رد: غالبا مايكون الحب قدر لاخيارا/بقلم كاتبه سحابٍ دنى
-26-
يوم الاحد
في الشركة
كل موظفين الشركة متجمعين ومسوين احتفال بسيط
خالد كان يدور وعد بعيونه ومالقاها وتوقع انها ماراح تجي
طلع برا الشركة
وبهاللحظة طلعت وعد من الغرفة بعد ماحطت اغراضها
وكانو عذاري وهياء قدامها سلمت عليهم وسلمت على باقي المتدربات
عذاري : الله اول مره اشوفك حاطه ميك اب يجننن مره
هياء : مرره حلووو وعد وين مخبيه هالجمال من زمان
منى ( وحده من المتدربات ) : مررره يجنن ماشاءالله انتي مسويته لنفسك ؟
وعد استحت : ياعمري بنات والله عيونكم الحلوه ( وتلتفت على منى ) اييه انا
منى : لازم لازم تعلميني الطريقة والله يجننن
جلسو البنات يسولفون و بعد ربع ساعة انسحبت وعد منهم وراحت لمكتبها عشان تاخذ شنطتها واغراضها
بعد ماخذتها طلعت كانت نفس حالة خالد جالسة تدوره بعيونها بس ماشافته سلمت على البنات كلهم وودعتهم
ركبت الاصنصير ونزلت
برا الشركة
خالد كان ماخذ اوراق من السيارة وراجع للشركة وهو جالس يكلم عبدالعزيز بالجوال : ايه قبل ماكلمك بخمس دقايق كنت عنده يقول يامر امر بس يختار الوقت اللي يناسبه ويجي .. انت كلم فهد وقل له هالكلام .. ايه ماقصر والله متصل علي اليوم وعزمني للأستراحة
قطع كلامه صوت فرامل قوي وضرب بوري
خالد ارتاع وهو يشوف مابينه وبين السياره الا اقل من متر
وعد فتحت الشباك تبي تشوف وش الموضوع وشافت خالد قدامها و بعصبيه : غبي انت ماتشووف ؟
خالد فتح عيونه وهو يشوفها : من الغبي انا ولا سواقكم ؟؟
وعد سكتت لان الغلط ماكان عليه فعلا
خالد مر جنبها ودقق على وجهها : امسحي الطحين اللي على وجهك عشان تركزين زين
وعد لفت عليه بنظرة حقد
خالد يسترسل : وبعطيك معلومة ترا محد يحط كذا بالدوام هذا للزواجات بس ومو اي زواج بعد بس اذا كنتي العروسه
وعد انقهرت بقوه و سكرت الشباك وقالت للسواق يمشي
و خالد مشى وهو يضحك
عبدالعزيز : هههههههههههههه خالد وش فيك ؟؟ من قاعد تكلم
خالد : بسم الله انت من متى موجود ؟
عبدالعزيز : بسم الله عليك لي نص ساعه اكلمك
خالد : ياخي فقعت قلبي هالانسانه
عبدالعزيز : ههههههههههههههههههههههه الحمدلله اللحين عرفت انا طالع على مين
خالد بحدة : تخسسي عاد ما اوصل لوصاختك انا
عبدالعزيز : اصبر اللحين خلك مني وش سالفتها هذي ؟
خالد : مو وقتها المهم بدخل الشركة اللحين اكلمك بعدين
عبدالعزيز وهو يضحك : خلاص طيب يالله
...
..
...
في بيت الجده
بنات ام ماجد ماداوموا كانو جالسين يرتبون اغراضهم
سيف كان توه راجع من الدوام دخل الغرفة اللي فيها ريوف وهي جالسة تحط اغراضها بكراتين
سيف وهو ينسدح على سريرها ويغمض عيونه وبصوت كله تعب : احس عظامي متكسرة
ريوف : سلامتك وش فيك
سيف : مانمت زين من يومين ووراي عمال بيجون الساعة 11 وبقعد عندهم لين المغرب
ريوف : طيب نام شوي على مايجون
لاحظت ريوف انه مارد عليها ولفت عليه وشافته مغمض عيونه
ابتسمت وهي تشوف شكله اللي كان جد تعبان وحطت الغطى عليه وسكرت الانوار والباب وطلعت
راحت غرفه ريما اللي كانت ترتب اغراضها بعد لانهم بينقلون بعد اسبوع تقريبآ
ريوف تقرب عندها : خلصتي ولا للحين ؟
ريما : تقريبآ خلصت
ريوف : تبين اساعدك ؟
ريما : ايه تكفين
ريوف : طيب ,, اسمعي شرايك نروح البيت بعد شوي ؟
ريما : اوكي بس اخاف فيه عمال !
ريوف : لا مايجون اللحين سيف يقول 11
ريما : كويس والله ماشفت البيت من زماان
ريوف : انااا بعد
ريما : وودي اشوف شكل غرفتي وكذا مكلمه محل اثاثهم مره عجبني بخليهم يسوون غرفتي كاملة
ريوف : وشو اي محل ؟
ريما : محل ....
