رد: غالبا مايكون الحب قدر لاخيارا/بقلم كاتبه سحابٍ دنى
-23-
يوم الجمعة الساعه 12 الظهر
نص البنات والعيال راحو وبعضهم للان ماراحو
وجدان وريوف والهنوف وهيفاء ومشاعل بالسويت
وجدان وهي تحط كريم بيدها : مين بنروح معه ولا ماتدرون ؟
ريوف : خالي تو متصل يقول تعالو مع سيف او عبدالعزيز
وجدان : وفيصل ؟
مشاعل : فيصل محجوز
وجدان : لحوول ليتكم ماتزوجتو ماعاد نشوفك لا انتي ولا هو
ريوف : من جدد والله مصخت السالفه ترى
مشاعل تفتح عيونها بقوه : وش دخلكم انتم
هيفاء : تعالو على طاري اننا بنروح وين رهف راحت مع مين ؟
الهنوف : مو امس هي تقول بروح موعدي اللحين هم هناك
هيفاء : اهااا
وجدان اتصلت على فيصل
رد عليها بعد رابع رنه
فيصل : هلا قلبي
وجدان : بسم الله وش صاير بالدنيا ؟
فيصل كشر : وعع احسبك مشاعلي
وجدان : مالت عليك انت ومشاعلك اسمع بس متى تصحون نبي نروح تأخرنا
فيصل : وش دخلني فيكم انا ؟ باخذ مشاعل انتم روحو مع سيف و عزيز
وجدان : افا يافصيل تسحب علي وانا اختك وتهتم ببنت الناس اكثر مني
مشاعل تفتح عينها بقوه : خيير وش فيك تبريتي مني !
وجدان ضحكت عليها
فيصل : قولي لها ماعاش من يتبرى منك
وجدان : بععد تبيني ادعي على نفسي
فيصل : اقول هاتي مشاعلي بس
كان سيف توه صاحي
و قام عبدالعزيز على صوت فيصل وهو يكلم مشاعل
فيصل : اييه خلاص باخذك الحين وخل الباقي يركبون مع عزيز وسيف
عبدالعزيز : قدامي ياللي ماتستحي ؟
فيصل بعد الجوال من اذنه وسد السماعه : قسم بالله ان ماسكت انت اني لاوريك نجوم الليل بعز القايله
عبدالعزيز بتهديد : تأدب تأدب ولا والله مااخليك تشوفها لين يوم الزواج
فيصل : الله ينشبك ياعبدالعزيز رح جعل ربي يخليك تاخذ وحده اخوها مثل بثارتك
عبدالعزيز ضحك وهو ياخذ الروب حقه ويدخل الحمام بيتحمم
بعد نصف ساعه
كلهم بسياره عبدالعزيز
سيف جنبه والباقي ورا
وفيصل واقف عند شباك عبدالعزيز : ان مانزلت زوجتي بتعلق بالسياره
عبدالعزيز : خلاص يااخي نشبه انت ! ترى بتمل منك
فيصل : ياخي انا وياها مبسوطين انت وش عليك
عبدالعزيز : ا خ و ه ا انا ا خ و ه ا
فيصل : عشانك اخوها انا ساكت ومادفنتك هنا
سيف : هههههههههه حرام عليك عزيز لعبت بنفسيته خلاص خلها تروح
عبدالعزيز وهو يضحك : تنزل وتركب معك بس بشرط
فيصل : موافق يالله انزلي مشاعل
عبدالعزيز : اسمع الشرط اول
فيصل : ايوه
عبدالعزيز : تمشون ورانا حتى اذا دخلنا ابوظبي ماتروحون منا ولا منا ولا انت عارف وش بسوي فيكم
فيصل طل براسه من الشباك : عشان ماتلوميني يامشاعل اذا قلت خلينا نتزوج الاسبوع الجاي
عبدالعزيز : حبيبي قبل ماتتزوجون تعلموني التاريخ عشان اشوووف هو يناسبني او لا
فيصل بااستهزاء : ماودك تختار اماكن شهر العسل بعد ؟
عبدالعزيز : الا طبعآ لاني اول واحد بيركب الطياره
مشاعل شهقت
عبدالعزيز مات ضحك : ههههههههههههههههههههههه امززح امزح بشهر العسل عاد ماراح اروح معكم (سكت شوي ) مو عشان اخليكم ترتاحون لا طبعآ عشان وراي دوام
فيصل : طيب نزل زوجتي يرحم امك
عبدالعزيز : يالله يامشاعل انزلي ( ولف على فيصل وبنظره تهديد ) ومثل ماقلت تمشون ورانا
فيصل بقله حيله : اووكي
نزلت مشاعل والبنات وسيف ميتين ضحك وراحمين فيصل
في ابو ظبي
الساعه 6 ونص
بعد ماخلصو كل شي قررو يشوفون فلم قبل مايرجعون دبي
خالد : انا اقترح فلم رعب
ماجد : ايه رعب او اكشن
ريوف : لا نبي فلم خفيف ولطيف مانبي شي يخوف
عبدالعزيز : انتم المفروض ماتشيلون هم الفلم شيلو هم صاله السينما اللي بتكفيكم
