عشق بلا قيود للكاتبة رشا الخياليه

في الاستراحه..
وضعوا مُلصق على الباب الرئيسي كُتب عليه "منعاً للإحراج ممنوع دخول المدخنين"..
الجميع متواجد.. في اجازة نهاية الاسبوع.. هنالك من يلعب "دوري بلايستيشن" وهنالك من يلعب "بلوت"..
وهناك من يجلس جانباً يحتسي قهوته في جلسه جانبيه
دخل حاكم في هذه اللحظات وبيده اكياس كبيره مشروبات غازيه وغيرها وبابتسامته العريضه/السلام عليكم

الجميع بأصوات متفاوته/وعليكم السلام..

وقف له تميم وهو يسلم عليه وكأنه يتفقده/حي الله هالوجه.. وين رحت يا رجل

اخرج حاكم مفتاح السياره وهو يعيده لتميم/ههه خايف علي والا على موترك الخرده هههه..

اخذ تميم مفتاح السياره وهو يدفعه بخفه/يا مصخك.. تعال تقهوى بس وعلمني وين رحت هذيك الليله..

سلمان وهو يعني تميم بحديثه/الله يعينك يا حاكم فالبيت زوجتك تحقق وفالاستراحه تميم ههههه

ضحك الجميع وتميم يلتفت الى سلمان/يعنك لو منت ضيفي الليله ثورت فيك مير احمد ربك

ضحك سلمان/اجل الف حمد وشكر لك يا رب اللي فكني منك.

التفت حاكم الى تميم وهو يبتسم بسعاده ظاهره على محياه/ صب صب لي فنجال خلني ارووق.. يا شباب ترى عشاكم الليله على حسابي.

سكب له فنجان ومده له وهو يلاحظ سعادته الظاهره/اكثر من كذا روقان وش تبي؟!!.. "همس له" انت وين رحت بالضبط؟

رد بنفس همسه/لها..

فتح عيناه من دهشته/مجنووووون رحت لها في ديرتها؟!!

اخذ رشفه من فنجانه وهو يرفع حاجبه الأيسر للاعلى بابتسامة انتصار، يجب ان يخبر تميم بما يفعله/و في وسط بيت اهلها بعد.

سكت تميم قليلاً وهو يفكر بما يفعله حاكم الذي يسافر ويغامر من اجل ان لا تنقطع صلته بزوجته التي مُنع منها، وهو هنا يطلق من يُحبها بسهوله! ..نطق بنبرة إعجاب/علي الحرام انك كفوو خل عنك بس

ابتسم من ردة فعله.. واكمل فنجان قهوته/انت بشرني وش جديدك

خفتت ابتسامته تلقائياً/مافي جديد.. عسى الله يزينها بس

فهم ما بداخله والتزم الصمت..
.
،
.
،

وقف بجاد غاضباً بعدما سمعه من سطام/يالـ… شلون يسوي بك كذا!!

تعمد اخبار بجاد لان عبدالرحمن ليس غبي و لا يناسب تطلعاته الانتقاميه/انت تدري انه ضابط ،استغل سلطته علي.. و اخذ السياره،

وقف بجاد وهو يخرج ويتوعده اشد الوعيد/والله ماخليه يفرح بها. ووين ابلقاه بس

بداخله فرح يتناثر وهو يرى بداية خطته تنجح.. سيغلق كل الطرق المؤديه للصلح بينهم،قد عرف من اخيه اين يتواجد/تلقاه باستراحتهم اللي بطريق الحسا، عليها لوحه كبيره اسمها استراحة ال براك انا بروح معك..

خرج بجاد و الشر في عينيه..

ركبا السياره متجهين بسرعه للاستراحه المزعومه..
.
،
.

وقفت بجانب مضاوي وهي تحاول تهدأتها بعد قرارها الذهاب معها لرماح/اذكري الله وتوكلي عليه..

تنهدت وهي تخرج معها لركوب السياره/توكلنا على الله..

ابتسم وهو يرى اخته اخيراً ستكسر حظر السفر وستذهب ترفه عن نفسها،الفضل يعود شيهانه بعد الله..