ريوف : تدرين قايله لسيف يوديني بس يقول اصبري وش مستعجله عليه وكل ماقلت له يصرف
ريما : ياحبي لك والله تنتظرينه اتصلي عليهم يجونك هم
ريوف : مافكرت فيها والله
جلسو يرتبون الاغراض
وبعد نص ساعة نزلو تحت وكانو الجده والجد يفطرون وسلمو عليهم وجلسو
ريوف : جدي السواق عنده شغل ؟
الجد : رايح يجيب اغراض الحين ليه وش تبين به ؟
ريوف : ودي اروح محل
الجد : ابشري بس اول مايجي بقول لك
الجدة : ليه وين تبين تروحين ؟
ريوف : محل اثاث قريب هنا
دخلت ام ماجد بهاللحظة : ليش وش تبين بمحل الاثاث ؟
ريوف : بصور معه واجي
ام ماجد رمت عليها المنديل : بلا استهبال
ريوف : هههههههههههههه يعني يمه وش ابي اكيد بدور اثاث لغرفتي
الجد : شكلكم مارحتو بيتكم من زمان
ريما : اييه مانروح له اساسا كثير عشان العمال
الجد : اجل غرفكم كاملة مكملة بس ناقصها اغراضكم
ريوف فتحت عيونها : شلووون !
الجد : بنات خالكم ماقصرو زينو غرفكم
ريما : ياعمرررري والله جد ؟؟؟
ام ماجد : ياحبي لهم والله يوم شفت الغرف انبسطت مره
الجدة : ياويلكم من وجدان والهنوف قايلين نبيها مفاجأه
الجد : هههههههههههههه والله ودي اني ساكت بس يوم شفت ريوف تبي تروح قلت اعلمها عشان ماتتعب
ريوف وريما تحمسو يروحون للبيت
ريوف : جدي الباب مفتوح اللحين ؟
الجد يقوم : ايه تعالو معي انا بروح الحين
قامو البنات بسرعه يلبسون عباياتهم
5 دقايق وكانو هناك دخلو غرفهم وانبهرو
ريما : ياعمرري واللله وجدان و الهنوف
خذت جوالها بسرعه واتصلت على وجدان
كانت وجدان والهنوف ورهف جالسين بكوفي بالجامعه عندهم بريك
وجدان ردت عليها : هلا والله
ريما : احبببكم احبكم احببكم احببكم
وجدان ارتاعت : بسم الله ماداومتي انتي ؟
ريما : ههههههههههههههههه طيب قولي وانا بعد على طوول ماداومتي انتي
وجدان : وانا بعد بس وش سالفة الحب المفاجئ هذا ؟
ريما : شفنا الغرف ياحبيي لكم وربي فكيتووو ازمه
الهنوف اللي كانت تسمع صوت ريما شهقت : لييه من قال لكم ؟
ريما : جدي هههههههههههههه
الهنوف : هذا وانا محذرتهم مليون مرره
ريوف دخلت عند ريما وخذت الجوال منها : ياحبي لكم هنوفي ووجداني وربي ماقصرتو
وجدان : وش دعوى ريووف قليل بحقكم قسم بالله
...
..
...
مر الاسبوع بطيئ على بعض ابطالنا اللي عندهم اختبارات وسريع على البعض الاخر
يوم الخميس العصر عبدالعزيز توه راجع من الدوام وواقف عند البيت مانزل من السيارة قاعد ينتظر الاغنية تخلص
انتي سما عمري وضحكة سنينه ,, منتي سحابه تعبر أوقات وتطوف
دام الطريق الجاي متقاسمينه ,, باذن الله انه ما على عمرنا خوف
وعبدالعزيز طرباان وجالس يغني معه
بهاللحظة شاف سيارة توقف عند بيت ابو تركي ونزلت رهف
ماقدر يخفي ضحكته عليها وهي نازله من السيارة ومعصبه مره
عند رهف
كانت جد معصبه بسبب الاختبار اللي ماحلت فيه وصفقت باب السيارة بقوه من الزعل
السواق معصب عليها : مجنون انتاا ؟؟ بعدين هذا سيارة فيه خراب
رهف بعصبيه : انت المجنو..
وقطع كلامها اوراقها اللي طاحت بالارض وجلست تجمعها
السواق سحب عليها وراح غرفته وهو معصب عليها ويتمتم : بعدين بابا يهاوش انا انتا مايجي مشاكل
رهف تتطنز بكلامه : بئدين بابا يهاوث انا انتا
قاطعتها وجدان اللي معها على الخط : هههههههههههههههههههه بسم الله بسم الله الله يعين سواقكم
رهف : يختي قسم بالله مقهوورة الله يااخذها كل اللي جابته من برا المنهج وصعبب صعب ويجيني ذا يكملها علي
وجدان : انتي ماذاكرتي زين لانه والله حلو مره اعجبني
رهف : اقولك من برا المنهج وش اللي ماذاكرت زين !
وجدان : وش تقصدين اي سؤال
رهف : اخر سؤال اللي عليه 6 درجات حسبي الله عليها
وجدان : الا ياعمري هذا من اخر تشابتر ترى ماحضرنا المحاضرة لانها لما كنا بدبي يمكن تحسبينها مو معنا
رهف : اي تشابتر ؟
وجدان : السابع
رهف : ايه ماذاكرته !
وجدان : ياشييييخة ! وزعلانة بعد ؟
رهف وهي تفتح الباب ومقصره صوتها : لا وزياده على الاختبار الزفت اشوف ولد عمك الزفت يعني جد اليوم مو يومي
وجدان : منهو ولد عمي الزفت ؟!
