تعرفون اول قبل 150 سنه واكثر كانوا البدو وسيلتهم في التنقل الابل والخيل بين هجر ومناطق المملكة ويسافرون مثل سفرنا الان بالسيارات ووسيلة الترفيه عندهم الغناء هجيني اما ان تهيجن اليا هيجنت ..والا انت عن فاطري حول .. كانوا يمسكون بها الخط في الليل
من قال سالم وغانم
سولف لي عن قصة رجل من جماعته كان مسافر من الرياض الى اعلى نجد يعني قبل مدينة الطائف ..على ناقته ويسمونها رحول او ذلول .. يقول هذا الرجل كان ماشي على ذلوله في النهار وامساه الليل في مكان موحش ولا حوله احد .. في شعيب صغير يقول فيه شجر ولا هو بواجد .. يقول كان وقت المغرب .
نوخ الرجال رحوله وقال خل اصلي المغرب واقرر المبيت او اواصل السير بندقه معلقها على شداد رحوله وجنبيته في محزمه اذن الرجال للمغرب واقام صلاته وكبر وصلى يقول وهو في اخر ركعه يقراء التشهد قبل يسلم حس بجلده قشط عليه ..
طبعآ هذه اشارة من الدماغ !!! تنبية وتحذير بأن في خطر يقترب منك
سلم الرجال على يمينه الا انثى الذيب بينه وبين الذلول التي تبعد تقريبآ عشرة متر عنه .. سلم على يساره الا الذيب الاسرح المخيف على يساره متحفز للهجوم عليه .. يقول نزل شماغه من راسه وهو في جلسته .. لفها على رقبته وجود ربطها
الرجال عرف ان الشر حضر والمواجهه حاصله بكل تأكيد ..
يقول انثى الذيب منبطحه في وضعية الهجوم وتضرب الارض بيديها .. وتحاول ارباكه ودفعه الى المواجهه والاشتباك مع الذيب ..وكل مالها تقترب منه
طبعآ هذه كلها في ثواني معدوده .. يقول على قومته من مكانه الا الذيب هجم عليه وتم الاشتباك بشكل مخيف ومرعب ..
الرجل لا شك انه في وضع مرعب ومخيف ومربك وهو فعلا ارتبك ولم ياخذ الفرصه الكافيه من الوقت لكي يدافع عن نفسه بطريقته هو .. بالعكس تم اجباره على المواجهه بشكل سريع واول شي اربكه انثى الذيب حالت بينه وبين بندقه سلاحه
تم الاشتباك .. والرجل من خطورة الموقف والمواجهه كان تركيزه ان لا يترك مجال لذيب ياكله بأنيابه فمسك الذيب بحلقه بكل يدينه وبكل قوة يقول كأني مواجهه رجل مو حيوان .. الذيب واقف مثل الرجل .. يقول بداء الذيب بمخالب رجليه يقطع جلدي فخوذي ورجولي وانا اضربه برجلي اليمين ابي اخل توازنه
طبعا هو ماسك الذيب بحلقه وداخل بين يدين الذيب ومحتمي بيدينه هو وذرعانه يقول كل ماحاول يوصل لوجهي انزل راسي بين يدي ولم كتوفي علي .. ومنحني الى الامام مابي مخالبه تنوش بطني وهو يحاول يقول لو استمر على وضع هجومه سبع ثواني فقط ضفر بي واكلني لكن غير وضعية اشتباكه
لف الذيب جسمه الى اليمين في محاوله للوصول لبطني بمخالب رجله اليسار .. يوم الله انقذني نشبت مخالب رجله في محزمي .. يقول انتبت تلني الذيب بقوة يحاول يطلع مخالب رجل من المحزم كاد ان يطرحني من قوة سحبه لرجله
يقول عرفت ان رجله ناشبه .. يقول تدفيته بقوه الى الخلف مع رقبته وطاح .. يقول في اقل من ثانية طلعت جنبيتي .. وهو قام علي ومسكته برقبته .. يقول حاولت اضربه في نحره بس ماكان عندي امكانيه لضيق المكان ..
يقول وانا الهده بجنبيتي خلف كتف يده بالجنبية الى النصاب
وسليتها منه .. يقول دفني الى الخلف بقوة تقول دافني اقوى واعتى الرجال .. لدرجة اني طحت على الارض ازحف ثلاثه متر بسرعه هائله
يقول راح الذيب يصوي .. وفكني الله منه .. لكن انا عطيب .. يقول كتوفي ويدي ورجولي مقطعه تقطيع من مخالبه .. يقول جيت ابي اقوم ماقدرت .. حبيت حبي الى ذلولي
وصلت الذلول وركبت على الشداد وابي افك رباط البندق ..قامت ذلولي .. وعلى طول قامت تجمع جمح .. Evacuated medical اخلا طبي 😂😂😂 (( تجمع ))تمشي بسرعه عاليه .. يقول بدون توجيه مني ولا اعرف هي وينها رايحه والا وين اتجاها .. يقول انا مانيب طيب صرت افقد ثواني واصحا
يقول صحيت الا هي تدرهم بي .. تمشي (( حسب السرعه المحدده )) 🤣 وبعدها ماعاد دريت عن نفسي .. الا اونس شي احرقني واسمع الا الرجال يقول انجح الكي انجح الكي
فتحت عيوني الا انا عندي ضو ورجال كثير واللي ماسك رجليني ويدي زحمة رجال .. يكووني بالمخطر .. (( حديده يتم كوي المصاب بها )) طبعا اصابه انياب الذيب ومخالبه لازم تنكوي بالنار لنها مسمومه جدآ طبعآ هذا طب الاولين واسعافاتهم
يقول كووني بالنار في الجروح الغائره الكبيرة .. وقاموا وحطوا لي مره في طاسه ويسقوني وربطوا على فتحات خشمي مره بخيط .. يقول جلست عندهم يومين او ثلاثه الا انا يوم حسيت بالعافيه
يقول شبه تعافيت وقمت أسألهم ... أنتم مين وانا مين وهذولا مين ؟ 🤣🤣🤣
قالوا الا انت علمنا وش سالفتك .. وكيف كاد الذيب ياكلك وانت معك سلاحك
قال علموني كيف وصلت عندكم واعلمكم بسالفتي 😂😂😂
قالو كان عندنا مناسبة عشاء عزيمة وفجأة بعد ماصلينا صلاة العشاء الا الذلول اللي جايه مدرهمه ومقتحمه مخيم الرجال المجلس والضؤ شابينها .. يقول جت حتى بركت عند النار مابينها وبين النار الا مترين وحصلناك متكرفس على شدادك ومتحضن بندقك ودمانك تنزف .. نزلناك وقمنا بالواجب
عاد علمهم الرجال بقصته وشكرهم على الضيافه ومعالجته ..
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف
من قصص الاولين
العرض الشجري