ودعتهم ام ذيب بسعاده وهي تدعو لشيهانه بالدعوات الصالحه فهي من اقنعت مضاوي بالخروج من قوقعتها/الله يحفظكم ويستر عليكم..

لحظات وهم ينطلقون في طريق سفرهم.. مضت الدقائق و مضاوي تشعر في بعض اللحظات بالخفقان والتوتر… ذلك الماضي كان صعباً عليها.. تلك الذكريات الأليمه والفقد الموجع.. كلاهما ليس لها منهما مخرج، تمسكت بخاتم الاستغفار باصبعها وهي تحاول ان تُشغل نفسها بذكر الله لتنسى همها ومخاوفها..
.
،
.
،

وجدا باب الاستراحه مفتوح.. دخلا كالإعصار بسيارتهما..
أوقف بجاد السياره ثم ترجل منها وهو ينادي بأعلى صوته/الرجااال فيكم وحالبتن امه على خششمه يطلع لي هناا

خرج جميع من في المجلس من شباب العائله واصحابهم..
كان اولهم تميم الذي خرج وهو يزم شفتيه غضباً/خييير وش في رااسك يا وررع؟!

صرخ بجاد من هذه التسميه/الورع جابته أمك

بدون تردد ألقى شماغه ارضاً ثم هجم تميم عليه بسرعة البرق ليبرحه ضرباً..والجميع يحاول افتكاكه من يدي تميم الذي سيسحقه تحت قدميه ضرباً ..

خرج حاكم من بينهم وهو يبتسم بسخريه بعد رؤيته لسطام/خيير يا جماعه وش صاير ؟

حاول بجاد الوقوف بعد ضرب تميم/والله يا حااكم ان تدفع الثمن. وين السياره

أسف ان يكون هذا الغبي اخو زوجته،رد بهدوءه/اي سياره؟

تكلم سطام اخيراً/اللي صادرتها مني .

ابتسم بسخريه، وهو يذكره بما فعل به/ما شاء الله،طلع له لسان قليل المرجله، تبي اسوي لك مشوار ثاني بالموتر…!

حاول سطام التهجم عليه لكنه صد هجومه بحركتين سريعتين جعلته يتكتف أرضاً/ثااني مرّه اعرف من تعامل معه قبل تتهور يا ورع… يلا انقلع انت وياه

تكلم تميم وهو يثور غضباً/يلاااا براا ماتسمعوون؟!

هز رأسه بجاد وهو يقترب من حاكم ويهمس له/قسماً بالله لاقهرك وأذلك.. وبكرا بتشووف

هز رأسه بالموافقه/ورني وش بتسوي مراجلك

خرج سطام بصحبة بجاد، وضل الجميع واقفين متفاجئين مما حدث امامهم… ماعدا تميم الذي مازال يقف وهو يحترق/ياليت من كتفهم و ربطهم في ظهر الددسن وسحبهم على هالزفلت ليين تظهر قلوبهم .. علشان ثاني مره يحشمون الناس.. هذا وانت نسيبه يقول ذالكلام.. امحق رجال!

لم يعلق حاكم ضل صامتاً يغلي من داخله.. مادام ان هذا السوسه "سطام" موجود بين انسابه لن يتوافق معهم ابداً..
.
،

اليوم التالي;
بعد العصر..
جلست تدلك قدمي جدتها قبيل نومها فهي ملازمه لفراشها.. وهي تراها صامته منذ ذهاب "حاكم الجد"..حاولت ان تفتح معها مجال الحديث لتعرف سرها بنفسها،لماذا لم تخرج له/جدتي.

ردت بصوتٍ مبحوح ويتضح به الألم/لبيه

ابتسمت لنبرتها،لم تعهدها هكذا،قررت ان تتحدث بصراحه/جاك لين عندك.. انتظرك فالحوش بلهفه المشتاق.. و ضاق صدره علشانك.. خاف عليك وانتي تطيحين مكتومه من الربو .. ليه ماطلعتي له يا جده؟

شعرت بالحرج و قصتها تنكشف امام حفيدتها/يا بنتي عييب هالكلام… الرجال جاي يسلم وبس

ضحكت بنبرة خفيفه/هو حرفياً قال (ماتعنيت الا علشانها) ليه تخلينه يرجع خالي لقاء!..السلام جبر الخواطر يا جده

التفتت اليها الجده و يتضح خجلها/احذريني تقولين لعمانتس عن زيارة حاكم..