رهف بعدم انتباه : عبدالعزيز
وجدان : و ليش زفت عاد !!
رهف توهقت : مدري بس قاهرني دايم اشوفه بأيامي الخايسة
وجدان : هههههههههههههههه والله انك غبيه .. ربي جايبه قدامك عشان تروقين وتنبسطين بس مافهمتيها
رهف : وععع لا تقهريني تكفين كفاية اللي فيني
عند عبدالعزيز اللي مازال يسمع الاغنية قطع طربه صوت خالد وهو يطق الشباك : الحلو طربان
عبدالعزيز : اي والله مجنونة الاغنية لا تفوتك
خالد : اييه سامعها امس اعجبتني مره
عبدالعزيز : حملتها وثاني مره اسمعها ماقدرت انزل ياخي
خالد : ياشيخ ! انزل بس انزل ذبحنا الجوع والوالدة رافضه يحطون الغداء لين يجي عين السيح عزيز
عبدالعزيز وهو يضحك : ياحبي لها والله
نزل عبدالعزيز مع خالد ودخلو الملحق يسولفون وينتظرون الغداء يجهز
....
..
...
بنفس اليوم الليل
كانت الجمعة العائلية ببيت ام ماجد
كانو توهم ساكنين من يومين واصرت عليهم يجون عندها وعزمت ام تركي وام نايف
كانو الحريم جالسين بالصالة والبنات بالملحق الخارجي التابع لقسم الحريم
ريوف وهي تصب القهوة للجازي : والله تو مانور بيتنا
الجازي : النور نورك ياعمري
ريوف تجلس : عاد خلاص جاملناكم بفنجالين يالله كل وحدة تصب لنفسها اللحين
رهف : يوه ريوف ليتك صابره شوي لين يخلص فنجالي
نورة فتحت عيونها بقوه : معليش بنات بنت عمتي ماتستحي ابد ( وتاخذ الترمس منها ) وخري بس انا بصب لهم
ريما اللي كانت جنب رهف : رهوف فيه شي ملاحظته عليك و ماقلته لين خلاص بدا يطلع من خشمي
رهف عقدت حواجبها مستغربه : وشو بسم الله !
ريما : اسوارتك ذي اللي فيها اسمك ماعمرك شلتيها داايم وانتي لابستها حتى لو بمناسبة كبيره وش السر !
رهف : اييه طبعااا اكيد ماراح اشيلها هذي اغلى شي املكه بالحياة
غدي وهي تغمز : الله الله شكلها من الحب ؟
رهف : اي والله من حبيبي تركي جابها لي باول راتب استلمه
ريما : يووه وللحين ماشلتيها ؟
رهف : لا
غدي : واااو سو كيوت
رهف رمت عليها قاعدة الحلا الصغيرة : تتطنزين انتي ووجهك ؟
غدي : هههههههههههههههههههه لا والله اتكلم جد يجنن اخوك حلوة الفكره مره
رن جوال رهف بهاللحظة
وطلعت عن زحمه البنات وردت : هلا ماما .. مدري يمكن جوالها صامت .. لييش تركي وين ؟ .. اهااا اوكي خلاص .. طلول غريبه مااتصل علي .. خلاص انا بروح البيت بدخل الاغرض وارجع .. ابشري
دخلت رهف عند البنات واخذت عبايتها
ريوف : تستهبليين رهف ؟ وين رايحة له
رهف : طلال جايب اغراض بروح البيت بدخلها وارجع
الهنوف : ياحبك للمشاوير وين اخوك
رهف : مو بالرياض ولا كان
وعد : وش عنده طلال ؟
رهف : مدري والله امي تقول جايب اغراض ثقيلة وتتكسر وما اثق بالسواق مابيه يدخلها
وعد : طيب تبيني اروح معك ؟
رهف : لا لا باخذ الشغاله معي وبجي ماراح اطول
رهف راحت المطبخ نادت الشغاله وطلعو من البيت
لما وصلت عند باب بيتهم شافت طلال
طلال : هلا والله بالحلووة
رهف سلمت عليه : هلا فيك شخبارك
طلال : مشتاق لك والله
رهف : ياحبي لك والله وانا اكثر
طلال : تعالي بس اتركي عنك الكلام وشيلي معي والله ظهري تكسر
رهف : ههههههههههههههههه وش جايب انت ؟
طلال : والله مدري وش هالاشياء امي مخليتني اجيبها من خالتي نوف
رهف كشرت : وعع قطيعه وش جاب الطاري ؟
طلال : والله ضاق صدري يوم قالت لي امي رح لبيتها
رهف بحماس : يا ليتك مكسر القزاز على راسها
طلال : هههههههههههههههه لا والله الا ليته براس لولوة
رهف : لييه شسوت ذي بعد ؟
طلال : ذبحتني كل ماشافتني تسألني عن تركي
رهف باستغراب : خيير ليه وش تبي فيه ؟
طلال : انتي شكلك ماتدرين !