مشعل : لا ولاحظ انهم يبون يصيرون جنب بعض
عبدالعزيز : واللهي مشكله
بعد مشاورات امتدت لربع ساعه قررو يدخلون اي فلم فاضي
وكان الفلم دراما من حسن حظ البنات
بعد مامر شوي من الفلم
كانو البنات كلهم ساكتين ومندمجين مع الفلم عكس العيال اللي كانو يذبون على كل مشهد
ريوف : شوفوو البطله بتتركه عشانها ماتجيب عيال
وجدان بحزن : ياعمري والله
مشاعل : سخيفين ليه مايتبنون وخلاص اما يتركون بعض عشان اطفال
هيفاء بااندماج تام : شوووفي شووفي دمعته
مشعل لف عليهم : ياااي دمعته طاحت مرا يحززن مسكين !!!
هيفاء : انت انطم ماعندك احساس
مشعل يناظر رهف : يرضيك يارهف تقول لي هيفاء انطم
رهف فتحت عيونها بقوه وضحكت : شددخلني
مشعل يبتسم : يقولون انك معجبه فيني يعني دافعي عني
عبدالعزيز اللي عيونه على الفلم ابتسم ابتسامة استهزاء : مسويه تحديد اللكل
محد فهم وركز الا رهف طبعا و تنرفزت بقوه قالت بصوت خفيف : وععع مصدق نفسه
هيفاء اللي كانت جنبها تحسبها تقصد بطل الفلم شهقت : حرام عليك والله يجنن ومسكين
رهف ماقدرت تمسك ضحكتها على هيفاء اللي عايشه جو ثاني : اييه صح كملي بس كملي
عبدالعزيز وسيف طلعو بنص الفلم وراحو لمعرض السيارات
والشباب الباقيين طلعو بعدهم لآنهم ماقدرو يكملون الفلم
اما البنات كملو الفلم للاخير وكانت نهايته حزينه وطلعو وهم حزينين
بعد ساعتين كان كلهم بالسيارات راجعين لدبي
خالد وماجد بسياره ومعهم وجدان وريوف والهنوف وهيفاء
خالد وهو يناظر سياره فيصل : اتوقع فيصل ومشاعل بيطفشون من بعض قبل مايتزوجون
وجدان : ههههههههههههههههههه صادق والله انا طفشت من كثر مايطلعون كيف هم
خالد : اللي ماعندهم احساس سيف وعزيز احد يروح معرض سيارات اللحين
ماجد : ايه عبدالعزيز له كم يوم يقول بغير سيارتي
خالد : يستهبل ذا ؟ توه شاريها من سنه ونصف والله من الفسقه
سيف وعبدالعزيز بعد ماطلعو من المعرض راحو كوفي وجلسو يتناقشون بالسيارات
رن جوال عبدالعزيز وقطع نقاشهم
عبدالعزيز : هلا بدر ... الحمدلله بخير وانت كيف حالك .. لاياقلبي انا تمددت جلستي بالرياض سنة كاملة .. جد والله .. غريبه وافقو .. كويس يعني نشوفك الاثنين ؟ ... لا الاحد مو موجود للاسف .. خلاص تم .. ابشر والله من عيوني .. يالله فمان الله سلم على العيال .. يووصل يووصل ان شاءالله
سكر عبدالعزيز
سيف كان ماسك جواله ويطقطق
عبدالعزيز : وش راايك نمشي دبي اللحين ولا نجلس ؟
سيف : لا والله خاطري نروح للبحر
عبدالعزيز : البحر البحر تم
راحو عبدالعزيز وسيف للبحر
في دبي لما وصلو الباقين
نص البنات نامو والنص قايمين
وبرضو عند الشباب نصهم نامو ونصهم قايمين
في سويت البنات كانو رهف والهنوف وهيفاء صاحين وجالسين بالبلكونه يسولفون
الهنوف : تصدقون بنات خاطري اسكن هنا
رهف : لا والله دبي حاره ومليانة رطوبه بالصيف
الهنوف : على اساس الرياض ينزل فيها ثلج يعني
رهف : لا مو كذا والله بس رطووبه بقوه وهي احر من الرياض
هيفاء : انا عن نفسي احس دبي مو للسكن بس تجين كم يوم وترجعين خلاص
الهنوف : انا متحمسه اسكن هنا اذا تزوجت بتقولون لي ليه ؟ انا اقولكم .. لأني بصير مضطره اقابل عيالي عشان اهلي واهل زوجي مو عندنا وبصير اقضي وقت اكثر معهم
رهف : وانتي كل شي بالحياة تربطينه بالاطفال ؟
هيفاء : ههههههههههههههه الله يقلعك وانا على بالي تبين تسكنين هنا عشانها دبي وتطور وكذا طلع هذا السبب
الهنوف ضحكت وكملوا سوالفهم
ودخلو ينامون عشان بكره وراهم قومة بدري
..