بابتسامه/آمري يا جوازي..

رمقتها و كأنها تطلب منها ان لا تلمح بشيء/توووق

انفجرت ضحك من ردود فعل جدتها التي تغيرت كلياً، لم تعرف هذا الجانب من شخصيتها ابداً ،أزاحت الغمامه وابعدت سوء الظنون فتغيرت نفسيتها للافضل..
فعلاً لا شيء يهدم الانسان ببطئ كسوء الظن !
،
تركت جدتها ترتاح في غرفتها ثم سمعت ضرب الباب ..اتجهت اليه تفتح لربما كانت ام عساف منذ ايام لم تراها، لا تعرف مالذي جعلها تغيب هكذا! /ايووه جاايه افتتح مييين؟

ردت من خلف الباب/أنا شيهاانه يا تووق افتحي

فتحت الباب بسعاده وهي تحتضنها/يا هلا ومرحبا تفضلوا

شيهانه وهي تشير الى اخت زوجها/هذي حماتي مضاوي..

سلمت عليها،/حي الله مضاوي.. اقلطوا زارتنا البركه والله

لم يغيب عن شيهانه نفسية "توق" التي تبدو بأفضل حالاتها.. ظنت انها ستراها حزينه ومكتئبه، مالذي يجري بحق الله!!
.
،
.
،

اتصلت بجدها كثيراً ولكن هاتفه خارج الخدمه لم تراه منذ اسبوع هذا كثير عليها..… بدأت تقلق وهي في طريقها الى منزل وصايف لوحدها بعد رفص والدتها الذهاب معها بحجة الارهاق..
نزلت من سيارتها وهي تشاهد سيارته تقف هنالك مصطحباً اثنتين.. لاتعرفهن.. الا ان واحده تبدو والدته ولعل الأخرى زوجته الثانيه.. تجاهلته ودخلت مسرعه ..

استقبلتها وصايف وهي تأخذ عبائتها وتعلقها بعد السلام/يا مررحبا والله.. "همست لها" مشكووره لجيتتس.. لبى والله

ابتسمت سلهام/هذا اقل واجب…وانتي اخت وعزيزه..

ابتسمت وصايف بإمتنان/بعد عمري انتي.. تفضلي داخل

لحظات لتدخل ام تميم بصحبة دلال ليسلمن…

دخلت وكأنها لم تراهن.. لا تريد سماع حديثاً مسموماً من ام تميم.. لا تريد تذكر الماضي أبداً..!

رآتها ام تميم وهي تتجاهلها بالهروب منها وقت دخولها،حقد عليها أضعافاً كيف لها ان تفسد قلب أبنها وتسيطر على اوردته.. ليطلق ابنت خاله.. وليعيش في حزن وكآبه لم يعد يستطيع ان يخفيها مهما حاول (آآه وش سويتي بولدي يا سلهام.. كيف صملتي فيه وكبيتيه!!)

اتجهت اليها دلال بعدما سلمت على الجميع.. جلست بجانبها.. لم تتحمل مايحدث في هذا المجلس من مجاملات وابتسامات صفراء.. لا تعرف بماذا تشعر، تسائلت وهي تتذكر مال قالت لها أختها "هل فعلاً أنا اصبحت كئيبه لهذا الحد.. للحد الذي جعلني ارى كل ضحكه تبدو "زائفه" وكل ابتسامه تبدو"صفراء"!!!

لمحتها شاردة الذهن منذ بداية الامسيه،حاولت الخديث معها بدلاً من سماع احاديث النساء الاخريات/وين وصلتي سلهام؟

ابتسمت بفتور/ما وصلت محل.. انا جنبك..

باعجاب/اليوم صايره احلى.. وش مسويه بوجهك انتي؟

التفتت اليها مستغربه ولكن ستجاريها/ابد صرت انام بدري وكبيت السهر.

ضحكت دلال/والله وصفه سهله..

