الشاعر الأمير محمد الأحمد السديري

ياالله انا من جود حسناك طالبك = عفوك ومدك حيث منت بخيلى
يالادمي دنياك هذي تعذبك = لوطفت فيها مالقيت الدليلى
كل على مذهب امامه يخاطبك = يبيك من زايد ذنوبه تشيلى
واليا عصيت اهل المذاهب تعاتبك = كل يقول ابيك يمي تجيلي
ولو انتحيت بعيد بالسؤتطلبك = وكل بصاعه من ذنوبه يكيلي
احد يصحح لك حديثه ويرهبك = واحد يقول الحق عندي نزيلي
واحد يخيفيك في كلامه ويدبك = وابليس يضحك له وهو مستشيلي
الناس عوجان المناطق تكذبك = وعن الصحيح الكذب معهم بديلي
ان مارضيت بقولهم نتف شاربك = وتكبر ذنوبك لوغناك تهليلي
ناس على درب الفضيله تحاربك = وعلى دروب الشر تهذل هذيلى
ودروبهم عسرات عوج وتتعبك = ما تستوي لك لا ولا تستويلي
ينبيك عن دنياك ماضي تجاربك = وعزي لحالك كان عرفك قليلى
اتبع نبيك واترك اللي مجنبك = واقضب مماشى سنته لا تعيلى
اللي بغار الثور للرشد يندبك = وابوبكر عنده نديم وخليلى
نصايحه للرشد حذرا تغايبك = هرجه صحيح وكل فعله جميلي
سنة نبيك للفضيله تقربك = المصطفى ماله شبيه وعديلي
واحذرك عن نقالة السو تقربك = ومن يتبع العايل لزوم يعيلى
لوانت ما تغضب ترى الناس تغضبك = وعقب المعزه يجعلوانك ذليلى
وترى ردي العرق للعيب يجذبك = وتصير بدروب الردا له عميلي
وبنت الردي حذراك حذراك تعجبك = واحذر تصير لمثل هذي حليلى
وعن ما يعيب النسل عرب مناسبك = وعليك في بنت الحصان الاصيلي
يجي ولدها فارق عن قرايبك = ويقف في وجه الخصيم القبيلي
ان كبرت القالات بالفعل يعجبك = ويبرد همومك كان قلبك غليلي
مثل القطامي في هداده يشببك = والدم من مخلاب كفه يسيلي
ليا صارما صلبين الارياء مكاسبك= تراك بين الناس تبقى هزيلي
وترى دروب الخبث يالعبد تذهبك = ويفوت عمرك ما تحصل حصيلي
احذر يابن حوا تطمن لحاجبك =الا لـرب للخلايق يزيلي
الي بعفوه عن عذابه يرغبك = وعينه لكل الخلق دايم تخيلى
في لوحه المحفوظ يا لعبد مذهبك = نزل بحق وكل ما به فضيلى
ومعاشر الخايب مع الناس يذربك = وتصبح قليل الميز عقلك هبيلى
ومعاشر الطيب على الطيب يجلبك = ويرقيك للعليا بظل ظليلي
لا تقرب الأجرب بالامراض يعطبك = يصير جسمك مثل جسمه عليلي
ممشا الخفامن صافي العقل يسلبك = ويصير لك يم الرذيله سبيلي
وعن مارد الانذال نزه مشاربك = واشرب نظيف لوورادك طويلي
ولياك تنسى يابن الأ جواد واجبك = والي يروم المجد حمله ثقيلي
يا لادمي وان كان كبرت مصايبك = ازبن على محي ا لبلاد المحيلى
ازبن على رب بعرشه يراقبك = وناجه وبعد العسر يره جليلي
ناجه ولاجل ارضاه وجه ركايبك = وخلك لعلام السرايردخيلي
هو الذي ينجيك من كود صايبك = ويذريك من كربات هول مهيلي
يا لعبد مكن عند ربك مقاضبك = وفكر وقدر وانتبه لاتميلي
ولحد من الخلاق يالعبد حاجبك = هو الذي مده وعفوه جزيلى
وهو الذي في ما فعلته يحاسبك = وهو الذي بارزاق عبده كفيلي

ينام منهو مايعرف الهمومي = وعيني اليا ناموا حريب لها النوم
الله يلوم اللي لحالي يلومي = لا ساهرن سهري ولاهو بمهوم
ماهو بمثلي يزعجه كل يومي = همن يلوج بداخل الصدر مكتوم
لامبدين أسرار قلبي لقومي = واللي بسر الغيب ماهو بمفهوم
أخاف أبوح السر تبدأ الثلومي = وتاقف على مكنون سري هل اللوم
عاهدت قلبي ما يبوح العلومي = ولايويق بغايته كل مذموم
بالليل أساهر ساريات النجومي = والصبح أعدى بالنباكل مزموم
اوجس بقلبي مثل حر السمومي = ولا صفالي خاين الدهر لويوم
يا سيف قم لعل حظك يقومي = ولعل ابوك بساعه الحشر مرحوم
النار شبه ياقوي العزومي = وهات الدلال وترك النوم لرخوم
خابرك بالطيب ودودورحرمي = قم سو مايبعد عنا كل شغموم
فنجال بن مايحضره رخومي = مبهرن مابين الاجواد مقسوم
ارواحنا بافلاك الايام تومي = مهما يطول العمر فالاجل محتوم
روحي بيد فارض صلاتي وصومي = اللي بحبل اليسر ينجي لمضيوم
الواحد اللي نطلبه كل يومي = منجين يوسف وهو قبل مظلوم
دنيا الشقايا يا سيف ماهي تدومي = كم واحدن فيها مشيحن ومنجوم
وافراح اليا قالوا تقافت غيومي = على شفا الباطن وهو قبل ماسوم
حيثه مرب لكل وضحا ردومي = اللي بها زودن على الطوق برشوم
عسا تعله مرهشات الوسومي = يمطر عليها الوبل يومن بعد يوم
عشبه يغطي نايفات الحزومي = فيه الزهر فوق الزماليق منضوم
مخالف النوار غادي سهومي = والعشب من وبل المراهيش كيهوم
فيه ام سالم من طربها تعومي = تلفح بسمح الريش في كل مرجوم
من الطرب في كل روض تحومي = وتقضي الدنيا زغاريت وسجوم
ان شافت النوار نبته يزومي = ما سايلت عن حال معطا ومحروم