رهف : عن وشو ؟
طلال : ماتدرين انهم محيرينهم لبعض من وهم صغار
رهف فتحت عيونها بقوه : نعممم ! ومن يقوله ؟
طلال : كل الحريم يدرون والرجال بعد
رهف : وتركي يدري ؟
طلال : والله مدري عنه بس انا توني عارف عن الموضوع
رهف بقهر : تخسي والله ما تااخذه لو تموت هذا تركي القلب والحب ما اخليه ياخذ اي وحده كيف لولوة عاد
طلال يضحك على وجهها اللي قلب احمر من العصبيه : يمه بسم الله طيب شيلي معي وياويلك لو كسرتي شي على راسي ترى مالي دخل والله
رهف ضحكت بنص عصبيتها على طلال وشالت معه
في جهه ثانيه قدام بيت ابو ماجد
عبدالعزيز كان طالع برآ ينتظر سيف
وجالس يراقب تحركات رهف ويتذكر كل الاشياء اللي حصلت معها في دبي وقبل دبي
ومستغرب ومصدوم شلون استحوذت على تفكيره
ماقدر يخفي ابتسامته وهو يشوفها تضحك وشوي تعقد حواجبها وشوي تعصب وترجع تضحك
كان بأعماق قلبه يحسد طلال ...
بس ماصرّح بهالشي لنفسه ولا راح يصرح لان بقناعته ان مافيه اي بنت تقدر تلفت انتباهه كيف رهف !
قطع تفكيره صوت ضرب بوري و ارتاع ولف : الله يقلعك روعتني
سيف نزل من السيارة وبأبتسامة : اللي ماخذ عقلك يتهنى فيه
عبدالعزيز : انت اللي ماخذ عقلي ياعمري
سيف : اقول بس تعال نزل معي العشاء
عبدالعزيز راح له وهو مبتسم ويحاول يشيل رهف من تفكيره !
..
...
..
بعد 3 ساعات اللكل راح لبيته باستثناء البنات اللي اصرت عليهم ريوف ينامون عندها
مشاعل والهنوف ووجدان وهيفاء ونورة كلهم مجتمعين في غرفة ريوف
ريوف : عاد انتم تتوقعون اني مخليتكم تنامون حب فيكم ؟ طبعآ لا
الهنوف : ريوف وش صاير لك اليوم صايره ماتستحين ابد
وجدان : تلاحظين ؟ ههههههههههههههههههههه
ريوف وهي تضحك : انا حسيت بعد بس والله ابيكم ترتبون معي اغراضي
مشاعل : انا لو اني رايحة مع فيصل اصرف لي
هيفاء : ياليل هالفيصل ترى بعلم عزيز عليكم
مشاعل : هيوووف والله احبه
نورة : ياعمري وينك يا اخوي تسمع هالكلام
وجدان بجديه : مشاعل صدق بسألك
مشاعل ترفع راسها من جوالها : هلا
وجدان : تحبين فيصل من زمان ولا حبيتيه من بعد ماخطبك ؟
مشاعل استحت ووجهها انقلب احمر
هيفاء : ياربيه اللحين بنجلس 5 ساعات ننتظر الحياء يروح بعدين تعلمنا عاد
مشاعل رمت عليها الخداديه : انتي اسكتي ولا كلمة ( ولفت على وجدان ) اممم لا يعني قبل كنت منجذبه له بس اللحين جد احبه يعني يوم عرفته من قريب
ريوف تصفر : تكبيييير مشاعل ماطولت وهي مستحية
مشاعل : الشرهه مو عليكم الشرهه علي جالسة معكم
جلسو البنات يسولفون ويضحكون لين غلبهم النوم
-
يوم الجمعة الساعه 7
هيفاء متعودة تصحى بدري سواء ايام دوام او لا وكانت صاحية اول وحدة من البنات
لبست شيلتها ونزلت تحت تبي تسوي لها كوفي وكانت تدعي ان محد يطلع بوجهها من عيال عمتها
دخلت المطبخ وهي مازالت تدعي وتحطمت لما شافت ماجد قدامها يسوي قهوته
جت بتطلع بس انتبه لها ماجد
ماجد بابتسامة : صباح الخير
هيفاء وهي تعدل الشيله : صباح النور
ماجد : شخبارك هيفاء
هيفاء : الحمدلله بخير انت وش اخبارك
ماجد : اذا على الكحه الحمدلله خفت
هيفاء تفشلت وسكتت ولفت بتطلع
ماجد : خليك خليك انا خلصت قهوتي وبطلع خذي راحتك
هيفاء بكذب : لا لا انا جايه اخذ مويه بس وبروح
ماجد ابتسم : اوه مويه اجل بطلع قبل ماتكبينها علي
وطلع مع باب المطبخ الثاني اللي على الحوش
هيفاء ودها تصفق نفسها وبصوت خفيف : انا حيوانه يوم اكب عليه مويه واضح ماراح ينسى السالفة ابد
راحت تسوي لها قهوه
دخلت عليها عمتها ام ماجد : صباح الخير هيووف
هيفاء بأبتسامة : هلا عمتي صباح النور
ام ماجد : تعالي ياقلبي افطري معي
هيفاء وهي منحرجه : لا لا بالعافية عليك ياعمة والله ماشتهي بس اخذت لي قهوه
ام ماجد : الا حالفه عليك والله ترى مافيه احد ابو ماجد والعيال بالدوام وانا ماعرف افطر الا وفيه احد مقابلني
هيفاء ماحبت تردها : ابشري والله من عيوني
جلسو يفطرون وبعدها خذتهم السوالف لين نزلو البنات كلهم
...
