الشاعر الأمير محمد الأحمد السديري

مرقا العلا خطرعسـيـرصـعـوده=ما يطلعه مـن لاتجلدعلـي الكـود
والبيـت مايبنـي بليـا عمـوده=والحيف يزعل من عن الحق مردود
والحريجـزع يـوم توطـاحـدوده=وتشرهه نفسه علي الطيب والزود
ولايشتكي مـن لا تضـره لهـوده=انشاف جورالحيف والعدل مفقـود
والوقت شفناكل بيضـه وسـوده=وشفنانهاره مع لياليـه مضهـود
والغيم لوتسمع صواعـق رعـوده=لاممطروبـل ولاهـوب مـريـود
يامدوريـن الطيـب قيسوعـدوده=والطيب عد بين الاجـواد مـارود
والناس بارض الله تراهم شهـوده=وحق بلا فعل علي الرجل مجحـود
والنذل حيـلات الـردى ماتكـوده=واليابغا الطولات مايـدرك الجـود
عن المراجـل قاصـرات زنـوده=طيرالعشا يصبر علي كـل منقـود
الخيل ماتشكي مضاريب عوده= وبالقيظ ماركب النضا مثل صاهود
يعيش في دنياه همه رقوده= ولانفضنه قرح الخيل والقود
لاعل رحمة خالقه ماتعوده= وعساه مع زمرة هل النار بخلود
هذا زمان هايبات فهوده= والناس نادو عنتره بأسم مسعود
واشوف لي رجلٍ يعدد جدوده= لوان ابوه وجده اضعف من الدود
كلت من الماطا رواسي حيوده= والبوم شاش ولابسٍ درع داوود
والنيص حط لهامة الراس خوده= عقب المذله له طوابير وجنود
ماكن شيٍ في زمانه يكوده= شاهد بها الدنياسلامات وركود
وحتى الغراب اليوم يفخر بجوده= والفار بذراعه قطع كل بالود
والشري والحرمل تباهت وروده= وقامت تشيل غصونه الماس وعقود
ياحسين زانت له ليالي سعوده= وصدق حياه بزايد الوبل ورعود

قلت آه من صبر صبرته على الكود =ومن ونة للقلب جاحت وقدت
ونة عتب ونة غضب مالها حدود =ياليتها عن مغلق الصدر صدت
لوهى بحيد ذوبت كل جلمود =على الضماير بالهضايم تحدت
قامت تعرض لي بالايام والسود =ان قلت قفت عودت لي وردت
ان قلت هانت بالحشا جابت الزود =وجاحت خفايا ضامري واستجدت
وزادت جروح القلب بجروح ولهود =ودنياي مالت عن سنعها ولدت
والعين كن بنونها ملح بارود =على السهر كل الليالي تحدت
تسهر وبعض الناس هجاع ورقود =وهي تبي فرقاه ما فيه لدت
ونشدت يا تركي عن اللي بهم جود =وقالوا ضعون اهل المروات مدت
العدل من شد ومع الناس مفقود =وبفعالهم عمسين الاريا تقدت
منزالهم خال تصافق به النود =من يوم عنه اسلاف الاجواد شدت
افقوا على الدنيا هل الخيل والقود =اللي فضايلهم على الناس بدت
هل الفعول ولبسهم صنع داوود =وهل المهار اللي على الضد كدت
عصمان الاريا مشرعة كل مجرود =ليت الليالي السود عنهم تعدت
الناس بالايام طارد ومطرود =ياليتها باهل المروه تحدت
وطير الفلاح اللي عن الصيد مردود =عقبه تبوع علمت واستهدت
اشوف ناس عندها الحقد ماجود =ونفوسهم عن كل عليا تردت
العدل في ساحاتهم صار مفقود =وعن الفضيلة جنبت واستردت
ما يرفعون النفس عن كل منقود =ان ما تعشت عرضها له تعدت
تعطى عن العليا محاريف وصدود=ووجيههم ما قيل بالجود ندت

