-
›ديوان شاعر
(
https://www.sham-alro7.com/vb/forumdisplay.php?f=127)
زهرة المطر |
07-30-2015 04:58 PM |
شاعر القمح د.جمال مرسي
https://fbcdn-profile-a.akamaihd.net...f13db685e789ee
يسعدني اليوم أن أقدم لكم ديوان لشاعر عريق ، هو من فحول الشعر في هذا العصر ، بفكره و خلقه ، هو ابن هذا الصرح الكبير ، و من كبار شخصياته
أسس منتدى ( قناديل الفكر و الأدب ) ، هذا الشاعر الخلوق هو
الدكتور جمال مرسي
و أقدم لكم سيرة ذاتية بقلمه .
سيرة ذاتية بقلم جمال مرسي
]http://www.almolltaqa.com/vb/image.p...ine=1202117288
جمال مرسي إنسان بسيط محب للناس يبذل كل طاقاته من أجل إسعاد الآخر ، يسعي للخير بأمر الله و لا يتوانى عنه .
شهد اليوم الثاني من شهر فبراير لعام 1957م الصرخة الأولى في قرية جميلة نائمة في أحضان النيل هي قرية دار السلام بمحافظة كفر الشيخ بمصر . كان والدي رحمه الله يعمل مدرساً بهذه القرية و كنت ثالث مولود له فرعاني و أمي رحمهما الله و ربياني على القرآن و الخلق القويم و حب الناس . فكان أن التحقت ب ( كتّاب القرية ) .. و هو ما يعادل روضة الأطفال في أيامنا هذه و لكن بطريقة بدائية و أنا في الرابعة من عمري فتتلمذت على يد أستاذي المرحوم الشيخ أحمد عابدين الذي بدأ بتحفيظنا القرآن و معي محموعة من أصدقائي الصغار الذين صارت لهم مناصبهم المرموقة الآن . و كان يتخذ معنا أسلوب اللين و الشدة ، العصا و الحلوى فحفظنا ما تيسر من كتاب الله في أقل من سنة . كنت أمارس طفولتي كبقية زملائي في اللعب في أزقة القرية الضيقة بألعاب بدائية لم أنسها لأن لها ذكريات جميلة عندي .
فلما أشرقت السنة الخامسة من عمري انتقل والدي رحمه الله و الأسرة جميعا للمدينة حيث منصبة الجديد كإداري بمديرية التربية و التعليم بكفر الشيخ المدينة . رغم أنه خريج المعاهد الأزهرية
و أنا أعتبره قدوتي و مثلي الأعلى فقد كان عطوفاً و مربياً فاضلاً لا يخشى في الحق لومة لائم حتى أنني أذكر عندما كنتُ ضابطا احتياطيا في القوات المسلحة ، حاولت التوسط لأحد الزملاء عنده و كان هذا الزميل مخالف فما كان إلا أن أخذت دشاً باردا فوق رأسي أمام موظفي مكتبه و كأنه نسي أنني ابنه الذي يرتدي الحلة العسكرية أمامه .
التحقت بمدرسة أحمد عرابي الابتدائية ثم انتقلت بعدها لمدرسة الشهيد حمدي الإعدادية و من بعدها لمدرسة الشهيد رياض الثانوية العسكرية و التي أخذت منها شهادة الثانوية العامة . و كان هذا في العام 1975م .
كانت بي رغبة شديدة للإلتحاق بإحدى الكليات العسكرية و خاصة الفنية العسكرية و لكن الظروف حالت دون ذلك فالتحقت بكلية الطب البيطري التي تخرجت منها عام 1980م .
و بعد أن أنهيت دراستي الجامعية و أديت الخدمة العسكرية تغير مسار حياتي تماماً بدءً من السفر للأردن و مرورا ببعض الدول الأوربية كهولندا و النمسا و تركيا و يوغوسلافيا و انتهاءً بالمملكة العربية السعودية التي أقيم فيها الآن منذ أكثر من سبعة عشر عاما أدير فيها إحدى مؤسسات الأدوية .
