اقول بسم الله الرحمن الرحيم
خاشة للمطبخ بالرجل اليمين وماما وراى عشان تعلمنى الطبخ ....طبعا بالاول سويت الهوايل
المهم اول طبخة كانت مكرونة مبكبكة اجدت طبخها بس للاسف انا ما احبها ابدا ويوم يعملوها بالبيت اعمل مشاكل لها اول ومالها اخر ....كل الناس تقولى يافيفى حلوة وكل الناس تحبها يس انا دماغى ناشف ما احبها يعنى ما احبها اوريكم صورتها وبعدين اكمل لكم الحديث المطبخى
قاعدين فى غنة المبكبكة زى ماشفتو يعملوها الناس على السريع فى الزرادى وفى الايام العصيبة هههههههههه زى ماصار عندنا ايام الحرب الكل مشغول ومش فاضى يعمل شى المهم ياأخوانى يوم بعد يوم مبكبكة الى حد ماوليت زى الخلال (الخيال)
مأساتى مع المكرونة المبكبكة لم ولن تنتهى الا بزوالها من الدنيا ككككككككككككك
المشكلة كل الناس تحبها الا انا .........
ملاحظة ...المكرونة المبكبكة ماعادش ياكلو فيها فى الصحون صارو يحطوها فى السفرة كل هدا يعملوه لاغرائى بأكلها بس متنحة مافى فايدة
طيب لوكانت جارية كان فيها مافيها بس احيانا تجى يابسة شوية وهنا الكارثة كككككككككك لماتبرد تنزل طرف واحد ومحسوبتكم تجى من العمل جعانة ومتأخرة يعنى الاقيها طرف واحد وهنا يغلى الدم فى عروقى ويرتفع ضغطى...واتركها واروح اقلى دحية (بيضة)لحد ماقربت اكاكى متل الدجاج
المكرونة المبكبكة عبارة على انك تجيب الطنجرة وتحطها على النار حط زيت وقرض بصل خليه الى ان يتحمر وحط فلفل بظار(كركم) وطماطم ومعاهم اللحم خليهم يغلو شوية وبعدين صبو فوقها شوية مويا وماتنسوش الملح باش ماتطلعش صامتة خليه فوق النار تغلى وبعدين صبو المويا الى مسامير الطنجرة ادا كنتو عيلة كبيرة اوينه حطو بعدين المكرونة وخليها الى ان تنضج وحطى قرينات فلفل اخضر باش تجيك حارة ومفلفة ...المهم اوينه كان جاتك جارية فيها مافيها ولو جاتك يابسة دور وين تحطها على حسب رائى وخصوصا انكم عملتو طنجرة مليانة
ككككككككككك
طيب انا نسيت نقول لكم ان ممكن نعملها بسوالف القرنيط ( الاخطبوط) وفيه اللى يحط فى الاخير ريحان وتجى زى العسل على حسب كلامهم
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف
مدونتى المطبخية
العرض العادي