قادها فضولها الذي تدفعه الغيره للتساؤل،قد تكون نوير في المنزل ويعود اليها تميم/ماشوف نوير معكم؟!

اخذت رشفه من فنجانها وهي تجيبها/طلقها تميم خلاص وراحت لبيت اهلها

لم تصدق ماتسمعه.. قد يكون هذا اجمل خبر سمعته منذ مده/اها يمكن زعله بسيطه وبيرجع يراضيها

التفتت اليها دلال وهي ترئ بريق عينيها/ماظنتي فيها رجوع.. علطول اول ما وداها لأهلها جاب عمال و لا ارتاح لين طلع اثاث غرفتها ورجعها فاضيه زي قبل !

وكأن شهيتها تنفتح من جديد، مؤشر السعاده يرتفع لاول مره منذ فتره،اخذت رشفه من فنجانها وهي تبتسم بصدق.،الآن سيرتاح قلبها المشحون ولو قليلاً..

دخلت حدى السيدات للتو.. ليست غريبه على سلهام،ملامحها تبدو مألوفه لها، اوووه تذكرتها وهي تكتم ضحكتها بابتسامه لم تراها منذ ايام الثانويه مع انها صديقة والدتها (يووه هذي أبلا لطيييفه… يا رربي وش جاابها هنا) /دلال وين صيته وش علومها.. ؟

دلال/سافرت امس لتركيا..

ابتسمت/الله يسعدها..
.
،

عاد للاستراحه.. يعرف انها الآن فارغه ولكن..هو أصلاً يريد مكاناً خالياً ليفكر بحاله ماذا بعد طلاقه، كيف سيعيدها وهي بذاك العناد والغرور!!
لحظات قبل ان يقف بسيارته.استغرب من وجود رجلين يقفزان من اعلى سور الاستراحه ويهربان !!

ظن انهما لصّان لم يجدا ما يسرقان فذهبا… اخذ هاتفه واتصل بحاكم لعله متفرغاً له.. ليسهرا معاً هنا..

ثم دخل..لحظات ليأتي حاكم وكان مستعجلاً..بعدما سمعه من تميم ووجود اللصوص..ليس الامر يتعلق بالسرقه فحسب..
دخل وهو يرى تميم يشاهد مباراة كرة قدم/تميم يا بردك ياخي

التفت اليه مستغرباً/بسم الله.. ياخي سلم.. علامك مرتاع؟ ابشرك ماسرقوا شي ..كل شي مكانه.. شواحن الجوالات والاجهزه واسطوانات الغاز وكل شي

التفت حاكم لصاحبه/حسين بسررعه تعاال

استغرب اكثر وهو يقف ويتجه اليه/انت جايب معك ضيف؟

دخل حسين وبيده جهاز اسود/السلام عليكم

تميم وهو يسلم/وعليكم السلام..

التفت الى حسين وهو يناديه/يلا خلنا نبدأ بسرعه.

تميم بفضول/يا جمااعه وش العلم فهمووني.

حاكم بجديّه/تميم فتح مخك يدخلون حراميه ولا ياخذون اي شي!! .. وش ظنك انهم جايين يسوون بالله؟

فكر قليلاً/وش يبون طيب؟

حسين بابتسامه/هاللحين نبي نعرف.. خلونا نبدأ ندور
.
،

بعد العشاء ..وقفت وصايف تتحدث مع سلهام قبل ذهابها فهي تريد الاستئذان والعوده لمنزلها باكراً....لتتفاجأ بـ أبله لطيفه" توقفها/انتي سلهام البراك ماغيرها بنت رفيقتي أمال؟

بابتسامه/ايووه انا هي..

ابتسمت لطيفه/انا من البدايه اقول هالوجه مألوف لي

تخصرت وصايف وهي تحدث سلهام/طلعتي تعرفين خالة زوجي وانا مادري؟!

ضحكت لطيفه وهي ترمق سلهام/كانت طالبه عندي وامها صديقتي بنفس المدرسه… والله يا كانت مشااغبه

شعرت بالحرج وهي تقول بداخلها( بتجيب العيد أم الدب)

استدركت حديثها لطيفه وهي تسأل سلهام/الا صحيح.. عسى قبلوك..انا قلت للوالده عن وظايفنا

سلهام/والله توني مقدمه ونقول يا رب

وصايف بحماس/وش شهادتك يا سلهام..