..
من بكره
الساعة 1 الظهر كل البنات والعيال بالملاهي
الهنوف تمشي وهي معصبه : احد يروح ملاهي بعز القوايل ؟؟
تركي كان يناظرها ويضحك وانتبهت له وتفشلت وسكتت
رهف : ايه ياقلبي الملاهي عندهم تقفل بدري وحنا نبي نشبع صراحه
مشاعل تلتفت : الحمدلله عزيز للحين ماجا يمديني اروح مع فيصل شوي
فيصل اللي كان جاي لها
وجدان : مامدى تجيبين طاريه على طول جا
فيصل : يا الله يالعواذل بااخذ زوجتي
راحت مشاعل معه
ومر يومهم كله لعب وضحك واستهبال
الساعه 7
مازالو يلعبون الا وجدان تعبت من رجلها وماكملت
راحت جلست على كراسي جنب كوفي صغير
الهنوف ورهف رايحين يجيبون لهم اكل
وقفو عند المطعم ينتظرون دورهم وكان زحمه شوي قدامهم تقريبآ 5
وكان تركي قدامهم ومانتبهو له لانه معطيهم ظهره
الهنوف : تصدقين خاااطري العب قطار الموت
رهف : امانه فيك حييل تعبت انا
لف تركي عليهم وهو مبتسم ويناظر الهنوف : بغيتي تطيرين خمس مرات وبكل قواة وجه تقولين بلعب قطار الموت
الهنوف انخرشت وقعدت تضحك بدون وعي
رهف : تررركي ! بسم الله شجاابك هنا
تركي وهو للان مبتسم : باخذ لي اكل تبون اجيب لكم ؟
رهف : ايه الله يخليك مالي خلق اوقف
تركي : من عيوني وش تبون ؟
رهف : انا بس ابي موية عطشانه
تركي لف على الهنوف : الهنوف وش تبين ؟
الهنوف سرت رعشه خوف بجسدها وهي تسمعه ينطق اسمها وبهدوء : مابي شي شكرا
تركي يقرب شوي ويسوي نفسه ماسمع : ايش ؟؟
الهنوف انحرجت من قربه : مثل رهف
رهف وهي تصارخ على الهنوف : تستهبلييين انتي ! ساحبتني من اخر الملاهي عشان موية ؟؟؟ لك ساعتين تزنين على راسي جوعانه وجوعانه
الهنوف ودها تذبح رهف : لااا لا عطشانه بس
تركي وهو مبتسم : طيب
الهنوف سحبت رهف بقوه وبعدو شوي
الهنوف بعصبيه : الله ياخذذك يارهف لييه تقولين كذا
رهف بفهاوه : بسسم الله وش قلت ؟
الهنوف وهي تقلد صوتها باستهزاء : وانك تقولين جوعانه من ساعتين !! فشلتييني عنده
رهف : عادي الجوع مايفشل !