دنياك يا مخلوق يظهر بها أشكال =توريك صفحات وتكشف لك الغيب
تخفي عنك حال وتبدي لك احوال =تكدر مشاريب وتصفي مشاريب
يهفا بها جيل وتخلق بها اجيال =ولو اضحكت تبكي وفيها عذاريب
للمفتهم فيها جديدات واسمال =بيض لياليها وسود غرابيب
وفيها نهار واضح يشعل اشعال =وفيها نهار مظلم به لواهيب
احد تدعذع له على روس الاقذال =واحد يعيش من الوزا عيشة الذيب
دنياك تجري بين الاقفا والاقبال =واليا اوجهت غارات خيل مهاذيب
يالادمي ما طاوعت كل عذال =كم ليعت بالبوق من يفعل الطيب
دنيا يبيد حيلها كل محتال =تدور بك دورات عجل الدواليب
باقفايها تعرض ولا ترحم الحال =وباقبالها تملا كبار المحاليب
انبيك يا من سلت عن بعض الاحوال =انشد وانا لك حاضر الفكر ومجيب
أن كان تبي الرشد يا طيب الفال =ازبن على رزاق عكف المخاليب
ازبن على اللي في يده علم الاجال =علام ما بالكن مذر المعاطيب
الواحد اللي للصعيبات حلال =منقذ مداريك ومبري مصاويب
اخلص لعلام السراير بالافعال =وناجه اليا صكت عليك اللواليب
ادعه يفرج لك ليا صكك الجال =حلال عسرات الأمور المصاعيب
اللي دعاه ايوب من ضيم الاهوال =وانجاه من حال تزايد بها الشيب
الناس في دنياك كل له اعمال =اتبع طريق العدل وابعد عن العيب
درب النقا بين ولك فيه مدخال =ومن باق ماله عند ربه مقاضيب
واليا رضا حلال عسرات الاقفال =لاتلتفت للخلق لو هم مغاضيب
لا تلتفت للخلق راحل ونزال =مالك على ذريه آدم مطاليب
وفيقك المامون حطه على البال =واذره الياجن الليالي شلاهيب
اجعل بقلبك له محل ومدهال =لقاه ذخر بمعضلات المواجيب
عديل روحك لا تدور به ابدال =عونك ليا صكو عليك المغاليب
ما هوب من شيل العظايم بملال =يصبر كما تصبر على شيلها النيب
مفراص ماص للصعيبات حلال =صميل قيض وماضيا له تجاريب
واحذر ترى بالناس مبغض وختال =ماله مراجل كود شذب العراقيب
عن مذهبه خلك على رأس ماطال =وخله على فاله يشم المغاريب
البوم يسكن بالخرايب والاطلال =والحر مسكانه بروس المراقيب
طير السعد من كفه الدم شلال =بالمخلب الساطي عطيب المضاريب
ولا يغرك بالرخم كبر الازوال=وكبر النسور المهدفات المحاديب

إن صار زود المال بيدين الأنذال=حنّا من المعروف تندا يدينا
وإن كان شرهو على طيب الأفعال=حنّا وردنا جمامها و ارتوينا
وإن فكّرو للجود يمشون رحّال=حّنا قبل يمشون يمّه خطينا
يا ما لبسنا للشرف كل سربال=وعلى البسيطه للفضيله مشينا
في دوحة العربا لنا مجد وظلال=وحّنا على درب المكارم غذينا
لو نجمع إللي فات منّا من المال=ان كان شيّدنا القصور وبنينا
نعطي ولا نتبع عطانا بالاقوال=ونبذل ونسكت كننا ما عطينا
وإن باعوا الشيمه بدينار وريال =حّنا دخلنا سوقها وأشترينا
نطلع لها لو هي على روس الاقذال=لوهوعسيرٍ دربها ما نثنينا
بافعالنا نرسم دروب للاجيال=إلى نساها غيرنا ما نسينا
اسود سادات تسجل للاشبال=فضايل شمنا لها وأهتدينا
بيضٍ نسجلهن جديدات وسمال=حفايظٍ لاحفادنا اللاحقينا
نصبر على الشدات لو شيلنا مال=لو سال دم ادفوفنا ما شكينا
نخاف يلقى سدّنا كل ختال=ويبني هزيلات المعاني علينا
الليل يا خالدعلى والدك طال=وهنّينت ناس بالكرا نايمينا
يا عز راسي شفت ما خبّث البال=شئ يهوّل شيّب الجاهلينا
شى من أسبابه يشيب بالاطفال=فطّر خشوم مهجرعات الحنينا
اديرقالات عريضات و اطوال=قالات خلّن المخفىّ يبينا
منهن رزين العقل بالوقت يهتال=بوقتٍ عبوس فطّن الغافلينا
وقت من أسبابه شكا كل ريبال=نصبر ونسكت كننا غايبينا
الناس با لايّام راحل ونزّال=وتفجعهم الدنيا وهم دالهينا
وحيات رب نزّل آيات الانفال=عالم خفايا نية الحاقدينا
ما اترك طريق العدل في كل الاحوال=لو يرحل المريخ للفرقدينا

لزيت نفسي مير عيت تلزا=وقهرتها غصب على غير ماجاز
مير انها شامت تبي درب عزا=وتبي من الاحراز تظهر للابراز
ان صار من بعض المشارب تكزا=النفس ماتغصب على غير ماجاز
وش حيلتي لا صار فكري مجزا=وقته رماه وفرقه مثل عناز
كن المناشر له تعط وتحزا=وكنه يكظه قالع الضرس بالكاز
عيني االى نامت عيون الاعزا=ياقف لها عن لذة النوم حجاز
وعن الهموم الى بغيت اتعزا=تجهز علي جموعها فرد واجواز
رايتها وسط الضماير ترزا=ليته يذاودها عن النوم حواز
اكنها ولها بصدري موزا=اخاف يقضب غيبتي كل لماز
حلو كلامه مير قلبه مخزا=وده يحطم وسط نار من الغاز
اسهر وعندي شف تقل وزا=وانا لهن مع ضيقة الصدر معتاز
فنجالهن بين الشفايا يمزا=اشقر ومشروبه عن الخمر يمتاز
وافرح بعلم صادق مبرهزا=ونبي على سكانة القدس ملكاز

يالله يالي كل حي يراجيه= يالي بمايخفى علـى الناس علام
يامن دعاه ايوب من جورمافيه =ونجا الخليل وذل عباد الاصنام
تفرج لقلب كاثراتً طواريه =تارد همومه بالحشا فرد واتوام
لوصاح باعلى الصوت يمة مناديه =ماينتبه فكره بجو الفضا حام
ماينتبه من جايرٍ وسط خافيه =زود عناه وشتت افكاره اقسام
كن السعاير بالضماير تحاضيه =ومن العنا كنه على كير فحام
عزي لمن كثر الروابع تناجيه =ان هام شرق ادوى على نقرة الشام
وبالغرب كن معالج القلب يدعيه =وعينه بنجم سهيل يوضى بالاظلام
العبديم الخير ربه يمشيه =ان جاد حظه بدل المشي درهام
ابوصي اللي مالقى من يقديه =وصيةٍ تبقى لناسٍ بالارحام
وصيةٍ بيضا تكاشف معانيه =فيها الدليل لنايمٍ مابعد قام
بيتك عن الانذال بعد مبانيه= وقبلك ذياب الخيل عن ديرته شام
وبالك رفيق السؤ حذرا تباريه =ونظف حلالك عن حلال الايتام
ولا تلحق المقفي عبار ومشاريه =انسه ولايلحقك لومه اليالام
ومن لاتحمل زلتك لاتصافيه =خله ولو انه لرفقتك عـزام
وراع الخيانه بالخلا لاتخاويه =ماينومن قلبه على الغدر مريام
وراع النمامه بيناتٍ مواريه =تلقاه عند مدور الحكي خدام
درب الردى ماشيه والحظ مهفيه=اسود ولو ثوبه جديدً من الخام
ياكل عروض الناس وابليس مغويه=عن السفر ممشاه بدروب الاظلام
ومن لايبش بوجه ضيفه وعانيه =ياطا دياره ماوطى ديرة أدهام
رافق عديمٍ جاذباته مجانيه =مجربٍ يضحك حجاجك اليا قام
زعلك يزعل منه ورضاك يرضيه=تلقاه ذخرٍ بالليالي والايام
اللى بعدوانك تكاشف مصاطيه=يجوزله يامدور العرف الاكرام
هذاك ملزومٍ تعزه وتغليه =خلك لحاجاته سريع ومولام
قولولزبن اني على البعد ناخيه=يشوف منيوبٍ على الكود كظام
يشوف من حرالسمايم تصاليه =تجددت شكواه عامٍ باثر عام
همه بصندوق الضماير مخفيه =ومعودٍ قلبه على الكود جزام
شاف الحصيني ماتناتٍ علابيه =وعلى رقاب الحصن ياطا بالاقدام
سبحان من بالكون مكن عراويه=ويقدر بغمضة عين لعراه صرام
بحسناك يامرجع ليعقوب غاليه =تكتب لنا حظٍ يذعذع بالانسام

