رد: غالبا مايكون الحب قدر لاخيارا/بقلم كاتبه سحابٍ دنى
-24-
يوم الاحد الصباح
الساعه 7
رهف صاحيه وهي اساسا مانامت الا نص ساعه من امس فكره توديها وفكره تجيبها وكانت مصددعه
بعد نص ساعه تقريبا البنات صحو وجلسو يتقهوون
وجدان : رهف وش فيه وجهك ؟
رهف : تعبانه شوي مانمت زين
مشاعل انتبهت لجوالها اللي كان جنبها : بسم الله وين لقيتي جوالك ؟؟؟
رهف ارتبكت : ايييه تخيلو كان بالكيس اللي معي سوري والله ادري تعبتكم امس
ماكان كلام رهف مقنع بس سكتوا ومشو الموضوع
وعد : ليش كان ضايع جوالك انتي ؟
رهف : ايه امس ضيعته واشغلت البنات معي
سكتو شوي بعدين قطع الهدوء هيفاء : رهف
رهف : هلا
هيفاء : بسرعه اعترفي وش بينك وبين اخوي ؟
رهف اول شخص طرا على بالها عبدالعزيز وانتفضت ووجهها تغير لونه وكل اللي ببالها كيف هيفاء قالت هالشي قدام البنات
ريناد اللي انتبهت لها رفعت حواجبها مستغربه : وش فيك رهف خفتي ؟
هيفاء كملت بدون ماتنتبه على ردة فعل رهف : تخيلو جلست ساعه اقنعه يعطيني السماعه ورافض وبس قلت له رهف طفشانه تبي تسمع اغاني وافق عشان اصورها له
نورة : ميين ؟ مشعل ؟؟
هيفاء : ايييه فيه احد غيره هالخبل
رهف ارتاحت وحاولت تبين انها طبيعيه وضحكت : يوه شكلي ماراح اجي وانتم موجودين خلاص بخاف منكم
هيفاء : ههههههههههههههههه لا لا مشعل عادي يعني
رهف : شوفي دامه اصغر مني بكثيير يعني عادي جد والله ماستحي منه
نورة وهي تضحك : طيب يالله قومي هزي على الطاوله ونصور ونرسل له عشان ينبسط ولد عمي
رهف : قولي بعد بنرش عليك فلوس ؟؟
ريما : طبعااا اهم شي
غدي : والله عاد معي ريالات كثير .. يالله قومي وش تبين اغنية ؟
مشاعل : ههههههههههههههههههههههههههه خير انتي وياها مصدقين
رهف تضحك : لا ولاحظي البخل بترشني بريالات بس
نورة : عاد تدرون رهف صادقه مستحيل استحي من اي احد اصغر مني حتى لو بيومين
وجدان تعدل جلستها : لا احس مهما كان يعني بعمر معين تصيرون كلكم كبار وخلاص يصير عيب
رهف : ايه بعد الثلاثين اكيد بحترمه
الهنوف : يعني بتخليه لين 29 بعدين ترحمه وتبدا تستحي منه
رهف وهي تضحك : اييوه بالضبط
هيفاء : اشوا اخوي مطول على الثلاثين يعني يمديه ينبسط معك
رهف : ههههههههههههههههههههه خير ان شاءالله
مشاعل : عاد رهف تدرين انه جد مهذري فيك
هيفاء : اييه من يوم قلت له انك خاقه معه ماعاد يشوف شي غيرك
رهف تمثل انها مستحيه : يعني خلاص ابدا اسميكم حمولتي ؟
هيفاء : هههههههههههههههههههه اصبري لين يتخرج من الثانوي بعدين نتفاهم على الزواج
رهف : عاد والله اخوكم حلوو وصوته حلوو فل اوبشن يستاهل من ينتظره
ريوف : البنت معد تستحي خلاص
وعد : رهف اثقلي شوي عيب
رهف كان جنبها علبه مويه مافيها الا شوي فتحتها ورشتها بوجه وعد
وعد شهقت : وجججع ياتبن
رهف : احسن تستاهلين
هيفاء فجأه فقعت ضحك وصارت عيونها تدمع
ريما تشوفها مستغربه : شفييها ذي بتموت
هيفاء تذكرت وجه ماجد : الموويه هههههههههههههههههههههههههه
وعد وهي تمسح وجهها ومعصبه : وش فيها المويه ؟؟
هيفاء حست ان السالفه ماتنقال وسكتت وهي كاتمه ضحكتها : لا بس وجهك ضحكني
وعد بنص عصبيتها ضحكت على شكل هيفاء : ههههههههههههههه الحمدلله يارب وش فيها ذي انهبلت
هيفاء رفعت كوب القهوة بتشرب بس فجأه رجعت تضحك
مشاعل وهي تضحك عليها : لا لا مو صاحيه اختي والله
رن جوال الهنوف بهاللحظه وردت : هلا ماما .. وصلتو ؟؟ .. اوكي .. عبدالله بيجيبها ؟ .. اوكي انتظرها .. لا لا ماراح اتركها .. باي
سكرت الهنوف
نورة : مين بيجي ؟
الهنوف : ماما جايه هنا مع خالاتي وحلا نايمه بتجيبها لي عشان يطلعون للسوق
جمانه : يووه الله يعيننا على دلعهاا
غدي : غريبه شعندهم ماما وخالاتي جايين ؟
الهنوف : نسيتي زواج ابتسام بنت خالتي الخميس ومفصلين فساتينهم من هنا وجايين يستلمونها
غدي : يووه والله نسييت (وبحماس) طبعا حنا بنجلس معهم صح ؟
الهنوف : لا طبعا بنروح اليوم اصلا ماما معصبه عشان الدوامات والاختبارات قربت وانتم ساحبين 3 ايام واخر سنه بعد