تزوجت بأم رامي حفظها الله و بارك فيها مع نهاية العام 1988م و رزقني الله منها بولد ( رامي ) في كلية التربية قسم فيزياء و بنتين ( سلمى في الصف الثالث الإعدادي و مروة في الصف الخامس الابتدائي ) جميعهم مع أمهم هم كل شيء في حياتي لهم اعيش و لهم أعطي حبي و وقتي .
كنت محبا للقراءة منذ نعومة أظفاري و كان أبي رحمه الله يوفر لي الكتب و القصص و الدواوين التي أحبها حين لمس بي رغبة في الأدب بشتى أنواعه شعراً و نثراً .. حتى حفلت مكتبته رحمه الله بأنفس الكتب و التي ورثتها منه رحمه الله مستأذنا بقية أخوتي فيها .
و كان القرآن هو معلمي الأول و ما زال فمن كلام الله عز و جل تعلمت فنون الكلام و طريقة النطق و مخارج الألفاظ حتى أنني فزت بجائزة الإلقاء في كثير من مسابقات الشعر التي كانت تنظمها الجامعة .
أحببت الشعر حباً كثيراً و عشقته حد الثماله و له كرست معظم وقتي و فكري فقرأت لفحول الشعراء في عصر ما قبل الإسلام و العصر العباسي و الأموي و العصر الحديث ابتداءً من البارودي و مرورا بشوقي و حافظ و انتهاءً بأدونيس و محمود درويش . و لا زالت القراءة دون انقطاع حتى أنني أقرأ أيضا لكثير من الشعراء عبر شبكة الإنترنت و مواقعها المختلفة الشباب منهم و المخضرمين .
روحي مرحة .. أعشق النكته و التندر و أحب مداعبة أصدقائي و مشاغبتهم حتى في ردودي عليهم .. احببت الناس فأحبوني و هذه نعمة كبيرة منَّ الله عليَّ بها فكان لي قبولٌ عند الكثيرين .
أتعامل مع الآخر بأدب و احترام حتى لو أخطأ فيّ ، و أغفر له لأنني أيضا لي أخطائي و زلاتي و أحب أن تُغفر لي . و الله غفور رحيم
========================
من أعماله المنشورة ديوان شعري عمودي و تفعيلي بعنوان ( البنفسج يرفض الذبول ) , وأعمال أخرى ،
و إليكم بعض أعماله .
|
|
|
|
زهرة المطر |
07-30-2015 05:03 PM |
رد: شاعر القمح د.جمال مرسي
و ليه نحزن؟
1
http://www.lahaonline.com/media/imag...sabdls2n0o.jpg
و ليه نحزن ؟
ما دام نقدر نعيش الفرْح
و نشطب من معاجمنا معاني الجرح
و نمحي لون سواد غيّم على عنينا
بمحايه
عشان نقدر نشوف الشمس
نور الشمس
ننسى إيه يكون اليأس
و في ساعة صفا نرسم
في كراسة الحياه ورده
و ياسمينه
و شجرة توت و ضلايه
و عصفورة لصاحبتها
بتهمس همس .
***
فتحت اليوم شبابيكي على الدنيا
و كان الوقت وقت شروق .
لقيت الناس
كتير أجناس
برغم جراحها فرحانة
دا رايح شغله من بدري
و دا ماشي
و دا بيجري
و دي بتنادي يا أوطة و يا بطيخ
و دا رايح على غيطه و شايل فوق كتافه الفاس
و وسط المعمعه جاني
يا صاحبي صوت و كان مخنوق
ينادي يقول يا تسنيمي
عليا قومي سدي الباب و خليني
أعيش وحدي بأحزاني
دا انا اللي فيا يكفّيني
جاوبت الصوت
بقلب حنون ملاه الشوق
بلاش الحزن ليه نزعل
و ليه دايما نبص لتحت لو نقدر نبص لفوق .