نظرت لساعتها تريد الخروج فسائقها ينتظر/بكلوريوس علم نفس من جامعة الملك فيصل ودبلوم عالي في تربية الموهوبين من جامعة الخليج فالبحرين..

شعرت بالانبهار/اممما انتي.. اتوقع افضل cv ممكن يتقدم للوظايف اللي اعلنا عنها..

وصايف/اي والله.. ما شاء الله عليك..

ابتسمت وهي تقرر مساعدتها،لابد وان تزكيها،هي ابنة الصديقه وشهادتها تستحق الدعم/تدرين شلوون بكرا تجيني الساعه8 وباذن الله يصير خير

شعرت وان الحظ الليله يبتسم لها، خبر طلاق نوير من تميم والان الوظيفه..كلاهما يتنافسان أيهما اسعدها اكثر/باذن الله أبله لطيفه..

وصايف وهي توقفها/استني شوي بعد ما امدانا نجلس نسولف

وهي تهم بأخذ حقيبتها والخروج/والله وعدت الوالده ما اتأخر ..اسمحيلي.. وكرمكم الله

لطيفه/وانا بعد والله طالعه، بدر ينتظرني برا.. عندي دوام ماقدر اسهر… كرمكم الله..

خرجت سلهام وهي تتذكر بدر و تلك الأيام..تلك البراءه المرسومه على خديه ونظارته الغبيه..
لتتوقف وهي تراه يقف أمام.. شخصاً آخر ليس ذلك الدب صاحب النظارات السميكه..! ما هذا الطول والوسامه.. حتى انه لم يعد يلبس نظارات.. قالتها بصوت خافت/بدر الدب!!

تمنت انه لم يسمع صوتها.. اتجهت الى سيارتها مسرعه..
صعدت سيارتها وهي مازالت مذهوله مما رأته،ضلت تفكر لحظات ثم نسيته…

،
في سيارته مازال يفكر بتلك التي مرت امامه ونطقت اسمه ثم ذهبت مسرعه لسيارتها..

لطيفه وهي تتذكر الماضي بضحك/بدر تدري من شفت الليله هههه

ابتسم لضحكتها/من يمه؟

لطيفه/سلهام البراك.. صديقتك ايام الروضه

يستحيل ان ينساها.. تلك التي لا تناديه سوى بكلمة "الدب"..تذكر تلك الفتاه التي مرت امامه قبل قليل وما قالته.. تذكرها/اهااااه ..احل هي اللي طلعت قبلك؟

ضحكت وهي ترى ملامحه المتفاجأه/اييه هههههه

الآن عرف سبب نظرات المفاجأه والدهشه ضل يضحك هو الآخر…

.
،
.
،

انتهوا من البحث ليقفوا في صندوق كبير يوجد في القبو تحت المخزن.. وضع فيه كميه من الذخيره والاسلحه الصغيره وممنوعه من البيع..!!

دهش تميم من كمية الاسلحه/وووجع وش ذااا

صمت حاكم الذي تأكد له مما لا يدع مجال للشك ان سطام له يد في تجارة الاسلحه ويريد جره والعبث بسمعته ليتاثر عمله ومنصبه..!
كيف سيقبض عليه بالجرم المشهود..

التفت حسين الى حاكم بعدما تلقى اتصال من المكتب/الوضع اكبر من انها شبكة تهريب.. هالكميه وراها كميات.. ووااضح انه ماتهمهم.. و كانوا ناووين توريطكم كلكم بتهمة الاسلحه…

تنفس بعمق وهو يجلس هناك/الحمدلله اني جيت هنا..

قرر بعد ما رآه/لازم هالاستراحه ينحط فيها حارس.. ونظام كاميرات.. ماهيب الاخيره بيجي غيرها،

تميم/اتفق معك، زلايب ال صارم ماهم مخلينا

رمق تميم بغضب/تميم..!!

ابتسم تميم/اقصد سطام الوصخ والزلابه الثاني بجاد.. لا تزعل امسحها بوجهي.

