ديوان الشاعر تركي 2000
نبذه عن حياة الشاعر تركي 2000
ظاهرة الشعر (( تركي بن عطا الله الميزاني )) الشاعر اللذي قلب الطاولة على كبار شعراء المحاورة فأصبح المطلب الأول لمكاتب الشعراء و أصحاب الحفلات ومحبي المحاورة ..ف بقوة لفظة و جمال شعره وحسن خلقه استطاع من خلال استفتاء على شعراء المحاورة بالتعاون مع مكاتب الشعراء بمناطق المملكة الغربية والشرقية والوسطى والشمالية والجنوبية في مجلة فواصل ونشرت ذلك في عددها رقم 14 الصادر بتاريخ 15اكتوبر الماضي 2004 م .. و ركز الأستبيان على الشعراء الأكثر طلبا وتفوق الشاعر ( تركي 2000) وفاق الجميع بثمان نقاط , كما شمل كذلك الحفلات الأكثر مبيعا . وهذا دليل واضح على مدى شعبية شاعرنا الشاعر تركي الميزاني اللذي لن ينتهي الكلام لو تحدثنا عن موهبته .. و لكن لندع موهبته تتحدث عن نفسها ... شاعرنا: هو الشاعر الفذ وصاحب الصوت الشجي والقوة البارعه في نظم القوافي والسيل الجارف من المعاني والصور يضاهي أبرع الشعراء في المحاوره ان لم يكن أبرعهم في الوقت الحاضر حتى أصبح له جمهور من المحيط الى المحيط من محبي شعر القلطه التي لا يستغني عنها أبناء الباديه في مناسباتهم السعيده...... وفي الأستبيان الذي اجرته مجلة فواصل على اكثر الشعراء طلبا وشمل الأستفتاء شعراء المحاورة مثل مستور العصيمي ورشيد الزلامي وصياف الحربي وفلاح القرقاح وسلطان الهاجري وفيصل الرياحي وحبيب العازمي وعبدالله بن شايق وسعيد المري وسعود المالكي وعطيه السوطاني وصالح اللخمي وضيف الله العمري وسعيد بن هضبان وعلى السالمي وعلي الشمراني وصالح بن عزيز وعبدالله البيضان وعيظه بن طوير وعبد الواحد الزهراني ومحمد بن حوقان ومحمد القويماني وملفي المورقي . وتفوق الشاعر ( تركي 2000) وفاق الجميع بثمان نقاط , كما شمل كذلك الحفلات الأكثر مبيعا (الكلام هذا في عام 2002) اما الأن فقد تعدى بمراحل كبيره إذا شاعرنا هو: تركي عطالله بن شامان بن سميليل القحم الميزاني العوني العبدلي المطيري(تركي2000).... نشأته: ترعرع ونشأ في الجياسر منطقة تتبع لثرب و ثرب والجياسر يقعان شرق مهد الذهب ب 150كلم تقريبا...وخواله من السماليل من القحومه.... وله من الأخوة 8 أفراد وأبيه متزوج من أثنتين , متى بدأ الشعر؟؟؟ بدأ الشعر وعمره 13 عاما.... من شجعه؟؟ وجد شاعرنا الفذ تشجيعا قويا من أبيه لقرض الشعر والمشاركه في المحاوره فأبيه وجده شعار فهو من بيت شعر ... يسكن شاعرنا في الرياض في حي أشبيليه وله بيت أيضا في جده... سبب التسميه بتركي2000 سئل تركي عن سبب تسميته بهذا الأسم فقال: ان سبب ذلك انه كانت بداياتي في المنطقة الغربية عام 2000 وغنيت موال اسمه ((العام عام الفين والله يحييه)) وقد اورد تركي في حديثه لمجلة فواصل هذي الابيات التي كانت بينه وبين الشاعر/فيصل الرياحي البقمي في بداياته حيث قال فيصل: الهدية من المطران شاعر جديد********والهدايا القديمة تجلس أحسن لها0 فرد عليه تركي: الهدية من المطران سيفن حديد*******وانت مالك سيوف تقوم وتسلها0 شاعرنا يحمل شاهدة ثانويه ومنتسب لجامعة الملك عبدالعزيز بجده لماذا شارك شاعرنا في شاعر المليون؟؟؟ لأنه يريد مزيدا من الأنتشار في العالم العربي واللقب وإلا شاعرنا عنده خير... من يحب ان يقابل تركي في المحاوره؟؟تركي يحب ان يقابل في المحاوره (الرياحي والمورقي ومستور العصيمي ,والقرقاح) ومع ان شاعرنا من محبي الشعر و جدوله ملأن بالمواعيد فلم يترك الأصاله وإرث الأجداد فقد إتخذ له ذودا من الإبل وقد انزلها الأرطاويه وكلها مغاتير... |
يعطيك العافيه على الطرح ..