***
و ليه نحزن
مادام نقدر نشوف أحلامنا في مرايه
و نلقى اصحابنا حوالينا
في وقت الشدة يحمونا
و ايدهم لينا ممدوده
تعدي بينا سكتنا اللي مسدوده
و ليه دايما نبص لنص كوبايه و كان فاضي
مادام نقدر نبص لنصها المليان
دي هي الدنيا يا صاحبي كدا حالها
تبات مهموم تقوم فرحان
و عجلة يومها ما وقفت عن الدوران |
|
|
زهرة المطر |
07-30-2015 05:33 PM |
رد: شاعر القمح د.جمال مرسي
الله عليكِ يا مصر
2
http://www.sham-alro7.com/vb/data:im...D2wtzW6kB//9k=
الله عليكِ يا مصر
و الكل بيحبك
و الكل يا أمنا
شايلاه هنا ف. قلبك
و الكل مهما بعد أو حتى يتغرب
لازم يجيلو اليوم
يقعد هنا جنبك
***
في ظل شجرة توت
أو حضن جميزه
كان المزاج مبسوط
من طنطا للجيزه
نقعد كدا شله
نحكي نوادرنا
و تسيل دموع العين
م. الفرحه و اللمه
نفتح قلوبنا لمين
غير ليكي يا طاهره
تاخدينا بالأحضان
و ننام كدا ف. حضنك
***
يا مصر عمرك يوم
ما كنتي يوم قاسية
اصلك رضعتي النيل
و على الضفاف راسيه
نخله و هرم و بيوت
يتحدوا نصل الموت
أما العدو الغدار
ينهار أمام شعبك
***
يا غاليه يا طاهره
عايشين بأنفاسك
عايشين هناك بره
حاسّين بإحساسك
و نقول بعلو الصوت
و الفخر مصريين
كاسبين جمال الروح
و الخفه من طبعك
و اللي شرب م. النيل
لازم هيرجعلك
|
|
|
|
زهرة المطر |
07-30-2015 05:36 PM |
رد: شاعر القمح د.جمال مرسي
القلب ليه أصبح حجر؟
3
http://www.sham-alro7.com/vb/data:im...iD+noksteL/9k=
يا ناس عرفتم ليه قلوبنا من حجر
علشان نفوسنا اتغيرت
و ما عادش ف. عيونّا نظر
..سكت السلاح الحر و نسينا البشر
اللي في صبرا أو شاتيلا اتقتّلوا
أو حتى في بحر البقر
و نسينا ان الكلب شارون الجبان اللي انسعر
كان هو شيخ الجزارين
اللي دبح و اللي نحر
و اللي سلخ جلد الدبيحه في الضحى أو في السحر
و الكل مبسوط من عمل خنزير يهود
نسل القرود
اللي غدر
و اللي انتصر
علشان يا صاحبي كلنا صابنا الخَوَر
و قعدنا نبكي زي نسوان الجنازه
بدموع رخيصه و نهنهات ما لهاشي عازه
و قعدنا نحلم ان امجاد العرب
ترجع و لسه غرقانين وسط اللذاذه
نحلم بكوره أو جوازه
و نهز اجسادنا طرب
لحد ما نسينا الأدب
و يموت ياسين
مليون ياسين
و تروح جنين أو دير ياسين
و الكل ساكت
ودن طين أو من عجين
و لحد ما يفوق العرب
نفضل ندور عن سبب
يا دي العجب
يا للقدر
علشان كدا قلب البشر
صار من حجر
ما يهمهوش اللي اتقتل
و اللي انكسر
|
|
|
زهرة المطر |
07-30-2015 05:41 PM |
رد: شاعر القمح د.جمال مرسي
صباح الورد
4
http://morning-evening.net/images/im...fb1621a703.jpg
صباح واخد عبيره من ورود الخد
و لونه من بياض قلبك
و طعمه من زلال الشهد
و سحرك لما بتطلي على عيني
يفوق الحد
و لما أسمع طيور قلبك تغنيلي
و صوتك في الفضا يعزف مواويلي
بحنّ للونك النيلي
بحنّ بجد
و ييجي العيد
و عيدك عندي أجمل عيد
يزيد شوقي
و حبي يزيد
و بتمنّى .. أكون جنبك
أقيد شمعه
و أمسح ع. الخدود دمعة
و أهمس لك
بأحلى أحلى كلمة شوق
أقول سامعه ؟
تجاوبيني بقلب كبير بيحويني
و صوت زي الربيع ممتد
بحبك حب فاق الحد
|
|
|
زهرة المطر |
07-30-2015 05:44 PM |
رد: شاعر القمح د.جمال مرسي
وحشتيني
http://jokes-funny.net/images/img_1/...93b242da4d.jpg
وحشتيني..