...
..
بنفس اليوم
المغرب
في احد مقاهي الرياض المفتوحة
عبدالعزيز وسيف وصديق العايلة ناصر جالسين يسولفون ويتقهوون
عبدالعزيز : ماقلت لي شخبار عبدالملك والباقين والله لهم فقده
ناصر : ايييه امس يقولون لي ماشفنا عبدالعزيز وسيف من عقب البر والله استغربت
سيف : ايه والله يبي لنا مره نجي الاستراحة
ناصر : تعالو اليوم
عبدالعزيز : لا والله ياحبيبي اليوم فيه مباراة
ناصر : من يلعب ؟
عبدالعزيز : الهلال و الاتحاد
سيف : يووه فيه احد يتابع الدوري السعودي للان
ناصر : ليه يالامريكي ماتشجع انت ؟
سيف : هههههههههههههههههه لا ما اشجع
عبدالعزيز : ماعليك منه ذا وتعال خالد يوم عرف انك معنا قال اسحبوه
ناصر : يووووه خالد تدري اني ماشفته من يوم اني ببريطانيا ! تقريبآ لي سنتين
سيف : والله مو خالد بس حتى ماجد اخوي والباقي يقولون من زمان ماشافوك
ناصر : اسف والله ادري اني قليل ادب وقاطع بس امور الحياة عاد
عبدالعزيز : خل امور الحياة عنك وتعال اللحين معنا
ناصر : انتم روحو اللحين انا بروح اودي الاهل مشوار واجيكم
سيف : خلاص اجل برسل لك اللوكيشن
ناصر : اوكي انتظرك
...
..
..
الساعة 9 ونص في ملحق بيت ابو ماجد
كل العيال مجتمعين يناظرون مباراة الهلال والاتحاد
دخل عليهم ناصر بهاللحظة
ماجد قام له : ياهلا والله يالله حيه القاطع
ناصر وهو يضحك : هلا هلا والله
قامو العيال كلهم وسلمو عليه
وكان اخر واحد وصل له خالد اللي ضمه : ياهلا ومرحبا وش اخباارك
ناصر ضمه بحرارة : هلا ابو عبدالرحمن والله الحمدلله انت بشرنا عنك
جلس جنبه وقعدو ياخذون اخبار بعض
كان ناصر صديق خالد وعبدالعزيز من الاساس وعرف باقي العيال عن طريقهم
خالد : وش اخبارك وش الدنياا بك
ناصر : والله الحمدلله بخيير ياخي مشتاق لك
خالد : ياحبي لك والله ردت روحي يوم شفت وجهك تذكرت ايام بريطانيا والهبال
ناصر : هههههههههههههههههههه انت الظاهر ماشتقت لي الا عشان كذا
خالد : تبي الصراحة ايه والله عشان كذا
ناصر : هههههههههههههههههه اياا الخسيس ليت من يعلم موظفينك والله معد يحترمونك
خالد : ايه صح مبروووك الوظيفة
ناصر يبتسم : الله يبارك بعمررك
خالد : والله وصرنا مدراء
ناصر : تعال على الطاري بسألك
خالد : سم
ناصر : كان عندكم موظفة اسمها وعد ال ... ؟
قطع كلامهم صوت صراخ العيال واعلان المعلق لهدف ثاني لصالح الهلال
عبدالعزيز بحماس وفرحة : والله محد يعشيكم اليوم الا انا
ماجد وهو يضحك : لا ياحبيبي عشاكم علينا
عبدالعزيز لف عليه : حلفت انا والله عشاكم علي تخسي تردني عاد
ماجد : يالله اجل قم جبه اللحين
عبدالعزيز : باقي 10 دقايق تقريبا وتخلص المباراة اصبر يااخي
ناصر وهو يضحك : يالله ياعبدالعزيز خلاص انت ضامن النتيجه لازم يعني تشوفها للنهايه ؟
عبدالعزيز : هههههههههههههه هذا الهلال عااد ماتدري وش يعني لي ؟
ناصر : الا والله ادري بس بيذبحك هالتعصب يوم من الايام
كلهم كانو داخل الا سيف اللي كان برا يكلم ريوف
ريوف : سيوف بطلبك طلب
سيف : تم
ريوف : طيب اسمع اول
سيف : ريوفي ماتطلب تامر
ريوف : عادي تجيب لنا عشاء ؟
سيف : بسس ؟ ابشري بس من وين تبون ؟
ريوف : بجمع الطلبات من البنات وارسل لك
سيف : عندكم بنات خالي ؟
ريوف : اييه
سيف : خلاص انا طالع الحين ارسلي لي
ريوف : طيب
سيف : يالله
ريوف : مررره احبك سيف
سيف ابتسم : وانا بعد ( ويقلد نبره صوتها ) مرره احبك
سكر منها
هيفاء : ياربيه اخوك مره كيوت
نورة : مره ماتشوفيني انا ودحوم او فيصل نتسابق من يسكر بوجه الثاني اول وذولا يقولون احبك
وجدان : هههههههههههههههههههه تدرين ان دحوم الحيوان هو اللي مطلع هالحركه صرت اشيل هم اذا اتصلت عليه اقول طلباتي بسرعه واسكر حتى قبل ما اسمع رده
مشاعل : اشوف مشيعل طايح فيها عاد انا اكرره ماعندي اللي يسكر بوجهي
الهنوف : عاد مالومه مشاعل انتي تجلسين سنتين على ماتقولين اغراضك هاادية مره
