الراس شايب وإكتسا راسي الشيب
والشيب ماهو عيب لاصرت شايب
العيب عيبك لا جفاء عينك الطيب
وماكل شخص(ن) عايش اليوم طايب
إن جيت أوضح يبكي القاف ويشيب
دنيا غريبه وكل مابه غرايب
أول أشوف الطيب حاضر ولا يغيب
واليوم أشوف الطيب بالحيل غايب
ضاق الفضا والحرف يحتاج ترتيب
وماني على الغالي كثير الطلايب
الشمس تشرق والسما وضعه إمريب
والليل مظلم والقوافي هبايب
الحبر يسكب والورق منه إيهيب
وإلا القلم للشعر ماكان هايب
مبعد عن الغالي وهم ومكاتيب
وفيني من الأشواق جيش وكتايب
هذي جروحي ياصحيبي معاطيب
وإن ماكفاك الشوق باعيش تايب
ماكل شخص(ن) في هوى خله إمصيب
وماكل شخص(ن) عاشلك دوم صايب
شخص(ن) أشوفه يافهد ينقل العيب
واليوم أشوفه يافهد دوم عايب
أول أشوف الطيب بروس المراقيب
واليوم أشوف الطيب فوقه نصايب
أحد خذا هالطيب كسب ومكاسيب
وأحد خذا هالطيب سرق ونهايب
المعطي الله مالي الخرج والجيب
المعطي الله ما لخلقه وهايب
ببعد عن العالم هل الشك والريب
وعند الله المعبود حل النشايب
عند الله المولى تهون المصاعيب
وبسم الله المولى تهون المصايب
ببعد عن العالم وأعاشر أجانيب
أخير من جلسة حبيب وقرايب
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف
الراس شايب
العرض الشجري