لولا الهرم والفقر والثالث الموت =يالادمي بالكون يا عظم شانك
سخرت ذرات الهوا تفهم الصوت= وخليتها اطوع من تحرك بنانك
جماد تكلمها وهي وسط تابوت =تاخذ وتعطي ما صدر من بيانك
وعزمت من فوق القمر تبني بيوت =من يقهرك لو هو طويل زمانك
لولا الثلاث وشان من قدر الفوت =نفذت كل اللي يقوله لسانك

ارى الدار عقب الضاعنين خراب = ولا شوف فيها من يرد جواب
سكانها يا سيف عنها تقللوا = زالوا كما زال السراب ضباب
شالتهم الايام واقفت ضعونهم = وساقوا كما ساق الشمال سحاب
ضعاين قفت بحي نوده = وشالت لنا فوق الحنايا احباب
واقول والعبرات مني سوابح = فرقا الاحبه للفواد عذاب
ولابي ولا شيء يلوج بخاطري= سوى عندل منها شبابي شاب
صافيتها والعمر في عنفوانه = وصارت على الهينات صعاب
وخاطرت بالنفس العزيزه بحبها = اكابد مغاليل على غضاب
وين الذي يا سيف وان بان وجهه = سنا الشمس عن كل العباد يغاب
وين الذي يا سيف وان جاني الظما = لقيت من بين شفتيه شراب
وين الذي يا سيف مكن صوابي = وانا فيه زودت الصواب صواب
وين الذي يا سيف فضله علينا = حسانيه والله ما لهن حساب
وين الذي يا سيف وان شفت ريبه = احطه على الصدر المريض حجاب
وين الذي يا سيف وان حل دارنا = تبدل من عقب المحول خصاب
وين الذي يا سيف ظيمه يظيمني = واطيب وان قفا عناه وطاب
وين الذي يا سيف اشاكيه ودي = ومن بيننا حب الموده ذاب
وين الذي يا سيف ما ديس عرضه = وعن كل منقود يقال يهاب
وين الذي يا سيف ما شفت مثله = مع الناس ما دام الغراب غراب
وين الذي ما شيف مثله ولا مشى = على الأرض مادام التراب تراب
عنود المها جدد غرامي واجادني = وله بين محني الضلوع صواب
هواياه ما بين الضماير تمكنت = وذوى القلب من جرح الغرام وذاب
ترى الحب بالعشاق حمر طعونه = مضارب سيوف يقتفيها حراب
قولو لخو صنعا شكالك مولع = هوى جادل راحت عليه ذهاب
راحت فوات الحرص من غير مقصد = امور لهن بالكاينات حساب
لا طارش جاني يودي رسالتي = ايضاً ولا منها قريت كتاب
يا زبن ابشكي لك هوى ضامر الحشا= اغديك تفتح لي عليه ابواب
إلى فعلت الخير تحمد فعايلك = وينو لك من الرب الكريم ثواب
وحمل خفوق الطير مني رساله = إلى غالي دونه يحول سراب
اعرج على داره واقبل رسومها = ولا اشوف فيها من يرد جواب

يامرحبا يلي على البعد ناديت = ومية هلا مني والاخرى قفتها
جاوبت بأسماك العزيزه ولبيت= روحي وروحك بالهوى رايمتها
انا الذي لك بالموده تلاجيت = روحن تبي روحن وهي مالكتها
تفتحن زهور قلبي وهليت = وعيني تراعي عشقة عاشقتها
للقلب يا وضاح لانياب تليت = وردون ثوبي عبرتي غرقتها
بسفك الدموع وبالتجلي تلهيت= فاحت وعبراتٍ بصدري حدتها
اليا بكت عيني ذكرتك وونيت= ودنياي من فرقاك ضاقت سعتها
وان غبت يا مضنون عيني وصديت = قلت الفراق وغيبتك ما غضبتها
اكره ليا قفيت وافرح ليا جيت = وعندك خبر نفسي تعرف شفقتها
ياما لشوفك يا حبيبي تعنيت = وكم خطوة للقاك رجلي خطتها
ان شفت غيرك صدت النفس واغضيت = وناسن تبي لاماي غيره عصتها
حبك بقلبي هزني واستخفيت = وجنات عطفك فرحتي غاليتها
انا على ذكراك عشت وتغذيت = وهواجسي فرحاتنا ما نستها
اقسمت لك بالي فرض حجة البيت = ان العهود سنيننا ما خلفتها
ليتك يابو تركي بعينك تحليت= شقرا القرون الناعمه ناقضتها
روحي معه تقعد ليا غبت وابطيت = وروحه على ماتشتهي عاسرتها

يعطيك العافيه ياااااارب..
ولك مني باقات من القرنفل
تحمل في شذاها اسمى معاني الاحترام
بانتظارجديدك بكل شوق

يعطيك العافيه ع المجهود المبذول
ماننحرم من فيض عطائك وتواصلك
ودي وتقديري