هيفاء : ههههههههههههههههه المشكلة الهدوء مايجي الا اذا جت تطلب بس ( وتقلد مشاعل ) اسمع ابيك تطلع الحين من البيت وتركب السيارة وتشغلها ,, ويسكر مشعل وهي مابعد قالت له امش
مشاعل : حيوانة والله موو كذا
وجدان : هههههههههههههه الا والله انك كذا تذكرين يوم تقولين لي اجيب لك عطر تعبت لين عرفت اسمه
رهف : خلاص بنات حرام عليكم الا مشاعل عاد
نورة : الله يعين اخوي والله هههههههههههههههههههه
مشاعل تناظرهم بحقد : ياعمري يارهف والله محد يفهم الا انتي
ريوف : اقووول بس شتبوون من المطعم ؟
قامو البنات يختارون وارسلت ريوف لسيف
بعد ساعة جا سيف ومعه الاغراض و ارسل لريوف تنزل
نزلت هي وهيفاء عشان ياخذون الاكل
لما دخلو المطبخ كان سيف مازال يحط الاغراض
ريوف : وش هذااا شكلك جايب كثير
سيف : ايه زودت شوي ( وكان توه ينتبه لهيفاء ) اوووه بنت الخال هنا
هيفاء : ايه ماتشوف البيت منور ؟
سيف : اي والله منور ومستغرب انا بس اللحين عرفت ليه
هيفاء : ياربيه ترى كذا ماقدر متعودة على جلد يجيني عقب هالكلمه
سيف : ههههههههههههه اصبري بس فترة وابدا اجلد
هيفاء : مامدى توني مادحتك
سيف : ههههههههههههههههههههه اللي يعاشر اخوانك يصير فيه كذا
هيفاء : لا حرام عليك لا تحطها بأخواني كلهم مشعلوه بس
سيف : و عزيز مو قليل شر
ريوف : عبدالعزيز للان كذا ؟ اذكر قبل مايصيحني ويطققني الا هو
هيفاء : ههههههههههههههه ايه كان متسلط على اللكل مو انتي لحالك
ريوف : ايييه ويجلدني قدامكم ولاتقولون شي بالذات انت سيف
سيف : انا كنت بودي قارد وجدان
هيفاء :ههههههههههههههههههه اتذكر مره كانو كل الحريم والرجال بمزرعه ال.... واحنا بمزرعتنا واكبرنا عمي خالد
ريوف : ايييه ذكررت يوم يصفنا عبدالعزيز على الجدار كلنا بنات وعيال ويجلدنا
سيف : هههههههههههههههههههههههههه
هيفاء : اكثر شي قاهرني انه مايحترم احد الا انت ياسيف وانت ماخذ وجدان ورايحين تلعبون لحالكم
ريوف تحط يدها على فكها : اذكر يوم انكسر سني بسبب ضربه الكوره واصيح وانت ووجدان تمرون قدامي تركضون تلعبون
سيف جلس على الكرسي من كثر الضحك : هههههههههههههههههههههه اذكر ابوي جلدني بسبب هالموضوع وعبدالعزيز الكلب طلع منها محد يقوله شي حبيب جدته
ريوف : عاد انت تستاهل اكثر منه والله قاهررني للان ترى
جلسو يسولفون شوي لين اتصلت عليهم مشاعل
واخذو الاكل وراحو ودخلو الغرفه وهم يضحكون
ريوف تشوف وجدان : شوفي انتي ماراح تاكلين معنا
وجدان : بسم الله وش فيها هذي جايه بشرها
هيفاء : هههههههههههههههههه تذكرت يوم تنجلد وانكسر سنها
وجدان تضحك : طيب شدخلني انا
مشاعل : هههههههههههههههههههههههههههه اييه ذكرت يوم كنتي تلعبين مع سيف لحالكم
وجدان : اييه تدرون تونا شايفينه قريب بكاميرا عمي خالد اااه متتت ريوف وجهها كله دم وسيف يلحقني ويضحك
رهف : ههههههههههههههههههههه من جالدها ؟
ريوف : عبدالعزيز الكلب
رهف كشرت وبنفسها : وجع من يومه شر
ريوف : انا مقهوره للحين والله من سيوف
رهف ضحكت : بس انا حبيت ان وجدان مانجلدت
وجدان : ايه حبيبتي الحمدلله اني مصادقه سيف ذيك الفتره هو الوحيد اللي يحترمه عبدالعزيز ,, مع اني احيانا اخذ نصيبي من الجلد اذا ماجا الواسطة حقتي هههههههههههههههههه
ريوف : والله صراحة عبدالعزيز لعن خيرنا صدق من اكبرنا لاصغرنا حتى اخوانه ماسلمو
وعد : حتى عمكم خالد ينجلد ؟ ههههههههههههههههههههههههه
وجدان : ههههههههههههه لاا كان اكبر بكثير ولا عادي ماتفرق مع عزيز
نورة : عمي خالد يوصونه علينا ويقفل على نفسه المجلس ويلعب اتاري وعبدالعزيز يلعب بنفسياتنا برا
وجدان : والله ولد عمي كان نذل الله يعين عياله
مشاعل : لا شوفي عاد حرام عليك اللحين يجنن عزوزي
هيفاء : اي والله يجنن مره بعد
رهف بدون استيعاب : والله ماهقيت
هيفاء تعقد حواجبها : ليش عاد !