الهنوف : الجوع مايفشل بس اللي يفشل انه يشتري لي اكل
رهف : طييب وش فيها ؟؟
الهنوف : اكررره برودك ( وشافت وجدان بالكوفي جالسه لحالها ) وخري عندي بروح عند بنت عمي حبيبتي
رهف وهي تمثل الزعل : ايييه بس اشوف كلن مع حبيبه تهنى وانا حبيب الروح صعب عليا
الهنوف راحت عنها وهي تضحك
ورهف راحت عند البنات
عند تركي توهق مايدري وش يطلب للهنوف واستحى يسأل رهف
قرر يااخذ كل الموجود وامره لله
وجلس ينتظر الطلب
عند رهف اللي كانت متجهه للبنات
شافت محل صغير جذبها شكله من برا دخلته وقعدت تتفرج
بهاللحظه اتصلت عليها افنان
رهف : هلا والله ومرحبا بأحلى بنت خاله
افنان : هلا هلا هلا وش عندي مرووقه اليوم
رهف : دايم وانا مروقه
افنان : بمشيها عشان ماتعصبين علي ايوه شخبارك وش علومك
رهف : تمام الحمدلله انتي شخبارك مشتاقه لك
افنان بشكل متواصل : والله اناا اللي اشتقت لك مرره مررره جبتيي العطر اللي وصيتك عليه ؟
رهف : هههههههههههههههههه لحظه لحظه مشتاقه لي ولا عشان العطر ؟
افنان وهي تضحك : والله مشتاقه لك بس بعد ابي العطر
رهف : لا بكره بنروح السوق واجيبه لك تامريني بشي ثاني اخت افنان ؟
افنان : سلاامتك ياعيني ,, متى رحلتكم ؟
رهف : اتوقع 9 الليل
افنان : حلووو توصلون بالسلامه
رهف : الله يسلمك ,, اسمعي قصري صوتك بحط سبيكر عشان اضبط حجابي
افنان : لا ياعمري حطي سماعات مابي العالم يسمعون صوتي
رهف : والله ماجبت سماعاتي نسيتها وبعدين من زين صوتك ؟
افنان : يطيح الطير من السماء
رهف : وععع
افنان : على تبن وخذي طلول عندي يبي يكلمك
رهف : يالله عطينياه
طلال : هلا والله
رهف : هلاا فيك شخبارك
طلال : تمااام التمام انتي شخبارك ياعيوني
رهف : الحمدلله والله بخير ,, شخبار الدراسه معك
طلال : وش هالنكد ؟؟ ماتسمعين صوتي الا تجيبين طاري الدراسه
رهف : هههههههههههههههههه وش اسوي احب انرفزك
عبدالعزيز كان داخل نفس المحل وقعد يدور فيه لين ميّز صوت رهف وحاول يقرب من مصدره
كانت رهف مازالت قدام المرايه وحاطه الجوال على الطاوله اللي جنبها ووراها جدار وهو يميين ماكانت تشوفه وهو مايشوفها بس يسمع الصوت وعارف انها رهف
طلال : جبتي لي شي ؟
رهف : اييه طبعا وانا اقدر انساك ؟
طلال : ياعمرري والله وش جبتي ؟
رهف : مفاجأه اذا رجعنا الرياض ارسلتها لك
طلال : طيب لمحي لي تحمست والله
رهف : تثق بذوقي صح ؟
طلال : طبعآ
رهف : خلاص اجل تشوفها اذا رجعنا الرياض
طلال : متى رحلتكم ؟
رهف : بكره الساعه 9 الليل
طلال : اجي استقبلكم بالمطار ؟
بهاللحظه رهف شافت عبدالعزيز وارتبكت : طلال بسكر شوي وارجع اكلمك
كانت نظره عبدالعزيز حارقة
رهف بارتباك تحاول تخفيه : طلال اخوي
عبدالعزيز ابتسم باستهزاء : محد سألك
رهف لفت وجهها عنه : ماقلت انك سألتني بس عشان ماتظن ظن سوء
عبدالعزيز بنفس نبره الاستهزاء : ليش يهمك ظني فيك ؟
رهف : لا طبعآ كلك على بعضك ماتهمني
تركته وطلعت من المحل وماستوعبت انها نست جوالها
شافه عبدالعزيز وضحك على ربكتها وخذه حطه بجيبه ومشى
عند تركي
اخذ الطلب وهو كان رايح لمكان تجمعهم لمح الهنوف ومعها وحده بالكوفي
تركي بنفسه : ارووح ولا اخلي رهف تعطيها الاكل ! لا تركي تشجع وروح حط الاكل وامش خلاص ليه تسوي المشاوير ذي كلها
كان بوجه وجدان تشوفه وهو جاي والهنوف على جنب ماتشوفه الا اذا لفت وجهها كله
وجدان وهي مقصره صوتها وعاقده حواجبها بااستغراب : تركي اخو رهف جاي عندنا !
