يابنت ماعمره نزل راسي القاع
لو زاد زينك كالذهب في بريقه
حطيت لك قلبي على كل الأوضاع
وجازيت قلبي بالجفاء والحريقه
ماني على هالزين راكع ومنصاع
مثلك حرام يزود الصدر ضيقه
سيفي على درب الهجر دوم قطاع
هذي الحقيقه لو بغيت الحقيقه
دام البشر عاشت على الهرج جياع
وشلون ترضين المهانه دقيقه
باصد لو قلبي من الهم ملتاع
ماني بطوق في حلوق الخليقه
ياما خذيت إمن الزمن جملة أوجاع
وجروح قلبي كل أبوها عميقه
ماكني إلا الذيب والذيب لاجاع
يسري بليله ما سأل عن طريقه
هذي هي إحروفي ولاني بجزاع
من قلب عاشق فاقد له عشيقه
وهذي هي إحروفي تعلى وتنصاع
يضرب على بحر الخليج ومضيقه
شعري على ذرب الحكي دوم طماع
مثل الزهر والحرف ريحة رحيقه
يابنت ماعمره نزل راسي القاع
لو زاد زينك كالذهب في بريقه
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف
يا بنت
العرض الشجري