رهف توهقت مره ماتدري كيف ترقعها
الهنوف اللي حست بوهقتها وقالت بضحكه : شكلها تقصد يوم يهاوش مشعل في دبي صح رهوف ؟
هيفاء : هههههههههههههههههه يووه عاد ماترضى على مشعل
رهف ضحكت مجامله وكان ودها تبوس راس الهنوف اللي انقذتها
كملو البنات سوالفهم وسهرتهم
-
يوم السبت الليل
في غرفة وعد كانت عندها رهف
رهف : ارسلتي السي في للشركه اللي عطاك تركي ؟
وعد وهي تشوف مسلسل باللاب توب : ايه ارسلته يوم الخميس
رهف : غريبه ماردو عليك
وعد بعدم اهتمام : بكيفهم عاد
رهف : شكل جلسة البيت اعجبتك
وعد : مرره بشكل ماتتصورينه
رهف : طيب تتوقعين اذا سفهوك يعني خلاص ؟
وعد : لا مستحيل ماراح يردون علي الا الاحد الويكند مافيه دوام غالبآ وحتى لو فيه دوام مايردون
رهف : واثقه انهم بيوظفونك ؟
وعد : يحق لي السي في حقي يشرّف
رهف : ياعمررري يالثقه بس
وعد بجديه : يحق لي والله هم الخسرانين اذا ماوظفوني
رهف : خلاص جد عاد ترى بقلب عليك
وعد وهي تضحك : اطلعي بس وقفلي الباب خليني اكمل المسلسل
-
يوم الاحد
في شركة ...
ناصر قاعد يقارن بين سيفيات المتقدمين
وطاحت عينه على سي في وعد وتذكر انه ماسأل خالد
اخذ جواله بسرعه واتصل عليه
خالد : هلا والله
ناصر : هلا حبيبي شخبارك
خالد : هلا فيك الحمدلله انت بشرني عنك
ناصر : الحمدلله تعال بسألك
خالد : سم
ناصر : جاي من شركتكم 3 اشخاص متقدمين عندنا وللاسف ماعندنا مكان شاغر الا واحد فقط وكلهم سيفياتهم كويسة
خالد : مين ؟
ناصر : اذا تتذكر اللي سألتك عنها امس اسمها وعد ال .... وفيه وحدة اسمها منار ال .... وفيه وحده اسمها سارة ال .... ابيك ترشح لي شخص شغّيل منهم
خالد : اممممم كنسل وعد ال ...
ناصر : ليه ؟ افضل سي في بينهم عاد
خالد : بالنسبة لي اشوف منار افضلهم كشغل مو خبرات وعاد انت بكيفك
ناصر : اوكي شكرآ والله مايمشيني الا انت من ايام الدراسه نافعني
خالد : هههههههههههههههه اخيرآ بيّن بعينك
ناصر : يالله اجل مااعطلك تآمر على شي ؟
خالد : لا ياحبيبي تسلم
ناصر : فمان الله
وسكر خالد منه وهو مايدري ليه مارشح له وعد مع انها افضل منهم كلهم حتى كشغل
واساسا مايذكر منار ولا يذكر شغلها بس قطع تفكيره صوت الباب
ورجع مره ثانيه لدوامة الشغل ونسى السالفه
..
...
....
يوم الاثنين العصر
في بيت ابو ماجد و في غرفة ريناد تحديدآ
كانت تكلم صديقتها بالغربه ليان : والله ياليان ماراح ياخذه احد غيري انا احبه
ليان : ياريناد ياحبيبتي واضح من كلامك انه مايحبك
ريناد : عادي اسهل شي بالحياة انك تجيبين راس ولد
ليان : من كلامك عن ولد خالك انه ثقيل ومايعطي احد وجه
ريناد : عادي انتي تذكرين كيف جبت راس طارق اللي معنا بالجامعة
ليان : اييي اذكر بس مادري يختي صعب انك تتميلحين عنده وبعدين طارق ماكان ثقيل
ريناد بعصبيه : لاتصيرين معقده انتي وشجعيني
ليان : طيب انتي وش تفكرين تسوين ؟
ريناد : ابي اعلقه فيني .. تتوقعين لو اطلع قدامه وانا لابسه كويس وكذا بيعجب فيني !
ليان : اول شي اعرفي اذا في قلبه احد او لا
ريناد : لا ماتوقع هو مفركش خطوبته من بنت خالي واساسا واضح ما كان يكن لها مشاعر بعد ومتأكده مافيه احد بباله نهائيآ
ليان : طيب قولي له انك تحبينه يمكن تتحرك مشاعره
ريناد : تحسبيني ماجربت ؟ جربت بس هو يتغلى !
ليان : جربي مره ثانيه وحاولي انك تتقربين منه وتمسكين يده او وجهه (وضحكت) اهم شي خليك كاشخه عشان يخق
ريناد بحماس : اييه ابي افكار مثل كذا
كملت مكالمتها التافهه مع صديقتها .
..
...
..