جمانه : الله ينكد عليك
كملو البنات سواليفهم
عند العيال
كانو كلهم نايمين الا خالد وماجد وسيف اللي نومه خفيف مره من الاساس
خالد يطق الباب عليهم بقوه ويطبل عليه ويغني ومافي فايده
خالد بصوت عالي : اول واحد بيقوم بعزمه فطور على حسابي
سيف : حنا اول من بيروح
خالد : ايه اكيد ياليت اللكل مثلكم
عبدالعزيز فتح عيونه : لا تلعب علينا بفطور الفندق
خالد : لا لا ماعليك عندي لكم مطعم يحبه قلبك بس قم انت
نزلو ماجد وسيف وخالد وعبدالعزيز
وطلعو يفطرون بعدين راحو العيال يتمشون بالمول وخالد وعبدالعزيز رجعوا للفندق
بسويت البنات
وعد جالسة قدام المراية فاتحه الايباد وتطبق ميك اب سموكي تجربه للمنتجات الجديده اللي شرتها من سيفورا
يوم خلصت لفت على البنات
وعد بحمااس : بناات شراييكم ؟؟
البنات شهقوو
نورة باانبهار : ماحب الميك اب بس هذا خيااال والله وعد مررره مبرز جمالك
ريما تصفر وبصوت عالي : وعد وين مخبيه هالجمال عننا !!!
وعد كان شكلها فعلآ ملفت وجميل مره
وعد تضحك : ضروري نروح المول ؟ والله صراحه متحسفه امسحه
نورة : والله للامانة حتى انا متحسفه انك تمسحينه
وعد بعد تفكير وبجرأه : بناات تتحدوني انزل كذا ؟
ريما بتصفيق : والله العظيم اتحداااك ولك اللي تبين
غدي : ولك مني اللي تبين بعد بس انزلي كذا
الهنوف : ههههههههههههههههه مو صاحيات لا تسمعين كلامهم نصيحه بيضيعونك
ريناد بأعجاب : عاد جد جد يجنن وعد ماشاءالله
وعد باابتسامة وسيعه : ياعمري والله انتي اللي تجننين
وجدان كان تتأمل وجه وعد : تصدقين وعد توني اركز ان عيونك فيها حور
هيفاء : اي والله من جد حتى انا اول مره ادقق بعد
رهف : من جدكم توكم تشوفونها ؟؟
وجدان : لا والله صدق ماركزت قبل
هيفاء : اتوقع وضحت اكثر مع الميك اب بس تجننن مره
وعد : خلاص بنات احرجتوني حتى العيب اللي بعيوني مدحتوه هههههههههههههه
هيفاء شهقت : هذا عيب ! حرام عليك من وانا صغيرة امنيتي عيوني تصير كذا نفس الين خلف
مشاعل وهي تااخذ طرحتها من الكرسي : اقول بس قومو البسوا عبايتكم وخلونا نزل بسرعة نستغل اخر ساعات
البنات قامو عشان يلبسون عباياتهم
الهنوف وهي جالسة للحين : بنات انا ماراح اروح اللحين
مشاعل مصدومه : لييه
الهنوف تأشر على حلا : حلا نايمه اخاف تصحى وحنا مو فيه بيجيها حاله نفسيه
رهف اللي منسدحه وتناظر جوالها : لا الهنوف روحي انا ماراح انزل الحين بتحمم واتقهوى واحاول اصحصح ومن الاساس مااشتهي المول بجلس يعني
الهنوف : متأكده ؟؟
رهف : اييه افا عليك روحي بس
الهنوف ارسلت لها بوسه بالهواء : يااعمري والله
طلعوا البنات
باقي غير حلا اللي نايمه وعد ورهف
وعد كانت تحط اللمسات الاخيرة على الميك اب حقها
رهف : اللحين انتي من جدك بتنزلين للمول فيه ؟
وعد وهي تعدل الروج : ايه وش فيها ؟
رهف : اوفر شكلك ملفت مرره
وعد : لا عادي اهم شي عاجبني
رهف : يعني انا اذا حطيت ماسكارا وحنا رايحين المول تجلسين ساعه تهزئيني واللحين انتي حاطه فل ميك اب والصباح بعد وعادي ؟
وعد قاعدة تحرك وجهها وهي تشوف نفسها بالمرايه بااعجاب : امانه مو حرام امسحه ؟
رهف بعدم اهتمام : بكيفك بس ياويلك لو تكلمتي اذا حطيت شي بعدين
وعد طلعت وهي تضحك وشافت خالد واقف عند الاصنصير وغيرت ملامحها للجدية بسرعه
لما دخلو الاصنصير خالد لف عليها وبهدوء : عيب اللكل يشوفك بهالشكل
وعد لفت عليه : عفوآ ؟
خالد وهو يحاول يتمالك اعصابه : اقصد المكياج اللي بوجهك .. مبالغ فيه على فكره
وعد بهدوء : اهم شي عاجبني انا
خالد عصب بس سكت يوم شاف الباب انفتح ودخلت عائلة خليجيه
كان شاب معه خواته و الشاب طارت عيونه بوعد وخالد لاحظ هالشي ويحاول يمسك نفسه
لما طلعو وعد لفت تبعد عن خالد ماتبي تمشي بنفس خطاه
قرب خالد ومسكها مع يدها : شفتي كيف مطير عيوونه فيك ؟؟
وعد تناظره مصدومه : يعني ؟! تراك مجرد مدير بالشركه بس خارجها مايحق لك تتأمر علي او تتحكم فيني !
سحبت يدها ومشت عنه و خالد كان منقهرر مرره بس ماكان يقدر يسوي شي اكثر من كذا
وسكت وانتظر 5 دقايق مايبي يطلع لانه لو شافها بيكوفنها
الساعه 12 ونص
رهف كانت متحممه وغافيه بالروب من التعب وصحت على صوت صياح حلا
رهف بتأفف : يالله موو وقتك ياحلا
حلا من بين دموعها : ابي الهنوف
رهف قامت من السرير تحاول تهديها بس حلا كانت تزيد صياح
رهف : خلاص ياقلبي اللحين ننزل كلنا للهنوف طيب ؟
حلا تمسح دموعها : طيب
رهف اتصلت على الهنوف
رهف بسرعه : هلا هنوف وين شنطه حلا ؟
الهنوف : ليش صحت ؟
رهف : ايه توها صاحيه اللحين
الهنوف : لا خلاص ياقلبي بجي انا البسها واخذها
رهف : لا لا انا بنزل على كل حال علميني وين شنطتها بس بلبسها والبس انا ونجيكم
الهنوف : ياعمري والله شوفيها لونها بينك بالغرفه الثانيه ولبسيها فستانها الاصفر
رهف : من عيوني
سكرت منها
وسوت لها سوت لها ساندويتش ولبستها ومشطت شعرها وراحت تلبس هي
في سويت الشباب
كان عبدالعزيز توه متحمم وطلع يلبس
لبس ساعته ورش من عطره وفصل جواله من الشاحن وطلع
كان شعره مبلول للحين وجالس يحركه بيده وهو ينتظر الاصنصير يجي
بهاللحظه طلعو رهف وحلا
رهف كانت ماسكه يدها وحلا لما شافت عبدالعزيز فكت يدها وركضت له
وعبدالعزيز بدوره نزل جسمه عشان يحضنها
شالها اول ماوصلت ورفعها فوق : هلاا والله بحلا قلبي
حلا وهي تضم رقبته : اشتقت لك
عبدالعزيز يضحك وهو يبوس خدها : والله انا اللي اشتقت لك ( ويقرب وجهه لفستانها ويشمه ) وش هالعطر الحلوو ياحلا
حلا : رهف حطته لي قبل شوي
عبدالعزيز ابتسم وقعد يلعبها
رهف تمنت انها قايله للهنوف تجي تاخذها لان مالها خلق عبدالعزيز ابدآ ومو مستعده تقابله اللحين
من امس وهي تدعي انها ماتشوفه واخرتها تشوفه و ببداية اليوم !!
قربت عند الاصنصير وهي تقول بنفسها : لا يهمك يارهف لا يهمك و لا يحرك فيك شعره
فتح الاصنصير بهاللحظه ودخل عبدالعزيز ودخلت حلا معه
رهف فتحت عيونها بقوه وبصوت عالي : حلا تعالي
حلا : لا بروح مع عزيز
رهف توهقت : قلت لك تعالي ترى ما اوديك للهنوف
حلا بطفولة : ما ابي الهنوف بروح مع عزيز للبقالة
رهف بهاللحظه محتارة وش تسوي كل القرارات كانت صعبة
تترك حلا والهنوف موصيتها عليها ولا تدخل الاصنصير وعبدالعزيز فيه !
كان الاصنصير بيقفل وضغطه عبدالعزيز بسرعة وقال بهدوء وعيونه على جواله : تعالي انتي ماراح تطلع ترى
رهف عصبت ودخلت وكان الاصنصير فاضي طبعا مافيه الا هم
رن جوالها على طول وردت : هلا .. ايه نازله اللحين .. انتم وينكم بالضبط ؟ .. اماانه معكم ؟ ياحلووها والله .. المشكله ماكشخت .. خلاص اوكي ماعليه .. يلا باي
رهف طلعت من شنطتها روج كان لونه بينك على لحمي خفيف وصباحي وجت بتحطه بنفس اللحظه خطرت لها فكره ورجعته وطلعت روج ثاني لونه احمر صارخ
وجلست تحط وهي لافه على المرايه ومو معطيه لعبدالعزيز اي اعتبار
وبحركه مجنونة و مقصوده فكت طرحتها وجلست تحرك شعرها ,, وكانت تتمنى ان عبدالعزيز يعلق او يتكلم
عبدالعزيز كان وجهه قدام بس بنفس الوقت يناظرها بطرف عينه ومستغرب من حركاتها !
حلا وهي تشوف رهف وبطفوله : رهف ليه ماتغطين شعرك عن عزيز هو مو اخوك هو رجال
رهف ابتسمت وهي تعدل الطرحه : لا ياقلبي ما اشوف اي رجال بالاصنصير عشان كذا ماغطيته
حلا قعدت تنطط بدون اهتمام برد رهف وهي تحس الاصنصير يتحرك وعاجبتها الحركه !
اما عبدالعزيز تجمع الدم بوجهه من جملتها وبهاللحظه فتح الاصنصير
رهف حمدت ربها انه فتح قبل مايسوي شي لان وجهه انقلب بقوه و ماتثق فيه وتخاف يسوي شي قدام حلا
مسكت يد حلا وطلعت قبله وبوجهها نظرة انتصار مع ضحكة .. تحس انها بردت قلبها فيه !
عبدالعزيز مازال موجود بالاصنصير مصدوم من جملة رهف
ركبو معه اثنين وكان بيقفل الاصنصير بس طلع بسرعة
وجلس باللوبي وهو مغمض عيونه ويحرك رجله بقوه ويغلي من القهر
عبدالعزيز بنفسه : مو انتي يارهف اللي تسوين فيني كذا والله لا انتي ولا عشرة من امثالك
بعد 5 دقايق تنهد بقوه ولبس نظارته وطلع للمول
عند البنات
كانو توهم مودعين صديقتهم الاماراتيه شيخة وللحين جالسين بالكوفي
شوي و جتهم رهف ومعها حلا اللي راحت للهنوف بسرعة
رهف كانت رايقه مره والابتسامة شاقة وجهها : راحت شيخة ؟؟
وجدان رفعت راسها : ايييه كان ودها تجلس بس تقول عندي شغله وحبيت اسلم عليكم قبل ماترجعون السعودية
رهف بنفس الروقان ومازالت مبتسمة سحبت الكرسي وجلست : يووه قهر والله كنت ابي اشوفها
ريوف : يووه قهر وانتي ابتسامتك واصله اذنك من الروقان ؟
الهنوف تضحك : قولي ماشاءالله لا تجينا النفسيه الخايسه اللي امس (وتوجه الكلام لرهف) فاتك شيخه والله تغييرت مره صايرة تجنن
رهف : اخر مره شفتها قبل سنتين تقريبا يوم كنا في مكه
وجدان : يووه صح انتي ماكنتي معنا العام يوم نجي دبي جتنا الفندق ونامت عندنا مررره تجنن هالبنت
جلسو البنات يسولفون شوي بعدين قامو يكملون تسوق
..
....
.....
في محل ارماني
عبدالعزيز وفيصل كانو عند التيشيرتات وفيصل قاعد يشاور عبدالعزيز وعبدالعزيز مو معطيه وجه
فيصل يطق كتفه : ياااولد شفيك انت
عبدالعزيز انتبه له : معليش سهيت
فيصل يناظر وجهه : فيه شي مضايقك ؟
عبدالعزيز : لا
فيصل : تراي ملاحظك من فتره متغير اذا فيك شي قل لي
عبدالعزيز يضحك : شكل استقعادي لك انت ومشاعل مااعجبك تبيني ازيد الجرعه يعني ؟
فيصل بجديه : لا عبدالعزيز انا اكلمك جد
عبدالعزيز : لا ياحبيبي مافيه شي والله
فيصل ماحب يضغط عليه : طيب شرايك في هالتيشيرت
عبدالعزيز : مش بطال بس اللون لك عليه
كملو تسوقهم
..
...
....
في سيفورا
الهنوف ووجدان وريوف يجربون ارواج
وجدان ماسكه بيدها لونين وتناظره بحيره بعدين لفت عليهم : بنات وش رايكم اخذ اي واحد ؟
ريوف : والله كلها جميلة
الهنوف : انا حبيت هذا اللي جاي على احمر اكثر
وجدان : شكلي باخذها كلها والله قد شفتها عند الجازي تمدح ثباتها مرره
...
..
..
رهف ووعد كانو يمشون مع بعض
وعد : اللحين تقولين لي الميك اب حقك اوفر وانتي جايه بروج احمر ! يالله صباح خير صدق !
رهف : هههههههههههههههه حبيبتي انا روج بس مو فل ميك اب
وعد : ولو الروج الاحمر يغني عن كل شي
رهف تصرف الموضوع : المهم خلاص تكفين خلينا نجلس شوي
وعد : اوكي بس خلينا نروح مح...
قطع كلامهم جوال وعد يوم رن وردت بسرعة : هلااا والله هلا .. الحمدلله بخير انتي كيفك .. في دبي والله فتره نقاهه .. وش تبين هدية ؟ .. لا وش دعوى والله ماتكلفين علي وانا بالمول اصلا .. ايوه .. ابشررري من عيوني والله اللحين بروح اجيبه لك
سكرت منها
رهف : مين ؟!
وعد : عذاري اللي معي بالدوام
رهف : وش تبي ؟
وعد : تبي عطر من محل ... بروح اجيبه تجين ؟
رهف : لا والله بآخر الدنيا مالي خلق اتحرك خلاص انا بروح اشوف المحلات القريبه وانتي روحي جيبي لها ومتى ماخلصتي اتصلي علي
وعد : خلاص اوكي
راحت وعد ومثل ماقالت رهف دخلت المحلات القريبة
بعد ساعه
كان عبدالعزيز يتمشى لحاله بعد ماتركه فيصل وراح لمشاعل
جلس مقابل محل اديداس ومعه اكياسه وقعد يطقطق بجواله ,, رفع راسه وقعد يلف رقبته يمين ويسار لانها تألمه
عند رهف
كانت واقفه بتحاسب ومعها اغراض
حطتها على الطاولة وجلست تحوس بشنطتها تدور بطاقتها بزحمة الاغراض
وحست بشخص قرب منها ومد بطاقته وهو يكلم الكاشير : حساب هالاغراض عندي
الكاشير رفع عيونه له ورجع نظره لرهف
رهف ارتاعت ولفت بسرعة وشافت عبدالعزيز !
رهف : وش اللي الحساب عندك ؟
عبدالعزيز : يعني انا بحاسب فيه شي مو مفهوم بكلامي ؟ .. ( ونقل نظره للكاشير ) كم الحساب ؟
الكاشير توه بيتكلم وقاطعته رهف : وش تبي انت ؟ بصفتك مين تحاسب عني ؟
عبدالعزيز : عيب تحاسب الحرمه ومعها رجالها
رهف فتحت عيونها وبعصبية : رجالها ! ماتلاحظ انك ماتستحي ؟ ابوي ؟ اخوي ؟
عبدالعزيز قصر صوته : خلاص لا ترفعين صوتك نتفاهم اذا طلعنا ( وناظر وجهها زين ) وبعدين امسحي هالروج اللي حاطته
رهف باندفاع : نتفاهم على ايش ؟؟ ولا دفعت لي كم مره خلاص حسيت انك ولي علي ؟ ثاني شي مالك دخل بالروج .. واييه صح على طاري الفلوس اللي دفعتها لي
طلعت محفظتها من الشنطه وفتحتها وخذت كل الكاش اللي فيها ورمته عليه ولفت بتروح
عبدالعزيز سحبها بقوه مع يدها ورجعها له
ومسك وجهها بيد وحط يده الثانيه على شفايفها ... وبهدوء مسح الروج الاحمر بأصابعه
تحت دهشة رهف واستسلامها التام له ..
قرب عند اذنها وهو يهمس بنبرة تهديد : على فكرة مانسيت اللي صار بالاصنصير للحين
رهف انصدمت و دب الخوف والرعب بقلبها
مسكت يده وابعدتها عنها بقوه ولفت بتطلع من المحل وسمعت صوت الكاشير من وراها يناديها عشان الاغراض
تنهدت وحاولت تقوي نفسها وتبين ان الموضوع ماهمها ورجعت مرة ثانيه وحاسبت واخذت اغراضها بدون ماتلف عليه ولا كأنه موجود
طلعت من المحل وعلى طول راحت لدورة المياه
كانت جدآ معصبة ومتوترة وجالسة تكلم نفسها بصوت عالي : لا بعد يهدد .. يعني وش بتسوي اكثر من اللي سويته !
رفعت وجهها للمراية وشافت الروج اللي كان فيه بقايا بسيطه
فتحت المويه وجلست تفرك شفايفها وهي للحين تكلم نفسها : الله ياخذك ياعبدالعزيز الله ياخذك
كان جنبها ناس من جنسيات غير عربية يناظرونها ومستغربين وضعها وانتبهت لهم وحاولت تهدي نفسها بس ماقدرت
ومالقت حل الا انها تتصل على افنان لآنها بتنفجر لو ماتكلمت
حطت شنطتها بقوه وطلعت جوالها واتصلت على افنان
بعد كم رنه ردت عليها افنان بصوت كله نوم : نعم يامزعجة
رهف : افنان وش يبي مني ؟؟؟ افنان ليه يسووي معي كذا ؟؟
افنان : وشوو ميين ؟
رهف علمتها السالفة بدون ماتقولها اللي صار بالاصنصير !
افنان فزت بسرعه : وشو !! مسح الروج ! وش يبي ؟ وش دخله ؟
رهف بقلة حيلة : مدري والله مدري خلاص بيجنني الله ياخذه اكرهه وجوده يوترني مرره
افنان مازالت مصدومه : بس ماله اي مبرر يمسح روجك ! حتى لو ماتعود يشوف كذا انتي مو من محارمه ولا تقربين له يعني ماله حق
رهف : لا ياافنان والله خواته كلهم يحطون كذا وحتى بنات عمه ليه متسلط علي بس ؟
افنان سكتت شوي وبعد تفكير : اممم طيب يمكن يحبك ويغار
رهف بعصبيه : حبك برص انتي وياه ان شاءالله .. هو ماعنده قلب من الاساس ولا ينتمي لفصيلة البشر الطبيعيين
افنان : قسم بالله احس كأنكم بمسلسل ماكأنه حقيقة
رهف جتها ضحكه : انا مادري ليه اقولك كل شي وانتي ردودك زي وجهك ماعمرك رديتي رد يبرد القلب
افنان : هههههههههههههههههه وش اسوي طيب مره يضحكني اسلوبك وانتي معصبه
رهف : والله يا افنان مقهورة ماخذه اغراض كثييير يوم جيت احاسب جا ونكد علي كل شي
افنان : يختي انا مستغربة انه قدر عليك !
رهف : وانتي تحسبيني بمشيها له ؟ والله لااردها له ولا ماكون رهف
افنان : مجنونه انتي خلاص فكي نفسك منه وبس و اذا قال شي تجاهليه وبعدي عنه
رهف : لا هو يبي هالشي عشان يحس بالانتصار بس يخسي والله والله ماخليه
افنان : والله انك مجنونه صدق مدري وش اقول صراحة
كملت مكالمتها مع افنان
اما عند عبدالعزيز بالمحل
رفع الفلوس اللي رمتها رهف وانبه ضميره شوي .. بس سرعان مازال هالشعور يوم طاحت صورة من بين الفلوس
رفعها وشافها كانت صورتها وهي صغيرة و فيها كمية براءه ولطافة ..
ابتسم عبدالعزيز وتنهد وهو يدخل الصورة في محفظته !
عند البنات
وجدان وريوف والهنوف جالسين
ريوف تأشر على المحل اللي قدامها : بنات تعالو للمحل هذا ودي اخذ شغله منه
وجدان : لا والله مالي خلق خلاص تعبت
ريوف : ياسخفكم بلييز مابي اروح لحالي
الهنوف : يلا قومي انا بروح معك
قامو البنات ووجدان كانت جالسه تتفرج على الرايح والجاي فجأه لمحت سيف بالكوفي اللي قبالها كان جالس لحاله ويطقطق بالجهاز اللوحي اللي قدامه ومعه كوب القهوه
وجدان قامت متجهه له
سيف كان سرحان لين لاحظ ان فيه شخص يقرب منه
عدل جلسته وقفل الجهاز لما استوعب انها وجدان : ياهلا والله
وجدان تبتسم له : هلا بك سيف ( وتشوف يمينه ويساره وضحكت ) شكل المول ماعجبك
سيف يبتسم لها : لييش ؟
وجدان : مااشوف معك اكياس او شي واضح انك مليت
سيف : الا والله بس مخلص من بدري والاكياس عطيتها خالد
وجدان كان معها كيس ومدته له : طيب خذ هذي هدية بسيطة مني لك
سيف رجع يبتسم لها : ليش وش المناسبة ؟
وجدان : تستاهل والله لانك ماقصرت معي
سيف : يووه وجدان مابيننا والله ليه تزعليني منك ؟
وجدان : عشاني بس خذها والله ماراح ارتاح الا اذا رديت جزء من الجميل
لف سيف وجهه وضحك ورجع لف عليها واخذ الكيس اللي معها : تمام شكرآ ياوجدان
وجدان ابتسمت : انت اللي شكرآ ياسيف
وشافت ريوف والهنوف طالعين من محل : يلا اجل اخليك اللحين
سيف : الله معك
وجدان راحت من هنا وجاء عبدالعزيز وجلس عند سيف من هنا
سيف : هلا والله بالساحب وينك
عبدالعزيز يضحك : كنت مع فيصل ومشاعل انكد عليهم شوي
سيف : ههههههههههههههههه حرام عليك خلاص اتركهم بحالهم
عبدالعزيز : لا والله يااخي فرصه وجت لعندي عشان اطلع شياطيني وتبيني اسكت
سيف يضحك : انت شيطان خلقه ماتحتاج فرص
عبدالعزيز : لا يكثر واطلب لي قهوه على حسابك
سيف : ابشر كم عندنا من عزيز
طلب سيف قهوه لعبدالعزيز وجلسو يسولفون
...
..
..
بعد نص ساعة
رهف توها طالعه من دورة المياة
بعد ما مشت شوي شافت تركي كان لحاله وماسك جواله .. مشت له بخطوات سريعه وضمته بقووه
تركي كان ساهي بالجوال ارتاع مااستوعب مين اللي جا الا بعد ثواني
تركي : رهف شفييك ؟؟
رهف وهي مازالت ضامته : اشتقت لك
تركي مصدوم : بسم الله خير وش صاير ؟
رهف تبعد عنه : ماشفتك اليوم ابد عشان كذا
تركي يركز بوجهها بتفحص : وش فيه وجهك اصفر ؟
رهف : يمكن عشاني مانمت زين
تركي بحنان : ليه مانمتي ؟ متأكدة رهف مافيك شي ؟
رهف كان ودها تقول لتركي كل شي لانها تحس انها تسوي شي غلط او بشكل اصح تحس نهاية هالشي ماراح يصير بصالحها ابد بس سكتت لان حتى لو تكلمت بتنفهم غلط : لا بس ازعاج وحوسه عشان كذا ماقدرت انام
تركي : اذا ودك احجز لك غرفة اللحين وتنامين ابشري
رهف بسرعة : لااا وين بخلي نومي كله بالرياض ان شاءالله
تركي : طيب ليش لحالك انتي وين وعد ؟
رهف : راحت تشتري عطر لصاحبتها ( وابتسمت ) عاد اللحين انا مو لحالي انت معي
ضحك تركي ومشى معها
وهم يمشون قابلو البنات وجدان والهنوف وريوف
رهف كان وجهها متغير صدق وماكان ودها تشوف البنات اللحين
غمضت عيونها لما شافتهم متجهين لها وحاولت قد ماتقدر تستجمع قوتها وتحاول تبين ان مافيها شي
وجدان : رهووف تجين معنا ؟ بنروح نتغدى بعدين نكمل تسوق
رهف تلف على تركي
تركي ابتسم لها : خلاص روحي معهم اساسا انا مواعد خالد بنروح محل هنا قبل مانرجع
الهنوف تشوف وجهها : رهف وجهك تعبان فيك شي ؟
تركي ضحك : اييه لو سمحتو لا تزعجون اختي وهي نايمة وجهها اصفر من قلة النوم
رهف توهقت و تركي مشى عنهم
الهنوف ضاق صدرها : رهف ازعجتك حلا مره ؟
رهف : لاا لا والله بس تركي متوقع انكم ازعجتوني لاني مانمت زين من يومين
ريوف : عاد رهوف انتي جد ماتنامين كثير لاحظتك
رهف بكذب : ايه عادي انا كذا بالسفر اشبع بسرعة
ماصدقوها البنات بس مشوا الموضوع
وجدان : طيب تعالي بنتغدى بعدين نكمل تسوق
رهف تبتسم : اوكي ( لفت على الهنوف ) : الا وينها حلا مو معك ؟
الهنوف : لا خذتها امي على طول
بهاللحظه رن جوال وجدان و ردت : هلا وعد ,, ايه ايه معاي ,, اوكي
وجدان مدت لرهف الجوال : خذي وعد تبيك
رهف خذت الجوال منها : هلا
وعد : وييينك اتصلت على جوالك 60 مره ماتردين
رهف : بالشنطه مانتبهت له
وعد : وين رحتي ؟ دورتك بنص المحلات مالقيتك
رهف : رحت اشتري لطلال هدية بس مالقيت
وعد : رحتي اديداس ؟
رهف بربكه بانت على وجهها : ايه رحت بس خايس مالقيت شي
وعد : غريبه عاد اشوفه من برا قبل شوي شكله حلو بس مامداني ادخله
رهف بسرعه : لا لا خايس مره
وعد : طيب بالفاترينه تبع نايك حاطين تيشيرت برشلونة يجننن وعليه تخفيض روحي خذيه
رهف عصبت : تستهبلين انتي وش ابي فيه وع
وعد : ترى لطلال مو لك
رهف : لاا خلاص الهديه الاولى تكفي
وعد : مين عندك اللحين
رهف : الهنوف وريوف ووجدان
وعد : اوكي حطي سبيكر بكلمهم
رهف حطت سبيكر بملل
وعد : هلا بنات قررتو اي مطعم بتتغدون فيه ؟
وجدان : وش رايكم في تشيز كيك فاكتوري ؟
ريوف : عاد تصدقين مشتهييته والله
وعد : الهنوف ورهف ؟
رهف : اوكي
الهنوف : يلا خلاص نشوف بعض فيه
وعد : يلا اجل
سكرت رهف وعطت وجدان جوالها
راحو البنات المطعم وشافو وعد هناك وجلسوا
وعد فتحت عيونها بقوه وهي تشوف رهف : تستهبليين انتي تقولين اديداس خايس اخرتها شاريه المحل كله !
رهف توهقت : انتي قلتي نايك مو اديداس
وعد : لا انا قلت لك اديداس
رهف تحاول تصرف : والله دايخه ماركزت ماسمعتك تقولين اديداس
قامو يسولفون البنات
رهف كانت مو معهم مره شوي تعلق على السواليف وشوي تسهى
وكلن ملاحظ بس سكتوا
في الرياض
معاذ وسلطان يتغدون
معاذ : اكرررمك الله ابو عبدالله
سلطان يبتسم له : عافيه
معاذ : الله يعافيك ( سكت شوي بعدين قال ) سويت شي بموضوع رهف ؟
سلطان : لا للحين قرب موعد رجعه الوالد من السفر
معاذ : انت صامل انك مااتكلمها وتاخذ رايها قبل مايصير شي رسمي ؟
سلطان : انا بصراحه ماكنت ناوي اكلمها بس شاورت لمى اختي وقالت الا كلمها
معاذ : والله كنت شايل هم ترى انك تخطب بدون ماتشاور
سلطان : لاصراحه اقنعتني ,, ورقمها عندي يعني خلاص كل شي سهل
معاذ : الله يكتب لك اللي فيه الخير
سلطان ابتسم : امين ويااك
في مطار دبي
الساعه 8 ونص
كانو اللكل موجودين ينتظرون رحلتهم الا وعد اللي كانت رحلتها قبلهم بساعه
خالد يدورها بعيونه ومالقاها كان مأنبه ضميره عقب الصبح لما هاوشها
لما ماشافها استغرب بس سكت !
اول ماركبوا الطيارة
رهف وهيفاء كانو جنب بعض
رهف اللي كان مقعدها جنب الشباك : هيفاء الله يخليك بدليني ماحب اجلس جنب الشباك
هيفاء : طيب تعالي هنا الكرسي الثاني مافيه احد
رهف : لا اخاف مكان احد واتوهق مالي خلق اتهاوش والله
هيفاء : لا مستحيل يجي احد اللحين بس خلاص تعالي مكاني اساسا ابي الشباك انا
مشاعل ومشعل وفيصل كانو قريبين منهم بالجهه الثانيه
فيصل : والله ماتوقعت يجي يوم اترجى فيه بزران
مشعل يلف عليه : بزران بعد ؟
فيصل : اسف ياشيخ مشعل بس ممكن تبدل اماكن ؟
مشعل : لا لا لا خلاص انسى
مشاعل كانت جالسه تضحك عليهم
فيصل : حنا نخلص من عبدالعزيز يطلع لنا ذا ؟ لين متى يعني
مشعل : لين الزواج ياحبيبي
شوي شاف رهف وهيفاء وهم يبدلون اماكنهم
مشعل وهو يعدل شعره : احمدو ربكم وادعوا لرهف لآني بترك لكم المكان كله
قام عنهم وراح عند رهف وهيفاء
فيصل جا جنب مشاعل : وش سالفته ذا الولد
مشاعل : ههههههههههههههههههه منهبل عليها الخبل
فيصل وهو يضحك : الله يجزاها خير يا ليتها تهبل بعبدالعزيز بعد ويفكنا من شره
عند البنات
مشعل : مافيه احد هنا صح ؟
هيفاء : وش جابك بسم الله
مشعل : حرام مشاعل وفيصل معاريس ماابي اخرب عليهم جوهم خلهم ينبسطون
هيفاء : انت تقول هالكلام من متى !!!
مشعل : المهم مافيه احد صح ؟
هيفاء : لا مافيه احد
مشعل بهبال : طيب يمديني اروح احط عطر ولا مايمدي ؟
رهف : هههههههههههههههه اجلس اجلس مايحتاج عطر
جلس مشعل : ايووه وش الاخبار رهف
رهف تضحك على ميانته : تماام انت شخبارك
مشعل : والله دام اني جالس جنبك بخير ونعمة
خالد كان قدامهم وجنبه عبدالعزيز وماجد
خالد لف عليه : استح على وجهك مشعل قلنا اوبن مايند و نفلها بس مو كذا
مشعل بتأفف : ياليل انتم وش جابكم هنا ؟
خالد : هذا اللي بيخليني اقوم اكوفنه هنا ! انا عمك استح على وجهك
عبدالعزيز بدون مايلف : اذا تبيني اقوم بدالك عادي !
رهف ارتجفت لما سمعت صوته ورجعت فيها ذاكرتها للي صار بدبي
وبسرعه طلعت سماعاتها ولبستها وشغلت اغنية وحطت راسها ورا وغمضت عيونها
مشعل : زيين اللحين ؟ خليتوها تنام وتسحب علي
خالد يهز راسه وهو يضحك على هبال مشعل
كان ماجد يكح بقوه
خالد : وش متعبك انت ؟ من امس اشوفك تكح
ماجد ببحه تعب : داخلني برد
عبدالعزيز : برد في دبي !!
ماجد : ايييه فيه وحدة كلبة كبت علي مويه الليل ويوم طلعت كان فيه هواء
هيفاء كانت كاتمه ضحكتها يوم سمعته يقول كلبة فتحت عيونها بقوه وجت بترد بس تذكرت انه ماقال الاسم وسكتت
عبدالعزيز : ههههههههههههههه منهي !!
ماجد : وحده داخله الفندق وانا طالع ومعها كاس موية وكبته علي
عبدالعزيز : وش السالفة مسلسل تركي !
خالد يجاري عبدالعزيز : و ماطاح الكاس ونزلتو مع بعض تشيلونه وناظرتو بعض نظره حب ؟؟؟
ماجد باستهبال : كان ودي والله بس مامدى
رهف جت بتعدل جلستها ورجفت الكرسي اللي قدامها
عبدالعزيز عارف ان وراه رهف وحس بالرجفه بس تجاهل
عبدالعزيز : دخلتو اديداس ؟ والله مجنوون بضاعتهم هالمرة اسطوورية
ماجد : ايه دخلته بس مو مره
عبدالعزيز بابتسامة : انا لقيت فيه شي بس شكله ليمتد اديشن يعني تخسون تلقونه بمكان ثاني
خالد مصدقه : وشوو ؟ دخلته انا مالقيت شي
عبدالعزيز بكذب : تيشيرت مدريد بس الموسم اللي راح
خالد : طيب خذيته ؟
عبدالعزيز زادت ابتسامته : لا بس شميته ورجعته
ماجد : من جدك ؟ هههههههههههههههههههههههه
عبدالعزيز : ايه ما معي كاش ولا كان خذته
خالد : والفيزا وبطاقاتك مو معك ؟
عبدالعزيز توهق : مدري تصدق شكلي ناسي المحفظه في الشنطة الكبيرة
عند وجدان والهنوف كانت جنبهم ريوف نايمة
وجدان بصوت واطي : رهف مره متغيره احس مو على بعضها طول الوقت
الهنوف بنفس الصوت : تصدقين انا ملاحظة ! تتوقعين صاير لها شي ؟
وجدان : تبين الصدق ؟ احس صاير شي مع عبدالعزيز بس مو راضيه تقول
الهنوف : ايه اصلآ واضح بينهم شي ! وجدان تتوقعين انا غلطت يوم خليتها تضيفه سناب ؟
وجدان : ما احس هذا السبب !
الهنوف : الا اكيد انا غلطت يا ليتني ماجبرتها والله ماكانت تبي ,, عبدالعزيز مايصلح تحط راسها براسه اببد والله مايخلييها ولد عمي واعرفه
وجدان : انا حذرتها كم مره وقلت لها لا تلعبين بالنار ترى عبدالعزيز يخرع
الهنوف بان الحزن على وجهها : يارب ماسوا لها شي
وجدان : لا لا تفكرين كذا ان شاءالله مافيه شي
الهنوف : انتي اسأليها مره ثانيه انا ماقدر اخاف تحس انه غلط تعلمني نظرآ للي حصل بيني وبينه بيوم من الايام
وجدان : طيب الهنوف جد انتي ماتكنين له مشاعر ؟
الهنوف بجدية : وجدان تتوقعين لو اكن له مشاعر بنسبة 1% برفضه ؟
وجدان بتفكير : مادري يمكن بعد اللي صار بينكم حسيتي انه مايصلح لك كـزوج لكن فيه حب بقلبك !
الهنوف ضحكت : والله لا بعد ولا قبل اللي صار عمري ماحسيت بمشاعر حب تجاهه .. عبدالعزيز ولد عمي وبس والمشاعر اللي تجاهه هي احترام وتقدير مثله مثل سلمان و فيصل سيف ماجد سعود كلللهم نفس الشي (سكتت شوي ) بس ولو مابي اسأل رهف مستحيل تقول لي انتي اسألي وشوفي
وجدان : خل تهدى الامور وبسألها واشوف
الهنوف : اوكي
بعد ساعتين وصلو الرياض
سلمان ومشاعل وهيفاء ومشعل جلسو بالمطار ينتظرون رحلتهم الثانيه على الدمام
والباقي تفرقو بالمطار واللكل رجع لبيته
انتهى البارت
|