04-30-2019, 01:27 AM
|
|
|
السكات
إيه..إيه ؟ياعمر فات
مالوش ف قلبي ذكريات
لا بلني فيه المطر
ولا هزني فيه الهوا
و لا خضني فيه الخطر
ولا فيه عرقت ولا عييت
عمر انزوي وانا انزويت
لا فهمت فيه معني الوطن
ولا الاشتياق ولا الشجن
ولا فيه مشيت قدام مظاهرة
ولا فيه جريت ورا البنات
ايه ..؟ ياعمر فات..محسوب وبس
عدا وخلاص من غير ما احس
كانه عمر من السكات
كاني مت سنين وبعد سنين صحيت
بصيت لقتني وحيد ....جريت
اتاريني باجري ف المكان
مطرح ما كنت العيل المليان جنان
علي الجسور باصطاد علي وشي الندي
وارمح ف دنيا ربنا وسط الغيطان
دنيا اﻷماني واﻷمان
انا كنت بحلم بس كان فيه ناس معايا
فجاة السنين اتكومت وبقت ورايا
يا مين يرجعلي اللي فات ؟
والله ما حسيت بطعم الدنيا من غير الغواية
الله يجازي المدرسة والقرايه
الله يجازي المدرسه والقرايه
كل اللي خدني مني لاحزان السكك
ورماني ف البير الغويط
في الضلمة ف الخوف ف الثبات
وحيد ومقتول م العياط
من غير سبب واضح
ومن غير ذكريات.
سمير الأمير ..
|