في بيت ابو نايف
علي توه داخل وكانت امه بالصالة جالسة لحالها
علي : السلام عليكم
ام نايف : وعليكم السلام والرحمه هلا والله بولدي
علي : هلا يمه وش اخبارك
ام نايف : الحمدلله بخير انت وش اخبارك
علي : والله الحمدلله بخير
ام نايف : وش فيه وجهك تعبان ,, فيك شي ؟
علي : لا والله مافيني شي بس يمكن ضغط الدوام (ويسكت شوي) امم ودي اكلمك بموضوع
ام نايف : سم
علي : ابي اتزوج
ام نايف تهلل وجهها : ابرك الساعات وانا امك .. في بالك وحده ولا اخطب لك انا ؟
علي وهو مبتسم : لا ابي بنت ابو فيصل
ام نايف : زييين ماخترت والله والنعم في اهل ابو فيصل كلهم
علي وهو مازال مبتسم : الله يخليك لي يايمه
ام نايف : ويخليك لي واشوف عيالك ان شاءالله
سهى وهو يتذكر وجدان .. اللي اخيرآ بيجمعهم النصيب قريب
-
يوم الثلاثاء الظهر
ام نايف اتصلت على ام فيصل
ام نايف : السلام عليكم
ام فيصل : وعليكم السلام ورحمة الله وبركاته هلا في ام نايف
ام نايف : هلا بك والله
ام فيصل : شخبارك وش اخبار العيال
ام نايف : الحمدلله بخير كلهم وانتي اخبار عيالك واخبار نورة ووجدان
ام فيصل : عساه دايم .. والله الحمدلله بخير جعلك بخير
ام نايف : والله متصله عليك يا ام فيصل ودي اطلبك طلب ومابيك ترديني
ام فيصل : امريني
ام نايف : ودنا نخطب بنتك نورة لولدي علي
ام فيصل ابتسمت : والنعم والله في علي
ام نايف : وودي تردون لنا خبر بأسرع وقت
ام فيصل : ابشري بشاور البنت وابوها وارد لك
ام نايف : زين زين الله يكتب اللي فيه الخير
ام فيصل : امييين
قفلت منها
..
...
..
في الجامعة
الهنوف ووجدان جالسين
جتهم رهف وهي مبتسمة ابتسامة قهر : باركو لي بنات شكلي بحمل مادة النقد الأدبي
الهنوف : ليش خير !
رهف وهي تجلس : بسبب بنت عمك النذله ماعلمتني عن اخر شي اخذناه
وجدان فتحت عيونها بقوه : يالله شدخلني انا مادريت انك غبيه لهالدرجه مو معناها حنا ماحضرنا الجامعه يعني كل شي توقف معنا
رهف وهي ترجع شعرها على ورى : والله مدري مافكرت ابد
وجدان : المشكلة هي قالته بالمحاضره الثانيه وعلمتنا كل التشابترز اللي معنا يعني غبائك زايد عن حده والله
رهف : انتي مو كفو صداقتي اصلا ليتني مادخلت معك نفس التخصص ورايحه مع هنوفي
وجدان تضحك : وتجلسين انتي وياها تقابلون بزران خلق الله ؟
الهنوف بعصبية : وش فيها ؟؟ يازيينهم والله مستعده اجلس طول حياتي مقابلتهم
رهف : والله مشكله عاد انا احب العب معهم خمس دقايق بعدين كل واحد بطريقه مااتخيل اني كل يوم اضطر اقابلهم ونعيد نفس الموال
الهنوف عصبت عليهم : من زينكم انتي وياها هذولي احباب الله كيف تقولون كذا عنهم
رهف بتأفف : يووه اللحين وش يسكتها هذي
وجدان : من جد اللحين تجينا محاضره طول بعرض عن جمال الاطفال وبرائتهم خلاص والله حفظنا الكلام والاطفال كلهم حلوين ويهبلون
الهنوف تسوي نفسها زعلانه : الشرهه مو عليكم الشرهه علي انا اللي جالسه معكم انتم وتخصصكم الفاشل
جلسو يضحكون ويكملون سوالف
...
...
..
في بيت ابو فيصل
كانت نورة توها داخله جايه من الدوام
سلمت على امها يوم جت بتطلع غرفتها فوق
ام فيصل : تعالي نورة بكلمك بموضوع
نورة لفت عليها بأهتمام : سمي يمه
ام فيصل اشرت على المكان اللي جنبها : تعالي هنا
نورة جت وجلست مستغربه
ام فيصل : ام نايف متصله علي
نورة : من ام نايف ؟
ام فيصل : جارتنا ام الجازي والعنود
نورة : اييه ياحليلها ,, طيب وش عندها ؟؟
ام فيصل : تخطبك مني لعلي وقلت خل اشاورك قبل مااعلم ابوك واخوانك
نورة ابتسمت بحياء
ام فيصل استرسلت : وعلي انتي تعرفينه من كلام فيصل اخوك وابوك رجال والنعم فيه عنده وظيفة زينه ومحترم وشهم
نورة : امممم بستخير وارد لك
ام فيصل : خلاص حاولي تردين علي بدري قبل ما اكلم ابوك
نورة : مايدري للحين ؟
ام فيصل : لا لو وافقتي بقول له
نورة : اوكي
قامت نورة وحبت راس امها وراحت فوق وهي مبتسمة !
انتهى البارت
|