الهنوف تصلبت رقبتها : لا تشوفينه لا تشوووفينه
وصل لهم تركي وكان بعيد شوي : مساء الخير
وجدان : مساء النور
تركي يحط الكيس على طاولتهم : الهنوف هذا لك
الهنوف وجهها تقلب الوان : ليه كلفت على نفسك والله مابيه
تركي مبتسم : والله ان تاخذينه عارف انك جوعانه واستحيتي مني
الهنوف ودها تختفي من الوجود : والله تركي شكرا بس مابي
تركي ذاب لما سمع اسمه بصوتها وزادت ابتسامته : بالعافية عليك
وراح عنهم
وجدان بعد ماختفى تركي عن عيونها لفت وهي فاتحه فمها : هييه على اي اساس يجيب لك اكل ؟
الهنوف قالت لها السالفه وهي فيها الصيحه
وجدان وهي تطل بالكيس : ههههههههههههههههههههه ياعمرري يارومانسيه السعودي ماخلى شي ماجابه
الهنوف : انسدت نفسيي وجداان خلينا نرجع الاوتيل ابي ابكي وانام
وجدان : ههههههههههههههههههههههه يادرااما انتي ! عادي شفيها
الهنوف والعبره خانقتها : خير وش دراما مابقى الا يجيب عامل المطعم وانتي تقولين دراما ( سكتت شوي وهي تناظر الكيس ) بعدين وش يقصد يعني انا دبا ؟؟
وجدان : هههههههههههههههههههههههههه ااه هنوف شكرا غيرتو مزااجي
الهنوف : يعني انا دبا صدق ؟؟
وجدان وهي مازالت تضحك : الهنوف بلا هبال وكلي قبل مانرجع
الهنوف كانت ميته جوع وصدق اخذت الكيس وقعدت تاكل
ووجدان تناظرها وكاتمه ضحكتها
عند البنات
رهف كانت حايمة كبدها خلاص ماتتحمل عبدالعزيز ابدآ تتوتر بوجوده وماتعرف السبب
رهف اللي محد يقدر يجاريها ولااحد يقدر يسكتها جا هذا وقدر عليها بسهوله
مشاعل اللي لها ساعه تناديها : رهوف رهووف بنت شفيييك ؟؟؟
رهف : ولا شي بس احس اني تعبانه شوي
مشاعل : وش فييك ماكله شي ولا ايش ؟
رهف تحاول تمسك اعصابها : لا بس ودي ارجع الاوتيل عشان انام
ريوف : طيب هنوف كانت معك وين راحت ؟
رهف بحده : مادري عنها
استغربو البنات من تقلب مودها وسكتو عنها
بعد نص ساعة كانو متوزعين بالسيارات بيرجعون للفندق خلاص
مشت سيارتين وبقى اخر سيارتين وحدة فيها خالد وعبدالعزيز والثانية فيصل
كانو ينتظرون البنات بالسياره
خالد اتصل على وجدان : هلا والله وينكم ؟
وجدان : دقيقه عمي رهف ضايع جوالها ماندري وينه
خالد : اوكي تحتاجون مساعده نجي ندور ؟
وجدان : لا ماتقصر حنا جالسين ندوره وان شاءالله نلقاه
خالد : خلاص اوكي
سكر منها
عبدالعزيز : وش فيهم ؟
خالد : صديقتهم ضاع جوالها وقاعدين يدورونه
عبدالعزيز : بنت ابو تركي ؟
خالد : ايه
عبدالعزيز تذكر ان جوالها للان بجيبه ولف وجهه للجهه الثانيه وابتسم
بعد نص ساعه رهف فقدت الامل وكانت جنبها الهنوف
رهف : هنوف اذا ماعليك امر ابي جوالك بتصل على وعد
الهنوف طلعت جوالها ومدته لها : شدعوى فداك الجوال وراعيته
اتصلت رهف على وعد وكان جوالها مقفول واتصلت على تركي
تركي : هلا ؟
رهف : هلا بك انا رهف
تركي يرجع يشوف الجوال ولقاه مو رقمها : وش غيرتي رقمك انتي !
رهف : لا
تركي : اجل جوال مين هذا ؟
رهف : مو هذا موضوعنا ,, وينكم ؟
تركي : رجعنا الفندق
رهف : من جدددك ؟
تركي : اي والله ليش !