دام التألق... ودام عطاء نبضك كل الشكر لهذا الإبداع,والتميز لك مني كل التقدير ...!! وبآنتظار روائع جديدك بكل شوق.. ودي وعبق وردي |
رد: ديوان الشاعر تركي 2000
قصيدة يابنت انا قلبي من البعد محروق - تركي 2000
يا بنت أنا قلبي من البعد محروق لا تحسبين أني قطعت العلاقه محبتك في القلب و ابراجها فوق تشيل صوت اسمك في حلم الصداقه محبتن ما شالها كل مخلوق بطاقتن يا حيها من بطاقه يسوقني طاريك لمشاهدتك شوق واشفق على لمست يدينك اشفاقه و الصبر زين و كل مطرود ملحوق شرهت قدم رجلي على عظم ساقه زرعت لك زرع له اثمار وعروق وقدمت لك من زهرت العمر باقه وان كان عندك شك لا ناشك العود في قلبي الي لك يزيد اشتياقه الشوق مشتاق اكثر من الشوق شوق ابدوي ضاعت نياقه |
رد: ديوان الشاعر تركي 2000
قصيدة لاح براق الفرح _ تركي 2000
لاح براق الفرح واستمطرت سحب التهاني وابتهج وجه الحجاز و غطرفت نجد العذيه جيت اسابق عقرب الساعه ودقات الثواني لجل أهني سيدي نايف وزير الداخليه وانتقيت من البيوت الشرد يوم العلم جاني وقمت ارددها على طرق اللحون السامريه والبيوت اللي مفاخر سيدي فيها معاني يشهد الله ماتتعبني ولا تصعب عليه تمتلكها موهبة شعري وينطقها لساني واكتب اسمي فوقها واسم بها خد المطيه والقصايد في سموك يالحصان ابن الحصاني تنحني لك من وفا واخلاص واتدق التحيه انت من تسهر عيونه لجل نرقد فالاماني وانت صرح مانعيش الا تحت ظله وفيه وانت رمز للوطن والدين واطوال اليماني وانت من يرفع شعار العز باليمنى الصخيه لك مكان بين نجم الجدي وسهيل اليماني واهني المنصب اللي يحمل اسمك واهنيه واسمك اللي حط له ياسيدي شان ومكاني واكتسب من هيبتك خبره وعلم ومقدريه وابشر انك ساكن بقلوبنا بين المحاني وأبشر انا لك دروع بسلم ولا جاهليه ياعضيد اللي على طاريه يزبن كل عاني سيدي سلطان وانته نايبه وانته حليه عودته لارض الوطن عيد كما عيد رمضاني وانتحرا شوفته فالصبح ولا فالعشيه |
رد: ديوان الشاعر تركي 2000
قصيدة الخلطه السريه - تركي 2000
قصيده رائعه وهي الخلطة السريه ياعذابي منك ياموتي وياحرماني زابنك بالله تخفف عني اللي فيه من عذابي وشهو اللى باقي ماجاني في عيوني من عذابك صاير ماريه وانت تدري كل ماتحتاجني تلقاني يشهد الله عنك ماتقدر تشح يديه بس تكفي لاتعذبني ولاتنساني ضمني يانور عيني في حشاك شويه كل ماشفتك تدخلني بعالم ثاني عين تنظر لك بشر و الثانيه حوريه فيك شيطان الهوى ياسيدي وصاني بالغلا والولف والتقدير والحنيه والقصيده اليا بغيته فيك مايعصاني يتباشر في وصوف عيونك السحريه ياوجودي لو أشوفك يابعد خلاني يشهد الله لحذف الغتره مع الطاقيه كيف أنا المجني عليه وكيف صرت الجاني لعنبوا حظك ضبطت الخلطه السريه لين من حبك ومن طيشك نسيت اخواني صرت أجي واروح لاهاذي ولاهذيه والهوى هو حاكم شعوري وهو سلطاني لاحصل لي منه لارحمه ولاماويه أشهد أنه راح فيها تركي الميزاني ومن يكذبني يعرف الخلطه السريه |
رد: ديوان الشاعر تركي 2000
قصيدة يامداين خاطري يا عاصمة دنياي - تركي 2000
على الله يامداين خاطري يا عاصمة دنياي على الله يالحروف التايهه في نظرة التايه على الله يالطريق اللي معاريفك تعب رجلاي على الله يا مسافر في طريق ماله نهايه الاياليل لاتسري ولاتشره على مسراي دخيلك لاتقدم شرهتك من دون مسرايه على شان الحبيب اللي يسابق نظرتي وخطاي على نفس الطريق اللي من اجله تعبت اخطايه ترجيتك تساعدني وانا ماندم على رجواي إذا شفتك توادع ضيقتي وتعانق ارضايه وانا اخترتك رفيق الدرب في صمت السنين الجاي ولا اخترتك يالين اصبحتلي ياعز خويايه وانا ماعشت وقتي يازماني بين راي وراي انا عشته على عز ورضيت بحكم مولايه ولا اطرد من سراب الوقت مايجلب علي مناي اعيش الواقع الحاضر لعين ايامي الجايه |
رد: ديوان الشاعر تركي 2000
قصيدة كلمتين _ تركي 2000
ياذهين العقل و تحفظ قواميس المعاني ... المعاني .. جمعتها كلمتين وفرقتها .. كلمتين .. تمر فالخاطر ويلفظها اللساني ... ومن سهولة .. لفظها الانسان يجهل منزلتها ... لوتعرف .. اللي تعبر عنه مع مر الزماني ... كان .. بعض الالسنه ترجف وتعجز منطقتها ... سرها بحروفها .. والعشر ماترجع ثماني ... لو .. تفصلها تهيل من أولتها لاخرتها ... والمعاني .. لو تسمى جزر ومواني ... والله الكلمتين .. اللي في بالي عاصمتها ... لاطرت لي صرت .. من جوي لها في جو ثاني ... كن قلبي .. لاطرت لي في تحكم سيطرتها ... لا تغيب ولا تروح .. ولا تفارقني ثواني ... شلت .. مشكلتي وصرت عيش معها مشكلتها ... كل ماعزمت .. أقول اللي عطيتيني كفاني ... هيضت .. قلبي واحاسيسي لما في ذاكرتها ... لاتناشدني .. عن اللي صار في الدنيا وجاني ... الله .. اللي ياذهين العقل يعلم تاليتها .. خالق .. الانسان علام الخفيه والبياني .. منه .. نرضى بالنصيب وقسمة(ن)جتني وجتها والختام .. إرتاح لاتحفظ قواميس المعاني .. المعاني .. جمعتها كلمتين وفرقتها .. |
رد: ديوان الشاعر تركي 2000
قصيدة أموت ما حطيتهم درع وحزام _ تركي 2000
يا علي أخذت من الليالي والأيام درس يجوز إني درسته لحالي ماهو بدرس بالدفاتر والأقلام لا بالله إلا أصعب دروس الليالي درس ملكت به الهقاوي والأحلام وكسبت من هالنادرات الغوالي وكشف لي وجيه الحقايق والأوهام وعلمني إني ما أتجاوز مجالي أنا . . إليا هبت ذعاذيع الأنسام صدري على صكات بقعا شمالي واللي على الجره يرزون الأعلام لا مكسب ليه ولا راس مالي أموت ما حطيتهم درع وحزام أستغفر الله عن كلام طرالي أنا خلقت مع الرياجيل قدام والفضل للمولى عزيز الجلالي ما اقصر نظر عيني على حد الأقدام ولا أستشير إلا زحول الرجالي أدعس برجليني على روس الأقزام ولي وطية تهتز منها الجبالي واللي تجارتهم على بيع الأذمام لابد يصلاهم من الوقت صالي أيتام . . لوما حالهم حال أيتام من روسهم . . عرف الرياجيل خالي حياتهم بين البشر مثل الأفلام تفشل يا لولا الدبلجه والخيالي وأنا . . يكفيني من دروس الأيام درس يجوز إني درسته لحالي |
رد: ديوان الشاعر تركي 2000
قصيدة لهفة المشتاق _ تركي 2000
يالهفة المشتاق .. وسهوم الموادع .. والفراق ياللحظة اللي .. تجمع العشاق .. ف أول تجربة شوفتك .. ي أغلا ماملكته بعد جو .. الليل ضاق وجمر المعاتب .. في ضميري شب .. ناره وحطبه ماكنه .. الا جلسة عقب التعب .. عند النياق ولاكنه .. الا أول حروف البنت ... لا قالت يبه |
رد: ديوان الشاعر تركي 2000
قصيدة والدمع اللي تشوفه ماهو دمع - تركي 2000
ياصاحبي واللي خلق نعمة السمع انك هنا بين المعاليق ثابت ماجيت لك صدفه ولاجيت لي رمع وأن غبت عني فرحتي معك غابت غيري عبث ف الحب بسياسة القمع لكن لاودت ولايوم جابت الا محبك من عشق يحسن الجمع ماشاب حبه لو قوافيه شابت والدمع هذا اللي تشوفه ماهو دمع أشعلت عيني لجل اشوفك وذابت واللي ينزل منها على خدي الشمع ارقد مادام الشوق في القلب نابت |
الساعة الآن » 04:26 AM.
|
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
new notificatio by 9adq_ala7sas
HêĽм √ 3.1 BY: ! ωαнαм ! © 2010
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd.
جميع ما يطرح في منتديات سهام الروح لا يعبر عن رأي الإدارة وإنما يعبر عن رأي كاتبها
ابرئ نفسي أنا مؤسس الموقع ، أمام الله ثم أمام جميع الزوار و الأعضاء على ما يحصل من تعارف بين الأعضاء على مايخالف ديننا الحنيف