وبُعدي عن عنيك السودْ..
على عيني .
وحشتيني ..
وشوقي كل يوم بيزيدْ ..
لأحلى خدودْ..
تزينها نجومْ وورودْ..
وصوتكْ لو يصحيني.
وحشتيني.
وحشني الهمس في همسكْ .
ونبض الحب في حِسِّكْ .
وغيرتي لو نسيم الصبحْ ...
يا عمري...
في يوم مسِّكْ.
أنا بكره اللي جاي ليكِ
أنا يومكْ .
أنا أَمسكْ .
وبعدي عن دفا قلبك بيكويني
وحشتيني
بجد بقول وحشتيني
و شيء يرضيك يرضيني .
وتفديكِ عيون القلبْ ..
تفديكِ شراييني
وعين ما شافتشْ غير حسنكْ .
بتشهد لكْ ..
وكل الكون بيشهد لكْ ...
بإنكْ شمس في جبيني .
وحشتيني
ولما في يوم أعود ليكِ
وأحط اديا في إديكِ
وابدأ خطوتي بيك ..
وأضمك ضمت المشتاق ..
تضميني.
وترويني .
ومين غيرك هيرويني
ومين زيك هيسقيني
وأنا العطشان و طال بعدي
و حبك أغلى شيء عندي
يا ست الحسن يا بلدي |
|
|
زهرة المطر |
07-30-2015 05:48 PM |
رد: شاعر القمح د.جمال مرسي
حبيبي يا رسول الله .
6
http://www.gl3a.com/album/342260_1361550230.jpg
حبيبي يا رسول الله
يا خاتم أنبياء الله .
يا مُرسَل بالهدايه من إله الناسْ ..
لكل الناسْ .
و بالقرآن تنور ضلمة التايهين
و ترجم بيه شيطان خناسْ .
و في سالف عصور الجهلْ ،
كنت النورْ .
و ينزل بالهدى جبريلْ ،
يقول : " اقرأ " ..
يزيد النورْ
و ييجي الأمر من ربكْ ،
تهاجر يا بن عبد اللهْ
تخط برجلك الطاهره طريق النورْ .
و نفضل في سنا نوركْ ...
على درب الهدي ماشيين ،
ليوم الدين .
عشان حققت للدنيا بكلْمة حق مطلبها
و خليت الطريق واضحْ
في شرقيها و مغربها
و جند الشر بالحجة بتغلبها
و تجذبها،
لدين اللهْ .
و لو كنت الغليظ القلب كانوا انفضّوا من حولك
و لكنكْ ..
مثال النُبل و الأخلاق في كل زمانْ
و جيت بالحق لجل تتمم الأديان
و تغرس في القلوب الطهر ،
تمحي الغدر و الطغيانْ .
و يتبدل سلاح الكفر و الجبروت
بغصن أمانْ .
و من نار الجحيم نهربْ إلى جنه من الإيمان
لأنّك رحمة للإنسان .
***
و بيدور الزمن بينا ...
و لا نصحصح
و تتبدل رجال و بلاد
تروح أمجاد
و ييجي ناس كتير حُسّاد
قلوبهم صخره مليانه بزيف و سواد
لا لاقوا حد يردعهم
و لا بالحق يمنعهم
فسابوا كلابهم الهايجه بعرض "المصطفى" تسرح
و تكذب تفتري تنبح
و تنشر سمها تجرح
و في الدنمارك يا حسرهْ...
لقت مطرح
و قلبي للأسى و الحزن يا "طه" بقى مسرح .
صور عِفْنه و كدابه
جرايد كلها كتابه
تعالب مكر و ديابه
و مين يا ناس يصحّينا من النومه ؟
ندافع عن حبيب الله بكلمة حق أو قومه
نشوف أعداءْ لنا بانوا و لا مرايه
إذا قابلونا وش لوش و حكايه
و لما نديّر السحنهْ ...
لهم في الضهر سلاّيه .