رهف بعصبيه : وانا طيب
تركي : سألت وعد وقالت انها بتجلس مع البنات
رهف عصبت اكثرر : على كيفها ذي ؟ متى قلت لها اني بجلس
تركي : طيب انتي شفيك معصبه ؟ اجي اخذك ؟
رهف بحده : لا خلاص لا تجي
تركي مستغرب من عصبيتها
رهف سكرت الجوال وعطته الهنوف : شكرا
الهنوف خذت الجوال وهي مستغربه حالتها
وجدان : رهف تعالي فيه محل مارحنا له يمكن فيه
رهف مازال مودها متوتر ومعصبه : لا خلاص خلونا نطلع ماعاد ابيه
مشاعل : لا تعالي ترى مادورنا بكل مكان حرام يروح عليك
رهف بصوت عالي شوي : لا خلاص قلت لكم ماابيه مالي نصيب فيه
الهنوف : اتصلتي عليه طيب ؟
رهف : ايه مقفل مع اني متأكده اخر مره شفته كان شحنه مليان
ريوف : طيب حاولي تتذكرين وين اخر مره شفتيه
رهف بتوتر : ماااادري صراحه فجأه فقدته اتوقع طاح مني بمكان ماادري عمومآ مايهم خلونا نطلع تكفون خلاص تعبت
طلعو البنات
لما وصلو للسياره رهف انفقع قلبها يوم شافت اللي يسوق عبدالعزيز
تذكرت الموقف اللي حصل بينها وبينه
ومشاعل واقفه بالنص ماتدري تركب مع مين وفيصل جالس يقنع عبدالعزيز
ورهف كانت واقفه بعيد شوي
عبدالعزيز اللي كان مركز عليها من البدايه : والله انكم ماتستحون يابنات عمي صديقتكم واقفه برا السياره لها ساعتين ومحد ناداها
وجدان طلعت راسها من الشباك : رهف لييش واقفه !
مشاعل : والله توقعتها راكبه انا وصراحه خفت اناديها وتعصب علي اليوم صايره كبريت
عبدالعزيز ابتسم بقووه لين طلعت خطوط جنب عيونه وبصوت عالي : خل نحطها مع فيصل اذا كبريت مالنا خلق تشب فينا
رهف سمعته وارتفع ضغطها وتحس الحقد بقلبها زاد اضعاف
وفتحت شنطتها تبي تتصل على تركي وتذكرت ان جوالها ضايع وتحس خلاص بتصيح
خالد : بسرعه عبدالعزيز لا تزودها اما مشاعل تركب معه ولا تنزل وجدان السياره ماراح تكفيهم كلهم
عبدالعزيز بهدوء : مشاعل خلاص روحي مع فيصل ( ويلتفت على رهف ) وانتم يالله اركبو عشان نمشي
رهف كانت تتمنى وجدان تنزل مع فيصل عشان تركب معها بس للاسف
تنهدت بقوه وركبت وهي ساكته تحس لو تكلمت بتصارخ من القهر والعصبيه
بالفندق
في سويت البنات كانو كلهم نايمين الا هيفاء ووعد
جالسين يتقهوون ويسولفون
هيفاء : تصدقين خاطري ارقص
وعد : عليك طلعات غريبه
هيفاء : لي كم يوم مشتهيه زواج والله
وعد : اذا جا زواج مشاعل وفيصل طلعي اللي بخاطرك
هيفاء : لا لا ابي اللحين
وعد وهي تضحك : اتوقع العيال عندهم سماعات جيبيها وعيشي الجو
هيفاء : ايييه بتصل على مشعل يجيبها
وعد : هههههههههههه وين رهف عنه
هيفاء : صح ذكرتيني بقول له رهف تبيها عشان يجي ركض
اتصلت هيفاء على مشعل
هيفاء : هلا شعولي
مشعل : شعولي بعينك
هيفاء : هههههههههههههه بليز جب السماعات لنا
مشعل : ليه وش تبون فيها
هيفاء : بصور معها انا والبنات ( وبعصبيه ) يعني وش بسوي ؟؟
مشعل : بسم الله الرحمن الرحيم ,, لا معليش حنا نبيها والله
هيفاء برجاء : مشعل بليييز
مشعل : والله نبيها يختي ماتسمعين الصوت ؟ منطربين حنا
هيفاء بكذب وحزن مصطنع : يالله خيرها بغيرها لك الله يارهف المسكينه ,, تخيل تبي ترقص ومايطربها صوت الجوالات الخفيف
مشعل : طيب اعطيكم بس بشرط
هيفاء ابتسمت بقوه : وشوو الشرط آمر
مشعل : اجي عندكم
هيفاء : والله انك ماتستحي على وجهك !!!
مشعل : والله ودي اشوف
هيفاء : خلاص بصور لك بعد شوي
مشعل تحمس : يالله اوكيي
هيفاء كتمت ضحكتها : يالله انتظرك
مشعل : طيب
سكرت منه
وعد وهي تضحك : والله رهف جايبه راسه
هيفاء : مررره هههههههههههههههه عاد اشكالهم لايقه على بعض والله تحسينهم كتاكيت
وعد : هههههههههههههه اقوول احترمي نفسك ترى اختي اكبر منك ( وشافت ساعتها ) ماتلاحظين انهم تأخرو ؟ لا يكون دخلو السويت الثاني ونامو
هيفاء : لا لا اكيد انهم جالسين يتمشون دام معهم عمي خالد مستحيل يرجعون بسرعه
في سويت الشباب
مشعل طفى الاغنية
سيف اللي كان مندمج : ليييش ؟؟
مشعل : البنات يبونها طفشانين
ماجد وعينه عاللاب توب : شكرا لهم والله كتبت الاغنيه بالايميل 4 مرات
مشعل : من قالك تجلس معنا يااخي
ماجد ضحك و قام : اقول بس احد يبي كوفي ؟
سيف : ايه جب لي معك
ماجد يلف على العيال : وانتم ؟
عبدالله : لا مااتقصر
عبدالرحمن : لا والله مابي اسهر
مشعل : دامك قايم قايم خذ السماعه تكفى حطها عند سويت البنات
ماجد : اي واحد ؟
مشعل : والله مدري يااخي بس هي جنب بعض طق عليها كلها
ماجد : هههههههههههههه ابشر
بالسياره
عبدالعزيز يتمشى فيهم ويسولفون و يضحكون
باستثناء رهف اللي كانت نفسيتها زفت ودها ترجع بسرعه بس ماتقدر تقول شي
وجدان : ماطفشتو ؟ احس رجلي نملت من الجلسه
خالد : الا اذا ودكم رجعنا
الهنوف : ايه والله دخت مره
ريوف : من جدد حتى انا احس اني ماعاد اشووف
خالد : ياعمري وراكم ساكتين طول الوقت اجل
عبدالعزيز : شكلهم مستحين
ريوف : لا والله بس الجو مايتفوت عشان كذا احاول قد ما اقدر اني اقاوم
عبدالعزيز : خلاص ابشرو بنرجع
...
..
عند سويت البنات
ماجد طق الباب الاول وحط السماعه بالارض
اول مارفع راسه انفتح الباب وهيفاء وراه مشغله اغنيه بجوالها وجالسه ترقص
هيفاء كانت تحسبه مشعل لما شافت ماجد فتحت عيونها بقوه وكان معها كوب مليان مويه يوم شافته يناظرها رمت الكوب كله بوجهه وسكرت الباب بقووه
ماجد كان واقف قدام الباب ووجهه وشعره وشوي من تيشيرته مليان مويه
يحاول يجمع ويستوعب اللي صار
بعد 5 ثواني استوعب وضحك و بنفسه : ياحليلها هيفاء والله ماتوقعت انها مجنونه كذا
مسح وجهه واخذ الكوب ومشى عند الاصنصير شوي سمع الباب ينفتح ويتسكر
لف ورا وشاف السماعه مو موجودة وضحك
.
..
...
بعد ربع ساعه كانو عند الفندق
نزلو البنات كلهم مايشوووفون من النوم والتعب اللي فيهم
خالد وهو يسكر باب السيارة : ههههههههههههههه حرام عليك شف سيارة فيصل واصل قبلنا
عبدالعزيز وهو يضحك : افا عليك مأدبه انا ماعندنا لعب
خالد : طلعت عينه والله
دخلو للأوتيل واتجهوا عند المصاعد
ورن جوال عبدالعزيز وهم ينتظرون الاصنصير
وجلس عبدالعزيز باللوبي يكلم وخالد رقى لحاله ..
رهف ووجدان اخر من نزل من السياره
وجدان : وش فيك اليوم متضايقه ؟
رهف : ضايق صدري على جوالي
وجدان : بكره الصبح نطلع على طول نشتري لك
رهف : صوري ومقاطعي وكل شي رااح وتدرين وش اكثر شي مخوفني
وجدان : ايوه ؟
رهف : مافيه باسوورد
وجدان : مجننونه انتي !
رهف : والله غبيه انااا مادري ليه ماحطيت له بس يالله استودعته ربي
وجدان : تعالي نروح فوق
رهف : لا مصدعة مره باخذ لي قهوه من الكوفي هذا تجين معي ؟
وجدان : لا والله رجلي مره شاده علي ومااشتهي شي صراحه ,, بالعافيه عليك
رهف : الله يعافيك
وجدان دخلت
ورهف راحت للكوفي واخذت لها قهوه وطلعت
كان عبدالعزيز للحين جالس باللوبي يكلم صديقه ناصر
لمح رهف داخله وكانت لحالها ورايحه لجهة المصاعد
عبدالعزيز : شوي واكلمك ناصر ,, يبلغ ان شاءالله ,, فمان الله
قفل من ناصر وقام عندها
ووقفها بصوته الضخم : رهف
رهف غمضت عيونها بقوه كان اخر شخص تبي تشوفه او تسمع صوته بهاليوم هو عبدالعزيز
لفت عليه وهي ساكته
كان شكلها اجممل وهي تعبانه وعيونها ذبلانه
رهف يوم شافته يناظرها وساكت : نعم ؟؟
عبدالعزيز طلع جوالها من جيبه ومده لها
رهف فتحت عيونها بقوه وهي تشوف جوالها بيده سحبته بقوه منه وقالت بااستحقار : والله العظيم انك قليل ادب
عبدالعزيز : والله مدري من قليل الادب وقليل التربيه اللي جالس يكلم وهو حاط سبيكر ما احترم لا ربه ولا اهله
رهف كانت تنتفض من العصبيه : خييير اقولك اخووي اخوووي !! ماتفهم انت !
عبدالعزيز : وشلون تبيني اصدقك وانتي مضيفتني بسناب وتسولفين معي وتسوين كابتشر على صوري وتتصلين بعد وماشاءالله كل حدث عندك تفسير له
رهف رفعت يدها تبي تعطيه كف
مسك يدها بقوه وقال وهو شاد على اسنانه : الزمي حدووودك لا اكسر لك يدك
رهف كانت تتظاهر بالقوه : حقييير قسم بالله حقيير الله ياخذك اكرررهك يامرييض
عبدالعزيز اللي كان للحين ماسك يدها سحبهاا بكل قوته وطاح كوب القهوه اللي معها
قرب من اذنها وبهمس : صدقيني شعور متبادل
وتركها وراح
رهف لما شافته دخل الاصنصير سمحت لدموعها انها تنزل وتحس قلبها يشب نار من القهر : الله ياخذك ياعبدالعزيز ياليتني ماعرفتك
جا عامل الاوتيل يمسح القهوه اللي انكبت واعتذرت منه
وهي تمسح دموعها بحرقه وقررت انها ترد له حركته الوصخه
طلعت برا واتصلت على افنان
افنان اللي ردت بسرعه و بروقان : هلا والله ماامداك تشتاقين لي
رهف : افنان تكفيين ابي اكون عندك اللحيين
افنان بخوف : وش فيييك ؟ صاير شي ؟؟
رهف : عبدالعزيز الحقيير الله ياخذه
افنان : هههههههههههههههههه وش سوا بعد
رهف : قسم بالله مو وقت ضحك ( وعلمتها السالفه )
افنان شهقت : حقيييير ! ليه يقولك كذا ؟؟ بعدين رهف خير ليه تبررين له ؟
رهف : ما ابرر له بس ليه يظلمني وهو مايعرف شي
افنان : ماعليك منه احسن خل يفكر انه حبيبك وش فيها ؟
رهف : لا خير ماابيه يحسبني بنت شوارع ومو متربيه
افنان : تهمك نظرته لك ؟
رهف سكتت
افنان : ردي علي
رهف بتفكير : لا طبعا
افنان : اجل ليش تبررين له ؟ بيصدق نفسه اللحين
رهف انقهرت اكثر من كلام افنان وحست انها صدق لازم تردها له
نرجع لعبدالعزيز اللي كان راكب الاصنصير
كان عارف ومتأكد انها صادقه لانه سمع صوت افنان قبل بس كان يبي يحرق قلبها
فيه جزء صغير فيه تأنيب ضمير ويحاول انه مايفكر فيه ابد
ابتسم وهو يتذكر وجهها التعبان وعيونها
وبهاللحظه فتح الاصنصير وطلع وهو يحاول يفكر بشي ثاني
انتهى البارت
|