لم يرد عليه.. فباله مشغول بما هو اهم (كيف سيقبض على سطام، ويقضي عليه.. فحرقة الشرف لا تطفئها الا القتل)..

حسين وهو يفكر بشي آخر/شبااب اي شي لكم فيه صله لازم يكون مراقب.. لين يتم القبض عليهم..واضح ان المقصود بالأذيه كل عايلتكم.
.
،

استيقظت صباحاً وخرجت من غرفة توق.. قد ألحت الجده وحلفت ان تنامان هنا الليله الماضيه.. خرجت وهي تلتفت بابتسامه الى تلك الطفله التي تنادي "توق" وتمشي خلفها اينما ذهبت..اتجهت اليها ولحقت بها الى المطبخ/توق عندتس بنت وإنّا ماندري هههه

ضحكت توق وهي تضع الكاسات في صحن مستطيل/و عندي ولد بعد.. بس مادري متى بيصبح علي،غريبه ما جاء مع اخته.. امووت على هالاثنين يا مضاوي

ضحكت مضاوي/والله زين يونسونتس

نزلت توق الى مستوى رنيم/حبيبتي خذي هالعصير وروحي نادي فهودي..

توقفت عن الابتسامه وهي تسمع باسم طفلها للمره الاولى منذ سنوات، صحت على همزات توق/تعاالي نصحي شيهانه..

بابتسامه/قامت قبلي وهذا هي بالحمام تستفرغ..المسكينه وحام

اتسعت ابتستمة توق/ما شاء الله.. الله يتمم لها على خير

ردت مضاوي/شيلي كل الليمون حقكم تراها صايره مدمنة ليمون هالايام

ضحكت توق/عاادي فداهاا.. اصلاً عند جدتي ثلاث شجرات ليمون..

….. /الله شجرات ليمووون.. عن اذنكم رايحه المزرعه

امسكت توق بيدها/ترركدي لا تصيرين مطفوقه.. اول شي تقهووا وافطروا وبمشيكم بالمزارع..

مضاوي/بسرعه لان بنروح.. اتصل بي ذيب يقول احمدوا ربكن خليتكن تنامن هنا

باعتراض/ماافيه رووحه لييين تغدوون.. انا بطلع له وبكلمه

ضحكت شيهانه/هذا اللي طراااه يا تووق..انا جاايه مرسول حب من حاكم وشكلي بقتلك وارجع

تخصرت توق وهي مستمتعه بالحوار /يا مسلمه قلت بكلمه بسس..! شفيك شبيتي علي

شيهانه وهي مازحه التفتت الى مضاوي/امششي امشي وانا اختتس تووق متغييره علي ماهيب الاوليه

ضحكت مضاوي/والله اللي يوقف بينكن يضيع فالطوشه.. بروح لخالتي ام فهد واقند راسي من القهوه وانتن لا خلصتن جدالكن ألحقني..

ابتسمت شيهانه وهي ترى توق بافضل حال/والله ارتحت بشوفتك مبسوطه.. انتي اقوى من اي ظرف ما شاء الله.. خليك دايم كذا

ابتسمت.. كل ذلك بفضل صبرها وثقة حاكم( بركة أميري والله)../حتى انتي انبسطت بخبر حملك.. مبروك.

شيهانه/عقبالك..

خافت/لا مو هاللحين توني مسقطه ومرعوبه

استغربت شيهانه/هههه انتي هاللحين عند اهلك.. لا رجعتي هذاك الوقت فكري بالحمل ..ان شاء الله ماتطول هالقصه عاد

تنهدت.. فهي تخفي لقاءها بحاكم/والله وضع اخواني معقد.. وحاكم حالف لعبدالرحمن ما يرجعني غيره او بقعد كذا طول عمري..

غضبت شيهانه/وهذا حاكم بعد معقدها.. ليه ما يجي ياخذتس وبس

تنهدت وهي تزيح ابريق الشاي عن النار/لا تنسين ان اخواني هم اللي اخذوني وجابوني هنا غصب عن حاكم.. يعني المفروض هم يرجعون.. انا فعلاً محتاره

تنهدت شيهانه/قالوا وش حدك يالمسمار.. قال المطرقه! الله يعينتس.
.
،