بتنهش لحمنا و تدبح
***
حبيبي يا رسول الله
فداك روحي
فداك أهلي و أولادي
راح ارفع بالندا صوتي
و أقول الحق لو في الحق كان موتي
بضايعهم نقاطعها
و شكوانا ، لمجلس أمن نرفعها
نخلي الأرض ، كل الأرض تسمعها
و لولا إن دين الحق علمنا
بإن الأنبيا واحد
لكنا نقول على موسى
على عيسى
و لكن ربنا الواحد
أمرنا بالإيمان بيهم
و دا الفرق اللي بين الكفر و الإيمان .
و دا العلم اللي علمته
لنا في خاتم الأديان .
|
|
|
زهرة المطر |
07-30-2015 05:52 PM |
رد: شاعر القمح د.جمال مرسي
7
إن حبيت تبحث عن صاحب
http://www.sham-alro7.com/vb/data:im...AAhCEACEIQB//Z
ان حبيت تبحث عن صاحب
اركب قارب
وسط البحر و جدف جامد
اوعى تخاف الموج و تهابه
افضل حارب
لما تلاقي جزيرة بعيدة
ارمي الهلب بتاعك و انزل
و افضل ماشي
خليك ماشي
تلقى طيور ع. الغصن تغني
تلقى وحوش في البر بتجري
تلقى زهور بريه كتير
تسمع صوت زقزقة و زئير
و هناك كوخ في الغابة مضلم
امسك شمعه
و افتح باب الكوخ بالراحة
و ادخل فيه بشويش بالراحة
تلقى كتاب
شكله مغبر كله تراب
ما يهمكش ترابه و شكله
أصله قديم من عمر الدنيا
لكن كله كلام موزون
قاله لسان و لا أي لسان
قال الصاحب
اوعى تدور عنه يا صاحبي
في الإنسان .
|
|
|
زهرة المطر |
07-30-2015 06:01 PM |
رد: شاعر القمح د.جمال مرسي
بتضحك لي
http://media.linkonlineworld.com/img...22-59-5067.jpg
باحسّ الدنيا بتغني و تضحكلي
و تفرش لي
بساط أبيض من التلّي
و بتقوللي
عليه إمشي
عليه وردي ، عليه فلّي
و غيمة عشق ممدوده
عشان تحميك من الشمس اللي فوق راسك
و أنفاسي
في عز البرد حراسك
و تضحك لي
با حسّ الدنيا تضحك لي
و بتجيني
و تبدر ضيّها ف . عيني
أشوف نورِك على جبيني
و حبِّك في شراييني
أقول من قلبي سامحيني
و دايما ع. الغريب طلّي .
أنا امبارح
و انا بكره
و عمر الشوق ما كان ذكره
و لا فكره ..
على الخاطر بتمحيها قوام غلطه
و عمره ف. يوم ما كان كلمة بنكتبها
و لا نقولها
بدون إحساس
و لحظة طيش بنمسحها من الكراس
و نفضل بعدها ف. ورطه
دا عهد كبير بيربطنا
بميت ربطه
و لحظة صدق بنعيشها بتحييني
أسامحك لو تجافيني
و تضحك لي
كتير لو يوم تسامحيني |
|
|
زهرة المطر |
07-30-2015 06:06 PM |
رد: شاعر القمح د.جمال مرسي
9
اعترف لك
http://www.sham-alro7.com/vb/data:im...DHS9gAc5QB/9k=
باعترف لك يا حياتي
ان حبك كان منايا
و الهوى ساكن حشايا
من زمان و انا عود صغير
و الفؤاد الغض أخضر
و امّا شوفتك
بعد ما مرت سنين
دق قلبي بالحنين
حس ان الصبح نوَّرْ
و ان ورد الحب زهّر
يا حياتي في الحنايا
بحر عينك خدني ليه
روحت اسبح
كان نصيبي غرقت فيه
كنت مبسوط بالغرق جوه العنين
طول ما ايدك لامسه ايدي
هي مجدافي و عودي
طول ما قلبك كان معايا و الحنين
كنت مبسوط بالغرق جوه العنين
|
|
|
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
new notificatio by 9adq_ala7sas
HêĽм √ 3.1 BY: ! ωαнαм ! © 2010
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd.
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها
ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف