيك في صدك وهجرانك
ودعتك الله وتلقى واحد ثاني
أتعبت الأعيان والأقدام من شانك
وأنت ولا شيء سويته على شاني
فزيت لك يوم قلت أسمك وعنوانك
لو كان ما تنتمي لأسمي وعنواني
ما جيت أدورك ولا أطق بيبانك
وإلا ترجاك مثل فلان وفلاني
أنت الذي جيت لي وأعلنت بلسانك
أنك على شوفتي جايع وعطشاني
صدقت هرجك ومنطوقك من لسانك
وأقبلت لك مندفع من كل وجداني
ما كنت أفكر يجي في يوم نسيانك
وأنساك وأنت معاهدني ما تنساني
إلا بعد ما قريت الكذب في أعيانك
حاولت أوادعك وأنسى كل ما جاني
خلاص ما نيب متعني على شانك
ودعتك الله وتلقى واحد ثاني
|
|
|
11-03-2016, 10:12 AM
|
#32
|
رد: ديوان الشاعر تركي 2000
قصيدة سيرة بطل - تركي 2000
يافالق الصبح يامولج نهارك بليل
ياجامع الناس في يوم البعث و النشور
عليك كل إتكالي وأنت نعم الوكيل
يا عالم بالمصير و ماتكن الصدور
يالله يالله تهديني سواء السبيل
و تعصم لساني عن الزله وعن كل زور
الشعر موقف وحده مثل حد الصقيل
لو كان كتله من احساس البشر والشعور
ياما رقابي ورقيته براس الطويل
- وياما سبح بي بحور وغصت به في بحور
وانا ليا حان ميقافي قبست الفتيل
و اوقدت من نار فكري للمسافات نور
واليوم لاهنت ياشعري مايخدم بخيل
مادام سلحتك الافكار مانت معذور
قدمك من العز مايروي ظما كل جيل
سوالفه تزرع الامجاد في كل بور
وقدمك لميع الهنادي والقنا والصقيل
وقدمك من المجد ماترويه كل العصور
مسافته عز ماتنقاس كيلو وميل
بركانها ماخمد وامجادها ماتبور
ياموكب الشعر وقف واستمع لي قليل
حتى اني اعطيك للتاريخ رخصة عبور
سيرة بطل ماتغيبها حكاية رحيل
تبقى بوجه الزمن كالنحت فوق الصخور
ماكانت ارض الجزيرة قبل ذاك الاصيل
إلاتفكك عقيدة وانحدار ودبور
نهارها كم قتيل وليلها كم قتيل
جنايز مالهافوق البسيطة قبور
قويهم سلطته تسلب حقوق الذليل
وشيطانهم ساد والظلم انتشر والفجور
وكل لخصمه من اصناف العداوة يكيل
وصدورهم من جهلهم فالمعاصي تفور
مال الامن شجرة فيها مقر ومقيل
ولابينهم للمودة في الجزيرة جسور
هذا قبل هيت تخطيها عيون الدليل
وهذاقبل سطوة القرم العزوم الصبور
النادر اللي على العارض يهيم ويخيل
- من يوم عمره عشر شوره غلب كل شور
من قو باسه صنع ممكن من المستحيل
- ومن طيب راسه يحل معقدات الامور
زهابه الصدق والاخلاص حمل الصميل
وسلاحه الدين والتقوى سلاح الغيور
جمع شتات القبايل لين صارو فصيل
واخوان عقب التناحر والجفا والشرور
وحكم بشرع الكتاب اللي ماغيره بديل
وعم الفرح فالبلاد وساد كل السرور
لامال ميزان غيره مايحيد ويميل
في سطوته ينكسر راس الجهل والغرور
شخصيته مالها في كل جيله مثيل
تجف الاقلام وبمدحه تضيق السطور
والله ليبطن ماجابن ناقضات الجديل
مثله ولاقول في كل النشامى قصور
ويالله يامستجيب للدعاء ياجليل
من عبدك اللي لك مطيع وذليل وشكور
ترسل على قبر ابو تركي صدوق المخيل
وسم يساقيه من غر السحاب البكور
وتهل فوقه بسيل مايلاديه سيل
وترحم عظامه وتغفر زلته ياغفور
وتجمع به المصطفى في جنتك والخليل
وتحفظ عياله مواكير الحرار الصقور
وإنك تجمل وتهديني سواء السبيل
وتعصم لساني عن الزله وعن كل زور
|
|
|
11-03-2016, 10:14 AM
|
#33
|
رد: ديوان الشاعر تركي 2000
قصيدة الوداع الأخير - تركي 2000
يا مالك الملك يالواحد شديد العقاب
يا غافر الذنب يا مرسل رسولك نذير
يا خالق الخلق يا محصى الخطا والصواب
تعالت اسماك مالك في صفاتك خشير
يا محي الارض بأمرك من حمول السحاب
يا عالمن فالحياة وما يؤول المصير
يا جامع الناس في يوم الحشر والحساب
مافيه فرق هذا تاجر وهذا فقير
كل الخلايق سوا الا بحمل الكتاب
لا شخصت ابصارهم يوم النهار العسير
احد فتح له كتابه صوب جنتك باب
واحد هوابه اكتابه للسخط والسعير
يا رب رحمتك لا هلو علي التراب
واصبحت مالي عن الوحشه مفر ومطير
واقفوا ولدموعهم فوق الخدود انسكاب
واسمع قريع احذيتهم فالوداع الاخير
ودخلت في عالم البرزخ وطال الغياب
وفارقت كل القرايب والاهل والعشير
وجوني ملائكتك العمل والعذاب
استسلمت نفسي لمنكر وجاني نكير
في موقف للسؤال يزيد ثقل الجواب
الا برحمتك اللي فالخفايا خبير
يا رب حملت نفسي بالشقا والعتاب
ومديت حبل الخطا لبليس واصبحت اسير
وطاوعتها في متاهات الوهد والسراب
لين اشبكتها الخطايا شكب والنفس طير
ازل واقول انا توي بسن الشباب
واليا نصحني محب اقول توي صغير
ما كنت احسب لوقتي والليالي احساب
ولا كنت افكر وش اللي في زماني يصير
الا بعد ما نصفت العمر والراس شاب
وفقدت من ربعي الادنين جمع غفير
عرفت ان الحياة مصارعه واكتئاب
واني مودع ولالي غير ربي نصير
ومن لا تزهب من التقوى ليومه زهاب
لا مات وش حجته يوم النهار الكبير
فالموقف الي مافيه امجادله وانسحاب
منهوله لهاك النهار يشيب راس الغرير
|
|
|
11-03-2016, 10:15 AM
|
#34
|
رد: ديوان الشاعر تركي 2000
قصيدة دوله ال سعود مزبنين الجلاوي - تركي 2000
فاح عطر القصيد وغردن الفرايد
من ضمير على بدع المثايل رهاوي
واشلعن من غصون الشعر ندر القصايد
شردن مايروظهن قريب الهقاوي
واستوت طبخت المعنى بجمر الوقايد
لين ذيب القصيد من الوله جاك عاوي
حالفن اني لاعلقها قلايد قلايد
لين ماعاد تطلع من ذهن كل راوي
وكان مارضيت راع الموهبه والمحايد
والله اني لاصير عن القصايد نحاوي
اعشق الشعر واخذ من سنيني فوايد
واتزود وانا اللي ماقطعت الرجاوي
جعل يوما جمعنا في الامارات عايدد
ولتن ماحكمها غير حر النداوي
لين صار الامن والعز والخير سايد
ومن يجيها فقير يروح منها غناوي
اعشق ترابها واحبها حب زايد
ودي اروح عنها مير ماني بقاوي
املكتني وانا قلبي من الحب جايد
وحبها مايداويه الطبيب المداوي
ودعت قايدن غالي وفرحت بقايد
عنده اكبر مصيبه مثل شرب القهاوي
وله عضيد عليها للامجاد رايد
من هو اللي براعي المجد والطيب غاوي
سعد منهو تعزوى به نهار الشدايد
يوم فعل الشجاعي يبين وقت العزاوي
وانا من دولتن فيها وساع البنايد
دوله ال سعود مزبنين الجلاوي
|
|
|
11-03-2016, 10:17 AM
|
#35
|
رد: ديوان الشاعر تركي 2000
قصيدة ياحرفي اللي ضاع - تركي 2000
ياحرفي اللي ضاع مابين الدفاتر والرفوف
اللي رسمته من تنهاتي ومن حبر قلمي
ضحيت لجله في حروف وقمت لجله في حروف
وصبرت لو النار من فوقي ومن تحت قدمي
ياصاحبي اللي على شانك تحديت الضروف
اسمع كلامي زين وافهم وش اقوله من فمي
ماهو بأنا اللي تتركه بين الخناجر والسيوف
وتمص دمه بين خلق الله يامصاص الدمي
انا بدوي ماسكن في الوقت مسكان الضعوف
اتبع هوا بالي واسير عند ذودي وغنمي
طوفتها لك لجل خاطر عين ولا ماتطوف
ولا انت مهما زاد وزنك وزني يطرحك نسمي
صمتي يدل اني وفي ومسوي فيك امعروف
وصبري يدل اني من زحول الصناديد انتمي
ياقوم ياللي تذبحون الحيل قدر للضيوف
وش رايكم في اللي يعشيني من اوصال لحمي
وقفت له يوم اجلسوا واجلستله ناس وقوف
غير الذخيره والفشق في محزمه من محزمي
|
|
|
11-03-2016, 10:18 AM
|
#36
|
رد: ديوان الشاعر تركي 2000
محاوره شعريه بين فضيلة الشيخ الدكتور عايض القرني الداعية المعروف والمحبوب
وبين الشاعر الشاب تركي الميزاني حبيت انقلها لكم
تركي الميزاني
سلام يا رمز الأدب والدين وبحور القصيد
ياللي بنيت أمجاد وصروح ما تمحاها السنين
إنت بزمنا أكبر عطايا وقتنا وأغلى الرصيد
ولا أقول غير الله يخليكم ذخر للمسلمين
عائض القرني
أهلا هلا بالشاعر المقدام والشهم الرشيد
في حضرتك ننثر سنابل كادها والياسمين
إليا ذكر تركي ذكرنا قصة القول المفيد
أقطف زهور الورد من شعره على مر السنين
تركي الميزاني
الله يبارك فيك ياللي كلما زادوا تزيد
وتبني من الأشعار ما تذهل عقول السامعين
النار فاتح بابها والموت في حبل الوريد
لكن متى تصحى قلوب الغافلين النايمين
عائض القرني
ذكرتني بالنابغة والبحتري وابن العميد
مجالس المأمون في بغداد وأيام الأمين
معاوية نمدح علومه مير ما نمدح يزيد
وش لون نمدح من توهق حيل في قتل الحسين
تركي الميزاني
هذي شهادة والشهادة منك يا دكتور عيد
نبي نعلقها على جدار الزمن للتابعين
أحد بها الدنيا شقي و أحد بها الدنيا سعيد
تمر دورات الزمن والعاقبة للمتقين
عائض القرني
أبي أرسل الأشواق لكن كيف يحملها البريد
أحسن نوصلها وليلة عيد شوق الطيبين
أرجوك خبر كل مخذول وشيطان مريد
قبر الغزاة ديارنا وحنا عيال الفاتحين
تركي الميزاني
ضاعت حلول المشكلة يا شيخنا مابه جديد
إلا غرور أهل اليسار وصمت أصحاب اليمين
مدري نقول لما مضى من وقتنا ليته يعيد
وإلا عليك نهل كل الدمع يا بدر وحنين
عائض القرني
الياس ذنب وعندنا أحفاد المثنى والوليد
والشبل من ذاك الأسد وأرض الوطن كله عرين
من يعتصم بالله ربه عاش في عمره سعيد
يبشر بحفظ الله له ويكون في حصن حصين
تركي الميزاني
حنا بلشنا بالقريب اللي عرض دون البعيد
يا صعبها لا حولت ما بين خشم وبين عين
الجرح مبطي مابرى والصبر ذاب مع الجليد
ولا أقول غير الله يعين القانتين الصابرين
عائض القرني
حنا تعودنا على طحن الحجارة والحديد
ولا نخاف الموت لنا للجنان مسافرين
عدونا والله ما يحميه زيد ولا عبيد
على جماجمهم نشيد مجدنا الباهي المتين
|
|
|
11-03-2016, 10:20 AM
|
#37
|
رد: ديوان الشاعر تركي 2000
رثاء تركي الميزاني لرياحي ,,
خيم الحزن في صدري ونوخ ركابه
وابتدا ليل هم ونوم عيني هجرته
مابقى للقصايد وسط صدري رحابه
غير هم ليا اجتاح الخفى ماشكرته
كل مخلوق فالدنيا مقدر حسابه
لو يقولون توه ماخلص من ثمرته
والسبايب تفاوت والمنايا تشابه
وجل الانسان تكسب ساعته من صغرته
اه ياخوي اللي ماتعوض غيابه
اشهد اني فقدته واشهد اني خسرته
كيف ابنساه وادله واتناسا مصابه
وكل طاروق لاجيت ابتديبه ذكرته
يابدر كل كسر يهون واجبر صوابه
غير كسرن يبا يبطي وانا ماجبرته
رحمة الله على اللي له مقام ومهابه
منبع الطيب يوم الطيب تثمر شجرته
من فراقه غديت اقنب قنيب الذيابه
وبح صوتي ودمعي من عيوني نثرته
ودي اسلا عن الهاجوس واصك بابه
مير حزني وهمي ساقني ماقدرته
|
|
|
11-03-2016, 10:22 AM
|
#38
|
رد: ديوان الشاعر تركي 2000
قصيدة جرح المفارق - تركي 2000
على الهون ياجرح المفارق وضيق البال
على الهون ياهم(ن) سطا بي وقدرته
على شان من ذوقني الحزن والغربال
وفجيت له باب(ن) عن الناس سكرته
حفظته ودللته وغنيت له موال
وتخيرت قربه ليتني ماتخيرته
|
|
|
11-24-2016, 11:22 PM
|
#39
|
رد: ديوان الشاعر تركي 2000
.
دَام عَطَائِكْ.. يَآطُهرْ..
وَلَا حَرَّمْنَا أَنْتَقَائِكْ الْمُمَيِّز وَالْمُخْتَلِف دَائِمَا
حَفِظَك الْلَّه مِن كُل مَكْرُوْه ..
*
تَحِيّه مُعَطَّرَه بِالْمِسْك.., ,
|
|
آيإكثر مآيطري على آلبآل توقيع .,,ولآ شفت لي توقيع يرضي غروري ..!!
إن مآحصل توقيع فوق آلتوآإقيع .,,وإلآ عن آلتوقيع يكفي حضوـوري ..!!
|
01-26-2017, 07:04 PM
|
#40
|
رد: ديوان الشاعر تركي 2000
راق لي ماراق لك
انتقاء راقي ومميز
كما عهدناك بمواضيعك دائما
مودتي
كنت هنا
سكون الليل
|
|
|
تعليمات المشاركة
|
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
كود HTML معطلة
|
|
|
الساعة الآن » 05:20 AM.
Powered by vBulletin® Version 3.8.11 Copyright ©2000 - 2024, Jelsoft Enterprises Ltd. new notificatio by 9adq_ala7sas HêĽм √ 3.1 BY: ! ωαнαм ! © 2010
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd. جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف
| | | | | | | | | |