سمك سنجارى بسلطاته وبابا غنوجه والارز بتاعه كمان**

المكونات
سمك بلطى متنضف ومفتوح من الضهر
سمك ماكريل متنضف ومقطع قطع متوسطه
بصل _طماطم_فلفل اخضر رومى_ليمون _جزر _بصل اخضر_فلفل حار للى بيحبه
والكميه حسب كمية السمك

الطريقه
حضرت خلطه من التوم والفلفل الحار وكمون وليمون وملح وشطه
كل ده مفروم ناعم فى الكبه
وتبلت بيها السمك وسيبه شويه قبل التسويه

وجهزت الخضار اللى فى المقادير
بشرت الجزر وقطعت البصل حلقات والفلفل والليمون والطماطم
حشيت السمك بالخضار ورصيته فى الصوانى كده
وفرشت جزء من الخضار تحت السمك وعلى الوش


وده البلطى

ندخله فرن سخن ودى الصور بعد التسويه


طبعا عملت معاه رز بالبصل ودى طريقته طبعا عارفينها بس زيادة تاكيد
حمرت البصل فى زيت مش سمنه عشان رز السمك بيتعمل بالزيت بس

وده بعد ما اتحمر وبقى لونه دهبى حلو

حطيت الرزوقلبته تقلبتين كده شويه عشان يتشرب الزيت ويبقى مفلفل

وبعدين حطيت ميه مغليه منحطش ميه ساقعه عشان ميعجنش وضفت الملح وكمون وشوية قرفه جمييييله مع رز السمك واسيبه يستوى عادى

وطبعا عملت سلطه بابا غنوج
شويت البتنجان على النار من فوق وممكن فى الفرن

قشرته وهرسته بالشوكه كويس وضفت جزء من تتبيلة السمك (التوم والفلفل والكمون والملح والشطه)وحطيت الطحينه وشوية خل وبس كده وادى النتيجه

وعملت سطه خضرا ودى صوره للسفره كلها
اتفضلو معانا

بس يا جماعه عايز اقولكم ان الخضار اللى مع السمك طعمه يجنن بجد

الموضوع الأصلي: سمك سنجارى بسلطاته وبابا غنوجه والارز بتاعه كمان** || الكاتب: فارس الشهباء || المصدر: منتديات سهام الروح

سهام الروح

كلمات البحث

العاب ، برامج ، سيارات ، هاكات ، استايلات , مسابقات ، فعاليات ، قصص ، مدونات ، نكت , مدونات , تصميم , شيلات , شعر , قصص , حكايات , صور , خواطر , سياحه , لغات , طبيعة , مناضر, جوالات , حب , عشق , غرام , سياحه , سفر