بالهون يا عذال قلبي ولا يمه =دع الهم بفوادي يصالي هضايمه
اسهرو عيني ما يهملج نظيرها =وقلبك خلي الهم والعين نايمه
إلى صار قلبك بارد الهم غافل =انا ترى قلبي يصالي عظايمه
يجر ونات تضايق بها الحشا =ايضاً ولي روح بالافلاك حايمه
ان هاجت افكاري على وتزايدت =تصور بعيني ساعة الحشر قايمه
تلاطم هموم القلب بالصدر كنها =ملاطم الامواج بالبحر عايمه
هم يفارقني وهم يزورني =وهم يزايمني وهم ازايمه
اسلي فوادي بالهموم وغايتي =إلى مرقب قلبي يحبه ورايمه
منيع الذرا يبعدك عن ساقط الملا =إلى صار لك نفس عن الذل شايمه
الذل يوريك الهوان وتنتمي =إلى امة في مرتع الذل هايمه
خاطر بدرب المجد يا طالب العلا =ترى خالق الدنيا كبار غنايمه
اللي يريد المجد يشريه لو غلا =وحليف المذله من تردت عزايمه
اختر طريق العز لو به منيتك =واعرف ترى دنياك ما هي بدايمه
حليف المذله لا تطاوع مشورته =إلى بغا لاماك حذرا تلايمه
ترى الفتى بالعزم يدرك مرامه =يخيف عدوانه وتقوى شكايمه
اتبع طريق العدل والطيب والنقا =وافطن لحظك لا تبيعه لسايمه
لا جاك مذموم من الناس مجرم =خلك بعيد لا تنوشك جرايمه
رفيقك المخلص تحمل مصيبته =اذكر فعول الطيب واذكر قدايمه
لا تتركه لعداه وعداك وحده =إلى تركته يلحقنك لوايمه
لاصابه الخطب العظيم تذكرك =تزيح عنه الكرب لا صار ضايمه
إلى التجابك واحد ضده النيا =عانيك لا ترضى عليه بهزايمه
بعدك عن الانذال فيه المعزه =في مهمه صيد المها في خرايمه
لو انت بالصيف الشديد وحره =يلفحك من حر الهواجر سمايمه
اخير من قربك لئيم وحاسد=ورزقك على رب له الخلق صايمه

فـات العــجاج وقـلت بالخــير مقبـوع =واثـر العـجـاجـة مــقتـفــيها عجــاجــــــــه
بالعـيـن شفـنا الحـيف والعــــدل مرفـوع=وبدى يغيب النـور عـقب انبــــــلاجـــه
وابعـد علينا الـعـدل من حبة الكـوع=وصار الخـطر من راكبــين الــحداجـــــه
وعن الــوطا غيـث السمــاء صـار ممنـوع=الله يعجـل لمــته بـــا نفراجــــــــه
قولوا لابـو فيــصل ترى الشـر مـزروع=ويصـعب عليه الى تعــظّم عــــــــلاجه
لا يتـرك الـدنيـا بلا اشبــوح واطـلـوع=نخـاف من سيـلٍ يزيـد ارتهـــــاجــــــــه
لازم يحــط الحبـل مثني ومـربـوع=ويخـط درب مايجـيبه عــــــــــــــــواجــــــــه
والقصـر لو إنه مـن الصلب مصنـوع=إن عاب ساسه ماتفيـدك بـراجـــه
والـراس مايــفزع الى صار مقطـوع=وللحـيّ ما قالو شف الميـت ناجـــه
والبيض مالبسن مـن الطـاس ودروع=والصّبـح بيّـن ينعــرف بانفجاجــــه
ولا حيٍّ الا يـعـرف الشبـع والجـوع=ونــفسه لها فـي كل الايام حــــاجـــه
اشوف نـاس زادو الخبـث بطبــوع=والـكل منهم قـام يرفـع حجاجـــه
ما جرّبـو غـارات طامع ومطموع=ولا دوّجـو بالحـرب يوم المـواجه
في سـاعة فيها الصعب يهتدي طوع=لا صار لافــواه المـدافع لجـاجــه
كم واحـد في ماقـف الطيـب مشلوع=ينقـص مقامه عقــب فعـل السماجه
كم واحد يصعد للافلاك بـطـلوع=بعزمٍ حـديد الصلب ذابه وعاجــــه
لقيت ناس مالقى لاصلها قـوع=وشفنا الفهـد والذيـب يتلى نعاجه
عـزَّاه ياقلب معـذّب ومـقلوع=خيل عليه وضيـقت به فجـاجه
ناس على نـوع وقلـبي على نـوع=وبيـني وبين الناس مثل الـزراجه
قلـبي صـعب حـرف الوفـا فيه مطبوع=لاشـك من ربـعه يشوف الحراجه
من ما نشوف بناظر العـين مفجـوع=وللطيّـب والله فـزّته وابتهـاجـه

ابا الوقت بايام النحوس يطيع =وانا منه من صرف الزمان وجيع
جرالي من اسباب الليالي وجورها =جرح بخفاق الضمير شنيع
على غالي ما شافت العين مثله =مصافيه يوم ان القلوب جميع
واليوم خلاني تقافت ضعونهم =متى ظعون خلاني على تريع
ابرجي اللاما ولو طال وقتها =متى حيهم لمي يجون نجيع
ان شفتهم بالقرب من نزل حينا =تبدل دهر قلبي على ربيع
عليهم بحر الوجد هاجت صبابتي =من الوجد دمع الناظرين يطيع
يا عين باسم الله كفى من البكا =لك من رجوع الضاعنين شفيع
إلى نهيت العين عن ذرف دمعها =يكب دمع المقلتين سريع
يجيبها قلبي على حر وجدها =الكل منهن بالغرام صريع
ان كادت همومي وهاجت ضمايري =تذكرت من هو للرفيق وديع
تذكرت ابو بندر على الكود والكدا =حيد على كل الحيود رفيع
ابشكي على من هو بشيبان يعتزي =بحر الندا رحب الغباب وسيع
ابشكي على من له تعنت رسالتي =حريب الردا بالمكرمات ضليع
ابشكي من اسباب الهوى حر ما جرى= ابشكي على حذق الفواد منيع
ابشكي على خالد وهو منبع الوفا =حجاب لمن يشكي عليه قريع
غدا منه مقرون الاحجه ومثله =بدبرات رب العالمين يضيع
تجرعت عبراتي على فقد من غدا =وتعوضت من عقب الحرير وشيع
الدار من عقبه محا الهجر وسمها=بها البوم بالصوت الرفيع يذيع

البارحه يا زبن بالقلب هاجوس = اسهر وبعض الناس بالنوم مغفين
شفت الصحيح وواضح العدل منكوس = وجض الفواد وفارق النوم للعين
اضحك ونا الصابر على جرعة الموس= وعزى لمن يصبر ويغضي على الشين
انا الذي قلبي بالانياب مجروس= من عام الأول به جنون وشواطين
قالو علامك قلت بالقلب حاسوس = قالوا تصبر قلت صبري إلى وين
ابكي على اللي للوطن عز وحبوس = راحو عن الدار العزيزه مقفين
اهل الدروع اللي على روسهم طوس= الحاكمين العادلين المصلين
أثر ليال السو يبري لها نحوس = والأرض ما تخلا بليا شياطين
ناس يحدونك على مذهب الروس = وقلبك يبي ما جا بطاها وياسين
يا ليت كل بالموازين مقيوس = حتى يبين الحق بين الموازين
ولا ياليت الحبل محكم وممسوس = ويشاف من يصبر على العسر واللين
من عاش ما حصل بدنياه ناموس = غصب بغير ارضاه يصبر على البين
بالله يالاهين بمقارع الكوس = الطيب عنكم غرب وانتم ورى الصين
الطيب عنكم مع هل الطيب محبوس = تجللوا ثوب الخنا يالرد يين
الطيب ثوبه مع هل المجد ملبوس = واضح وبين له سلوم وقوانين
محد يحوشه بالحيالات وفلوس= واهل الردى ما حصلوه ابملايين
اقفا مع الغالين قطاعة الروس = اللي على القاسين بالفعل قاسين
عرق الندا بقلوب الأجواد مغروس = حمله زهور الورد هي والرياحين
إن كفني وقتي بالانياب وضروس = شكيت للي عز بالغار الاثنين